ལྷུག་མའི་དེབ་འདི་ནི་ངས་ལོ་ངོ་བཅུ་ཙམ(༢༠༡༥-༢༠༢༥)གྱི་ནང་འབྲི་སྦྱོངས་བྱས་པའི་སེམས་ཀྱི་རང་སྒྲ་ཞིག་ཡིན་པར་ཐེ་ཚོམ་ཅི་ཡང་མེད། དེབ་འདིར་བརྗོད་བྱ་སྣེ་མང་གི་ལམ་ནས་དུས་སྐབས་མི་འདྲ་བའི་སྐབས་ཀྱི་རང་ཉིད་ཀྱི་བརྩེ་དུང་དང་འཚོ་བ་མཚོན་ཡོད་ལ། ཡིད་འགྱུར་དང་དོན་བརྗོད་སྤེལ་མའི་ལམ་ནས་ཚོར་འདུ་རྣལ་མ་དག་མངོན་མཚོན་བྱས་ཡོད། སྤྱིར་ན་དེབ་འདིའི་ནང་ཕུལ་བྱུང་དུ་བརྩི་རུང་བའི་ལྷུག་མ་གཅིག་མེད་ངེས་པས་སྙིང་ཉེ་བའི་ཀློག་པོ་པོའི་སེམས་ཁམས་བློང་བློང་པོར་བཟོ་ངེས། ཡིན་ནའང་། ཡིག་འབྲུ་རེ་རེ་དང་ཚིག་འབྲུ་རེ་རེའི་བར་དུ་སྐད་ཡིག་གི་སྐུད་སྣེ་ཕྲ་མོ་ཞིག་རྒྱང་རིང་དུ་བསྲིངས་ཡོད་པས་དེའི་སྣེ་མོ་ཅི་ནས་ཀྱང་དམ་པོ་བཟུང་སྟེ། མུ་མཐུད་ནས་སྐད་ཡིག་གི་བླ་སྲོག་དེ་ཉིད་སྨྱུག་རྩེའི་རིས་སུ་མངོན་ཐུབ་པའི་ཡིད་ཆེས་བརྟན་པོ་ཡོད།--ཅེས་གསར་བུ་ནས།

མཇུག་བྱང་།

　　ལོ་ངོ་བཅུ་བཞི་ཙམ་གྱི་གོང་རོལ་དུ་ཡར་ཀླུང་གི་ཕ་ས་དྲོན་མོར་དགེ་བའི་བཤེས་གཉེན་ཨོ་རྒྱན་བསྟན་དར་ལགས་དང་མཇལ་སྐལ་བྱུང་ཞིང་། ཁོང་གི་བཀའ་སློབ་དང་མཛུབ་སྟོན་འོག་དཔེ་ཀློག་ལ་དགའ་བའི་སེམས་འགྱུ་ཕྲ་མོ་ཞིག་མྱུ་གུའི་གསོས་སུ་སྨིན་ལ། རིག་ཚན་སྣ་ཚོགས་ཀྱི་མདུན་དུ་སྐད་ཡིག་ནི་ངས་ཤ་འཐམས་རུས་འཐམས་བྱ་སའི་འགྱུར་མེད་ཀྱི་གདམ་ག་ཞིག་ཏུ་གྱུར། དུས་དེ་ནས་བཟུང་ངས་དོན་གྱི་གནད་རྣམས་ཅི་ཡིན་ལ་ཆ་མ་འཚལ་རུང་ཚིག་འབྲུ་རེ་རེ་ཀློག་པར་མོས་པའི་སེམས་ཁམས་གང་དེས་དཔེ་དེབ་རེ་གཉིས་ཀྱི་གསང་བ་བསྔོག་ཁུལ་བྱས་པ་ཡིན། ངའི་དྲན་ལམ་དུ་སྐབས་དེར་སྟེས་དབང་དང་སྟབས་ལེགས་ཀྱིས་ངའི་སྙན་ངག<<ཡར་ཀླུང་གི་མཛེས་པ>>ཞེས་པ་ཞིག་རྒན་དྲིན་པོ་ཆེའི་རྒྱབ་སྐྱོར་འོག<<ལྷོ་ཁའི་བོད་ཡིག་ཚགས་པར>>ཐོག་ཏུ་དགོད་རྒྱུའི་གོ་སྐབས་ཐོབ་ཅིང་། སྒོར་མོ༢༨ཀྱི་རྩོམ་ཡོན་གང་དེས་སྔར་ན་མ་མཆིས་པའི་དགའ་བ་ཞིག་དང་སྐུང་མི་ཐུབ་པའི་སྤོབས་པ་ཞིག་གིས་མུ་མཐུད་རྩོམ་ཡིག་འབྲི་ཐུབ་ན་སྙམ་པའི་དམ་བཅའ་ཞིག་ཡིད་ཀྱི་གཏིང་སར་བཀོད།

