“ཨ་་་་་”

　　“ཅི་ཞིག་བྱུང་སོང་། ཅི་ཞིག་བྱུང་སོང་།”

　　“ཆོས་སྒྲོན། ཆོས་ཆོས་སྒྲོན།”

　　“ཨ་་་་་”

　　ཨག་སྐད་དེ་མལ་ཁང་དོག་མོ་དེའི་ཕྱོགས་བཞིའི་ཨར་འདམ་གྱི་གྱང་ངོས་ནས་བྲག་ཅ་མཆེད་ཅིང་། དེས་ཞོགས་པ་འདིའི་ཁུ་སིམ་སིམ་གྱི་གཉིད་དུ་ཡུར་བའི་ཁོར་ཡུག་ཀྱང་ཡོངས་སུ་དཀྲོགས་པར་བྱས།

　　“མྱུར་ཏུ་མངགས་གཏོང་ཁང་ལ་བརྡ་བརྡ་རྒྱག་དགོས།”

　　“མིན་མིན། སྔོན་ལ་སྦྱིན་བདག་འབོད་དགོས།”

　　“ང་་་ང་སྐྲག་གི”

　　“སྐྲག་མི་དགོས། ངས་མྱུར་ཏུ་སྦྱིན་བདག་ལ་ཁ་པར་གཏོང་།”

　　མཚོ་མོས་ཁ་ནས་དེ་ལྟར་བཤད་རུང་དོན་ངོ་མར་ཁོ་མོ་ཡང་སྐྲག་སྟེ་རེ་ཞིག་ཁ་པར་གང་ན་ཡོད་པའང་བརྗེད་འདུག

　　“ནམ་ཟླ་དབྱར་གཞུང་ཞིག་ལ།། རྩྭ་ལྗང་ཟིལ་བ་ཁྲོམ་ཁྲོམ།། མེ་ཏོག་བཀྲག་མདངས་ལམ་ལམ།།…”

　　ཁ་པར་གྱི་སྒྲ་དུང་ལས་ཁོ་མོ་གཉིས་ཀྱི་རྣ་བར་རྒྱུན་འབྱམས་སུ་སོང་བའི་གླུ་དབྱངས་དེའི་འགྱུར་ཁུགས་ལྷང་ལྷང་དུ་གྲགས་འོང་། གཡང་མཚོས་ལག་པས་ཁ་ཟུམ་དེ་སྐད་ཆུང་ངུས་ངུ་བཞིན་འདུག་ཅིང་སྐྲག་སྟེ་ལུས་པོ་ཡང་འདར་སིག་སིག་བྱེད།ཁོ་མོར་ཅི་ཁགའང་མོ་སྐྱེས་པ་ནས་ད་བར་བེམ་པོ་མཐོང་བ་ནི་ཐོག་དང་པོ་ཡིན་ལ། ལྷག་པར་ཤི་གསོན་གྱི་ཆོས་ཉིད་ཁོ་མོའི་ཉེ་འཁོར་རམ་ཡང་ན་འདི་འདྲའི་ཐག་ཉེ་པོ་ནས་བྱུང་བ་ཡང་ཐོག་དང་པོ་ཡིན།

　　སྔ་དྲོ་དེར་གཡང་མཚོ་ཁ་པར་གྱི་རྣར་གཟན་པའི་དྲིལ་བརྡས་གཉིད་ལས་བསླངས་ཤིང་།དེ་ནས་མལ་ཁྲི་ལས་བབས་ཏེ་ཁ་ལག་གཙང་མར་བཀྲུས་ཚར་རྗེས་ཕྱིར་མལ་ཁང་དུ་ཡོང་ནས་ད་དུང་གཉིད་ཀྱི་ཞིང་ཁམས་འགྲིམ་བཞིན་པའི་མོའི་འགྲོ་རོགས་མཚོ་མོ་དང་ཆོས་སྒྲོན་གཉིས་བོས་ཏེེེ་སྒོ་ཕྱིར་ནངས་ཇ་འཐུང་དུ་འགྲོ་བསམ་མོད། བློ་ཡུལ་ལ་མ་དྲན་པ་ནི་མོས་མགོ་བོ་རུམ་ལ་བཅུག་པའི་ཆོས་སྒྲོན་གྱི་མལ་ཐུལ་བཤུས་ནས་འབོད་བསམ་དུས།ཆོས་སྒྲོན་ནི་ངོ་ཤ་ཐལ་སྐྱ་དང་མཆུ་སྒྲོས་སྔོ་ནག་ཏུ་གྱུར་ཏེ་འགུལ་ཙམ་ཡང་མི་བྱེད། སྐབས་དེར་གཡང་མཚོ་ཅུང་ཟད་ཙམ་ལ་ཧད་དེ་ལུས་པ་དང་དེ་ནས་ཆོས་སྒྲོན་ཡང་ཡང་བསྒུལ་ཀྱང་ཆོས་སྒྲོན་ནི་སྔར་བཞིན་འགུལ་ཙམ་ཡང་མ་བྱས།དེ་ནས་ཁོ་མོས་མཛུབ་མོ་ཆོས་སྒྲོན་གྱི་སྣ་སྒོར་ཡུད་ཙམ་བཞག་པས་ད་གཟོད་ཆོས་སྒྲོན་ནི་དབུགས་ཀྱི་རྒྱུ་བ་སྔར་ནས་ཆད་ཟིན་པ་ཤེས་ཤིང་།ལུས་པོ་ཡང་སྔར་ནས་འཁྲེགས་རེངས་སུ་གྱུར་ཏེ་འཁྱགས་འདུག་པ་ཚོར།

　　ཁ་པར་གྱི་སྒྲ་དུང་ལས་ཡུད་ཙམ་ལ་གླུ་གཞས་དེའི་འགྲོས་དལ་བའི་འགྱུར་ཁུགས་གྲགས་ཤིང་།ཡུད་ཙམ་གྱི་རྗེས་ནས་ད་གཟོོོད་སྦྱིན་བདག་གི་གཉིད་མ་སད་ཀྱི་སྐད་གདངས་གྲགས་འོང་།

　　“ཝེ།སུ་ཡིན།འདི་འདྲའི་སྔ་མོ་ཞིག་ལ་འདྲེ་ཡིས་བཟུང་པ་མིན་ནམ།”

　　“ཆོས་སྒྲོན།ཆོས་སྒྲོན་་་་”

　　“ཡ།ཅི་རེད།ཆོས་སྒྲོན་གྱིས་ང་དྲན་གྱིན་པ་ཡིན་ནམ།ཧི་ཧི་ཧི།”

