འབྲོག་ཁྱི་ནི་འབྲོག་རུའི་གླུ་བ་ཡིན།མཚན་མོའི་མཚན་ཁྱི་བཟང་བོ་ཞེས་འབོད་པ་ཡང་དོན་གྱིས་འབྲོག་རུའི་མཚན་མོའི་གླུ་བ་ཡིན།འབྲོག་ཁྱི་ནི་འབྲོག་རུའི་མེལ་ཚེ་ཡིན།མཚན་མོའི་མཚན་ཁྱི་བཟང་བོ་ཞེས་འབོད་པ་ཡང་དོན་གྱིས་འབྲོག་རུའི་མཚན་མོའི་མེལ་ཚེ་ཡིན།འབྲོག་ཁྱི་ནི་འབྲོག་རུའི་སྲུང་མ་ཡིན།འབྲོག་གི་འབྲོག་ཁྱི་བཟང་བོ་ཞེས་འབོད་པ་ཡང་དོན་གྱིས་འབྲོག་རུའི་ཐང་གི་སྲུང་མ་ཡིན།འབྲོོོག་ཁྱི་ནི་འབྲོག་རུའི་རུ་མ་ཡིན།འབྲོག་གི་འབྲོག་ཁྱི་བཟང་བོ་ཞེས་འབོད་པ་ཡང་དོན་གྱིས་འབྲོག་རུའི་ཐང་གི་རུ་མ་ཡིན།འབྲོག་ཁྱི་ནི་འབྲོག་རུའི་ལྡོག་གཟུགས་ཡིན།འབྲོག་གི་འབྲོག་ཁྱི་ལ་བོ་ཞེས་འབོད་པ་ཡང་དོན་གྱིས་འབྲོག་རུའི་ཁམས་ཀྱི་ལྡོག་གཟུགས་ཡིན།འབྲོག་ཁྱི་ནི་འབྲོག་རུའི་མཐར་ཐུག་ཡིན།འབྲོག་གི་འབྲོག་ཁྱི་ལ་བོ་ཞེས་འབོད་པ་ཡང་དོན་གྱིས་འབྲོག་རུའི་ཁམས་ཀྱི་མཐར་ཐུག་ཡིན།

　　ཐེངས་ཤིག་ན་རོ་ཡིས་གོང་ལྟར་འབྲོག་ཁྱི་ལ་བོ་ལ་གདེང་འཇོག་མཐོན་པོ་བྱས་རྐྱེན།ཕྲག་དོག་ཅན་གྱི་གུག་གུ་ཡིས་དེ་ལ་སེམས་ཀྱིས་མ་བཟོད་པར་མི་འདོད་པའི་རྣམ་འགྱུར་ཡང་ཡང་བསྟན་ཡང་།ཞབས་ཀྱུ་དང་འགྲེང་བུ་ཚོས་ན་རོའི་བསམ་ཚུལ་ལ་གདུང་བ་མཉམ་སྐྱེད་བྱེད་དང་བྱེད་མུས་སུ་གྱུར་བས།ད་ལྟའི་ཆར་གུག་གུ་ཡང་མང་སྣ་ཉུང་གིས་མ་བརྟེན་པར་འབྲོག་ཁྱི་ལ་བོ་ཞེས་པའི་སྙན་དེབ་ཅིག་ལ་གཡེང་ཁུལ་བྱས་འདུག་ཟེར།སྤྱི་ཚོགས་འདིའི་ཁམས་སུ་གུག་གུ་ལྟ་བུའི་མི་བུ་ད་དུང་ཡང་བགྲང་གིས་མི་ལང་བས་ན་དེ་ལ་དོ་སྣང་ཆེན་པོ་བྱེད་རི་བ་ཅི་ཡང་མི་འདུག་ཀྱང་།འབྲོག་ཁྱི་ལ་བོའི་གོ་ས་ལ་རྡོག་བརྫིས་གཏོང་བའི་མི་དེ་དག་ལ་ཚིག་མཚོན་རེ་བསྐོར་ན་འདོད་དེ་ཆེས་མ་མཐའ་ཡང་ད་རེས་དེ་ལྟར་བྱེད་རྩིས་ཡོད།