　　མཐོ་འབྲིང་ཐོན་རྗེས་སློབ་གྲྭ་ཆེན་མོ་ཟེར་བའི་ར་བ་དེའི་ནང་དུ་ངས་སྔར་བཞིན་སྐད་ཡིག་དང་འབྲེལ་བའི་དཔེ་དེབ་མང་པོ་ནན་ཀློག་བྱས་པ་ཡིན་ལ། ཚོགས་པ་མང་དག་ཅིག་ནས་དགའ་མོས་ཀྱི་ལས་ཀ་སྣ་ཚོགས་ཀྱི་སྣེ་མོར་འཇུས་པ་ཡིན། དེ་བས། རྩོམ་རིག་ཟེར་བའི་མིང་བརྡ་སྙན་པོ་དེ་ངའི་རྣ་བར་གྲགས་པའི་མགྲོན་པོ་ཡག་ཤོས་སུ་གྱུར་རྐྱེན། ངས་སྙན་ངག་ཡིན་ཁུལ་གྱི་ཚིག་ཚོགས་མང་པོ་རང་གི་ཟླ་བོར་བཀུག་སྟེ། ཧ་ལམ་ཉིན་དཀར་གྱི་དུས་སུ་སྙན་ངག་གི་བསུ་མ་ཡོད་པ་མ་ཟད། མུན་ནག་ཀྱི་དབུས་སུ་ཡང་སྙན་ངག་དང་སྙན་ངག་མ་ཡིན་པའི་ཡིག་འབྲུ་དེ་དག་ངའི་འགྱུར་ཁུག་ཏུ་སིམ་བཞིན་ཡོད། སྐབས་རེར་རྩོམ་ཡིག་རེ་འགའ་འཕྲིན་སྟེགས་སམ་དུས་དེབ་གང་རུང་དུ་བཀོད་ཐུབ་པའི་དགའ་ཚོར་གང་དེས་ཉིན་ཤས་རིང་རང་རྩོམ་རང་ཀློག་གི་ངང་ནས་བདེ་བའི་དཔལ་ལ་རོལ་གྱིན་ཡོད་ལ། སྐབས་རེར་རང་སེམས་སུ་རྩོམ་ཡིག་དེ་ཉིད་ཡག་པོ་འཁྱོངས་ཡོད་ཨང་སྙམ་པའི་འདུ་ཤེས་ཤིག་གིས་དུས་དེབ་གང་རུང་དུ་བསྐུར་ན་ཡང་ཨ་ལན་ཙམ་མེད་པའི་གཟུགས་མེད་ཀྱི་ན་ཟུག་གང་དེས་སྡུག་བསྔལ་གྱི་བཙོན་དུ་བཅུག་སྟེ། ཆར་ཆུ་ཆད་པའི་རྫིང་བུ་བཞིན་དུ་གནས་སྐབས་རིང་ཁུ་སིམ་མེར་བསྡད་རྒྱུ་ལས་གདམ་ག་གཞན་ཅི་ཡང་མ་མཆིས།

