བཤེར་འཚོལ།
ཏཱ་ནའི་སྟོད་དང་ཧོར་གཙང་ཁོག(2)
གཉིས་པ།
དགོང་ཕྱི་དྲོའི་གྲིབ་མ་གོན་ཐལ།
ཕོ་བཟང་པོ་ཉི་མ་ཚེ་རིང་།།
མ་བཟང་མོ་ཟླ་བཟང་སྒྲོལ་མ།།
ཞིང་གྲུ་བཞིའི་ཞིང་ཚིགས་བར་ནས།།
ཚིག་བཤད་ནས་གང་འགོར་མ་ཤེས།།
དགོང་ཉི་མ་ཚང་ལ་ནུབ་ནས།།
ཕོ་བཟང་པོ་ཉི་མ་ཚེ་རིང་།
རྟ་འདོ་བ་གྲོ་གཞིར་ཞོན་ནས།
ཕྱིར་འཁོར་རེ་ཡུལ་ལ་བུད་ཐལ།
མ་ང་ཚོས་ཡུར་མཚམས་བཞག་ནས།།
ཕྱི་འཁོར་རེ་ཡུལ་ལ་ལོག་སྟེ།།
ཁ་མར་འཁོར་ཇ་ཁང་ནང་ནས།།
འདི་ཐབ་ཀ་གྲུ་བཞིའི་ཐོག་ལ།
འཁར་ཁྲོ་ཟགས་སེར་པོ་བཙུགས་ནས།།
ཡང་སེར་པོའི་འཁར་ཟངས་ནང་ལ།
སྟོད་རྫ་ཆུ་བསིལ་མ་བླུགས་ནས།།
ཇ་མེ་ཏོག་ཡོངས་འཛིན་བཏབ་སྟེ།
ཁྱིམ་ཐབ་ཁུང་གོར་མོའི་ནང་ལ།
བྲག་ཤུག་པ་ལྷ་ཤིང་བུས་ཏེ།།
མེ་མེ་ལྕེ་དམར་པོ་འབར་ནས།།
དུད་ནག་པོ་དགུང་ལ་འཕྱུར་གི།
མོས་ཇ་ནག་གསར་སྐོལ་བྱས་ནས།
ཇ་གཡིས་མ་བསྐོལ་བའི་འཁོལ་མགོ།
རོགས་ཡོང་སའི་ས་ལ་མཆོད་ལ།
རོགས་ཆུང་ལོའི་སྐྱེ་ལུས་ཕྲ་མོར།
བགེགས་བར་ཆད་མ་ཡོང་ཟེར་ནས།།
ལྷ་བླ་མར་གསོལ་བ་བཏབ་ནི།།
ཁ་ཡར་འཁོར་མགྲོན་ཁང་ནང་གི།
ཁྲི་འདྲ་བའི་ཚ་ཐབ་སྟེང་ལ །
ཁོས་གདན་དཀར་གདན་དམར་བཏིང་ནས།།
སྔས་མཐོན་པོ་ཅན་ཞིག་བཞག་ནས།།
རོགས་ཡོང་བ་བསམས་ནས་བསྒུགས་ནི།།
ས་རུབ་ནས་ནམ་གུང་ཐོན་ཐལ།།
ཁྲ་གསལ་ལེ་སྐར་མའི་གཞུང་རེད།།
རོགས་དགའ་ལོ་ཡོང་བའི་ཚད་རེད།།
ཇ་ཞིམ་པོ་འཐུང་གི་སྐབས་རེད།།
མ་ངེད་ཚོ་བྲེལ་བ་ལངས་ནས།།
ཁྱིམ་ཁང་བའི་ཀླད་ལ་བུད་ནས།།
རོགས་ཡོང་སའི་ཕྱོགས་ལ་བལྟས་བསྡད།
ཟངས་སེར་པོའི་གླིང་བུའི་ནང་ནས།།
སེམས་འགུག་པའི་གླུ་ཞིག་བླངས་ཐལ།།
ངའི་གསལ་བོ་རྣ་ཡིས་ཉན་ན།།
ངའི་རོགས་ཀི་འབུད་ཚུལ་ལྷང་རེད།།
ངའི་ངོ་ལ་འཛུམ་ཞིག་ལངས་ནས།།
ངའི་སེམས་ལ་དགའ་སྤྲོ་སྐྱེས་ནོ།
ནང་འཇིག་རྟེན་མི་ཡིས་ཆད་ཤེས།།
ང་གཤོག་ཐོགས་བྱ་རིགས་བཞིན་དུ།།
ཁང་ཐོག་ནས་མར་ལ་བབས་ནས།།
ཕྱི་སྒོ་ཁར་རྒྱུགས་ནས་སོང་དུས།།
སྡེ་ཏཱ་ནའི་སྟོད་ཀི་དགའ་།
ཞེ་སྣང་བ་མཐུན་གི་རོགས་ལོ།
ཁ་བགད་ནས་སྒོ་ཁར་ཐོན་ཐལ །
ཕར་འཁོར་ནས་འཚམས་འདྲི་བྱས་།
ཚུར་འཁོར་ནས་སྐེ་ལ་འཇུས་ནས།།
སེམས་མཐུན་པའི་འོ་ཞིག་བྱེད་ཀི།
ཕྱིར་སྒོ་ཆེན་ཕྱིར་ལ་བརྒྱབ་ནས།།
