བཤེར་འཚོལ།
སྟོན་ཁ་དང་སྙན་ངག
སྤྲིན་པའི་ལུག་ཁྱུ་གངས་རིའི་ལ་ཐོད་གྱུར།།
སྨུག་པའི་ཡོ་ལང་རྒྱ་མཚོའི་འཇིངས་སུ་བབས།།
འཛིན་མའི་ཁ་དོག་གསེར་གྱི་མདངས་ལ་འགྲན།།
ད་ཡང་སྟོན་ཁའི་སྒྱུ་རྩལ་དལ་གྱིས་མཐོང་།།
ནགས་ཀྱི་མཛེས་ལྗོངས་སྟག་མོའི་གཞིས་སུ་བཏབ།།
མགྲིན་བཟང་ཁུ་བྱུག་ལྷོ་མོན་རོང་ལ་ཆས།།
དཀར་དམར་མེ་ཏོག་གྲུག་པའི་ས་གཞིའི་ལྟོར།།
དངུལ་དཀར་ཟིལ་བའི་མུ་ཏིག་ཁྲོམ་ཁྲོམ་གཡོ།།
ངོ་མཚར་འཇའ་ཚོན་རི་མོ་དབྱིངས་སུ་བཀྲ།།
ཉི་མའི་འཛུམ་ཟེར་རི་བོའི་སྙིང་ལ་འཁྱུད།།
སྟོན་རླུང་ཡན་མོས་འཕྱག་པའི་ཤིང་ལོ་ཡང་།།
ངེས་མེད་གནས་སུ་ཡིབ་པའི་སྟ་གོན་བྱེད།།
ནམ་ཟླ་བསིལ་ཞིང་གྲང་བའི་སྐབས་དང་བསྟུན།།
རབ་དཀར་རྫ་རིའི་ཞལ་ངོ་ཁ་བས་བརླན།།
རི་སྐྱེས་སྲོག་ཆགས་རི་ལུང་ཐང་གསུམ་ཉུལ།།
ཁྲུང་ཁྲུང་གཤོག་རྡང་བསྒྲིགས་ཏེ་ལྷོ་རུ་འཕུར།།
འབྲས་ལྡན་ལྗོན་པའི་ཚལ་དག་ཤིན་ཏུ་དུད།།
རྐང་དྲུག་ཟིར་ངག་བསྡོམས་ཏེ་ཚང་མལ་ཉལ།།
ཕུ་ཆུ་མྱུར་བཞུད་རོལ་དབྱངས་སྙན་མོའི་སྒྲ།།
གང་གི་རྣ་བའི་འཁྲིས་སུ་ལྷང་ལྷང་གྲགས།།
ལོ་ཡག་སྙེ་མའི་མགོ་ལྕོག་སྨིན་དང་ལྷན།།
འཁོར་བའི་མི་ཚོགས་སྟོན་ཀའི་ལས་ལ་གཞོལ།།
ངས་ཀྱང་སོར་མོའི་བར་གྱི་སྙན་ངག་དང་།།
རང་སེམས་སྨྱོན་པ་འདི་གཉིས་གཅིག་ཏུ་བྲིས།།
རྩྭ་ལྗང་གསེར་མདོག་ལྷུང་བའི་ཟློ་གར་ལས།།
གྱེས་བྲལ་གདུང་བའི་ན་ཟུག་མ་ཚོར་མོད།།
ཡོད་ཚད་འགྱུར་བའི་རང་གཤིས་ངོམ་པའི་ཚེ།།
སུ་ལའང་ཡིད་རྟོན་བྲལ་བའི་ངེས་ཤེས་རྙེད།།
ཟླ་འདི་ཚངས་སྲས་བུ་མོའི་མངོན་བརྗོད་ཏེ།།
བརྒྱ་ཕྲག་རི་ཆུས་བསྐལ་བའི་སྙན་ངག་མཁན།།
སྟོན་མཚན་ཟླ་བའི་མདངས་ལ་སྔར་ལས་ཅེར།།
ཁྱོད་ནི་སྟོན་ཟླ་བསུ་བའི་ཕོ་ཉར་བྱས།།
སྤང་རྒྱན་ཁེར་སྐྱེས་དགོད་པའི་སྟོན་མཇུག་ཏུ།།
བདག་སེམས་སྲབ་མེད་རྟ་ཕོ་གཤོག་ཐོཊ་བཞིན།།
ཚོར་བའི་རི་ལུང་ཉུལ་བའི་ངང་ཚུལ་གྱིས།།
ད་དུང་རེ་བའི་མདུན་ལྗོངས་དུ་མ་བསྐྲུན།།
དུས་བཞིའི་འགྲོས་ལ་འཁྱུད་པ་ང་ཡི་ལས།།
དུས་གསུམ་ཚིག་ལ་དཀྲི་བ་ང་ཡི་གཤིས།།
དུས་ཚོད་སྐར་ཆའི་བར་སྟོང་རེ་རེ་ལའང་།།
དུས་ཀྱི་ཆོས་ཉིད་འབྲི་ལ་རབ་ཏུ་མོས།།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།