ཞོགས་ཀའི་མཚམས་སྤྲིན་གྱི་ཕག་ན་ཡིབ་པའི་ཉི་གཞོན། མཁའ་མཐའི་རི་རྩེ་ན་འགུལ་ཙམ་འགུལ་ཙམ་གྱིས་འཕགས། ཐོག་ཁང་གི་བྱ་འདབ་འོག་འཚང་བའི་སྐྱུང་ཀ་དག་ཁྱུ་ཁྱུ་བྱས་ཏེ་ཐག་རིང་ལ་འཕུར། ཐུར་དུ་དཔྱངས་པའི་སྒེའུ་ཡོལ་སྔོན་པོ་རླུང་བུས་དལ་གྱིས་སྒུལ། དག་གཙང་གི་བར་ཁྱམས་ན་དུག་སེལ་དང་སྨན་དྲི་ཁ་བོ་ཞིག་ག་སར་འཐུལ། སྐབས་ཐོག་འདིར། གཉོམ་དུང་དུང་གི་ཚེ་སྲོག་ཅིག་འཇིག་རྟེན་མ་མའི་ངོ་མཚར་གྱི་ལྟད་མོ་མཇལ་བར་བསླེབས།

　　གསལ་ལ་གདངས་མཐོ་བའི་ཨག་སྐད་དེ་ནི། སྨན་ཁང་འདིའི་ལྷིང་འཇགས་དཀྲོགས་པའི་ཅོང་བརྡ་དང་སྙིང་ཁ་བཙང་བའི་ཁྱིམ་མི་ཚོ་བདེ་ལ་དབབ་བྱེད་ཀྱི་བརྡ་དོན་ཞིག་ཅིས་མ་ཡིན། ཨ་འཇམ་ཚར་ལྭའི་ཁུད་ན་དབུགས་ལྷེམ་ལྷེམ་རྒྱུ་བའི་ཁྱེའུ་དམར་འབྱར། ལག་ཟུང་གིས་སྐྱོར་ནས་བྲང་ཁར་གླན་ཚེ། ཚེ་སྲོག་ཆུང་ཆུང་འདི་ཟླ་དགུར་མངལ་གྱི་ཁང་བཟང་དུ་རུམ་པའི་ཁོ་བོའི་མ་ལོའི་དཀའ་ཚེགས་དྲན་པར་འཆར་ཅིང་སྲོག་རྒྱུན་གཅོད་ལ་ཁད་པའི་ན་ཟུག་དེ་ཡང་ཡིད་ལ་འཁོར་བར་བྱེད།

　　ཨ་མ་ནི་གནམ་འདེགས་ཀ་བ་དང་འཁོར་བའི་རྟེན་ཕུར། སྲོག་གི་ཕྱེད་ཀ་དང་སྙིང་ཆུང་འཚོ་ཡ་ཡིན་རབས་གླེང་མཁན་མང་ན་ཡང་། ཐེངས་དང་པོར་ཨ་མར་གྱུར་བའི་སྐྱེ་ཟུག་དང་དཀའ་སྡུག ཉེན་ཁ་བརྗོད་པ་མཐོང་ཡུལ་དུ་མ་གྱུར་པས། བདག་གིས་ཆེས་ཕལ་བའི་གཞོན་ནུ་མ་ཞིག་གི་བུ་སྐྱེའི་གོ་རིམ་བརྒྱུད། འཇིག་རྟེན་གྱི་ཨ་མ་ཡོད་དོ་ཅོག་གི་གཞལ་མཐའ་བྲལ་བའི་བཀའ་དྲིན་དང་བླ་ན་མེད་པའི་སྙིང་སྟོབས་དེ་ངག་མ་ལྐུགས་ཙམ་དུ་གླེང་བར་འདོད་བྱུང་།

