བཤེར་འཚོལ།
2025ལོའི་ནོ་བྷེལ་རྩོམ་རིག་བྱ་དགའ་ཧང་གྷ་རིའི་རྩོམ་པ་པོ་ལཱ་ཟི་ལོ ·ཁེ་རོ་ཟི་ན་ཧོར་ཁེ་ལ་ཐོབ་པ།
མཆོད་མེ་བོད་ཀྱི་རྩོམ་རིག་དྲ་བའི་འཕྲིན། པེ་ཅིང་གི་ཡུལ་རྩིས་ཀྱི་2025ལོའི་ཟླ10པའི་ཚེས་9ཉིན་གྱི་དགོང་དྲོའི་ཆུ་ཚོད་བཅུ་དགུ་པར། སི་ཝེས་དན་རྩོམ་རིག་སློབ་གླིང་གིས་སི་ཐོག་ཁོར་མོ་རུ་བསྒྲགས་པའི་གནས་ཚུལ་ལྟར་ན། 2025ལོའི་ནོ་བྷེལ་རྩོམ་རིག་བྱ་དགའ་དེ་རྒྱལ་ཁོངས་ཧང་ག་རི་ནས་ཡིན་པའི་རྩོམ་པ་པོ་ལཱ་ཟི་ལོ ·ཁེ་རོ་ཟི་ན་ཧོར་ཁེ((László Krasznahorkai )ལགས་ལ་སྤྲད་དེ་ཁོང་གི་གསར་རྩོམ་ཐད་ཀྱི་གྲུབ་འབྲས་ལ་གཟེངས་བསྟོད་བྱ་རྒྱུ་ཡིན་པ་འཛམ་གླིང་ཡོངས་ལ་བསྒྲགས། སི་ཝེས་དན་རྩོམ་རིག་སློབ་གླིང་གིས་ལཱ་ཟི་ལོ ·ཁེ་རོ་ཟི་ན་ཧོར་ཁེ་ལགས་ལ“ཡིད་ཀྱི་བརྟན་པ་ཅིག་ཅར་དུ་འཕྲོག་ཅིང་་མིག་རྒྱང་རིང་བའི་ཁོང་གི་བརྩམས་ཆོས་ཀྱིས་དུས་མཐའ་ལྟ་བུའི་འཇིགས་སྣང་གི་ཁྲོད་ནས་སྒྱུ་རྩལ་གྱི་སྟོབས་ཤུགས་སླར་ཡང་ར་སྤྲོད་བྱས་འདུག”ཅེས་བྱ་དགའི་སྐྱེས་ཚིག་ཅིག་ཕུལ་འདུག
ནོ་བྷེལ་བྱ་དགའི་གཞུང་ཕྱོགས་ཀྱིས་ཁོང་ལ་བྱ་དགའ་དེ་ཐོབ་པར་ཚོར་བ་ག་འདྲ་འདུག་ཅེས་ཁ་པར་བཏང་སྟེ་དྲིས་པ་ན། ཁོང་གིས“ངའི་ཕ་སྐད་དེ་ཧང་གྷ་རིའི་སྐད--སྐད་རིགས་ཆུང་ངུ་དེ་འདྲ་བཀོལ་བར་སྤོབས་པ་ཆེན་པོ་སྐྱེ་ཡོང་། ངས་ཐོག་མར་ཀློག་མཁན་ལ་བཀའ་དྲིན་ཆེ་ཞུ་བ་དང་། སོ་སོས་འཆར་སྒོ་བཀོལ་བའི་ནུས་པ་སླར་རྙེད་པའི་རེ་བ་ཡོད། དེའང་འཆར་སྒོ་མེད་ན་འཚོ་བ་ནི་གཏན་ནས་མི་འདྲ་བ་ཞིག་ཡིན་སྲིད། དེ་བཞིན་དུ་དེབ་ཀློག་ཅིང་དེ་ལོངས་སུ་སྤྱད་ནས་སེམས་ཁམས་ཕྱུག་པོ་བསྒྱུར་འོས་ཏེ། དེབ་བཀླགས་པས་ང་ཚོར་སྟོབས་ཤུགས་མི་ཟད་པ་སྟེར་ལ་། ཧ་ཅང་དཀའ་སྡུག་ཆེ་བའི་དུས་སྐབས་འདི་བརྒལ་བར་ཕན་འདོགས་པར་བྱེད”ཅེས་གསུངས།