　　གུག་གུ་གཟུགས་འཁྱོག་མགོ་རིལ་མ།མགོ་རིལ་རིལ་དེ་ཡང་སྟོང་བ་སྟོང་རྐྱང་རེད།ཀླད་པ་རུ་ཁྲག་རྣག་མ་གཏོགས་ཅི་ཡང་མེད་ཚོད་མེད།ད་ཡང་འབྲོག་ཁྱི་ལ་བོ་ཞེས་པའི་སྙན་ངག་ཅིག་བཀླགས་ཁུལ་བྱས་ཏེ་གཞན་ལ་བསྟུན་ཤེས་བྱེད་ཀྱིན་འདུག་པ་ལ་བལྟས་ན།གུག་གུ་གཟུགས་འཁྱོག་འདི་སྔ་ས་ཞིག་ནས་དབྱངས་བཞིའི་མི་གྲལ་ནས་བླངས་ཏེ་ས་ཁོག་སྐམ་པོ་ཞིག་ཏུ་ཁེར་སྡོད་བྱེད་དུ་བཅུག་ན་དགའ་ས་རེད།ས་ཁོག་སྐམ་པོ་དེ་ནས་འབྲོོོག་ཁྱི་ལ་བོའི་གྲིབ་བརྙན་ཙམ་ཡང་མཐོང་མ་ཐུབ་ན།གུག་གུ་གཟུགས་འཁྱོག་གིས་རང་ཉིད་ནར་སོན་སའི་རྩྭ་ཐང་ཞིག་གི་ཤོང་ཚད་དང་དྲོད་ཁོལ་དྲན་ནམ།

　　ཞབས་ཀྱུ་ཡང་གུག་གུ་བཞིན་དུ་གཟུགས་གཞི་ཅུང་ཙམ་འཁྱོག་ཡོད་ན་ཡང་།ཞབས་ཀྱུ་ནི་རང་བཞིན་དྲང་བའི་མི་ཞིག་ཡིན་པ་མ་ཟད་ཁེངས་པ་སྐྱུང་བའི་མི་ཞིག་ཀྱང་ཡིན་ཏེ།ཁོ་རང་ནམ་ཡང་གསལ་བྱེད་སུམ་ཅུ་དང་འདྲ་བའི་སྤྱི་ཚོགས་འདིའི་དམའ་སར་གནས་ནས་འདུག་རྒྱུར་དགའ།དཔེར་ན་ཐང་ཁྲོམ་དུ་ཀུ་ཤུ་བཙོངས་བའི་ཚོང་བ་དེ་ཚོའི་མདུན་ནས་ཀྱང་ཞབས་ཀྱུ་ནི་ཁེངས་སྐྱུང་དང་བཅས་ཏེ་འགྲོ་ལ།འབྲོག་ཁྱི་ལ་བོའི་རིགས་ལ་ཤིན་ཏུ་ནས་ཀྱང་བརྩེ་བ་ཟབ་མོ་བཅངས་ཡོད་སྟབས།ཞབས་ཀྱུ་ནི་རྩྭ་ཐང་གི་བདག་པོ་རྣལ་མ་ཞིག་ཡིན་པ་ཐེ་མི་ཚོམ།

　　འགྲེང་བུ་ནི་གུག་གུ་གཟུགས་འཁྱོག་བཞིན་དུ་གཟུགས་གཞི་འཁྱོག་ཡོད་པ་ཞིག་ག་ལ་ཡིན་ཏེ་མིན།འགྲེང་བུ་ནི་བ་སྤུ་གྱེན་དུ་གཟེངས་གཟེངས་བྱེད་པའི་སྒང་གཟུགས་ཤིག་དང་འདྲ་བར་ང་རྒྱལ་ཅུང་ཙམ་ཡོད་མཁན་ཞིག་ཡིན་ན་ཡང་།གུག་གུ་གཟུགས་འཁྱོག་བཞིན་དུ་འབྲོག་ཁྱི་ལ་བོའི་གཟི་བྱིན་མི་བཟོད་པའི་ཕྲག་དོག་ཅན་ཞིག་མ་ཡིན་པར།འབྲོག་ཁྱི་ལ་བོའི་བདེ་ཐང་ལ་ནམ་ཡང་དོ་སྣང་ཡོད་མཁན་ཞིག་ཡིན་རྐྱེན།ཁོ་ལ་ང་རྒྱལ་གྱི་ཆ་ཅུང་ཙམ་འདྲེས་པ་དེ་ང་ཚོའི་མིག་ནང་དུ་མི་ཐོགས་པར་ཁོ་ཡང་འབྲོག་ཁྱི་ལ་བོའི་འཚོ་ས་འཚོ་ཡུལ་སྟེ་ཕ་ཡུལ་རྩྭ་ཐང་ལ་བྱས་རྗེས་འཇོག་མཁན་གྱི་མི་བུ་བྱས་པ་ཅན་ཞིག་གི་སྣང་བརྙན་ང་ཚོའི་སེམས་ནང་ལ་ཟུག་ཡོང་།