　　“མོ་ཤི་་་་ཤི་འདུག་པ་འདྲ།”

　　མཚོ་མོས་ངག་འཁྲོལ་བཞིན་དེ་ལྟར་བཤད།

　　“ཅི་་་ཅི་ཟེར།ཤི་འདུགཀུ་རེ་མ་རྩེད།”

　　ཕ་རོལ་པོའི་སྐད་གདངས་གློ་བུར་དུ་ཅེ་མགྱོགས་ལ་སོང་ཞིང་།སྟབས་སྟབས་པོར་ཁ་གྲགས་རྒྱུ་མེད་པར་གྱུར།

　　“ངོ་མ་ཟེར་བ་ཡིན།”

　　“ང་མྱུར་དུ་ཐོན་ཡོང་།”

　　སྦྱིན་བདག་གིས་དེ་ལྟར་བཤད་རྗེས་ཁ་པར་གྱི་སྒོ་གཏན་སོང་།

　　དངོས་གནས་མི་ཤི་བའི་བེམ་པོ་ནི་སྟག་ལས་ཀྱང་འཇིགས་ཟེར་བ་བདེན་པ་འདྲ་སྟེ།མཚོ་མོས་མལ་ཁྲིའི་ཐོག་དེ་ལྟར་འགུལ་ཙམ་ཡང་མི་བྱེད་པའི་ཆོས་སྒྲོན་གྱི་བེམ་པོར་བལྟས་ཀྱིན་བལྟས་ཀྱིན་སྐྲག་སྣང་གིས་ལུས་པོ་རིམ་གྱིས་སྦྲིད་པ་དང་།སྐབས་སྐབས་སུ་ཡ་ཆུང་ནང་དུ་ཅི་ཞིག་བརྫངས་པ་དང་འདྲ་བར་དབུགས་ཀྱང་གཏོང་ལེན་བྱེད་དཀའ་བའི་ཚོད་དུ་སླེབས།ཡིན་ཡང་རེ་ཞིག་འགོར་རྗེས་ཁོ་མོའི་སྐྲག་སྣང་དེ་རིམ་བཞིན་སྐྱོ་སྣང་དུ་གྱུར་ཞིང་།སྐྱོ་སྣང་དེའང་བྲང་གཞུང་ནས་ཤ་འོད་བཞིན་བརྡོལ་ཡོང་སྟེ་མཐར་མིག་ཆུར་གྱུར་ཞིང་མིག་གོང་ནས་མཁུར་ཚོས་དང་དེ་ནས་འཁྱགས་ཤིང་མཁྲེགས་པའི་རྡོ་གཅལ་སྟེང་ལྷུང་།གཡང་མཚོ་ནི་ཐང་དུ་བཙོག་ནས་ལག་པ་གཉིས་ཀྱིས་རང་གི་པུས་མོ་བསྡམས་ཏེ་མིག་ཟུང་ལ་འཇིགས་སྐྲག་གི་ཉམས་ཤར་ནས་ཁང་པའི་གྲུ་ཟུར་ཞིག་ཏུ་ཅེར་འདུག་ཅིང་།ལུས་པོ་འདར་བཞིན་ཁ་ནས་རྡབ་རྡིབ་ཅིག་གང་བྱུང་དུ་སྨྲ་བཞིན་འདུག

　　གཡང་མཚོ་དང་ཆོས་སྒྲོན།མཚོ་མོ་གསུམ་ནི་ཟླ་གཅིག་གི་སྔོན་ནས་ཆང་ཁང་འདིར་ཡོང་སྟེ་ཆང་མ་བྱས་ཏེ་གླ་རྒྱག་བཞིན་ཡོད་ཅིང་།དུས་རྒྱུན་མཉམ་འགྲོ་མཉམ་འདུག་བྱེད་བཞིན་ཡོད་པས་རྒྱ་སྐད་ཀྱི་ཀེའེ་མེས(闺蜜)ཞེས་པའི་འབྲེལ་བ་ཡང་ཆགས་ཡོད།འོན་ཀྱང་གློ་བུར་བའི་དོན་འདིས་གཡང་མཚོ་དང་མཚོ་མོ་གཉིས་ལ་རྨི་ལམ་དང་མངོན་སུམ་གང་ཡིན་མི་ཤེས་པའི་སྐྲག་སྣང་དང་རེ་ཆད།ཐེ་ཚོམ་བཅས་ཀྱི་རྒྱ་རུ་ཚུད་པར་བྱས།

　　ཡུད་ཙམ་འགོར་རྗེས་སྦྱིན་བདག་ཡང་སླེབས་བྱུང་།ཁོའི་མགོ་སྐྲ་འཛེངས་ཤིང་ཁོག་སྟོད་ལ་ཚི་ལེན་སྲབ་བུ་ཞིག་ལས་གྱོན་མི་འདུག་ཅིང་རྐང་མགོའི་ལྷམ་གཉིས་ནི་འདྲུད་ལྷམ་ལྟར་གྱོན་འདུག

　　ཁོ་མལ་ཁང་ནང་ཐོན་དུས་གཡང་མཚོ་དང་མཚོ་མོ་གཉིས་ཀྱིས་སྔར་ནས་ཆོས་སྒྲོན་གྱི་བེམ་པོ་མལ་ཐུལ་གྱིས་གཅུད་ཚར།

　　“ཅི་་་ཅི་ལྟར་ཤི་བ་རེད།ཅི་ལྟར་ཤི་བ་རེད།”

　　“ངས་མོ་སློངས་བསམ་དུས་འགུལ་རྒྱུ་མི་འདུག”

　　གཡང་མཚོས་ངུ་ངག་འདྲེས་མས་དེ་ལྟར་བཤད་ཅིང་མུ་མཐུད་དུ་མིག་ཆུ་འབྱིད་པར་བྱེད།

　　སྦྱིན་བདག་ཀྱང་ཡུད་ཙམ་ལ་ཧད་དེ་ལུས་པ་དང་དེ་ནས་སེམས་ལ་ཅི་ཞིག་དྲན་པ་ནང་བཞིན་“མདང་དགུང་ཁོ་མོས་ཆང་ཅི་ཙམ་འཐུང་བ་རེད”་ཅེས་དྲིས།

　　“འགྲུལ་བ་དེ་དག་གིས་ཁོ་མོར་བཙན་གྱིས་འཐུང་དུ་བཅུག་པ་རེད།ང་ཚོས་མཉམ་དུ་སྒམ་གཉིས་ལྷག་འཐུང་།”