　　སྤྱིར་བུད་མེད་ནི་འཇོ་སྒེག་མ་དང་འཕྱོར་ལྡན་མ། ཡིད་འོང་མ། སྐེད་ཕྲ་མ། རི་དྭགས་མིག་ཅན་མ་སྟེ་མཛེས་པའི་ཆ་དེ་དག་དང་ཁ་བྲལ་ཐབས་མེད་ལ། གཞན་ཡིད་འགུག་པའི་འཇོན་ནུས་དེར་སུས་ཀྱང་དང་དོད་བྱ་སྲིད་མོད། བྱིས་པ་སྐྱེ་ལ་ཉེ་བའི་སྦྲུམ་མ་ཞིག་ལ། མིང་དེ་དག་ལར་ནས་འཚམ་པོ་མེད་དེ། དེ་རིང་བརྗོད་པར་བྱ་བའི་མི་སྣ་བདག་གི་ཚ་མོར་ཆ་བཞག་ན། དེ་སྔའི་ཙ་རིའི་སྨྱུག་མ་ལྟར་གྱི་སྐྱེས་གཟུགས་དང་། དཀར་ལ་དམར་མདངས་འཛིན་པའི་ཞལ་ངོ་སོགས་ཀྱི་དཔལ་དང་ཡོངས་སུ་བྲལ་ཏེ། ངོ་གདོང་ནག་ལ་མིག་རྩ་དམར། ཁ་མིག་བསྐྲངས་ཤིང་མགོ་སྐྲ་གཟེངས། རྐང་ལག་སྦོམ་ཞིང་ལྟོ་བ་ལྡིར། སྔར་གྱི་སྐྱེ་གཟུགས་ཕྲ་ལ་མིག་གཉིས་གོར་བའི་མཛེས་ཉམས་ཀྱི་ཤུལ་ཙམ་ཡང་མ་མཆིས།

　　ང་རང་ཁོ་མོའི་མཐོང་ཡུལ་དུ་གྱུར་དུས། ཨ་ཅེ་ཞེས་སྤྲོ་འཛུམ་ཡོད་ཚད་ཀྱིས་བསུས་ན་ཡང་། བསྲན་ཐབས་མེད་པའི་སྐྱེ་ཟུག་དེ་ཐོན་ཐེངས་རེར། ངག་ནས་སྐད་ཆ་མི་འཁྲོལ་ལ། ཡ་ཁོག་གི་དཔའ་སྙིང་དེ་ཡང་གཞོམ་པར་བྱེད། ནད་ཁང་གྲུ་བཞིའི་རྐུབ་སྟེགས་དང་མལ་ཁྲི་མ་གཅོག་ཙམ་དང་། ལྷུ་ཆེན་དང་ལྷུ་ཆུང་མ་ཐོར་ཙམ། སྙིང་རྩ་དང་དབུགས་རྒྱུན་མ་ཆད་ཙམ་གྱི་ཁོ་མོས་དུས་ཚོད་ཕྱེད་ཙམ་ལ་གཟེར་ཟུག་དེར་ཡ་ལན་སྤྲད་ནས་སྡོད་དགོས།

　　རྔུལ་ཆུས་འབྱར་བའི་སྐྲ་ལོ་དང་སྐྱ་ཐག་ཆོད་པའི་ངོ་གདོང་། སེར་ཀ་གས་པའི་མཆུ་སྒྲོས། སྐྱི་ཤུན་དེད་པའི་ལག་ངར་རིག་ན། ཁྱིམ་མི་ཚོར་ཁ་བརྡ་དང་དགོད་སྒྲ་མེད་ལ། ལྟོགས་སྣང་དང་ཡི་ག་ཡང་དབེན། གཟེར་ཟུག་གི་བར་ཐག་ཉེ་ནས་ཉེ་རུ་ཕྱིན། ཅི་བྱ་གཏོལ་བྲལ་གྱི་ང་ཚོས་བཀོད་པ་ཡོད་སྙམ་བགྱི་བའི་ནད་གཡོག་མར་བྱིས་པ་སྐྱེ་བར་ཐབས་གཞན་མེད་ན། སྨན་ཁང་དུ་ཡོང་བ་དོན་མེད་ཡིན་པའི་ཚ་འདྲི་ཡང་ཡང་བཏང་། གདོང་ལ་མིག་སྐྱག་འབྱར་ཞིང་འདྲུད་ལྷམ་གྱོན་པའི་ནད་གཡོག་མས་ངག་ཐོན་མི་ཐོན་གྱིས་མ་གཟེར་བར་བྱིས་པ་ཞིག་སྐྱེ་ཐུབ་བམ། མངལ་སྒོ་སོར་དོ་ཙམ་ལས་ཕྱེ་མི་འདུག ནངས་ཀ་བར་སྐྱེ་ཐུབ་རྒྱུ་མ་རེད་ཅེས་སྒོ་ཐག་སེར་རྒྱབ། ཚེ་སྲོག་ཆུང་ཆུང་འདིས་ནམ་གུང་གི་ལྷིང་འཇགས་དཀྲོག་མི་འགྲོ་འམ་སྙམ་པའི་ངེད་ཅག་གི་རེ་བ་རྨང་ནས་བཅོམ། གཉིད་སེམས་ལར་ནས་མེད་པའི་ང་ཚོས་རེ་ཆད་ཀྱི་མགོ་བོ་དུད་དེ། ཧ་ཅང་རིང་བའི་མཚན་ལམ་འདི་རང་རང་ས་ནས་འབད་པས་བསྐྱལ།