　　ན་རོ་ནི་ངས་བསྐྱར་དུ་གསལ་བཤད་བྱ་དགོས་པ་ཞིག་མ་རེད་དེ་བརྒྱ་ལ་ཞིབ་བཤད་ཅིག་བྱས་ན་མི་ཆོག་རྒྱུ་མེད་ན་ནི།ཁོ་ནི་བྱ་རྒྱལ་རྒོད་པོ་ཞིག་ལྟར་འཇིག་རྟེན་གྱི་ནམ་མཁའ་རུ་རང་དབང་གིས་ལྡིང་སྐོོར་རྒྱག་མཁན་ཞིག་ཡིན་པས་མི་ཚད།འབྲོག་རུའི་འཚོ་བ་ལ་དགོས་གལ་ཤིན་ཏུ་ཆེ་བའི་འབྲོག་ཁྱི་ལ་བོའི་དར་རྒུད་ལ་ཐུགས་བསམ་བཞེས་མཁན་ཞིག་ཡིན་ཙང་།ང་རང་གུག་གུ་གཟུགས་འཁྱོག་མ་གཏོགས་ཞབས་ཀྱུ་དང་འགྲེང་བུ་ན་རོ་ཚང་མ་ལ་དགའ།གུག་གུ་གཟུགས་འཁྱོག་ལ་ཞ་དང་ཞོར་དུ་ཚིག་མཚོན་རེ་བསྣུན་ཏེ་ཁོའི་རང་བཞིན་ངན་པ་ལྷང་ལ་འབུད་དུ་འཇུག་ན་འདོད།

　　ནམ་མཁའི་བྱ་ཡི་ཕོ་མོ་མི་ཤེས་རུང་མགོ་ནག་མི་ཡི་རྣམ་འགྱུར་ལོས་ཤེས་ཞེས་པ་ལྟར།གུག་གུ་གཟུགས་འཁྱོག་གིས་ངའི་སེམས་འགྱུ་རྟོགས་སོང་བ་ལྟར་ང་ལ་མིག་ལོག་གིས་བལྟ་ཞིང་སྐེ་མཇིང་གཅུས་ནས་བུད་འགྲོ་ལ།མཚམས་དང་མཚམས་སུ་གཟུངས་བྷ་ངས་ཁྱོད་ལ་ཅི་ཞིག་བྱས་སོང་ཞེས་ལེ་བདའི་སྐད་ཆ་རེ་ཡང་གཡུགས་ནས་འགྲོ་ཞིང་།ངས་ཕྱིར་ཁོ་ལ་གསལ་བཤད་ཅིག་བྱེད་བསམ་དུས་ཁོ་རང་སྔ་མོོ་ནས་ང་དང་རྒྱབ་ཀྱིས་ཕྱོགས་ཡོད།ངས་སྐད་གསེང་མཐོན་པོའི་སྒོ་ནས་ཁོའི་གཞུག་ལ་སྐད་ཅོར་བརྒྱབ་ན་ཆོག་ཀྱང་།རང་སེམས་ལྷོད་ལ་བབས་ནས་ནམ་ཞིག་ཁོ་དང་ལྷོད་ལྷོད་དུ་ཁ་བརྡ་ཞིག་བྱེད་རྒྱུ་ནི་ཧ་ཅང་ནས་ཀྱང་གལ་ཆེན་དུ་བསམ་པས་ངང་སྒུག་རང་བཞིན་གྱི་མི་གཤིས་ཤིག་ལ་ཁག་འགེལ་མི་བྱེད་རང་བྱེད་རེད།