　　མཚོ་མོས་ངུ་ངག་འདྲེས་མས་དེ་ལྟར་བཤད་ཅིང་ངུ་སྔངས་ཤིག་བྱས་རྗེས་མུ་མཐུད་དུ།

　　“དེའི་རྗེས་སུ་ང་ནི་ཅུང་བཟི་འདུག་པས་གཡང་མཚོར་ཁ་པར་བརྒྱབ་ཏེ་ལེན་པར་ཡོང་དུ་བཅུག་པ་ཡིན།ཆོས་སྒྲོན་ཡང་ཅུང་བཟི་འདུག་མོད་འགྲུལ་བ་དེ་ཚོས་ཁོ་མོར་མུ་མཐུད་དུ་ཝུ་ཆང་གཏད་ཀྱིན་འདུག་ལ་ཆོས་སྒྲོན་གྱིས་ཀྱང་བཙན་གྱིས་འཐུང་གིན་འདུགཡུད་ཙམ་གྱི་རྗེས་ནས་གཡང་མཚོ་ཐོན་བྱུང་ལ་ང་རང་གཡང་མཚོ་དང་མཉམ་དུ་ཕྱིར་མལ་ཁང་དུ་ལོག་པ་ཡིན།ང་རང་ཡོང་དུས་ཀྱང་འགྲུལ་བ་དེ་ཚོས་སོང་མི་ཆོག་ཟེར་མོད་ངས་ཨུ་ཚུགས་ཡང་ཡང་བརྒྱབ་མཐར་ད་གཟོད་འགྲོ་ཐུབ་པ་བྱུང་།”

　　སྦྱིན་བདག་གིས་ཡུད་ཙམ་ལ་བསམ་བློ་ཞིག་བཏང་བ་དང་དེ་ནས་གཡང་མཚོར་གཏད་དེ།

　　“འོ་ན་ཁྱོད་ཀྱིས་ཆོས་སྒྲོན་ཁྲིད་མ་ཡོང་ངམ”་ཞེས་དྲིས།

　　“ངས་་་ངས་ཆོས་སྒྲོན་ཀྱང་བཟི་འདུག་པས་ཁྲིད་འགྲོ་རྒྱུ་ཡིན་ཞེས་རེ་བ་བཏོན་ཡང་འགྲུལ་བ་དེ་ཚོས་ཡིན་གཅིག་མིན་གཉིས་མི་གཅིག་གིས་ཁོ་ཚོར་འདུག་རོགས་བྱེད་དགོས་ཟེར།དེ་ནས་ང་ལ་ཡང་ཐབས་ཟད་དེ་མཚོ་མོ་ཁྲིད་དེ་ཕྱིར་མལ་ཁང་དུ་ལོག་པ་ཡིན།ངས་མཚོ་མོ་ཉལ་དུ་བཅུག་རྗེས་ཕྱིར་ཆང་ཁང་དུ་སོང་ནས་ཆོས་སྒྲོན་ཁྲིད་ཡོང་བསམ་དུས་ཆོས་སྒྲོན་དང་འགྲུལ་བ་དེ་ཚོས་སྔར་ནས་གང་ཞིག་ལ་སོང་ཚར་འདུག”

　　གཡང་མཚོས་ངུ་སྔངས་ཤིག་བྱས།

　　“སྐབས་དེར་ཆང་ཁང་ན་ད་དུང་མི་རེ་གཉིས་ཡོད་པས་ངས་དེ་ཚོ་འགྲོ་རག་བར་དུ་བསྒུགས་བསྡད་པ་ཡིན།ངས་མི་དེ་དག་ལ་ཁང་སྦུག་གཉིས་པའི་མི་དེ་དག་གང་ལ་བུད་སོང་ཨེ་ཤེས་ཞེས་དྲིས་ཀྱང་མི་ཤེས་ཟེར།ངས་ཡང་དང་བསྐྱར་དུ་ཆོས་སྒྲོན་ལ་ཁ་པར་བཏང་རུང་ཁོ་མོས་བླངས་མ་སོང་།”

　　“འོ་ན་ཆོས་་ཆོས་སྒྲོན་ཕྱིར་ཆང་ཁང་དུ་མ་ཡོང་ངམ།”

　　“སླེབས་མ་སོང་།མི་ཚང་མ་སོང་ཤུལ་དུ་ངས་ཆང་ཁང་ནང་ལ་གཙང་སྦྲ་བྱས་པ་དང་དེ་ནས་ཆང་ཁང་གི་སྒོ་གཏན་རྗེས་ཕྱིར་མལ་ཁང་དུ་ལོག་ནས་ཉལ་བ་ཡིན།”

　　གཡང་མཚོས་ཡང་བསྐྱར་ངུ་སྔངས་ཤིག་བྱས།

　　“ཕྱིར་མལ་ཁང་དུ་ཐོན་དུས་ཆོས་སྒྲོན་ཕྱིར་མལ་ཁང་དུའང་སླེབས་མི་འདུགཆུ་ཚོད་ཡང་གསུམ་ཙམ་ལ་སླེབས་འདུག་ཅིང་ང་རང་ཡང་ཧ་ཅང་ཐང་ཆད་འདུག་པས་མལ་ཁྲིའི་སྒང་ལ་བུད་མ་ཐག་གཉིད་སོང་།ཆོས་སྒྲོན་ནི་ནམ་ཚོད་ཕྱིར་མལ་ཁང་དུ་སླེབས་པ་ངས་ཀྱང་མ་ཤེས།”

　　“མི་དུ་ཡོད་དམ།མི་དེ་དག་སུ་ཞིག་ཡིན་པ་ཨེ་ཤེས།གང་གི་ཡིན་པ་ཨེ་ཤེས།”

　　སྦྱིན་བདག་གིས་མལ་ཐུལ་གྱིས་གཅུད་ཡོད་པའི་ཆོས་སྒྲོན་གྱིི་བེམ་པོར་ཅེར་ནས་ཡུད་ཙམ་ལ་ལུས་པ་དང་དེ་ནས་དངན་པ་རིང་བོ་ཞིག་འཐེན་བཞིན་མཚོ་མོར་གཏད་དེ་དེ་ལྟར་དྲིས།

　　“མི་གསུམ་ཡོད།སུ་ཞིག་ཡིན་པ་དང་གང་གི་ཡིན་པ་མི་ཤེས།དེ་དག་ལས་གཅིིིག་ནི་ཕལ་ཆེར་ལས་བྱེད་པ་ཞིག་ཡིན་པ་འདྲ།”

