གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རྨི་ལམ་གྲོང་གི་ལྷ་བཟོ་ཀུན་དགའ། གཞན་གཅིག

2015-01-14 21:53:49 རེ་རྐང་གླིང་། ཀློག་གྲངས། མཆན ཡོད།

 

རང་བྱུང་ཁམས་ཆེན་མོ་ནི
མི་ཚོགས་ཀྱི་མིག་ཟུང་ལ་བབས་པའི
སྙིང་སྡུག་གི་རི་མོ་དག་སྟེ
གངས་རི་དང་རྩྭ་ཐང ནམ་མཁའ་དང་རྒྱ་མཚོ
རྒྱ་སྟག་གི་ཐིག་ལེ་དང རྨ་བྱའི་སྒྲོ་མདོང
ཡོད་ཚད་ཀྱིས་རང་བྱུང་གི་བཞུར་རྒྱུན་དེ་ལ་རྐང་བཙུགས་ཤིང
རྟེན་འབྲེལ་གྱི་ཆོས་ཉིད་ཅིག་ལ་ཕྱི་ནང་སྦྲེལ་ནས་ཡོད

ཁྱོད་ཀྱིས་མཐོང་བྱུང་ངམ
ནགས་ཚལ་གྱི་སྐྲ་ལོ་ལ
རླུང་ཆེན་གྱི་ལག་པས་བྱིལ་བྱིལ་གཏོང་དུས་སུ
མཛེས་སྡུག་གི་རྒྱབ་ཏུ་བསྐུངས་པའི
མེ་ལོང་ཆག་པོ་དེའི་གཞུང་ལ
ལྗོན་པའི་ཚོགས་ཀྱིས་ཤུབ་བུར་སྨྲ་བའི་ངག་སྒྲོས་ཀྱི་གཡའ་རྩི་ཆགས་ཡོད

མེ་ཏོག་ཅིག་གི་ཚེ་སྲོག་གི་ཉམས་རྒུད་ལྟར
འདབ་མ་རེ་རེའི་ངོས་ལ
བཀླགས་མི་ཚར་བའི་ལོ་རྒྱུས་ཀྱི་གཏེར་ཡིག་བྲིས་ཡོད་དུས
ཁྱོད་ཀྱིས་བྲང་ཁར་བཏགས་པའི་ཆུ་ཚོད་འཁོར་ལོ་དེ
གཙང་བོ་དང་བསྲེས་པར་དོན་སྙིང་ཅི་ཡིས་སྟོངས

རྐང་རྗེས་ཀྱི་རི་མོ་མཐའ་དག་རྡོ་ཡི་སེང་གེར་བསྒྱུར་ནས
གསེར་ཁྲི་སྟོང་བར་ལུས་པའི་ཕོ་བྲང་གི་ནུབ་སྒོར་འཇོག་དུས་སུ
ཁྱོད་ཀྱིས་རང་གི་ལ་ཐོད་དུ་བཅིངས་པའི
མཚམས་སྤྲིན་གྱི་རལ་བ་དེ
ཁ་དོག་སྔོན་པོ་ཡིན་པ་སུ་ལ་གསང

ཉི་མའི་ལག་མཐིལ་ནས་འཛར་བའི་འོད་ཀྱི་ཉིང་ཁུ་དེས
མི་ཡུལ་ལ་བརྗེད་པར་དཀའ་བའི་གསེར་སེར་གྱི་ན་བཟའ་བཀླུབས་པ་བདེན་དུ་ཆུགས་མོད
བུམ་པའི་ཁོག་པར་ནམ་མཁའ་བླུགས་པའི་ངང་ཚུལ་གྱིས
ཁྱོད་ཀྱི་འཇིག་རྟེན་དེ
སྒོ་མོ་མེད་པའི་ས་འོག་གི་སྒོམ་ཁང་ཞིག་རེད

སྒྱུ་མའི་རྨི་ལམ་དང རྟོག་བཏགས་ཀྱི་ཉི་ཟླ
བསླུ་བྲིད་ཀྱི་སྣང་བའི་འཇིག་རྟེན
ཐ་སྙད་ཀྱི་ལྕགས་ཐག་གིས་སྦྲེལ་བའི་ཚིག་གི་ཨ་ལོང་དག་གིས
ཁྱོད་ཀྱི་བསམ་རྒྱུན་གྱི་མཐའ་དེ་ལ
མུན་པ་ལས་སྐྱེས་པའི་ཁེར་རྐྱང་གི་བཙོན་ཁང་ཞིག་བཞེངས་ནས་ཡོད་པས
རྣམ་ཤེས་ཀྱི་བླ་གཡུ་བརྐུ་བའི་བཙོན་པ་དེ་སུ་ཡིན