　　ཞབས་ཀྱུ་ཡིས་བཤད་ན་ཁོ་བོས་ཅང་མི་ཤེས་པས་གུག་གུ་ལ་སློབ་གསོ་གཏོང་བའི་འོས་བབ་མེད་ཟེར།འགྲེང་བུ་ཡིས་བཤད་ན་ཁོ་བོ་ང་རྒྱལ་ཆེེ་དྲགས་འདུག་མ་ཟེར་དང་གང་ལྟར་ཁོ་བོའི་བསམ་བློ་གུག་གུ་ལྟ་བུ་ཞིག་གིས་རྟོགས་ཐབས་བྲལ་རབས་བཤད།ན་རོ་ཡིས་བཤད་ན་གང་ཟག་གི་ཚོད་གང་ཟག་གིས་མི་ལོན་ཞེས་པ་བཞིན་ཁོ་བོས་གནས་སྐབས་སུ་གུག་གུ་ལ་འདི་རེད་ཀན་རེད་ཟེར་བའི་ཐ་ཚིག་ཅི་ཡང་འཇོག་རྒྱུ་མིན་ཟེར།ཞབས་ཀྱུ་འགྲེང་བུ་ན་རོ་གསུམ་ལ་སོ་སོའི་རིན་ཐང་གི་ལྟ་ཚུལ་འདུག་ལ་སོ་སོའི་ལངས་ཕྱོགས་ཀྱང་ཁ་གསལ་མིག་གསལ་རེད།ཅིས་ཀྱང་ངས་ནི་མུ་མཐུད་ནས་ངང་སྒུག་ཟེར་བའི་མི་གཤིས་ཤིག་ལ་ཁག་འགེལ་བྱས་ནས་ནམ་ཉི་མ་ཞིག་ལ་གུག་གུ་གཟུགས་འཁྱོག་དང་ཞེ་ལྷོད་ལྷོད་དུ་ཁ་བརྡ་ཐེངས་ཤིག་བྱ་རྒྱུའི་འཆར་གཞི་འཐེན།

　　ལོ་ཟླ་ནི་དམ་འཛིན་ཇི་ལྟར་བྱས་ཀྱང་ཡ་ང་སྙིང་རྗེ་མེད་པར་ང་ཚོ་དང་རིང་དུ་གྱེས་འགྲོ་བའི་ཁྲེལ་མེད་དེའི་ཡན་ན་མེད་པ་ཞིག་རེད།བལྟས་བལྟས་རིག་རིག་ལ་སྤྱི་ལོ་ཉིས་སྟོོང་སུམ་ཅུ་སོ་ལྔ་ལོར་བསླེབས་སོང་ལ།སྤྱི་ལོ་ཉིས་སྟོང་ཉི་ཤུ་རྩ་ལྔ་ལོ་དེ་གུག་གུ་གཟུགས་འཁྱོག་དང་ལྷན་དུ་རྒྱང་རིང་རྒྱང་རིང་ཞིག་ཏུ་བྲོས་སོང་།གོ་ཐོས་ལྟར་ན་གུག་གུ་གཟུགས་འཁྱོག་ད་ལྟ་ནང་ལོག་གི་གྲོང་ཁྱེར་ཞིག་ཏུ་ལས་ཀ་འཚོལ་དུ་ཕྱིན་ནས་ལོ་མང་འགོར་སོང་ཟེར།ལོ་མང་འགོར་ཡོད་ན་ད་ནི་ཁོས་ལས་ཀ་ཞིག་རེག་ཡོད་རྒྱུ་རེད།ལས་ཀ་ཞིག་རེག་ཡོད་ན་ཇི་ལྟ་བུའི་ལས་ཀ་ཞིག་ཡིན་ནམ།གང་ལྟར་དེང་སང་གུག་གུ་གཟུགས་འཁྱོག་བཞིན་དུ་ཕ་ཡུལ་དང་རིང་དུ་གྱེས་ནས་ནང་ལོག་གི་གྲོང་ཁྱེར་ག་ས་གང་དུ་ལས་ཀ་འཚོལ་དུ་འགྲོ་མཁན་ཇེ་མང་ནས་ཇེ་མང་རེད།