　　“ད་ནི་ང་ཚོས་ཅི་བྱས་ན་དགའ།”

　　“སྤྱི་བདེ་ཅུས་ལ་བརྡ་རྒྱག་དགོས།ཁོ་ཚོས་མི་དེ་དག་སུ་ཞིག་ཡིན་པ་རྩར་ཆོད་ངེས།”

　　སྦྱིན་བདག་གིས་ཁ་པར་བླངས་ཏེ་རྫོང་སྤྱི་བདེ་ཅུས་ལ་ཁ་པར་བཏང་བ་དང་།དེ་ནས་ཅུང་མ་འགོར་བར་སྤྱི་བདེ་མི་སྣ་ཡང་སླེབས་བྱུང་།སྤྱི་བདེ་མི་སྣས་གནས་ཚུལ་གྱི་མགོ་བར་མཇུག་གསུམ་ལ་རྒྱུས་ལོན་བྱས་པ་དང་དེ་ནས་ཆང་ཁང་གི་བརྙན་མིག་ལ་བལྟ་དགོས་ཞེས་སྦྱིན་བདག་དང་མཚོ་མོ་གཡང་མཚོ་གསུམ་ཁྲིད་དེ་ཆང་ཁང་གི་བརྙན་མིག་ལ་བལྟ་རུ་སོང་།ཁོ་ཚོས་ཆང་ཁང་གི་བརྙན་མིག་ལས་ཆོས་སྒྲོན་གྱི་མ་ཤི་བའི་སྔོན་གྱི་གཟུགས་བརྙན་མཐོང་ཞིང་དེས་ཡང་བསྐྱར་གཡང་མཚོ་དང་མཚོ་མོ་གཉིས་སྡུག་བསྔལ་གྱི་ཀློང་ལ་ཁྲིད།

　　ཅུང་ཙམ་མག་མོག་ཏུ་སྣང་བའི་བརྙན་མིག་ཁྲོད་མཚོ་མོ་དང་ཆོས་སྒྲོན་གཉིས་ཀྱིས་མི་དེ་དག་དང་ལྷན་དུ་ཝུ་ཆང་ཤེལ་དམ་གཅིག་རྗེས་མཐུད་དུ་འཐུང་བཞིན་འདུགདེ་སྔ་མཚོ་མོས་བཤད་པ་ནང་བཞིན་བར་སྐབས་ཤིག་ལ་གཡང་མཚོ་ཐོན་ཡོང་སྟེ་མཚོ་མོ་བསྐྱོར་ཏེ་ཆང་ཁང་གི་སྒོ་ཕྱིར་བུད་སོང་།ཤུལ་དུ་ཆོས་སྒྲོན་གྱིས་མུ་མཐུད་དུ་མི་དེ་དག་དང་ལྷན་དུ་ཆང་འཐུང་བཞིན་འདུགརེ་ཞིག་འགོར་རྗེས་ཆོས་སྒྲོན་ནི་བཟི་སོང་བ་འདྲ་སྟེ།མི་དེ་དག་ཆོས་སྒྲོན་གྱི་སྐེ་ལ་འཁྱུད་པ་སོགས་བྱེད་ཀྱང་མོར་བཀག་འགོག་བྱེད་པའི་བཟོ་ལྟ་ཅི་ཡང་མེད་པར་དེ་ཚོར་གང་འདོད་བྱེད་དུ་འཇུག་གིན་འདུགདངོས་གནས་མཚོ་མོས་བཤད་པ་ནང་བཞིན་དེ་དག་གི་ཁྲོད་དུ་གོན་པ་ཅུང་ཚད་ལྡན་ཡིན་ཞིང་ལྟོ་བ་འབུར་བའི་མི་རྒྱགས་པོ་ཞིག་འདུག

　　“ཅུས་ཀྲང་བསམ་ཁོ།”

　　སྐབས་དེར་བརྙན་མིག་ནང་ལ་ཅེར་ཡོད་པའི་སྤྱི་བདེ་མི་སྣ་གཟུགས་ཐུང་དེའི་ཁ་ནས་དེ་ལྟར་ཤོར་ཡང་རྒྱ་མཚོ་ཅུས་ཀྲང་དུ་འབོད་པའིིིིི་སྤྱི་བདེ་མི་སྣ་ཅུང་རྒན་པ་དེས་ནི་མིག་བརྡ་ཞིག་བྱས་སོང་བས་ཁོ་བོ་ཏབ་ཅིག་ལ་ཁ་གྲགས་རོག་མ་ཆོད་པར་ལུས།

　　རེ་ཞིག་འགོར་རྗེས་ཆོས་སྒྲོན་འབོལ་ཁྲིར་བསྙེས་ཏེ་གཉིད་སོང་བ་བཞིན་འགུལ་ཙམ་ཡང་མི་བྱེད་ཅིང་།མི་རྒྱགས་པོ་དེས་ནི་མཁྲིས་ཀྱི་མི་དེའི་རྣ་རྩར་ཅི་ཞིག་བཤད་སོང་བས་དེ་གཉིས་ཀྱིས་ཆོས་སྒྲོན་དཔུང་བ་གཡས་གཡོན་ནས་བསྐྱོར་ཏེ་ཁོ་ཚོ་སྔ་ཕྱིར་སྒོར་ཕྱིན་སོང་།

　　བརྙན་མིག་ནང་བལྟས་རྗེས་སྤྱི་བདེ་མི་སྣས་ཤི་བོའི་བེམ་པོར་བརྟག་དཔྱད་བྱེད་དགོས་ཞེས་ཆོས་སྒྲོན་གྱི་བེམ་པོ་སྨན་ཁང་དུ་ཁྱེར་སོང་བ་དང་།སྦྱིན་བདག་དང་གཡང་མཚོ།མཚོ་མོ་གསུམ་ཡང་དོན་རྐྱེན་གྱི་འབྲེལ་ཡོད་མི་སྣ་ཡིན་ཞེས་ཁོ་གསུམ་ཡང་རླངས་འཁོར་ནང་བརྫངས་དེ་ཁྲིད་སོང་།

　　རྗེས་ནས་ཤེས་གསལ་ལྟར་ན།མ་གཞི་མི་རྒྱགས་པོ་དེ་ནི་དངོས་གནས་ལས་བྱེད་པ་ཞིག་ཡིན་པར་འདུག་ཅིང་།ད་དུང་རྫོང་གི་ལས་ཁུངས་ཆེ་གེ་མོ་ཞིག་གི་ཅུས་ཀྲང་ཡང་ཡིན་པར་འདུག