སོང་གིན་སོང་གིན་དུ
དགོད་སྒྲ་ལས་ཉོན་མོངས་ཀྱི་མཆེ་བ་སྐྱེས་ཤིང
སྙིང་རྗེ་ལས་ཚུལ་འཆོས་ཀྱི་ལག་པ་བརྐྱངས་ཡོང་དུས
ཕུགས་བསམ་གྱི་སོག་རུས་ངོས་ལ་བཙེམས་པའི
གཟུགས་མེད་ཀྱི་གཤོག་ཟུང་དེ་ཡང
ལྕགས་ཆས་ཀྱིས་གྲུབ་པའི་ལྷན་པ་ཞིག་རེད

པོ་ཏ་ལའི་མདུན་གྱི་རྡོ་རིང་གི་མིག་ཟུང་ལས
མཆི་མ་ནག་པོ་འབབ་དུས་སུ
ཁྱོད་ནི་ཁེར་བཞུད་ཀྱི་རླུང་དམར་པོ་ཞིག་སྟེ
སྣང་བའི་རྟེའུ་དཀར་བོ་དེར་བྱོན་ནས
ངོ་གདོང་སྨུག་པོ་དག་གི་རྨི་ལམ་གྱི་གཞུང་ལ
ཁ་དོག་སྣ་ལྔའི་འཇའ་ཚོན་གྱི་རི་མོ་འབྲི་མཁན་དེ་རེད།
                                ༢༠༡༣ལོའི་ཟླ་དྲུག་པའི་ཚེས་གཉིས་ཉིན།

 

      ཐ་སྙད་ཀྱི་ཆར་བ།

བབས་བྱུང   ཆར་བའི་ནང་གི་སྤྲིན་པ་དེ་ལས
ནམ་མཁའ་སྔོན་པོ་སྔོན་པོ་ཞིག་བབས་བྱུང
སྟོང་ཉིད་ཀྱི་ཐིག་ལེ་གསལ་བའི་འོད་ཀྱི་སྣང་བ་ཞིག་ལས
དམར་སྒོར་སྒོར་གྱི་ཉི་མ་ཞིག་ཀྱང་བབས་བྱུང

བབས་བྱུང   མིག་ཆུ་ལས་གྱེས་པའི་བརྩེ་དུང་གི་སྒྲོན་མེ་དེས
འཇིག་རྟེན་རློན་པར་བསྒྱུར་བས
མཁའ་དབྱིངས་ལ་གྲང་ངར་གྱིས་འདར་བའི་སྐར་མ་མང་པོ་ཞིག་བབས་བྱུང

བབས་བྱུང    དཀར་གཙང་གི་ཟླ་བའི་རྨི་ལམ
ནགས་ཚལ་གྱི་སྦྲ་རྒན་སྟེང་ལ་འཕྲོས་དུས
སྦྲ་གུར་གྱི་མཐོངས་གཡོགས་ལས་བཞུར་བའི
མིའི་རིགས་ཀྱི་བརྩེ་དུང་གི་གསང་བ
གས་གཏོར་བྱུང་ཞིང
ལྗོན་པའི་ལག་པ་རེ་རེའི་ངོས་ལ
ཁྲག་གི་ཐིགས་པ་རེ་རེ་བབས་བྱུང

བབས་བྱུང   སེམས་ཀྱི་རལ་གྲིས
སྐྱེ་མཆེད་ཀྱི་ལྟེ་ཐག་བཅད་དུས
རྟ་དང་གླང་བོ   མ་ཧེ་དང་ཆུ་སྲིན
གླེགས་བམ་གྱི་མངལ་ཁུགས་ནས་ཐོར་ཞིང
རླངས་འཁོར་གྱི་སྡུག་སྨྲེ་དང
ཁང་བརྩེགས་ཀྱི་ངུ་ཤུབ་དག
བག་ཆགས་ཀྱི་ས་ཁྲ་ངོས་ལས་བབས་བྱུང

བབས་བྱུང   འབབ་ངེས་པ་དག་བབས་བྱུང
སྒྱུ་མའི་འཇིག་རྟེན   སྐར་མ་རབ་རིབ
ཚེ་སྲོག་དང་འཆི་བའི་སྣང་བ
ཐ་སྙད་ཀྱི་མེ་ཏོག   ཚིག་གི་གསང་བའི་འདབ་ལོ
ཡོད་ཚད་ཀྱི་ཡོད་ཚད
ངའི་མགོ་སྟེང་ལ་བབས་བྱུང
བབས་བྱུང    བབས་བྱུང    ཡོད་ཚད་བབས་བྱུང་།

      ༢༠༡༣ལོའི་ཟླ༥བའི་ཚེས༡༥ཉིན་ཚོགས་འདུ་ཞིག་ལ་སུན་བཞིན་ཐོལ་བྱུང་དུ་བྲིས།

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།