　　ས་སྲོད་ཀྱི་ལག་གཡུག་དང་ལྷན་དུ་ས་གཞི་ནས་རུབ་སོང་།འབྲོག་ཁྱིའི་ཟུག་སྐད་སྙན་མོ་ཞིག་ཕ་གའི་བྲག་ཆ་དང་བསྡོངས་ནས་རྩྭ་ཐང་གི་ཁོར་ཡུག་ཀུན་ཏུ་མཆེད་ཀྱིན་འདུག་ལ།མཚམས་དང་མཚམས་སུ་རྟ་ཕོའི་འཚེར་སྐད་རེ་ཡིས་སྙན་འཇེབས་ལྡན་པའི་འབྲོག་ཁྱིའི་ཟུག་སྐད་དེ་ལ་རམ་འདེགས་མཛད་པ་ལྟར་འཚེར་དང་འཚེར་བཞིན་པ་ནི་སུས་ཀྱང་འགྲན་ཟླ་དབེན་པའི་མི་ཡུལ་གྱི་རོལ་མོ་ངོ་མཚར་བ་ཞིག་ཅི་ལ་མིན།ང་རང་ཡིད་དབང་གསོ་བའི་རང་བྱུང་ཁམས་ཀྱི་རོལ་དབྱངས་འདི་ལ་གཡེང་ཞོར་མཚན་མོའི་རྩྭ་ཐང་གི་སྐར་ཚོགས་འོག་ན་དགའ་མ་སུ་ཞིག་གི་དྲོད་ཁོལ་ལ་གཟས་ཏེ་འགྲོ་སྐབས།གློ་བུར་དུ་ཁ་པར་ལས་མཆེད་པའི་གླུ་དབྱངས་ཤིག་གིས་ང་རང་མུ་ནས་མདུན་དུ་འགྲོ་མཚམས་འཇོག་ཏུ་བཅུག་ལ།དེ་སྔ་གཏན་ནས་ཆ་རྒྱུས་མེད་པའི་ཁ་པར་ཨང་གྲངས་ཤིག་གིས་ངའི་ཁ་པར་གྱི་འཆར་ཤེལ་ངོས་སུ་ང་སར་ཅེར་ཞིང་མྱུར་དུ་ཕ་རོལ་བོའི་ཁ་པར་ལ་དང་ལེན་བྱེད་རྒྱུའི་འབོད་བརྡ་ཡང་མཚམས་མེད་དུ་བསྒྲགས།

　　དགའ་མའི་རུམ་གྱི་དྲོད་ཁོལ་དང་སེམས་ཀྱི་དུངས་པ་དེ་བསམ་ན་རྒྱུས་མེད་ཀྱི་ཁ་པར་འབོད་བརྡ་འདི་སྣང་མེད་དུ་བསྐྱུར་ནས་ད་ལྟ་ཉིད་དུ་ན་ཆུང་དགའ་མའི་སྔས་འགྲམ་དུ་འགྲོ་བསམ་ཡང་།འདི་ནས་དགའ་མའི་བར་ཐག་ཏུ་ད་དུང་གོམ་པ་སུམ་བརྒྱ་ཙམ་མངའ་ལ་མུན་རུབ་པའི་རྩྭ་ཐང་འདིའི་བཀོད་པ་ཡིས་ནང་སེམས་ལ་ལྷོད་སྣང་མི་དམན་པ་ཞིག་བསྩལ་སྟབས།ངས་སེམས་ཁམས་ལྷོད་ལྷོད་དུ་རྒྱུས་མེད་ཀྱི་ཁ་པར་དེ་ལ་སྣེ་ལེན་བྱེད་བསམ་ཞིང་།ཁྲིགས་ཁྲིགས་མེད་ན་དེ་ནི་རྒྱ་མ་ལོག་ན་སོའོ་རའོ་ཁ་པར་(骚扰电话)ཞིག་ཡིན་ལས་ཆེ།གལ་ཏེ་དེ་ལྟ་ཡིན་ན་དེ་དུས་ཁ་པར་གྱི་ཁ་གཏན་ཡང་མི་རན་པ་ཞིག་མ་རེད་སྙམ།

