བཤེར་འཚོལ།
སྙན་ངག་པ་དགའ་བདེ་ཚེ་རིང་གི་སྙན་ངག་དེབ་གཉིས་པ་《རྡུལ་ཕྲན་གྱི་གླེགས་བམ》ཞེས་པ་པར་སྐྲུན་དང་འགྲེམ་སྤེལ་བྱས་པ།
སྙན་ངག་པ་དང་རྩོམ་རིག་རྩོམ་སྒྲིག་པ་ནག་པོ་ལགས་ཀྱི་སྙན་དེབ《རྡུལ་ཕྲན་གྱི་གླེགས་བམ》ཞེས་པ་ཉེ་ཆར་པེ་ཅིན་མི་རིགས་དཔེ་སྐྲུན་ཁང་དུ་པར་བསྐྲུན་བྱས་འདུག དེབ་འདིར་སྙན་ངག་པས་མི་ལོ་བཅུ་ལྷག་གི་ནང་བརྩམས་གནང་མཛད་པའི་སྙན་ངག་ལེགས་ཤོས་ལས་ཉིས་བརྒྱ་ལྷག་བདམས་ནས་བསྡུས་ཡོད་ཅིང་། རང་གི་བུ་མོ་བསྟན་འཛིན་དབྱངས་གསལ་ལགས་ཀྱིས་བྲིས་པའི་རི་མོའི་བརྩམས་ཆོས་སྐོར་ཅིག་ཞར་དུ་བཀོད་འདུག སྙན་དེབ་འདིའི་ནང་དུ་སྙན་ངག་པའི་འཆར་སྒོ་ཀློང་བརྡོལ་པའི་ཟོར་ཡང་པའི་སྐད་ཆ་དང་ངོ་རྟགས་གལ་གནད་ཅན། འཚོ་བའི་ཉིན་སྲིབ་གཉིས་ཀྱི་གྲང་འཁྱག ཚིག་ངོས་དང་ཚིག་ངོས་མ་ཡིན་པའི་སྤྱི་འགྲོས་སྣ་ཚོགས་ཀྱི་སྲོག་སྙིང་། གཟབ་ནན་དང་ཡང་ན་ཆོབ་ཚ་པོའི་སྐད་ཆ་སོགས་སྙན་ངག་པ་རང་ངོས་ཀྱི་ཀུན་རྟོགས་ཡངས་པོས་ཀུན་ནས་ཕྱུག་འདུག
《རྡུལ་ཕྲན་གྱི་གླེགས་བམ》ནི་ཁོང་གི་བོད་ཡིག་གི་སྙན་དེབ་གཉིས་པ་ཡིན་ལ། དེབ་འདིར་ཁོང་གི་བློས་ཐུབ་གྲོགས་པོ་ལྡོང་བུ་དང་སྐྱབས་ཆེན་བདེ་གྲོལ་གཉིས་ཀྱིས་གླེང་གཞི་དང་མཇུག་བྱང་བྲིས་འདུག་པ་དང་། ཨོག་སི་ཧྥོར་ཌི་སློབ་གྲྭ་ཆེན་མོའི་མདའ་ཚན་བླ་མ་སྐྱབས་དང་མཚོ་སྔོན་དགེ་འོས་སློབ་ཆེན་གྱི་ངལ་རྫི། ཀྲུང་དབྱང་མི་རིགས་སློབ་ཆེན་གྱི་ཨ་བྱམས་བན་དེ་མཁར་སོགས་དགེ་རྒན་ཆེན་མོའམ་རྩོམ་རིག་ཉམས་ཞིབ་པ་གསུམ་གྱིས་གདེང་འཇོག་གི་སྐད་ཆའང་བྲིས་འདུག
སྙན་ངག་པ་དགའ་བདེ་ཚེ་རིང་གི་པིར་མིང་ལ་ནག་པོ་ཞེས་འབོད་པ་དང་། 1981ལོའི་ཟླ9པར་སྐྱེས། ཀྲུང་གོ་རྩོམ་པ་པོའི་མཐུན་ཚོགས་ཀྱི་ཚོགས་མི་དང་ཀྲུང་གོ་སྙན་ངག་སློབ་ཚོགས་ཀྱི་ཚོགས་མི། ལུའུ་ཞུན་རྩོམ་རིག་སློབ་གླིང་གི་སྐབས་བཅུ་བའི་མཐོ་རིམ་སློབ་མ་སོགས་ཡིན། ད་ལྟའི་བར་སྙན་ངག་གཙོས་པའི་བརྩམས་ཆོས་ཆིག་སྟོང་ལྷག་རྒྱལ་ཁབ་ཕྱི་ནང་གི་དུས་དེབ་ཏུ་བཀོད་ཡོད་ལ། དབྱིན་ཇི་དང་འཇར་མན། ཧྥ་རན་སི། ཉི་ཧོང་། སོག་པོ། ཡུ་གུར་སོགས་ཀྱི་སྐད་ལ་བསྒྱུར་ཡོད། 《ཝུ་བ་སོབ་སོབ》དང《བོད་ཀྱི་རབ་བྱེད》སོགས་བརྩམས་དེབ་ཁག་ཅིག་དཔེ་སྐྲུན་བྱས། རྒྱལ་ཁབ་དང་ཞིང་ཆེན་རིམ་པའི་རྩོམ་རིག་བྱ་དགའ་བཅུ་གྲངས་ཤིག་ཐོབ། ལས་ཞོར་དུ་“ཕ་ཡུལ”(PHAYUL)སྤྱི་སྟེགས་ཀྱི་གཙོ་སྐྱོང་པའི་འགན་ཁུར་ཡོད།
རྩོམ་སྒྲིག་པ། གངས་དགའ།
རྩོམ་ཁུངས། ངེད་དྲ་བ།