　　འོན་ཏེ། སློབ་ཆེན་གྱི་དུས་དེར་རྩོམ་རིག་ལ་དགའ་བའི་བཅོས་མིན་གྱི་བསམ་བློས་ངས་མུ་མཐུད་ནས་སྙན་ངག་དང་ལྷུག་རྩོམ་རེ་གཉིས་འབྲི་ཁུལ་བྱས་པ་ཡིན། རྒན་དྲིན་པོ་ཆེ་འགྱན་སངས་སོགས་ཀྱི་མཛའ་བརྩེའི་སློབ་སྟོན་འོག་ཏུ་དཔེ་ཀློག་དང་རྩོམ་འབྲི་ནི་དོར་དུ་མེད་པའི་ལས་འགན་རླབས་པོ་ཆེ་ཞིག་ཏུ་གྱུར། དཔེ་ཀློག་ཚོགས་ཆུང་དང་བུམ་པ་རིའི་རྩོམ་སྒྲིག་ཚོགས་ཆུང་ནི་ང་ལ་ཟབ་ནན་དང་ཡར་སྐུལ་གྱི་འདུ་ཤེས་སྐྱེད་བསྲིང་བྱེད་མཁན་གྱི་ཚོགས་པ་གལ་ཆེན་ཞིག་ཡིན་ལ། <<བུམ་པ་རི>>དང་<ཐོས་བསམ>><<རྒྱང་རིང་>>ལྟ་བུའི་དཔེ་དེབ་དག་ནི་ང་རང་རྩོམ་འབྲིའི་ལམ་དུ་དཔའ་རྩལ་ངོམས་ས་ཞིག་དང་གཞོན་ནུའི་རིན་ཐང་མངོན་སའི་གར་སྟེགས་རིན་བྲལ་ཞིག་ཏུ་རྩིས་ཆོག་པས། ངས་སྔ་ཕྱི་བར་གསུམ་དུ་དེ་ལྟ་བུའི་བཀའ་དྲིན་ཡིད་ལ་དྲན་ཞིང་། མི་ཚེའི་འཆིང་ཐག་མ་ཆད་བར་དུ་ཡིད་ལ་ཡང་ཡང་དྲན་པར་བྱེད་ཀྱིན་ཡོད།

　　ད་ནི་སློབ་གྲྭ་ཐོན་ནས་ལོ་ངོ་བདུན་ལྷག་ཙམ་འདས་འདུག ལོ་ངོ་དེ་དག་གི་ནང་དུ་ངས་རྩོམ་ཡིག་ཡིན་ལ་མ་ཡིན་མང་པོ་ཞིག་བྲིས་ཤིང་། རྩོམ་ཡིག་རེ་འགའ་དུས་དེབ་སྣ་ཚོགས་སུ་བཀོད་སྐལ་བྱུང་། ཡིན་ནའང་། ལོ་དེ་དག་ནང་དུ་རང་ཉིད་ལ་དབང་བའི་དེབ་གཟུགས་ཤིག་པར་བསྐྲུན་ཐུབ་ན་ཅི་མ་རུང་སྙམ་པའི་ཕུགས་འདུན་ཞིག་གིས་ཕྱོགས་མང་པོ་ནས་གོ་སྐབས་བཙལ་འཚོལ་བྱས་པ་ཡིན་ལ། སློབ་ཆེན་ལོ་རིམ་གཉིས་པ་ཙམ་ནས་བྲིས་པའི་ཡིག་རྙོག་དག་བསྡུ་རུབ་བྱས་ཏེ་རྩོམ་སྒྲིག་གི་ལས་སུ་འབད་པ་ཡིན། གོ་སྐབས་ནི་གྲ་སྒྲིག་ཡོད་མིར་དབང་བ་ཡིན་ཟེར་བ་ནང་ལྟར་འདི་ལོའི་ལོ་འགོ་ཙམ་དུ<<བོད་ཀྱི་རྩོམ་རིག་སྒྱུ་རྩལ>>རྩོམ་སྒྲིག་ཁང་གི་རྒན་ལྷ་གཡང་ནོར་བུ་ལགས་ཀྱི་སྐུལ་མ་དང་རམ་འདེགས་འོག་ལྷུག་མའི་དེབ་དེ་ཉིད་པར་བསྐྲུན་བྱ་རྒྱུའི་གོ་སྐབས་ཐོབ་སོང་བས་སྐོམ་པ་ཆུ་འདོད་ལྟར་བྱུང་སོང་།