　　ཁོ་རང་དངོས་ནས་ནང་ལོག་གི་གྲོང་ཁྱེར་ཞིག་ཏུ་འཚོ་བ་བསྐྱལ་ནས་ཡུན་རིང་འགོར་ཞིང་།ད་ལྟ་ཧྲན་ཏུང་གྲོང་ཁྱེར་ཟེར་ན་འབྲོག་པའི་འབྲོག་མི་རྣམས་འབྲོག་ཐང་ལ་རྒྱུས་མངའ་ཆེ་བ་ལྟར་ཁོང་ཉིད་གྲོང་ཁྱེར་དེའི་སྲང་ལམ་གྱི་གྲུ་ཟུར་རེ་རེར་ཅི་དང་ཅི་ཡོད་པ་རེ་རེ་བཞིན་གསལ་བཤད་ཐུབ་པའི་ཚད་དུ་ཡོད་ལས་ཆེ།གང་ལྟར་གུག་གུ་ལགས་ཀྱིས་ཚུར་བཏང་བའི་ཁ་པར་འདིས་རྙིང་སོང་བའི་དངོས་པོ་ཞིག་ལ་སླར་ཡང་གསོན་ཤུགས་གསར་བ་ཞིག་རྒྱས་སུ་འཇུག་འགོ་བརྩམས་ལ།ལྷག་པར་དུ་ཁོང་གིས་བཤད་པའི་སྐད་ཆ་དག་གིས་ང་ལ་འགྱོད་གདུང་ཁྲོད་ཀྱི་ཕྱིར་དྲན་ཞིག་བྱེད་དུ་བཅུག་ཅིང་།གུག་གུ་གཟུགས་འཁྱོག་ཅེས་པའི་མཚང་མིང་དེ་དོར་ནས་གུག་གུ་ལགས་ཞེས་ཞེ་ས་ཞིག་སྦྱོར་དོན་ཡང་རང་ག་བའི་སེམས་ཁམས་འགྱུར་ལྡོག་ཅིག་ག་ལ་ཡིན་ཏེ་མིན།གཙོ་བོ་ཁོང་གིས་ང་ལ་ཁ་པར་བཏང་བས་མི་ཚད་ཁ་པར་ལམ་གྱི་ཁ་བརྡ་དེས་ངའི་ནང་སེམས་ལ་སྤར་འབྲད་སྤར་མོ་གང་བྱས་པས་ལོས་ཡིན།

　　ཁ་པར་ལམ་གྱི་ཁ་བརྡ་དེ་ཧ་ལམ་སྐར་མ་བདུན་ཙམ་ལ་རྒྱུན་བསྲིངས་ཤིང་།རིང་ཟེར་ཆོག་ལ་ཐུང་ཡང་ཟེར་ཆོག་པའི་དུས་ཚོད་འདིའི་ནང་དུ་ལོ་ངོ་བཅུ་ལྷག་རིང་གི་གསང་བ་ཞིག་གི་མཐིལ་རྟོགས་སོང་བ་ལྟར།ང་ཡི་ནང་སེམས་སུ་དགའ་སྣང་ཞིག་ཡོད་པས་མི་ཚད་སྐྱོ་སྣང་ཞིག་ཀྱང་ངང་ངམ་ཤུགས་ཀྱིས་ལུས་ཀྱི་ཁམས་གང་ཞིག་ཏུ་འཕྱུར་འགོ་བརྩམས།དགའ་སྣང་ནི་སྐྱོ་སྣང་གི་ལྡོག་ཟླ་མིན་པར་དེ་ནི་ལུས་སེམས་ལྷོད་ལ་འབབ་ཐུབ་པའི་སེམས་འགྱུ་བསོར་མོ་ཞིག་གམ།སྐྱོ་སྣང་ཡང་དགའ་སྣང་གི་ལྡོག་ཟླར་གྲུབ་པ་ཞིག་མིན་པར་དེ་ནི་ལུས་སེམས་ཐང་ཆད་དུས་སུ་དངན་པའི་དབུགས་རིང་འཐེན་སའི་སེམས་འགྱུ་རབ་རིབ་མག་མོག་ཅིག་རེད་སྙམ།གང་ལྟར་སྐར་མ་བདུན་རིང་གི་ཁ་པར་ལམ་གྱི་ཁ་བརྡ་དེས་ང་དང་གུག་གུ་ལགས་ཀྱི་ལོ་ངོ་དུ་མའི་རིང་གི་འབྲེལ་བ་དང་གསང་བ།དོགས་སློང་དང་བསམ་གཞིག་ཡོད་ཚད་ལ་འགྲེལ་བ་ཁ་གསལ་གཏིང་གསལ་ཞིག་རྒྱག་ཐུབ་སོང་།

