བཤེར་འཚོལ།
ཟླ་བ་བཞི་ཡི་སྙན་ངག(སྙན་ཚོམ)
༡ སྟོང་བ་འདི་ཟླ་དྲུག་པའི་ཁ་བ་རེད།
ཟླ་དྲུག་པ་ཚེས་མགོ་ལ
ཆར་བ སེར་བ ཁ་བ ད་དུང་ཁ་ཆར་འདྲེས་མ
གཏིང་ནས་འཕྱུར་བའི་སྟོང་སང་ངེ་དེ
ཉིན་མཚན་གྱི་ཁྱད་མེད བྲི་གང་གི་ཚིམས་པ་མེད
མདེའུ་བསྟུད་མར་རྒྱག་པ་སྙིང་ལ་ཕོག
ན་ཁུག་ཏུ་རུམ་པའི་ལྕོང་མོ
ད་དུང བཙས་མ་ཐག་པའི་བེའུ
ཆུ་འཁྱིལ་ལ་སྦངས་པའི་ཁ་བ་ནང་བཞིན
ཀུ་ཐུག་པས་ཡོད་ཚད་གཏུམ
ནད་ཀྱིས་གློ་རྡེག་ལ་མནར་བ་དེ
གདོང་གི་ཁ་སྟབས་སྔར་ལས་སྐྱ་ཞིང་སྔོ
འཁྱག་སིབ་སིབ་བྲང་ཁོག་ལ་གླན་པས་ཡིན
ཁུར་མོང་གི་སྡོང་སྦུབས་ལ
ཁ་ཆར་གྱི་ཤྭ་འོད་ལོང་ལོང
བུ་མོ་ཆུང་ཆུང་གི་ཕུ་འདེབས་སྙི་མོས
ཕྱོགས་སུ་སྤུར་བའི་ཤིང་བལ་གྱི་ས་བོན
ད་ནི་བཞའ་རློན་ཏོག་ཙམ་གྱིས་ལྗིད་དུ་གཏོང
གནམ་ས་དང དེ་ཡི་ཁམས ད་དུང་མི་སེམས
དགུན་ཁ་རྔ་རིང་མའི་ཨུ་ཚུགས་ལ་འུ་ཐུག
༢ ཟླ་བདུན་པ་ནི་རྒྱ་མཚོ་ཆེན་པོ་ཞིག་ཡིན།
ས་ཆེན་གྱི་སྦུབས་སུ་ལྷུང་བ
རྒྱ་མཚོ་ཆེན་པོ་ཞིག་གི་སྐྱོ་བ་དེ
མཐའ་དག ཁྲོ་གཏུམ་ཆེ་བོས
ཉིན་ནས་ཉིན་དུ་ཁར་ལུད་པས
སྐྱི་གཉེར་གྱི་སྙུག་པ་རུ་འཚོ་བ་དག
འཆི་ཞགས་ཀྱིས་སྐེ་ནས་སྡོམ་པ་བཞིན
རྔུལ་ནག་ཁྲོམ་ཁྲོམ་དུ
འཇིག་རྟེན་གྱི་གསལ་ས་རུ་འབུད
གོ་ཐོས་སུ་འཐོར་ཞིག་ཤོར་བ་ནི
གདངས་མཁན་ཁུ་བྱུག་ཁོ་ན་ཡིན
པས་མོ'་ཆུང་དྲགས་པས
ད་དུང་ཟླ་ལྷག་ཡོད་པ་ཐག་གིས་ཆོད་ཟེར་མོད
ཟླ་བདུན་པ་ཚེས་ཟིན་ལ
འབྲོག་པ་དབྱར་སར་ཡང་སྤོས་ཟིན
གྲོང་བ་པས་ས'ར་ཡང་བསྡད་ཟིན་པས
དྭངས་མཐའ་མེད་པའི་སྤྲིན་གྱི་བང་རིམ་ནས
ཤོང་མཐའ་མེད་པའི་ཆར་གྱི་བརླན་པ་ནས
ཁྱོད་ལ་འབུལ་ཐུབ་རྒྱུ་ཁྱོར་བ་གང་སྟེ
རྒྱང་མིག་ཆད་དུས
ཕྱོགས་ཕྱོགས་ནས་བསྐོར་ཡོང་བའི་སྨུག་པ་དང
ལྷགས་པས་ཁུར་ཡོང་བའི་ཆར་བ་ལས
གཞན་ཞིག་འཚོལ་དཀའ་ཨང
'པས་མོ — (ཡུལ་སྐད)贝母 པས་ས'——པས་མོ་རྐོ་ས
༣ ཟླ་བརྒྱད་པ་སྨྱོན་པ་ལང་ཤོར་ཅིག
ཟླ་བརྒྱད་པར
ཆར་བའི་རྒྱུན་ཆེན་མོ
ཉིན་ཞག་བསྟུད་མར་འབབ
སླར་ཡང
གནམ་སའི་མཚམས་ནས
གནམ་ངོ་ཡར་བཀྱགས་པས
ཉིན་དུ་མར་ཉི་མ་མེ་ལས་ཚ
ཟླ་བརྒྱད་པར
གནམ་གློ་བུར་འཁྲིགས་ཤིང
དྲག་ཆར་འཚུབ་ལོང་ངེ་ཐོན
སྤྲིན་གློ་བུར་འཐོར་ཞིང
ནམ་མཁའ་སྔོ་ཐིང་ངེ་འགྲོ
མི་ནི
ཟླ་བརྒྱད་པའི་མེ་ཏོག་ཅིག
སེམས་ཆུང་གིས་གསོ་དགོས་པ་བཞིན
གློ་བུར་དང་ཐལ་དྲགས་པ
སྙིང་ཁམས་ཀྱིས་མི་ལྕོགས་པར
ཡུན་ནས་སྙེང་ཡོང་བ་ཞིག
༤ ཟླ་དགུ་བ་གློ་མེད་དེས་གཟབ་ནན་འབྲི།
གནམ་སའི་འབྲེལ་མཚམས་ཀྱི་ཐག་རིང་དེ་ནས
སྟོན་གྱི་རླུང་བུས་ཁྲུང་ཁྲུང་ཡུལ་ལ་བདས
བྱ་ཁྱུ་རྒྱང་དུ་བསྐྱོད་པའི་ལམ་ཐིག་ལ
སྟོན་གྱི་གཟབ་ནན་དེས་ཕྱིར་བརྟག་ཐེངས་གཅིག་བྱའམ
གསོམ་པའི་ལྗང་ནག
ད་དུང་ནམ་མཁའ་སྟོང་སངས་ཀྱི་ཆ
དེ་ཡི་བར་སྟོང་གི་སྤྲིན་གྱི་བགྱིད་བ་ཐ་དག
སྔར་མས་བཞིན་བརྟན་བརླིང་ཡང་ན་གཡོ་བའི་གནས་མལ་དུ
དུས་ཚོད་ཀྱི་མདའ་མོའི་ཐག་སྒྲ་ཉག་ཅིག ཐག ཐག ཐག
ཟླ་དགུ་བས་ཚམ་ཚོམ་མེད་པར་དུས་ཚིགས་ཀྱི་སྒོ་མོ་ཕྱེས
སྐབས་འདིར ཁྱོད་ཀྱི་ལག་ནང་དུ་བླངས་པ་དུས་བྱའི་སྒྲིག་ཡིག་གམ
ཡང་ན་ལྷོ་བཞུད་ཀྱི་ཁྲུང་ཁྲུང་ཁོ་ན
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།