གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་བཞུགས་སོ།། ༥

2009-12-29 10:02:00 གུང་ཐང་དཀོན་མཆོག་བསྟན་པའི་སྒྲོ ཀློག་གྲངས། མཆན ཡོད།

 

བྱིང་རྒོད་སྐྱོན་བྲལ་ཏིང་ངེ་འཛིན། །
གསལ་བར་ཡོན་ཏན་ཐམས་ཅད་འཆར། །
བཻཌཱུརྱ་མེ་ལོང་ཕྱིས་འདྲ་བའི། །
དྭངས་མཚོར་གཟུགས་བརྙན་ཅི་ཡང་གསལ། །

དངོས་ཀུན་སྟོང་པར་དམིགས་པ་ཡིས། །
འཁོར་བའི་གདུང་བ་ཀུན་སེལ་ཏེ། །
ཆུ་ཀླུང་མཐའ་དག་ཨ་གསྟྱས། །
ཧུབ་ཀྱིས་གཞལ་བས་བདུད་རྩིར་འགྱུར། །

ཀླུ་སྒྲུབ་བློ་མཚོ་རྒྱ་ཆེ་བས། །
དངོས་པོར་སྨྲ་རྣམས་སྤོབས་པ་ཕྲོགས། །
རྔམ་གནག་གཏིང་མཐའ་མི་མངོན་པའི། །
རྒྱ་མཚོས་བྱིས་པ་སྐྲག་པར་བྱེད། །

ཟབ་མོའི་དེ་ཉིད་འབྱེད་པ་ལ། །
ཐོག་མར་དགག་བྱ་ངེས་དགོས་ཏེ། །
རྒྱ་མཚོར་ནོར་བུ་ལེན་པ་ལ། །
འཇིགས་པ་གར་ཡོད་ཤེས་པ་གཅེས། །

གདགས་གཞི་ཕུང་སོགས་འདུས་པ་ལ། །
ངའོ་སྙམ་དུ་འཁྲུལ་པ་སྟེ། །
ཀླུང་ཆེན་གདོད་ནས་བྲུབས་འདྲ་ཡང༌། །
ཆུ་ཕྲན་དུ་མ་འདུས་པ་ཡིན། །

བཏགས་དོན་རིགས་པས་དཔྱད་པ་ན། །
ངོ་བོས་གྲུབ་པ་འགའ་མེད་དེ། །
ཆུ་ཀླུང་ཡུར་བ་བརྒྱར་དྲངས་པའི། །
ཤུལ་ན་ཟིལ་པ་ཙམ་ཡང་མེད། །

སྟོན་པས་ཇི་སྙེད་བཀའ་བསྩལ་པ། །
སྟོང་དང་རྟེན་འབྱུང་འདིར་འཇུག་སྟེ། །
ས་སྟེང་ཆུ་བོ་མ་ལུས་པ། །
རྒྱ་མཚོ་ཆེན་པོར་གཞོལ་ཞིང་འབབ། །

རང་རྒྱུད་སྨིན་པའི་རྒྱལ་སྲས་ཀྱིས། །
བསྡུ་བ་རྣམ་བཞིས་གདུལ་བྱ་སྐྱོང༌། །
རྒྱ་མཚོར་འཇུག་མྱོང་དེད་དཔོན་གྱིས། །
གཞན་ཡང་ཁྲིད་ནས་ནོར་ལ་སྦྱོར། །

རྒྱུ་ཡི་ཐེག་པའི་ལམ་རིང་ཡང༌། །
གསང་སྔགས་ཐབས་ཀྱིས་མྱུར་དུ་བགྲོད། །
ཐང་དུ་འདྲེན་དཀའི་གྲུ་བོ་ཆེ། །
རྒྱ་མཚོར་ཞུགས་ན་ཡུད་ཀྱིས་འགྲོ། །

རྡོ་རྗེ་ཅན་གྱིས་ལེགས་གསུངས་པའི། །
གསང་སྔགས་ནུས་པ་བསམ་མི་ཁྱབ། །
གདུང་བ་མ་ཞེས་བོས་པས་ཀྱང༌། །
ལྷ་ཡི་ཆུ་བོ་འགུགས་པར་བྱེད༌། །

ཟུང་འཇུག་གདེངས་ཅན་བདག་པོའི་གནས༌། །
རྡོ་རྗེ་ཐེག་པ་རྒྱ་མཚོ་ཆེའི། །
འཇུག་ངོགས་བདེ་བའི་འབབ་སྟེགས་ནི། །
དབང་བཞིའི་རིན་ཆེན་ཐེམ་སྐས་ཡིན། །