ཁོང་གི་སྒྲུང་དེབ《དམག་འཁྲུག་དང་དམག་འཁྲུག》གི་ཕྱི་ཤོག
ལཱ་ཟི་ལོ ·ཁེ་རོ་ཟི་ན་ཧོར་ཁེ་མཆོག་ནི་1954ལོའི་ཟླ01པའི་ཚེས05ཉིན་ཧང་ག་རིའི་ཇེ་ལོ་ས་ཁུལ་དུ་སྐུ་བལྟམས། ཁོང་གི་ཕ་ནི་ཁྲིམས་རྩོད་པ་ཞིག་དང་མ་ནི་གཞུང་ཞབས་པ་ཡིན། 1972ལོར་ཁོང་ཨེ་ཁེར་ཧྥེ་ལོན་ཛི་མཐོ་འབྲིང་ནས་ཐོན་ཞིང་། རབས་དེའི་ནང་གི་ཡོ་རོབ་ནུབ་མའི་མི་རྣམས་དང་ཁྱད་མེད་པར་རང་དབང་གིས་བསྐལ་བའི་དུས་སྐབས་དེ་ཉམས་སུ་མྱོང་ཐུབ་ཡོད། དགུང་ལོ18སྟེང་གྲོང་གསེབ་ཏུ་བསྐྱོད་དེ་ཞིང་གྲོང་གི་མཚན་མོའི་འགན་སྲུང་གླ་པ་བྱས་མྱོང་། རྗེས་སུ་སློབ་ཆེན་འགྲིམས་པ་དང་ཕ་ཡི་ཕྱག་ལས་ཀྱི་རྒྱུན་བསྐྱངས་ནའང་མཐའ་མར་རྩོམ་རིག་གི་ལམ་ཁར་ཞུགས། 1985ལོར་བརྩམས་ཆོས་ཐོག་མ《སེ་ཐྲེན་ཐང་གྷོ》(<བདུད་རྒན་གྱི་ཞབས་བྲོ>)ཞེས་པ་གསར་རྩོམ་མཛད་པ་དང་། སྐད་གྲགས་གོ་ལའི་ཁྱོན་དུ་ལྡིར། བརྩམས་སྒྲུང་དེ་ཆུ་ཚོད་བདུན་ཅན་གྱི་སྒྲུང་རབས་གློག་བརྙན་དུ་ཕབ་སྐྲུན་བྱས་པ་ནས་གློག་བརྙན་ལོ་རྒྱུས་སུ་ལམ་ཚད་རྡོ་རིང་ཞིག་བསླངས་ཡོད། 2015ལོར་ཁོང་ལ་རྒྱལ་སྤྱིའི་བྷོའུ་ཁེར་བྱ་དགའ་ཐོབ། ཁོང་ལ་《སེ་ཐྲེན་ཐང་གྷོ》ལས་གཞན་ད་དུང་《ཕྱིར་རྒོལ་གྱི་སེམས་ཁུར》（1989）དང་《དབྱི་ཟ་ཡཱ་སླེབས་བྱུང》（1998）《དམག་འཁྲུག་དང་དམག་འཁྲུག》（1999）《མཇུག་མཐའི་རི་སྤྱང་སྔོན་མོ》（2009）《འཇིག་རྟེན་འདི་ན》（2013）སོགས་བརྩམས་ཆོས་མང་པོ་ཡོད།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།