ཡར་འཁོར་ནས་མགྲོན་ཁང་ནང་ལ །
སྐེ་ལག་འཇུས་བྱས་ནས་སོང་བ། །
ངས་ཚ་ཐབ་གྲུ་བཞིའི་ཐོག་ལ།།
འདི་ཅོག་ཙེ་སུག་བཞི་བཞག་ནས།།
ཤིང་ཙན་དན་སྡེར་མའི་ནང་ལ །
ཟས་ཀ་ར་བུ་རམ་བསྒྲིགས་ནས།།
ཟངས་སེར་པོའི་ཇ་དེམ་ནང་ལ།།
ཇ་ཞིམ་མངར་ཅན་ཞིག་བསྐོལ་ནས།།
འབྲི་ཐུལ་མའི་འོ་མ་བླུགས་ནས།།
རྟགས་རྟེན་འབྲེལ་ཅན་གི་དཀར་ཡོལ།
དེའི་ཁ་ན་འཁོར་ལོ་རྩིབས་བརྒྱད།།
དེའི་སྐེད་ན་བཀྲ་ཤིས་རྟགས་བརྒྱད།།
ཡང་ཞབས་ན་པད་མ་འདབ་བརྒྱད།།
བཀྲ་ཤིས་པའི་དཀར་ཡོལ་ནང་ལ།
ཇ་དཀར་པོ་འོ་ཇ་བླུགས་ཏེ།།
ལག་ཉིས་ལག་བྱས་ནས་བྱིན་ནས།།
ངས་ཁྱེད་ཟོ་ཁྱེད་འཐུང་ཟེར་དུས།།
ངའི་ཆུང་དུས་རོགས་ལོའི་ངོ་ལ །
སྐྱིད་ཉི་མ་འདྲ་ཞིག་ཤར་ནས།།
ཁོས་ང་ཟོ་ང་འཐུང་ཟེར་གི།
ཟས་ཞིམ་པོ་ཟ་དབང་མ་བྱུང་།།
ཇ་མངར་མོ་འཐུང་དབང་མ་བྱུང་།།
ཚིག་སྙན་མོ་བཤད་དབང་མ་བྱུང།།
གསུམ་མ་བྱུང་ལས་ཀི་ཐ་མ།།
ལས་མ་བཟང་བ་ཞིག་བྱུང་སོང་།།
ཕྱི་སྒོ་ཆེན་ཐག་ཐག་རྡུང་གི།
ངའི་མིང་གིས་ཡང་ཡང་འབོད་ཀི།
སྐད་བཙོག་པའི་སྒྲ་ལ་ཉན་ན།།
ངའི་བཟའ་ཟླ་ཡིན་པ་ཤེས་སོང་།།
ཕོ་བཟང་པོ་ཉི་མ་ཚེ་རིང་།།
ཡར་ལངས་ནས་སྒོ་ལ་རྒྱུགས་ཀི།
ཁྱེད་དེ་འདྲ་མ་བྱེད་ཟེར་ནས།།
རོགས་ཉི་མའི་ལག་མགོར་འཇུས་ནས།།
དེ་མ་བྱེད་ཉི་མ་ལོ་ལོ།
ངའི་བཟའ་ཟླས་སྟོད་ལ་ཇག་བྱས།།
འདིས་སྨད་ལ་སོང་ནས་རྐུས་བྱས།།
འཐབ་རྩལ་ངན་ཤེད་ཆེན་ཡིན་།།
རོགས་དགའ་ལོས་སྔར་ནས་ཤེས་མོད།
ཁྱོའི་ཡུལ་གྱི་ཕ་ལོ་མ་ལོར།།
ཁྱེད་མེད་ན་ལག་པ་མེད་འདྲ།།
ཁྱོའི་ཡུལ་གྱི་རྒྱུ་བྱིན་ཆུང་མར།།
ཁྱེད་མེད་ན་སྐྱ་ཡ་མེད་འདྲ།
ཕོ་བཟང་པོ་ཉི་མ་ལོ་ལོ།
སེམས་བསམ་པས་འདང་གསུམ་རྒྱག་དགོས།།
སྡེ་ཏཱ་ནའི་ཉི་མ་ཚེ་རིང་།།
སྐྱེས་ཕོ་རབ་ཅིག་གི་སྐྱེས་ནས།།
ཁྱོད་བསྐྱུར་ནས་ང་རང་བྲོས་ན།།
ཕོ་ཉི་མ་ཡིན་པ་དོན་མེད །
ས་འཇིག་རྟེན་ཁམས་ཀི་འཚོ་བ།།
ཞེ་ཆགས་ནས་འདུག་ས་ང་མེད།།
སྨན་ཟླ་བཟང་སྒྲོལ་མ་མིན་པས།།
ཞེ་ཆགས་ས་གཅིག་ཀྱང་ང་མེད །
སྨན་ཟླ་བཟང་སྒྲོལ་མ་ལོ་ལོ།
ཁྱོད་བསྐྱུར་ནས་འགྲོ་སྲོལ་ང་མེད།
སྐལ་བཟང་ཚེ་བརྟན་དང་ཚེ་རིང་བཀྲ་ཤིས་གཉིས་ཀྱིས་བསྡུས།
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།