　　ལྷུག་མའི་དེབ་འདི་ནི་ངས་ལོ་ངོ་བཅུ་ཙམ(༢༠༡༥-༢༠༢༥)གྱི་ནང་འབྲི་སྦྱོངས་བྱས་པའི་སེམས་ཀྱི་རང་སྒྲ་ཞིག་ཡིན་པར་ཐེ་ཚོམ་ཅི་ཡང་མེད། དེབ་འདིར་བརྗོད་བྱ་སྣེ་མང་གི་ལམ་ནས་དུས་སྐབས་མི་འདྲ་བའི་སྐབས་ཀྱི་རང་ཉིད་ཀྱི་བརྩེ་དུང་དང་འཚོ་བ་མཚོན་ཡོད་ལ། ཡིད་འགྱུར་དང་དོན་བརྗོད་སྤེལ་མའི་ལམ་ནས་ཚོར་འདུ་རྣལ་མ་དག་མངོན་མཚོན་བྱས་ཡོད། སྤྱིར་ན་དེབ་འདིའི་ནང་ཕུལ་བྱུང་དུ་བརྩི་རུང་བའི་ལྷུག་མ་གཅིག་མེད་ངེས་པས་སྙིང་ཉེ་བའི་ཀློག་པོ་པོའི་སེམས་ཁམས་བློང་བློང་པོར་བཟོ་ངེས། ཡིན་ནའང་། ཡིག་འབྲུ་རེ་རེ་དང་ཚིག་འབྲུ་རེ་རེའི་བར་དུ་སྐད་ཡིག་གི་སྐུད་སྣེ་ཕྲ་མོ་ཞིག་རྒྱང་རིང་དུ་བསྲིངས་ཡོད་པས་དེའི་སྣེ་མོ་ཅི་ནས་ཀྱང་དམ་པོ་བཟུང་སྟེ། མུ་མཐུད་ནས་སྐད་ཡིག་གི་བླ་སྲོག་དེ་ཉིད་སྨྱུག་རྩེའི་རིས་སུ་མངོན་ཐུབ་པའི་ཡིད་ཆེས་བརྟན་པོ་ཡོད།

　　མཇུག་ཏུ་དེབ་འདིའི་དཔེ་སྐྲུན་ལ་མཐུན་རྐྱེན་གནང་མཁན་གྱི་ཚན་པ་དང་འགན་འཁུར་མི་སྣ། དེ་བཞིན་དེབ་འདིར་ཞུ་དག་གནང་མཁན་གྱི་རྒན་དྲིན་པོ་ཆེ་དག་དང་གྲོགས་གཅེས་དགའ་བོ་དག་ལ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན་ལ། བདག་གི་ཆུང་མ་དང་བུ་ཆུང་བཅས་སྤུན་མཆེད་ཡོངས་ལ་ཐུགས་རྗེ་ཆེ་ཞུའོ།། ཡང་དགོས་སུ་ལྷུག་དེབ་འདིར་ཚིག་གི་སྙན་ཆ་མེད་པ་དང་བརྗོད་བྱ་ཚུར་སྣང་དཀའ་བ། ལྷག་པར་དུ་སུམ་རྟགས་དག་གསུམ་ཇི་བཞིན་མ་བྱུང་བའི་སྐྱོན་མང་དག་ཅིག་ཡོད་སྲིད་པས། རྒྱ་ཆེའི་ཀློག་པ་པོ་ནས་སྐྱོན་བརྗོད་གང་མང་ཡོད་ཞུ།།

　　                                           རྩོམ་པ་པོས་གནས་མཆོག་ལྷ་ལྡན་གཞུང་ནས༢༠༢༥ལོའི་ཟླ༦ཚེས༢༥ཉིན་བྲིས་པ་དགེའོ།།

རྩོམ་སྒྲིག་པ། དབང་མོ།

རྩོམ་ཁུངས། ངེད་དྲ་བ།