　　ཕྱིར་སོང་རྗེས་སྤྱི་བདེ་མི་སྣ་རྒན་པ་སྟེ་རྒྱ་མཚོ་ཅུས་ཀྲང་གིས་སྤྱི་བདེ་མི་སྣ་གཟུགས་ཐུང་དེ་རང་གི་གཞུང་ལས་ཁང་ནང་བོས།ཁོ་བོས་སྤྱི་བདེ་མི་སྣ་གཟུགས་ཐུང་དེ་གྱང་ངོས་ན་མི་དམངས་ལ་ཞབས་འདེགས་ཞུ་ཞེས་སྦྱར་ཡོད་པའི་གཙོ་འཛིན་གྱི་གསུང་ཚིག་དེའི་རྩ་ན་བཞག་ཡོད་པའི་ཀོ་བའི་འབོལ་ཁྲི་རུ་འདུག་དུ་བཅུག་པ་དང་།དེ་ནས་ཤོག་ཕོར་ཞིག་གི་ནང་ལ་ནམ་རྒྱུན་གོང་རིམ་མགོ་ཁྲིད་རྟོགས་ཞིབ་ལ་ཡོང་དུས་མ་གཏོགས་མི་ལྡུགས་པའི་ཇ་ཕུའུ་ཨར་གང་བླུགས་ནས་བྱིན།

　　“ཞོའོ་ཚེ།ཁྱོད་ནམ་ཞིག་ལ་རྫོང་སྤྱི་བདེ་ཅུས་ལ་ཡོང་བ་རེད་དམ།”

　　རྒྱ་མཚོ་ཅུས་ཀྲང་གིས་སྐད་ཀྱི་འགྲོས་ཅུང་དལ་བའི་སྒོ་ནས་དེ་ལྟར་དྲིས།

　　“ཉེར་གཅིག་ལོར་ཡོང་བ་རེད།”

　　“རེད།ཉེར་གཅིག་ལོ།ངའི་རྗེར་འབྲངས་ནས་ལོ་གསུམ་ཙམ་འགོར་འདུགཨང་།”

　　“རེད་ལགས།”

　　“དེ་དུས་ངས་ཁྱོད་ཡར་འཐེན་མི་བྱེད་རྒྱུ་ན་ཁྱོད་ད་དུང་ཞང་མངགས་གཏོང་ཁང་ན་ཡོད་སྲིད།”

　　རྒྱ་མཚོ་ཅུས་ཀྲང་གིས་དེ་ལྟར་ཟེར་ཞོར་དུ་ཀྲུང་ཧྭ་རྟགས་ཅན་གྱི་དུ་སྒམ་ཞིག་བླངས་ཤིང་དེ་ལས་དུ་རྐང་གཉིས་བླངས་ནས་གཅིག་ཞོའོ་ཚེ་ཡི་སར་བསྲིངས་ཤིང་ཅིག་ཤོས་རང་གི་ཁར་བཙུགས་ཏེ་མེ་བསྒྲོན།ཁོ་བོས་བསྟུད་མུར་ཐེངས་འགར་གཞིབ་ཅིང་དུ་བ་ཕོན་པོ་ཞིག་ཡར་ནས་ཡར་རུ་འཕགས་ཏེ་གཙོ་འཛིན་གྱི་མི་དམངས་ལ་ཞབས་འདེགས་ཞུ་ཞེས་པའི་གསུང་ཚིག་སྟེ་རྒྱ་ཡིག་ཆེན་པོ་དེ་དག་ཀྱང་སྐད་ཅིག་ལ་བསྒྲིབས་པར་བྱས།

　　“རེད།དེ་དུས་ཁྱེད་ཀྱི་བཀའ་དྲིན་མིན་རྒྱུ་ན་ང་རང་རྫོང་མཁར་ལ་ལས་གནས་སྤར་ཐུབ་མེད།”

　　ཞོའོ་ཚེས་དུས་རྒྱུན་རང་ཉིད་གོང་ནས་མཐོན་པོ་བྱས་ཏེ་ལག་འོག་གི་མི་ལ་བཀའ་འབེབས་པར་དགའ་བའི་ཅུས་ཀྲང་གིས་དེ་རིང་འདི་ལྟར་རང་ཉིད་གཞུང་ལས་ཁང་ནང་བོས་ཏེ་དངོས་སུ་ཇ་ལྡུགས་པ་ཡིད་ལའང་མ་དྲན་ཞིང་།ལྷག་པར་ཅུས་ཀྲང་གིས་ཅིའི་ཕྱིར་སྐད་ཆ་འདི་ལྟ་བུ་ཞིག་བཤད་དགོས་པ་ཁྱོན་ནས་ཤེས་མ་སོང་།

　　“གནའ་མིས་ཁ་དཔེར་ཡང་རྐང་ཐང་རྟ་ཞོན་ལ་རེ་དུས་ཡོད་ལ།རྟ་ཞོན་རྐང་ཐང་ལ་རེ་དུས་ཀྱང་ཡོད་ཟེར།དེ་དུས་ངས་ཁྱོད་ལ་རོགས་རམ་བྱས་པ་རེད།ད་ལྟ་ཁྱོད་ཀྱིས་ཀྱང་ང་ལ་རོགས་རམ་ཞིག་བྱེད་དགོས་འདུག”

　　“རོགས་རམ་ཅི་ཞིག”

　　“དེ་གཙོ་བོ་མ་རེད།ཁྱོད་ཀྱིས་ང་ལ་རོགས་རམ་བྱེད་དམ།”

　　“གལ་ཏེ་ངས་བསྒྲུབ་ཐུབ་པ་ཞིག་ཡིན་ན་རོགས་རམ་ལོས་བྱེད།”

　　“ཧ་ཧ་ཧ།དེ་རེད།སྐད་ཆ་དེ་ཡོད་པས་ཆོག”

　　“ཅུས་ཀྲང་དོན་ངོ་མར་དོན་དག་ཅི་ཞིག་ལ་རོགས་རམ་བྱེད་དགོས།ད་ནི་ཁྱེད་ཀྱིས་ང་ལ་བཤད་ན་ཆོག་གམ།”