　　སྐྱེས་བསྒུག་གི་དུས་ཚོད་སྐར་ཆ་རེ་རེ། ནད་གཡོག་མའི་སྒྱིད་ལུག་གི་འགྲོ་འོངས་ཐེངས་འགའི་བར་ནས་བཞུར་སོང་། སྐྱ་རེངས་བཀྱག་བྱུང་། ནངས་མོར་བུ་སྐྱེ་ཆེད་མཁས་སྨན་པ་ནད་གཡོག་འགས་བསྐོར་ནས་སླེབས་ཤིང་། བརྟག་དཔྱད་ཐེངས་ཤིག་བྱས་རྗེས། བྱིས་པའི་མགོ་གཞུག་ད་དུང་འཁོར་མི་འདུག ཨ་མའི་ཁྲག་ཤེད་ཡང་ཧ་ཅང་མཐོ། གཤག་བཅོས་ཀྱི་ཐབས་ལ་མ་བརྟེན་ན། བྱིས་པ་རྒྱུན་ལྡན་ལྟར་སྐྱེ་མི་ཐུབ་པའི་རྒྱུ་མཚན་མང་པོ་བཤད། ཞག་གང་བོར་སྐྱེ་ཟུག་མྱངས་པའི་ཚ་མོར་ལྟ་བཞིན། སེམས་ནས་མ་བཟོད་པར། ནད་གཡོག་མར་ནུས་པ་ཅུང་ཙམ་ཡོད་པ་ཡིན་ན། སྔ་ས་ནས་བུ་སྐྱེ་དཀའ་བའི་གནད་དོན་དང་། ཁྲག་ཤེད་མཐོ་བའི་གནས་ཚུལ་རྟོགས་ན་འགྲིག དེ་ན་ཁོ་མོས་སྐྱེ་ཟུག་འདི་འདྲ་མྱངས་དགོས་ག་ལ་ཡོད། ཐབས་བཀོད་གཞན་ཞིག་མེད་དམ་ཞེ་ན། སྨན་པས་གཟེར་ཡུན་རིང་དྲགས་རྐྱེན་ཁོ་མོར་ཁྲག་ཤེད་མཐོ་བའི་སྦྲུམ་སྐྱེའི་སྣང་ཚུལ་བྱུང་ཡོད་ལ། བྱིས་པར་དབྱང་དབུགས་འདང་ངེས་ཀྱང་མེད་པས། མྱུར་མོར་གཤག་བཅོས་མ་བྱས་ན། མ་བུ་གཉིས་ཀར་ཉེན་ཁ་ཆེ་ལུགས་བརྗོད།

　　དུས་མདའ་ཐག་སྒྲ་དང་བཅས་སྐོར་བ་ལན་གཅིག་བརྒྱབ་པ་ན། ཏག་ཏག་ཞོགས་པའི་དུས་ཚོད་བདུན་དང་ཕྱེད་ཀར་འཁེལ་འདུག རྟེན་འབྲེལ་ཞུ། བུ་ཞིག་རེད་ཟེར་གྱིན་སྨན་པས་ནག་ཀྲིག་ཀྲིག་གི་མགོ་སྐྲར་མངལ་ཁྲག་འགོས་པའི་ཁྱེའུ་དམར་འབྱར་དེ་ངའི་ལག་ཏུ་གཏད། ཁ་སྣ་དམར་བོར་གྱུར་པའི་རྒྱུས་མེད་ཀྱི་ངོ་གདོང་དེས་ཧ་ཅང་མ་རངས་པའི་རྣམ་འགྱུར་གྱིས་ཐོད་པ་གཉེར་གཉེར་དང་། མིག་བཙུམ་བཙུམ། ཁ་གསེག་གསེག རྐང་ལག་ཤུད་ཤུད་བྱས་ཏེ་སྐད་འཛེར་འཛེར་ངང་ངུས་བྱུང་།