འོན་ཀྱང་དངོས་གྲུབ་རྣམ་གཉིས་ཀྱི། །
གཞི་རྟེན་དམ་ཚིག་སྡོམ་པ་སྟེ། །
རྩ་བ་ཆུ་མཚོ་སྐམ་གྱུར་ན། །
རླབས་ཀྱི་འཕྲེང་བ་གང་ལས་འབྱུང༌། །

དེ་ཉིད་རིག་པའི་རྣལ་འབྱོར་པ། །
འདོད་ལ་སྤྱོད་ཀྱང་ཞེན་པ་མེད། །
ཉ་ནི་ཆུ་གཏིང་ཟབ་མོ་ན། །
འགྱུ་ཡང་ཆུ་ཡིས་འཚུབ་མི་འགྱུར། །

ཆགས་སོགས་ཉོན་མོངས་ཉེས་པ་རྣམས། །
ཉོན་མོངས་ལམ་བྱེད་ཉིད་ཀྱིས་འཇོམས། །
རྣ་བར་ཆུ་སོན་ཆུས་འབྱིན་ཞིང༌། །
མེས་འཚིག་མེ་ཡིས་གདུངས་པས་ཞི། །

བསྐྱེད་རིམ་ཕྲ་རགས་རྣལ་འབྱོར་གྱིས། །
སྐྱེ་ཤི་བར་དོ་གསུམ་སྦྱོང་སྟེ། །
སྐལ་ལྡན་ཤིང་རྟའི་མཆོད་ཡོན་གྱིས། །
དུག་ཅན་དྲི་མ་འཁྲུད་པ་བཞིན། །

དགའ་བཞིའི་ལྷན་སྐྱེས་བདེ་བ་ཆེས། །
སྟོང་བཞིའི་ཡེ་ཤེས་རྒྱས་འགྱུར་ཏེ། །
ཆུ་བོ་རྣམ་བཞིའི་རྒྱུན་འབབ་པས། །
རྟ་གདོང་མེ་ཆེན་འབར་བར་འགྱུར། །
ཕྲ་བ་གཉུག་མའི་རླུང་སེམས་ལས། །
སྒྱུ་མ་ལྟ་བུའི་སྐུར་བཞེངས་པ། །
དྭངས་པའི་ཆུ་ལས་ཆུ་བུར་དང༌། །
དག་པའི་མཁའ་ལས་ཆུ་འཛིན་བཞིན། །

རྩྭ་རྩེའི་ཟིལ་པ་རེ་རེར་ཡང༌། །
ཟླ་བའི་གཟུགས་བརྙན་སྣང་བ་བཞིན། །
དཔེ་ཡི་རིམ་པ་རེ་རེས་ཀྱང༌། །
འཁོར་འདས་ཆོས་ཀུན་མཚོན་པར་ནུས། །

འཇིག་རྟེན་ཡ་རབས་སྤྱོད་པ་ནས། །
མདོ་སྔགས་ལམ་གྱི་རིམ་པའི་བར། །
དཔེར་བྱ་གཅིག་གིས་མཚོན་པ་འདི། །
ལེགས་བཤད་འཕྲུལ་གྱི་རྒྱ་མཚོ་ཡིན། །

ལོངས་སྤྱོད་འཁོར་ལོའི་ཆུ་གཏེར་ན། །
དབྱངས་ལྡན་ངང་མོ་རྣམ་རོལ་པ། །
དེ་ཡི་ཁ་ལས་ལེགས་བཤད་ཀྱི། །
རྦ་རླབས་འཁྲི་ཤིང་ཅི་ཡང་གཡོ། །

གང་ཡང་བདག་བློའི་ཆུ་གཏེར་ལས་འཁྲུངས་ལེགས་བཤད་གསར་པའི་ཟླ་བ་ནི། །
འཇིག་རྟེན་རྨོངས་པའི་མུན་འཕྲོག་སྙིང་གི་གདུང་སེལ་བསིལ་བའི་རེག་པ་ཅན། །
དེ་ཡི་དགེ་བ་ས་གསུམ་རྣམ་དཀར་འོད་ཀྱི་གོས་བཟང་འཛིན་པ་དེས། །
སྐྱེ་དགུའི་ལེགས་བྱས་བློ་དང་ལྷན་ཅིག་བསྟན་པའི་ཆུ་གཏེར་རྒྱས་གྱུར་ཅིག ། ། །



 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།