མགོན་པོ་འོད་དཔག་མེད་ཀྱི་བསྟོད་པ་ཞིང་མཆོག་སྒོ་འབྱེད་ཅེས་བྱ་བ་བཞུགས་སོ།།
ན་མཿཤྲཱི་གུ་རུ་མཉྫུ་གྷོ་ཥཱ་ཡ།
༄༅།། བདེ་གཤེགས་ཀུན་གྱིས་བསྔགས་པའི་བདེ་བ་ཅན།།
རྣམ་དག་ཞིང་གི་དབང་ཕྱུག་བཅོམ་ལྡན་འདས།།
ལྷ་མིའི་སྟོན་པ་མགོན་པོ་ཚེ་དཔག་མེད།།
རྒྱལ་བའི་དབང་པོས་འགྲོ་ལ་འཆི་མེད་སྩོལ།།
སྣ་ཚོགས་སྣོད་ཀྱི་དབྱེ་བ་མཐའ་ཡས་པའི།།
དང་བའི་ཆུ་ལ་སྤྲིན་བྲལ་ཟླ་གཟུགས་བཞིན།།
སྐལ་ལྡན་གྲངས་མེད་འགྲོ་ལ་ཅིག་ཅར་དུ།།
རྣམ་པར་དུ་མར་སྟོན་པ་ཁྱོད་ཀྱི་སྐུ།།
མཐའ་ཡས་གདུལ་བྱའི་སོམ་ཉིའི་དྲ་བ་རྣམས།།
སྐད་ཅིག་ཉིད་ལ་སོ་སོར་གཅོད་མཛད་ཅིང་།།
ཡང་དག་དོན་ལ་བློ་གྲོས་མིག་འབྱེད་པའི།།
རྒྱུན་མི་འཆད་པར་སྒྲོག་པ་ཁྱོད་ཀྱི་གསུང་།།
ཤེས་བྱ་ཀུན་ལ་རབ་འབྱམས་མཁྱེན་པ་འཕྲོ།།
རྒྱུད་ལྔའི་འགྲོ་བ་ཐུགས་རྗེའི་གཞན་དབང་གྱུར།།
མཁྱེན་བརྩེའི་ནུས་པས་སྲིད་ཞིའི་འཇིགས་ལས་སྐྱོབ།།
འབད་རྩོལ་མཚན་མས་མི་གཡོ་ཁྱོད་ཀྱི་ཐུགས།།
ཉིན་བྱེད་ཟེར་གྱིས་ལྷ་ཡི་ལམ་ལ་བཞིན།།
དཔག་ཡས་ཞིང་ཀུན་མཐའ་མེད་འོད་དཔུང་གིས།།
ཡོངས་སུ་འགེངས་པའི་གཟི་བརྗིད་ཕུང་པོའི་སྐུས།།
སྐལ་ལྡན་བདག་གི་མིག་གི་དགའ་སྟོན་བསྒྲུབས།།
སྙན་པའི་འབྲུག་སྒྲས་རྨ་བྱའི་སྙིང་ལ་བཞིན།།
ཐོས་པ་ཙམ་གྱིས་བདེ་བའི་མཆོག་སྟེར་བའི།།
ཡན་ལག་ལྔ་དང་ལྡན་པའི་ཚངས་དབྱངས་ཀྱིས།།
རྣ་བའི་ལམ་དུ་བདུད་རྩའི་ཟེགས་མ་འཐོར།།
ནམ་མཁའི་དབྱིངས་སུ་སྤྲིན་ཕུང་ཞི་བ་བཞིན།།
སྟོང་བའི་ངང་དུ་རིག་པ་ཞུགས་གྱུར་པས།།
སྤྲོས་ཀུན་ཉེར་ཞི་ཞི་བའི་ཐུགས་མཆོག་གིས།།
ཀུན་རྟོག་ཡིད་ཀྱི་དམིགས་གཏད་ཐམས་ཅད་ཞི།།
རྒྱལ་བ་ཀུན་གྱིས་དཔག་མེད་བསྐལ་པ་རུ།།
བརྗོད་ཀྱང་ཕ་མཐའ་རྙེད་པར་མི་སླ་བའི།།
ཁྱོད་ཀྱི་ཡོན་ཏན་ཕུང་པོ་ཅི་འདྲ་བ།།
དེ་འདྲ་བདག་གིས་བརྗོད་པའི་ཡུལ་ལས་འདས།།
དེ་ཕྱིར་མི་ཟད་ཡོན་ཏན་གཏེར་གྱུར་ཅིང་།།
ཉེས་པའི་ས་བོན་མཐའ་དག་གཏན་སྤངས་པ།།
ཁྱོད་དང་མཚུངས་པའི་སྟོན་པ་གཞན་ཡོད་མིན།།
དེ་སླད་ཁྱོད་ཉིད་གཅིག་པུ་འགྲོ་བའི་སྐྱབས།།
སྐྱོབ་པ་ཁྱོད་ཀྱི་སྨོན་ལམ་བྱེ་བ་བརྒྱས།།
ལེགས་པར་བསྒྲུབས་པའི་ཞིང་མཆོག་དམ་པ་གང་།།
སྡུག་བསྔལ་རྣམས་ཀྱི་མིང་ཡང་མི་འབྱུང་བས།།
བདེ་བ་ཅན་ཞེས་ཡོངས་སུ་གྲགས་པ་དེར།།
ཚེ་འདིའི་སྣང་བ་ནུབ་པར་གྱུར་ཙམ་ན།།
འདབ་སྟོང་པད་མའི་སྦུབས་སུ་སྐྱེས་མ་ཐག།
ཆུ་སྐྱེས་དབུས་ནས་ཐོགས་པ་མེད་བྱུང་སྟེ།།
ཁྱོད་སྐུ་མཐོང་ནས་གསུང་གིས་ཚིམས་པར་ཤོག།
མགོན་པོ་ཁྱོད་ལ་ཐེག་མཆོག་གཏམ་ཐོས་ནས།།
སྲིད་པའི་གཏམ་དུ་བྱིང་རྣམས་བསྒྲལ་ཕྱིར་དུ།།
སྤྱན་རས་གཟིགས་དང་མཐུ་ཆེན་ཐོབ་གཉིས་ཀྱིས།།
ཇི་ལྟར་སྤྱོད་པ་དེ་ལྟར་བདག་གྱུར་ཅིག།
རྩོམ་ཁུངས། ངེད་དྲ་བ།