　　ཞོའོ་ཚེས་ཅུས་ཀྲང་གི་དགོད་སྒྲ་ལ་རྒྱུན་ལྡན་མིན་པའི་ཆ་ཞིག་གིས་ཁེངས་འདུག་པ་ཚོར་ཞིང་སེམས་ལ་དབང་མེད་དུ་འཚུབ་ཆ་ཞིག་ཀྱང་ལངས།

　　“སྡོད་སྡོད།མ་བྲེལ།ཁྱོད་ནི་མ་འོངས་པར་དོན་ཆེན་བསྒྲུབ་པའི་མི་རེད།དེ་འདྲ་བྲེལ་ནས་ཅི་བྱེད།”

　　ཅུས་ཀྲང་གི་གདོང་ལ་གཡོ་འཛུམ་ཞིག་ལངས་ཏེ་དེ་ལྟར་ཟེར་ཞིང་སྒོ་ཕྱེ་སྟེ་མི་གཞན་གྱིས་ལྐོག་ཉན་བྱེད་བཞིན་ཡོད་མེད་ལ་བལྟས།དེ་ནས་སྒོའི་ནང་ཟྭ་བརྒྱབ་སྟེ་ཕྱིར་འདུག་སྟེགས་སྟེང་བསྡད་དེ་མདུན་གྱི་ཤེལ་ཕོར་ལས་ཇ་ཧུབ་གང་སྒོག་སེར་མིད་རྗེས།

　　“ཞོའོ་ཚེ།ད་ཅིས་བརྙན་མིག་ལས་ཁྱོད་ཀྱིས་སུ་མཐོང་སོང་ངམ།”

　　“ཤི་ཟིན་པའི་ཆོས་སྒྲོན་མཐོང་སོང་།”

　　“མ་རེད།མ་རེད།དེ་ཟེར་བ་མིན།”

　　“མཚོ་མོ་དང་གཡང་མཚོ་ཡང་མཐོང་སོང་།”

　　“དེ་ཡང་མ་རེད།དེ་དག་ལས་གཞན་སུ་མཐོང་སོང་།”

　　“ཅུས་ཀྲང་བསམ་ཁོ།”

　　རྒྱ་མཚོ་ཅུས་ཀྲང་གི་མིག་ཟུང་གློ་བུར་དུ་སྒོར་སྒོར་དུ་གྱུར་ཏེ“སྐད་མགོ་དམའ་མོ་བྱོས།གཞན་གྱིས་གོ་ན་མི་བཟང་།”ཟེར་ཞིང་།སྐད་མགོ་དམའ་མོས་མུ་མཐུད་དུ།

　　“འོ་ལེ།ཅུས་ཀྲང་བསམ་ཁོ་ཁྱོད་ཀྱིས་མཐོང་ཡོད་པ་དེ་རེད།བལྟས་ཡོང་ན་དོན་རྐྱེན་འདི་ཁོ་བོར་འབྲེལ་བ་མེད་མི་སྲིད།”

　　“ངས་ཀྱང་དེ་ལྟར་བསམས།”

　　“འོན་ཀྱང་ཅུས་ཀྲང་བསམ་ཁོ་ང་ལ་མཚོན་ན་དངོས་གནས་དྲིན་ཅན་ཡིན།ཁོ་མིན་རྒྱུ་ན་ངའི་བུས་ད་དུང་བྱ་བ་དངོས་རག་ཐུབ་མེད།ཁོས་ད་དུང་ང་ལ་ངའི་བུ་ཅུས་ཀྲང་གཞོན་པར་ཡར་འཐེན་བྱེད་རྒྱུའི་ཁས་བླངས་ཡོད།”

　　“འོ་་་་དེ་འདྲ་རེད་དམ།རྒྱ་མཚོ་ཅུས་ཀྲང་འོ་ན་ད་ལྟ་ཁྱོད་ཀྱིས་ང་རང་བོས་ནས་་་་་”

　　“ཁྱོད་ཀྱིས་ད་དུང་ཧ་གོ་ཡིན་མི་འདུག་གམ།”

　　“དངོས་གནས་ཧ་གོ་མ་སོང་།”

　　“ཨ་ཡ་ཡ།ཁྱོད་ད་རག་བར་དུ་ཉེས་དོན་ཉེན་རྟོག་པའི་རུ་གཙོར་ཇི་ལྟར་བསྡད་པ་ཡིན།”

　　“……”

　　“དྲང་མོར་བཤད་ན་རོགས་རམ་བྱེད་རྒྱུ་ཧ་ཅང་སླ་མོ་ཞིག་ཡིན།ངས་ཁྱོད་རང་ཉེས་དོན་འདིའི་འགན་འཛིན་པར་བསྐོཁྱོད་ཀྱིས་ཆོས་སྒྲོན་གྱི་ཤི་རྐྱེན་ཅུས་ཀྲང་བསམ་ཁོར་འབྲེལ་བ་མེད་པ་ཞིག་བྱེད་དགོས།ཇི་ལྟར་འབྲེལ་བ་མེད་པ་ཞིག་བྱེད་པ་ཁྱོད་རང་ཉིད་ཀྱིས་ཐག་གཅོད་བྱོས་དང་ཆོགང་ལ་བསམ་འཆར་ཅི་ཡང་མེད།”

　　ཞོའོ་ཚེའི་སྐད་ཆ་འདི་དག་ཐོས་རྗེས་རེ་ཞིག་ཅི་བྱེད་འདི་བྱེད་མི་ཤེས་པར་གྱུར་ཞིང་།ཁོའི་སྣང་ངོར་མིག་མདུན་གྱི་ཅུས་ཀྲང་རྒྱ་མཚོ་ནི་དངོས་གནས་རྒྱ་མཚོ་ཆེན་པོོ་ཞིག་དང་འདྲ་བར་ཁང་མིག་འདི་ཡོངས་སུ་བཀངས་བ་དང་།ཁོ་བོ་ཡོངས་སུ་དེའི་གཏིང་དུ་ནུབས་པར་བྱས་ཏེ་དབུགས་ཀྱང་གཏོང་ལེན་དཀའ་བའི་སྣང་བ་ཤར།

　　“འོ་ན་བེམ་པོའི་བརྟག་དཔྱད་ཟིན་ཐོ་ཐོན་ཚེ་གནས་ཚུལ་དངོས་ཤེས་མི་འགྲོའམ།”