　　གུག་གུ་ལགས་ཀྱིས་བཤད་རྒྱུར་གཅིག་བྱས་ན་ནང་ལོག་གི་གྲོོང་ཁྱེར་ལ་འཕེལ་རྒྱས་ཟེར་བ་དེ་ཡོད་པ་བདེན་ཡང་སྲིད།གང་ལྟར་ཀྱང་རུང་ནང་ལོག་ནས་ནམ་ཡང་ཕ་ཡུལ་ཟེར་བ་དེ་བརྗེད་མ་མྱོང་།ཕ་ཡུལ་ནི་ཁ་ཐག་ཇི་ལྟར་རིང་ན་དེ་ལྟར་དྲན་ཡོང་བ་ཞིག་རེད།ཕ་ཡུལ་ནི་ཁ་ཐག་ཇི་ལྟར་ཉེ་ན་དེ་ལྟར་འདྲེས་ཡོང་བ་ཞིག་རེད།སྔོན་ཆད་ངས་འབྲོག་ཁྱི་ལ་བོའི་རིགས་ལ་བསྟོད་ར་འཐེན་པར་འཁང་ཚིག་བརྡོལ་མྱོང་ཡང་།ད་ལྟ་ངའི་མལ་ཁང་དང་འགྲུལ་ཁང་ཐ་ན་ཁ་ཟས་གཡོས་སྦྱོར་བྱེད་སའི་ཐབ་ཚང་དུ་ཡང་འབྲོག་ཁྱི་ལ་བོའི་རིགས་ཀྱི་པར་དང་པར་དེ་དག་ལ་གསལ་བྱེད་ཀྱི་ཚུལ་དུ་བརྩམས་པའི་སྙན་ངག་ཐུང་ངུ་རིགས་ཀྱིས་ཁེངས་ཡོད་ཟེར།འདི་ནི་ཡུན་རིང་ལ་ས་ཁར་མ་བུད་པའི་ས་འོག་གི་རྡོ་རིང་ངོས་ཀྱི་ཡིི་གེ་ཞིག་རེད།འདི་ནི་ཡུན་རིང་ལ་སེང་རས་དཀྲིས་པའི་སེང་རས་ནང་གི་ངོ་གདོང་དངོས་མ་དེ་རེད།

　　ངས་ཡུད་ཙམ་ལ་ཁ་པར་ལམ་ནས་ཕྱིར་གུག་གུ་ལགས་ལ་ཇི་ལྟར་ལན་འདེབས་དགོས་པ་མ་ཤེས་པར་ལུས་ཤིང་།མཐར་ཁྱེད་ཀྱིས་ང་ལ་འདི་ལྟར་གསལ་བཤད་ལྟ་བུ་ཞིག་བྱེད་དགོས་དོན་ཅི་ཡིན་ནམ་ཞེས་ལྡོག་འདྲིི་ཞིག་བྱས་པ་ན།གུག་གུ་ལགས་ཀྱིས་དེ་ལ་དྲི་བ་དྲིས་ལན་གྱི་ཚུལ་དུ་བཏབ་པའི་སྐད་ཆ་དེས་ང་ལ་སྔར་ལས་ཀྱང་གསལ་ཁ་བཏོད་པའི་གསལ་བཤད་ཅིག་བྱེད་ཐུབ་སོང་བ་འདྲ་སྟེ།ཁོང་གིས་གསུང་རྒྱུར་དེ་ནི་གཙོ་བོ་ང་ཚོའི་བར་དུ་གོ་བ་མི་ལོག་རྒྱུའི་ཆེད་དུ་ཡིན་ལ།དྲང་མོར་བཤད་ན།ཁོང་ཡང་ཕ་ཡུལ་ལ་དུངས་ཤིང་འབྲོག་ཁྱི་ལ་བོའི་རིགས་ལ་བརྩེ་བ་ཆེས་ཆེར་མངའ་བའི་ས་མཐའི་ཡུལ་གྱི་འབྲོག་ཕྲུག་རྣལ་མ་ཞིག་ཡིན་ཞེས་སྟབས་བདེ་ཡིན་ལ་དོན་སྙིང་ཡང་ངེས་ཅན་ལྡན་པའི་དྲིས་ལན་ཞིག་བཏབ་སོང་ལ།དུས་སྐད་ཅིག་མ་དེ་ལ་ངས་ཀྱང་ཕྱིར་ཁོང་ལ་དེ་དེ་བཞིན་ནོ་དེ་དེ་བཞིན་ནོ་ཞེས་བརྣན་པའི་ཚུལ་དུ་ལན་སྟབས་བདེ་སྟབས་བདེ་ཞིག་དབང་མེད་དུ་ཤོར་སོང་བ་ལས་གཞན་པའི་སྦྱོར་བ་ཅི་ཡང་བསྒྲུབ་མ་ཐུབ།

