ནེ་ལེར་བགྲོ་བའི་གཏམ་གྱི་ཁོག་ན་ཉམས་རྒུད་ཅིག་གི་རྒྱུ་རྙོག་ཡོད། །
དྲན་མགུར་ཁུ་བྱུག་མགྲིན་གླུའི་རུམ་ན་གྱེས་བྲལ་ཞིག་གི་གྲོད་པུ་ཡོད། །
བསམ་གཞིག་དང་ནི་རྩྭ་ཟིལ་སོགས་ཀྱང་གཏམ་ཡག་འབུམ་གྱིས་བསྔགས་རི་ཡང་། །
ང་ལ་མཁོ་བའི་གྲུ་སྣེ་ན་དེ་རྒན་ཁྱོད་བཀྲ་ཤིས་བརྩེགས་པ་རེད། །

 

ཤར་ཕྱོགས་དུང་རི་མི་ཡིས་འགྲེང་དུས་རྨ་རྒྱལ་སྦོམ་ར་མ་འཐད་ཚོད། །
ཙོང་ཁའི་སྐྱེས་རི་བདག་གིས་སད་དུས་གཉན་པོ་གཡུ་རྩེ་མ་སྤྲོ་ཚོད། །
གནོད་སྦྱིན་ཕོ་བྲང་དཀྲུགས་པའི་རྗེས་སུ་གནོད་སྦྱིན་རྣམས་དང་འདྲེས་པ་ཡི། །
ཤེས་ལྡན་ཁྱེད་ཀྱི་འཁྲུངས་རབས་འདི་ལ་ཁོ་བོ་སེར་སྣ་ཚད་མེད་འོང་། །

 

ངག་གི་རྣམ་བཤད་སྙིང་དུ་བཏབ་སྟེ་ལོ་ངོ་བཞི་དང་ཕྱེད་ཅིག་སོང་། །
དུངས་སེམས་མགུར་ཆུང་བློ་རུ་ཕབ་ཏེ་དུས་ཚོད་ཅི་སོང་ཅི་ལྟར་ཤེས། །
སུའུ་པུན་ཧེར་གྱི་འགྱུར་རྩོམ་དེ་ཡང་གང་འདྲའི་དགའ་ཞིང་འཐད་པ་ལ། །
ཡིན་ཡང་དུས་ཀྱི་དགག་སྒྲུབ་བཤད་དུས་རྒན་ཁྱོད་ད་དུང་མི་ལོ་འདུག །

 

 

      ཅེས་པ་འདིའང་བར་སྐབས་ཤིག་གི་ཐོལ་སྣང་ལ་རྐྱེན་བྱས་ཏེ་ཡི་གེར་བསྟར་པའོ། །