　　“དེར་ཁྱོད་ཀྱིས་སེམས་ཁུར་བྱེད་མི་དགོས།སྨན་ཁང་དང་ལག་རྩལ་ཚན་ཁག་གི་སར་ངས་བཀོད་སྒྲིག་བྱས་ཟིན།ད་ཐེངས་ཁྱོད་ཀྱིས་ང་ལ་ངེས་པར་རོགས་བྱེད་དགོས།ང་ལ་བུ་ཀན་གཅིག་པོ་ལས་མེད།ཁོར་ནུས་པ་ཅི་ཡང་མེད་པས་མུ་མཐུད་དུ་ཅུས་ཀྲང་བསམ་ཁོར་བརྟེན་དགོས།དེ་བས་ཅུས་ཀྲང་བསམ་ཁོ་ངེད་ཕ་བུ་གཉིས་ལ་མཚོན་ན་ཧ་ཅང་གལ་ཆེ་བའི་མི་ཞིག་ཡིན།”

　　“ཡ་ཡ་་་་”

　　“ཞོའོ་ཚེ།དྲང་མོར་བཤད་ན་ད་ཐེངས་ངས་ཁྱོད་ལ་ཡང་གོ་སྐབས་ཤིག་སྟེར་འདོད་པ་ཡིན།གཅིག་ནས་ང་ཁྱོད་ཀྱི་ནུས་པར་ཡིད་ཆེས་ཡོད་པ་དང་།གཉིས་ནས་དོན་དག་འགྲུབ་རྗེས་ཁྱོད་ལ་ཡང་བཟང་ཆ་ཞིག་ཡོད་ཐག་ཆོད་ཡིན།”

　　ཅུས་ཀྲང་རྒྱ་མཚོས་མཛུབ་བར་གྱི་དུ་རྐང་དེ་དུ་ཐལ་སྤྲུགས་སྣོད་ནང་བཙུར་བ་དང་།ག་ལེར་མདུན་གྱི་ཇ་ཕོར་བླངས་ནས་ཧུབ་ཞིག་བྱས་།

　　“ད་ནི་ང་རང་ཡང་ལས་འཁྱུར་བྱེད་ལ་ཉེ་བར་འདུགདེ་བས་ད་ཐེངས་ནི་དངོས་གནས་ཁྱོད་ལ་མཚོན་ན་གོ་གནས་འཕར་བའི་གོ་སྐབས་བཟང་བོ་ཞིག་རེད།གོ་སྐབས་དམ་འཛིན་བྱེད་མི་བྱེད་ཁྱོད་རང་ཉིད་ལ་ཐུག་ཡོད།”

　　“ཡ་ཡ།ཅུས་ཀྲང་གིས་བཤད་པ་ཇི་བཞིན་བྱེད།”

　　“རེད།ངས་མིར་བལྟས་པ་འཆུག་མི་འདུགཞོའོ་ཚེ།ཁྱོད་དངོས་གནས་མི་རིག་རྒོད་ཅིག་རེད།དོན་དག་འགྲུབ་རྗེས་ངས་གོང་རིམ་ལ་ཡར་ཞུ་བྱས་ཏེ་ཁྱོད་སྤྱིི་བདེ་ཅུས་ཀྱི་ཅུས་ཀྲང་གཞོན་པར་མཚམས་སྦྱོར་བྱེད།”

　　“ཅུས་ཀྲང་གི་གཟིགས་སྐྱོང་ལ་བཀའ་དྲིན་ཆེ།ད་ནི་དོན་གཞན་མེད་ན་ང་བུད་འགྲོ།”

　　ཞོའོ་ཚེས་དེ་ལྟར་ཟེར་བཞིན་ཕྱིར་འགྲོ་རྩིས་བྱེད་དུས་ཅིས་ཀྲང་ཡང་བསྐྱར་ཁོ་བོ་བོས་ཏེ་“དོན་འདི་ཅུས་ཀྱི་ནང་འུ་གཉིས་ཀྱིས་མ་གཏོགས་གཞན་གཅིག་གིས་ཀྱང་མི་ཤེས་པས་ངེས་པར་གསང་རྒྱ་བྱེད་དགོས་”ཞེས་བདམས་སོང་།

　　སྤྱི་བདེ་མི་སྣས་ཆོས་སྒྲོན་གྱི་སྤྱི་དམངས་གནས་ཚུལ་ལ་རྒྱུས་ལོན་བྱས་མཐར་ད་གཟོད་ཁོ་མོ་ནི་ཆུ་ལུང་ཞང་ཚ་ཤུལ་སྡེ་གསར་ནས་ཡིན་པ་རྟོགས་ཤིང་།ད་ལོ་ལོ་ཉེར་གཉིས་དང་ཡུལ་དུ་ཨ་མ་གཅིག་པུ་ལས་གཉེན་ཉེ་གཞན་ཅི་ཡང་མེད་པ།དམའ་འབྲིང་མཐར་ཕྱིན་རྗེས་རྫོང་ལས་རིགས་ལག་རྩལ་སློབ་གྲྭར་སོང་ཞིང་དེ་ནས་ལོ་གཅིག་ཙམ་འགོར་རྗེས་སློབ་བྱོལ་བྱས་ཏེ་རྫོང་མཁར་ནས་ཇ་ཁང་དང་ཟ་ཁང་སོགས་ནས་གླ་བརྒྱབ་ཅིང་།ཟླ་གཅིག་གི་ཡར་སྔོན་ནས་ཟ་ཁང་ཞིག་ནས་ད་ལྟའི་ཆང་ཁང་འདིར་ཡོང་བ་སོགས་ཤེས།

　　ཁོ་ཚོས་སྦྱིན་བདག་དང་གཡང་མཚོ་མཚོ་མོ་གསུམ་གྱི་གནས་ཚུལ་ལ་ཡང་རྒྱུས་ལོན་བྱས་ཤིང་།ལྷག་པར་དུ་གཡང་མཚོ་དང་མཚོ་མོ་ཆོས་སྒྲོན་གསུམ་གྱི་འབྲེལ་བར་རྩད་ཞིབ་ནན་མོ་བྱས།དེར་མ་ཟད་ད་དུང་ཆང་ཁང་གི་ཆང་གི་དག་རྫུན་ལ་ཡང་བརྟག་དཔྱད་བྱེད་དགོས་ཞེས་རྫོང་བཟོ་ཚོང་ཅུས་དང་འཕྲོད་བསྟེན་ཅུས་སོོགས་ཀྱི་འབྲེལ་ཡོད་མི་སྣ་མངགས་ཏེ་བརྟག་དཔྱད་བྱེད་དུ་བཅུག་ཀྱང་གནད་དོན་གཞན་ཞིག་རྙེད་མ་སོང་།