　　བྱིས་པ་རུམ་གྱི་དྲོ་སར་སྦྱར་བའི་ཨ་ནེ་སྒྲོལ་མས་དཔྲལ་བ་དཔྲལ་བར་གཏུག་སྟེ། ལོ་ལོ་མ་ངུ་གཉིད་ལ་སྡོད། གཉིད་ལ་སྡོད་དང་རྟ་ཞིག་སྟེར། སྟ་ལ་སྒ་ཞིག་སྟོད་ལ་སྟེར། ནམ་མཁའི་སྐར་མ་འཛིན་ལ་སྟེར། ས་ཡི་མེ་ཏོག་འབལ་ལ་སྟེར་ཞེས་ངུ་ཁ་ལེན་བཞིན། སྨན་ཁང་བར་ཁྱམས་ནས་ཕར་འགྲོ་ཚུར་འགྲོ་བྱེད།

　　ངའི་རྣ་ལམ་དུ་ཁབ་གྲིས་ཕོ་བ་གཤག་པའི་ཧྲག་སྒྲ་དང་ཚ་གཟེར། དྲོད་རླངས་དང་སྐྱེ་དབུགས་ཤོར་བའི་སུར་སྒྲ་ཡང་བསྐྱར་རྒྱུ་ཡོང་ལ། མཐོང་འཛིན་དུ་ཐེངས་དང་བོར་རང་ལུས་ནས་བཏོན་པའི་དམར་རྗེན་གྱི་བྱིས་པ་མངོན་ཚུལ་དྲན། ཇི་འདྲའི་ཆུང་བ་ལ་ཨང་། སྐྱེ་སྡུག་འདི་འདྲ་མྱངས་དགོས་མི་འདུག་སྙམ་པའི་དགའ་སྐྱོའི་མིག་ཆུ་ལྷུང་བ་ད་ལྟ་ཡིན་སྙམ་འདོད།

　　གཤག་བཅོས་ཁང་གི་སྒོ་ཁྲོག་སེར་ཕྱེ་བ་དང་མཉམ་དུ་ཚ་མོ་ཕྱི་རོལ་དུ་དེད་ཡོང་། གདོང་གི་མཆི་མ་མ་སྐེམ་པའི་ཁོ་མོ་ནད་ཁྲིར་བཞག་མ་ཐག སྔས་བསྟེན་འཇོག་མི་ཆོག་ལ་སྐད་ཆ་བཤད་མི་ཉན། གཉིད་ཁུག་མི་ཆོག་ལ་ཟས་ཀྱང་བཟའ་ག་ལ་རུང་། སྣ་ནང་ལ་དབྱང་དབུགས་དང་རྣ་ཁུང་དུ་སྲིང་བལ། བྲང་ཐོག་ཏུ་སྙིང་ཆས། དཔུང་པར་ཁྲག་བཤེར་ཆས། ལག་ངར་ལ་གནམ་ཁབ། ཕོ་བར་སེང་རས། མངལ་སྒོར་རྒྱུ་མ་དྲངས་པ་སོགས་རིག་ན་ལྟ་བས་མི་བཟོད་ལ། མྱངས་ན་སེམས་ཀྱིས་མི་ལོངས།

　　བཟི་སྨན་ནུས་པ་ཤོར་རྗེས་ཀྱི་དུས་ཚོད་ཉེར་བཞིའི་རིང་། ཚ་མོས་ཨམ་གཙིགས་བསྡམས་ནས་ཁོག་གཟེར་དང་། ཚ་གཟེར། ལྟོགས་གཟེར་རྐྱ་འཐབ་པའི་འཇིགས་སྐྲག་དེར་འཐབ་འཛིང་བྱས། འདར་འདར་གྱི་ལུས་ཕུང་དང་དགྱེ་སྒུར་མི་བཏུབ་པའི་སྐེད་པ། གཟེར་ཟུག་གི་འཁུན་སྒྲ་དང་འཁྱར་འཁྱོར་གྱི་འགྲོས་ལ་བལྟས་ན་སྙིང་ཤ་འདར།

　　ཕྱི་དྲོའི་མཚམས་ལ། ཁ་ལ་འབྲས་ལྡུར་ཉུང་ཙམ་འཐུང་རྗེས་ཁོ་མོའི་ངོ་མདངས་རིམ་བཞིན་སོས་ཤིང་། ཕུང་བོར་གསོན་ཤུགས་ཅུང་ཙམ་རྒྱས།

　　མཚན་དཀྱིལ་དུ། སྐྱེ་ཟུག་ལས་ལྡབ་འགྱུར་གྱིས་གཟེར་པའི་བུ་སྣོད་བསྐུམ་པའི་ན་ཟུག་དེས། ཞག་གང་བོར་ཚ་མོར་སྡང་སྡུག་བར་མེད་དུ་བསྟན་པས། གཉིད་ཅོག་ཙམ་ཡང་རྒྱག་མ་ཐུབ།

