གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བག་ཉལ་གྱི་རྒྱབ་རོལ།

2015-01-06 11:19:06 སེང་རྡོར། ཀློག་གྲངས། མཆན ཡོད།

1109051422bbf9409e598a0c4a.jpg

བག་ཉལ་གྱི་རྒྱབ་རོལ།  (སྙན་ངག)

___________________________________________________
1
རི་རྩེ་ན་འབར་བཞིན་པའི་མེ་ལྕེ་དམར་ཧང་ཧང་བ་དེ།།སེམས་ཀྱི་ཅི་ཞིག་ཁོ་ནས་ཇེ་ཆེ་ཇེ་ཆུང་དུ་གཏོང་ཐུབ།།ངས་རང་གི་དབུགས་ལ་ཁ་ལོ་སྒྱུར་བ་བཞིན་སེམས་བཏུལ་བས།།རི་མགོའི་མེ་ལྕེ་ངའི་ཚོད་འཛིན་བཞིན་བོངས་ཚད་སྣ་ཚོགས་གྱུར།།དེ་བས་ཁ་བ་དཀར་པོའི་ཁྲོད་ཀྱི་ངེད་ཀྱི་སྡེ་བ་ཡི།།ཁྱིམ་ཚང་ཞིག་ཏུ་བདག་གིས་སེམས་ནི་སྟོབས་དང་ལྡན་འདུག་སྨྲས།།

2
ཕྱི་གླིང་བ་ཞིག་རང་གི་ཨམ་ཕྲག་ནས།།ལྷག་ལྷག་འོད་ཟེར་འཕྲོ་ཞིང་སྤྲིན་གྱིས་ནི།།ཅུང་བཀླུབས་ཉི་མ་ཆུང་ཞིག་རབ་བླངས་ཏེ།།ང་ཡི་ལག་མཐིལ་བཞག་སོང་ངས་ཀྱང་དེ།།རྒན་པོ་ཞིག་གི་ལག་མཐིལ་བཞག་ནས་ནི།།སྤྲིན་བསྣན་ཆུ་ཡིས་གསོས་ནི་བཏབ་གྱུར་ཚེ།།རྒན་པོའི་ལག་མཐིལ་པདྨ་ལྟར་གས་ཤིང་།།དེ་ལས་ཉི་མ་ཡི་ནི་དུམ་བུ་དག །མཚན་མོའི་ཀློང་དུ་ཟགས་ཤིང་མཚན་མོ་ཡི།།གཏམ་རྒྱུད་ཕྱལ་ལེ་བ་འགའ་འགྲུབ་པར་བྱས།།
3
ངས་ནི་རང་གི་སེམས་གཏིང་གི །སྤྱང་ཀིའི་མཐོང་སར་མཐོང་ཙམ་གྱིས།།དད་པ་འཆོར་སའི་མཆོད་རྟེན་ཞིག །བཞེང་འདོད་དེ་ཡི་བདག་པོ་ལ།།བདག་མེད་དྭ་ཕྲུག་ཅིག་བསྐོ་འདོད།།དེ་ནི་ཆུ་ལ་ལྷུང་བ་ཡི།།ཉི་འོད་ཀྱི་ནི་མདུད་པ་འདྲ།།མཆོད་རྟེན་འཁྲིས་ལ་མི་ཚོགས་དང་།།མི་ཚོགས་དཀྱིལ་ལ་ས་རྡུལ་དང་།།ས་རྡུལ་ལས་ནི་རླངས་འཁོར་དང་།།རླངས་འཁོར་ལས་ནི་ཁ་ཆེ་པ།།སྤྱང་རྙི་ཐོགས་འགའ་འབྱུང་འཇུག་འདོད།།ངས་ནི་རང་གི་འཆར་སྣང་གི །ཚོ་བར་སྐྱེ་བོ་ཆ་མེད་ཅིག །མངག་འདོད་དེ་ཡི་མི་རྒྱུད་དུ།།བུད་མེད་ལས་ངན་ཞིག་བཙའ་འདོད།།དྭ་ཕྲུག་དེ་དང་བུད་མེད་དེ།།བཤོས་ལས་ང་ནི་སླར་སྐྱེ་སྟེ།།སྙན་ངག་ངང་བའི་རྒྱལ་པོ་ནི།།མཆོད་རྟེན་དེའི་རྩེར་འཕུར་འཇུག་འདོད།།ཚུལ་དེ་གཏམ་དང་ཟེའུ་འབྲུ་དང་།།སྐྱེ་བ་གཏན་གྱི་བུ་ལོན་ཡིན།།དཔེར་ན་གུར་ཀུམ་ལི་ཁྲི་དང་།།མཚམས་སྤྲིན་གསུམ་གྱི་ཁྱད་པར་རམ།།དེ་དག་ཁྱད་པར་མེད་འདྲ་འོ།།
4
དེ་རིང་ཐང་ཚང་མ་མིག་གིས་གང་འདུག །བདག་གི་མིག་ཀྱང་དེ་ཡི་ཁྲོད་སླེབས་འདུག །མི་ཚང་མས་ཤར་གྱི་ཕྱོགས་སུ་བལྟས་འདུག །ཤར་ཕྱོགས་ནི་གྲུ་བཞི་བརྒྱས་བྱས་པ་དེའོ།།དེ་རིང་ལྷ་འགའ་ཞིག་ཤི་བར་གྱུར་ཏེ།།རུས་པ་ཚང་མ་མུན་ནག་གིས་བཏུམས་འདུག །ང་ཡི་ཁ་པར་ནང་གི་འདྲ་པར་ཞིག །ཆུ་འམ་ཅི་ཡིས་རློན་པར་བཏང་བྱུང་།།
5
གླང་ཆེན་ཕྲུ་གུ་འབུམ་ཕྲག་ཅིག །དཀར་སེང་འགྲོ་ལྟ་མཆིས་པ་དེ།།སྤྲིན་ནོ་དེའི་ལོགས་ཉི་མ་དང་།།མཚུངས་པར་རྒྱུ་གང་ཉི་མ་འོ།།དེ་གཉིས་བར་དུ་ཆུ་བོ་ནི།།བཞི་འབབ་བཞི་ཡི་གཅིག་གི་ནི།།མགོ་ཁུངས་ལ་ངའི་སྒྲུབ་ཕུག་དང་།།གཞན་གསུམ་མགོ་ཁུངས་མེ་ལྕེ་དང་།།མེ་དཔུང་དང་ནི་མེ་མདག་ཡོད།།དེ་དག་རེ་རེ་སྡེ་བ་རེ།།ཡིན་ཞིང་ཁྱི་སྐད་ལྷང་ལྷང་གིས།།བྲག་ལ་མཆེད་ཅིང་བྲག་ཅ་ཡིས།།ཁ་བའི་གཞི་ལ་འཕག་འཚག་བྱེད།།

                                                                                                                                    
༢༠༡༥ ༡ ༦

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།