　　ཕྱི་དྲོའི་དུས་སུ་སྨན་ཁང་གིས་བེམ་པོར་བརྟག་དཔྱད་བྱས་པའི་མཇུག་འབྲས་ཀྱང་ཐོན་བྱུང་།སྦྱིན་བདག་དང་གཡང་མཚོ།མཚོ་མོ་གསུམ་གྱི་ཡིད་ཀྱི་རྒྱུ་ལའང་མ་དྲན་པ་ནི་ཆོས་སྒྲོན་གྱི་ཤི་རྐྱེན་ནི་མི་གཞན་སུ་ལའང་འབྲེལ་བ་མེད་པར་ཁོ་མོས་གཉིད་བཅག་མང་དྲགས་པ་དང་ངལ་དུབ་ཐལ་དྲགས་པས་ཤི་བ་ཡིན་པ་དེ་རེད།

　　ཕྱི་དྲོ་དེར་སྤྱི་བདེ་ཅུས་ཀྱིས་ཆོས་སྒྲོན་གྱི་ཨ་མར་ཁ་པར་བཏང་སྟེ་ཆོས་སྒྲོན་གྱི་བེམ་པོ་ལེན་དུ་ཡོང་དགོས་པའི་བརྡ་རྒྱབ།ཁ་པར་ལས་ཆོས་སྒྲོན་གྱི་ཨ་མས་ཡུད་ཙམ་ལ་ཅི་ཡང་མི་སྨྲ་བར་སྡོད་ཅང་།རེ་ཞིིག་འགོར་རྗེས་དལ་བྲེལ་མེད་པའི་སྐད་གདངས་ཤིག་གིས་“དོ་དགོང་ཐོན་དུ་འཇུག”་ཅེས་ཟེར།མཚོ་མོས་ཆོས་སྒྲོན་གྱི་དེ་སྔའི་དགའ་གྲོགས་ལ་ཁ་པར་བཏང་ནས་ཆོས་སྒྲོན་གྱི་ཤིད་དོན་བརྗོད་དེ་ཆེས་མཐའ་མཇུག་གི་སྐྱེལ་མ་ཞིག་བྱེད་དགོས་པའི་རེ་བ་བཏོན་པ་དང་དེས་ཀྱང་དལ་བྲེལ་མེད་པའི་སྐད་གདངས་ཤིག་གིས་“ཁོམ་སོང་ན་སླེབས་སུ་འཇུག”་ཅེས་ཟེར།

　　སྨག་ཡོངས་སུ་རུབ་ཟིན།ནམ་མཁར་སྐར་མ་གཅིག་ཀྱང་མཐོང་རྒྱུ་མེད་པར་ནག་རོག་གེར་འདུགཆོས་སྒྲོན་གྱི་ཨ་མས་སྡེ་བའི་རྒད་པོ་གཉིས་ཁྲིད་དེ་སླེབས།ཁོ་ཚོ་རྫོང་སྨན་ཁང་དུ་སླེབས་དུས་གཡང་མཚོ་དང་མཚོ་མོ་གཉིས་ཀྱིས་སྔར་ནས་སྨན་ཁང་གི་བེམ་པོ་འཇོག་སར་བསྒུགས་འདུག

　　“དོ་དགོང་སྦྱིན་བསྲེགས་བྱེད་དགོས་སམ།”

　　མཚོ་མོས་ཆོས་སྒྲོན་གྱི་ཨ་མར་དེ་ལྟར་དྲིས་ཀྱང་དེས་ནི་ལན་ཅི་ཡང་བཏབ་མ་སོང་།

　　“འོ་ལེ།སྦྱིན་བསྲེགས་བླ་མས་དོ་དགོང་སྦྱིན་བསྲེགས་བྱེད་དགོས་གསུང་།”རྒད་པོ་གཅིག་གིས་གདོང་ནག་རོག་གེར་དེ་ལྟར་ཟེར་ཞིང་ཤུགས་རིང་ཞིག་འབྱིན།

　　རྒད་པོ་དེ་གཉིས་ཀྱིས་ཆོས་སྒྲོན་གྱི་བེམ་པོ་རླངས་འཁོར་གྱི་འཁོར་སྒམ་ནང་བཞག་ཅིང་།ཅིག་ཤོས་ཀྱིས་རླངས་འཁོར་བསྐོར་ཏེ་ཅིག་ཤོས་བེམ་པོ་བཞག་ཡོད་པའི་འཁོར་སྒམ་ནང་བསྡད་དེ་ཕྱིན་སོང་།སྲང་ལམ་ན་མི་དང་རླངས་འཁོར་སོགས་ཀྱང་གཅིག་ཀྱང་མཐོང་རྒྱུ་མི་འདུགགྲང་རླུང་རྩུབ་མོ་ཞིག་ཀྱང་བར་མེད་དུ་ལྡང་སྟེ་སྲང་ལམ་གྱི་གད་སྙིགས་དག་ཕར་འདེད་ཚུར་འདེད་བྱེད།

　　ཆོས་སྒྲོན་གྱི་ཨ་མ་དང་གཡང་མཚོ།མཚོ་མོ་གསུམ་སྨན་ཁང་གི་སྒོ་ཁ་ནས་འགྲེངས་ཏེ་འདུག་ཅིང་།ནུབ་ཕྱོགས་སུ་འཐེན་པའི་གཞུང་ལམ་དཀྱིལ་ན་ཆོས་སྒྲོན་གྱི་བེམ་པོ་ཁྱེར་ཏེ་ཐག་ཇེ་རིིང་ནས་ཇེ་རིང་ཡིན་པའི་རླང་འཁོར་དེའི་དམར་ལམ་ལམ་གྱི་མཇུག་སྒྲོན་ལ་ཅེར་ཏེ་ཡུན་རིང་དུ་ལུས།གར་འོངས་མི་ཤེེས་པའི་རླུང་འཚུབ་ལྡོམ་པོ་ཞིག་ཀྱང་ལངས་ཡོང་སྟེ་དམར་ལམ་ལམ་བྱེད་པའི་རླངས་འཁོར་གྱི་མཇུུག་སྒྲོན་དེའང་ཡོངས་སུ་བསྒྲིབས་པར་བྱས།།

　　                                 ༢༠༢༥ལོའི་《ཤ་སྐྱ》དེབ་གཉིས་པར་བཀོད།

རྩོམ་སྒྲིག་པ། གངས་དགའ།
 

རྩོམ་ཁུངས། ངེད་དྲ་བ།