　　དོན་དག་འདི་ཞབས་ཀྱུ་འགྲེང་བུ་ན་རོ་གསུམ་ལ་ཡང་ནམ་ཞིག་ངེས་པར་དུ་གསལ་བཤད་ཅིག་བྱ་དགོས།དེ་མིན་ན་བློ་སེམས་བདེ་ལ་འབབ་ཐབས་བྲལ།མི་ནི་དངོས་ནས་ནམ་ཡང་མི་བཟང་མིན་ལ་མིི་ངན་ཡང་མིན་ཟེར་ཆོག་པ་འདྲ་སྟེ།སྔོན་ཆད་གུག་གུ་གཟུགས་འཁྱོག་ཅེས་མཚང་འདྲུ་མཁན་ང་ཡིན་ལ་ད་ལྟ་གུག་གུ་ལགས་ཞེས་ཞེ་ས་སྦྱོར་མཁན་ཡང་ང་སྟེ་མི་གཅིག་གི་སྔ་ཕྱིིའི་བསམ་བློའི་འགྱུར་ལྡོག་ཡིན།དེའི་སྟབས་ཀྱིས་ང་ཚོས་ནམ་ཡང་མི་ཞིག་མ་ཤི་བར་དུ་མི་དེའི་མི་གཞི་དང་བསམ་བློ་ལ་གདེང་འཇོག་མཐོ་དམན་བཟང་ངན་ཅི་ཡང་མ་བྱས་ན་བཟང་སྙམ་སོང་།རེད་ཡ་དེ་ཡང་གོང་དུ་བཟང་སྙམ་སོང་ཞེས་ཐེ་ཚོམ་ཟ་བ་མིན་པར་ཚིག་ཐག་བཅད་ནས་ངའོ་སྙམ་པའི་ང་རྒྱལ་གྱི་ཆ་དེ་མ་ངོམ་པ་ཙམ་ཡིན།

　　ང་ལ་མཚོན་ན་སྙིང་བོས་ཕྱུག་པའི་ཁ་པར་ལམ་གྱི་ཁ་བརྡ་དེའི་མཚམས་བཞག་ཅིང་ཁ་པར་གྱི་ཁ་གཞི་ནས་གཏན་སོང་།འབྲོག་ཁྱིའི་ཟུག་སྐད་ཕྲ་མོ་ཞིག་མུ་མཐུད་ནས་མུན་རུབ་པའི་རྩྭ་ཐང་འདིའི་ག་ས་གང་དུ་མཆེད་ཀྱིན་འདུག་ལ།ཡ་གའི་དཔའ་བོ་ངར་ལངས་ཀྱི་རི་རྩེ་ན་འོད་ལམ་ལམ་གྱི་འཛུམ་ཆུང་རེ་འཛུམ་བཞིན་པའི་སྐར་ཚོགས་ཁྲ་མོའི་རི་མོ་ནི་ཅི་འདྲའི་སྙིང་དུ་སྡུག་ལ་མིག་ལ་མཛེས་ཨང་།ང་དང་དགའ་མོའི་བར་དུ་བར་ཐག་གོམ་པ་སུམ་བརྒྱ་ཙམ་ལས་མེད་ན་ཡང་།ང་ལ་མཚོན་ན་ཧ་ཅང་རིང་སྣང་ཞིག་སྟེ་ད་ལྟ་ཉིད་དུ་ཁོ་མོའི་དྲོ་ཞིང་དྲོ་བའི་མཚན་མ་རུ་འདོད་པའི་དཔལ་ལ་སྤྱོད་ན་བསམ་ཞིང་།གོམ་པ་སུམ་བརྒྱ་ལྷག་ལ་དུས་ཚོད་ག་ཚོད་དགོས་སམ་ཞེས་བྲེད་སྣང་གི་སེམས་ཁམས་ཤིག་གིས་རང་སེམས་ལ་རང་གིས་འཚུབ་ཆ་སློང་དུས།མ་གཞི་ཡུལ་དང་ཡུལ་གཞན་ཞིག་གི་བར་ཐག་རིང་མིན་ནི་གཙོ་བོ་སེམས་ཀྱི་འཚུབ་ཆ་ཆེ་མིན་ཞིག་ལ་རག་ལས་འདུག་སྙམ་པའི་དྲན་སྣང་ཐན་ཐུན་ཞིག་ཀྱང་མ་བོས་མགྲོན་པོའི་ཚུལ་དུ་སེམས་ཀྱི་གུར་ཁང་དུ་རང་ཤུགས་སུ་ཐོན་སོང་ངོ་།།

　　རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།