　　བྱིས་པར་ནུ་མ་ལྡུད་པ་ནི་དཀའ་ལས་མེད་ལ། ཨ་མས་ཁོའི་ཁ་ལ་ཐུག་ཙམ་གྱིས་འཇུབ་འགྲོ་བ་ཞིག་ཡིན་མོད། ནུ་ཁབ་གོན་པའི་དགེ་མཚན་ལས་རྩ་བ་རྒྱས་པའི་འོ་འཛིན་ནི་རྩེ་མོ་མེད་པའི་ཤིང་ལྡུམ་ལྟར་དུ་གྱུར་པས། བྱིས་པར་འོ་མ་ལྡུད་ཐབས་རྩད་ནས་མ་རྙེད། ཚ་མོའི་དབུགས་ལྒང་ལྟར་འབུར་ཞིང་ནུ་རྩ་སྔོ་སེང་ངེར་རྒྱས་པའི་མྱོས་བུམ་འོ་མས་བཀང་བས་ཟུག་གཟེར་དྲག་ཏུ་ལངས། ཐབས་ཟད་པའི་ང་ཚོས་ཁོ་མོའི་ནུ་མ་བཞོ་བར་བརྩམས་ཚེ། ཚ་མོ་དངངས་སྐྲག་གི་རྣམ་འགྱུར་སྙིང་རྗེ་ལ། སྲོག་རྩ་འབལ་བ་ལྟ་བུའི་ཚ་གཟེར་བསྲན་མ་ནུས་པར་ཁ་ཆུ་སྣ་ཆུ་ཙར་ཙར་དུ་བཞུར།

　　རང་སེམས་ལ་སྙིང་ཕུར་ཡང་ཡང་རྡེབ་པའི་ཨ་ཅེ་ཚུལ་དེ་མཐོང་བས་རྦད་དེ་བསྲན་ཚུགས་མ་སོང་། སྙིང་རྗེ་བའི་བུ་མོའི་གདོང་ལ་ལྟ་མ་བཟོད་པར་ཁང་མིག་གི་གྱན་ཟུར་དུ་བཀབ་སྟེ་ཁ་རོག་གེར་མིག་ཆུ་འབྱིད་ཅིང་གདའ། ཅི་ཁག་སྟེ། ཚ་མོས་ཐོག་མར་སྐྱེ་ཟུག་དང་བར་ཏུ་གཤག་བཅོས། ཐ་མ་ནུ་གཟེར་བཅས་འཕྲོ་རིམ་འཕྲོར་ཉིན་མཚན་གསུམ་ལ་མྱངས་པས། སྡུག་བསྔལ་མཉམ་བསྐྱེད་ཀྱི་སེམས་ཁྲལ་འདི་སྐྱེད་མ་སུ་ཡིན་ཡང་ཐེག་པར་ནུས་སམ།

　　བུ་ཞིག་སྐྱེ་བ་ནི་ཨ་མ་དང་འཆི་བའི་བར་ན་ནས་འབྲུ་གཅིག་གི་ས་ཕྱོད་ལས་མེད་པ་ཡིན་ན། བུད་མེད་ཀྱི་ལུས་རྟེན་ཐོབ་པ་ནི་འཆི་བར་གདོང་གཏོད་ཐེངས་ཤིག་ཡིན་ལ། ཨ་མ་ཞིག་ཏུ་གྱུར་པའི་དཀའ་སྡུག་ནི། ཚེ་སྲོག་གི་བྱུང་རིམ་ལས་འདས་པའི་རླབས་ཆེ་བའི་བྱ་བཞག་ཅིག་ཡིན་པ་སུས་ཀྱང་རྟོགས་འོས།

　　ཨ་མ་ནི་བབ་ཆགས་ཐ་སྙད་འདིའི་མཚོན་ནུས་ཙམ་དུ་ཟད་མོད། མོ་སྐྱེས་ཀྱི་ལུས་རྟེན་ནི་མིའི་རིགས་ཚེ་སྲོག་གི་འབྱུང་ཁུངས་དང་། མ་འོངས་པའི་རེ་བ་ཡིན་རྐྱེན། སྐྱེས་མ་ནི་སེམས་བསམ་པས་གཅེས་འོས་ཤིང་། ལུས་ལག་པས་སྲུང་རི་བ། བློའི་ཕྱི་ནང་ལ་འཇགས་འོས་པ་ཞིག་གོ།

རྩོམ་སྒྲིག་པ། གངས་དགའ།

རྩོམ་ཁུངས། ངེད་དྲ་བ།