གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མཁས་པ་དང་བླུན་པོ་བརྟག་པའི་བསྟན་བཅོས་དགེ་ལྡན་ལེགས་བཤད་པད་མ་དཀར་བོའི་ཆུན་པོ་ཞེས་བྱ་བ་བཞུགས་སོ།།༣

2009-11-26 17:57:00 བསོད་ནམས་གྲགས་པ། ཀློག་གྲངས། མཆན ཡོད།

 

མཁས་པ་བློ་གྲོས་མཛངས་པའི་མཐུས།

རང་གི་གཏམ་ངན་ཐབས་ཀྱིས་སེལ།

དྲང་སྲོང་ཞིག་གིས་རྒྱལ་པོ་ལ།

ཐབས་ཀྱིས་དག་པར་བྱས་ལ་ལྟོས།

 

བླུན་པོ་མཛངས་པའི་བློ་མེད་པས།

རང་གི་གཏམ་ངན་ངོ་སོར་བྱེད།

ཙུ་ཏའི་ཡུལ་གྱི་རྒྱལ་ཕྲན་འགའ།

ཕ་བསད་པ་ལ་རྒྱལ་རྔ་རྡུང༌།

 

མཁས་པ་ཤིན་ཏུ་ཉམ་ང་བའི།

གནས་ལ་གཟུར་བ་དཔའ་རྟགས་དེ།

སེང་གེ་ཁྱུ་མཆོག་གསོད་པའི་ཚེ།

རྭ་ལས་གཟུར་བ་བྱེད་ཅེས་གྲགས།

 

 

བླུན་པོ་གཅིག་ལས་མེད་ན་ཡང༌།

མང་བ་བཞིན་དུ་ཉེས་སྐྱོན་ཆེ།

སྦལ་བ་རྨ་ཅན་གཅིག་གིས་ནི།

སྲོག་ཆགས་ཟླ་བོ་ཕུང་ལ་ལྟོས།

 

མཁས་པ་གལ་ཏེ་ནོར་ན་ཡང༌།

ཅུང་ཟད་ཙམ་གྱིས་མཐོ་དམའ་ཡིན།

ཆག་ཚད་ཤེས་པའི་བཟོ་བོ་ཡིས།

ནོར་ཡང་སོར་གང་ཡིན་ཞེས་གྲགས།

 

བླུན་པོ་གལ་ཏེ་ནོར་བ་ན།

ཚད་ལས་བརྒལ་བའི་མཐོ་དམའ་འབྱུང༌།

རི་དྭགས་རྒྱ་རུ་ཚུད་པ་ན།

སྲོག་དང་བྲལ་བའི་ཉེས་དམིགས་ལྟོས།

 

མཁས་པས་རང་སྲིད་ནང་བསྡུམས་ཏེ།

སྡང་བའི་དགྲ་ལ་ནུས་པ་འདོན།

སྲིན་པོ་རང་ཁྲིམས་བསྡོམས་ནས་ནི།

ཕ་རོལ་མི་ཤ་ཟ་ལ་ལྟོས།

 

བླུན་པོ་དགྲ་ལ་བག་འཁུམས་ཀྱང༌།

ནང་དུ་འཁྲུགས་ལོང་སྣ་ཚོགས་བྱེད།

ཁྱི་ངན་མི་ལ་མཇུག་བསྒྲིལ་ཡང༌།

ཕན་ཚུན་སྐྱེལ་བསུ་བྱེད་ལ་ལྟོས།

 

མཁས་པས་དགྲ་ལ་མིག་བསྲིངས་པས།

ཐ་མར་དགྲ་བོ་དབང་དུ་བསྡུས།

དཀའ་ཐུབ་ཅན་གྱི་བཟོ་པ་ཡིས།

རྒྱལ་པོ་དབང་དུ་བསྡུས་ལ་ལྟོས།

 

བླུན་པོས་དགྲ་ལ་ལན་བྱས་པས།

དཀའ་བ་རྒྱུན་མི་འཆད་པ་འཐོབ།

སྲོག་ཆགས་བྱ་རོག་འུག་པ་གཉིས།

རྟག་ཏུ་འཐབ་པའི་སྤྱོད་ཚུལ་ལྟོས།

 

མཁས་པ་ང་རྒྱལ་ཞི་བའི་མཐུས།

དམ་པ་བསྟེན་ནས་ལེགས་བཤད་ལེན།

གཞོན་ནུ་ནོར་བཟང་ཞེས་བྱ་བས།

བཤེས་གཉེན་བཙལ་བའི་རྣམ་ཐར་ལྟོས།

 

བླུན་པོ་ང་རྒྱལ་ཆེ་བའི་མཐུས།

དམ་པ་བསྟེན་པའི་གོ་སྐབས་མེད།

མཁས་རློམ་ཞིག་གིས་མཁན་སློབ་ནི།

མེད་པར་རང་རྟགས་བླངས་ཞེས་གྲགས།

 

མཁས་པ་དང་བོ་དབྱེ་དཀའ་ཞིང༌།

ཕྱེ་ནས་ཡང་ནི་འདུམ་པ་སླ།

ལྗོན་ཤིང་གཅོད་པ་དཀའ་ན་ཡང༌།

སྦྱར་བའི་ཚེ་ན་འབྱར་ལ་ལྟོས།

 

བླུན་པོ་དང་བོ་དབྱེ་སླ་ཞིང༌།

ཕྱེ་ནས་ཡང་ནི་འདུམ་པ་དཀའ།

སོལ་བ་ཆག་པར་གྱུར་བ་ན།

འབྱར་བའི་གོ་སྐབས་མེད་ལ་ལྟོས།

 

མཁས་པ་ཤིན་ཏུ་ཁྲོས་གྱུར་ཀྱང༌།

ཕུགས་སུ་ཕན་པ་ཁོ་ན་སྟེ།

ཡི་དམ་ཆོས་སྐྱོང་ཁྲོས་ན་ཡང༌།

བར་ཆད་མཐའ་དག་སྲུང་ལ་ལྟོས།

 

 

བླུན་པོ་ཤིན་ཏུ་འཛུམ་ན་ཡང༌།

ཕུགས་སུ་གནོད་པ་ཁོ་ན་སྟེ།

གཤིན་རྗེ་འཛུམ་པ་སྟོན་པ་ཡིས།

སྲོག་ཆགས་གསོད་པའི་ཚུལ་ལ་ལྟོས།

 

མཁས་པ་འབྱོར་བ་ཙམ་གྱིས་ནི།

གཞན་ལ་མི་གནོད་བདེ་བར་གནས།

རི་དྭགས་རྒྱལ་པོ་འགྲངས་པ་ན།

གཞོགས་གཡས་ཕབ་ནས་ཉལ་ལ་ལྟོས།

 

བླུན་པོ་ཅུང་ཟད་འབྱོར་བ་ན།

གཞན་ལ་གནོད་པ་ཁོ་ན་སྟེ།

ཝ་སྐྱེས་ཟས་ཀྱིས་འགྲངས་པ་ན།

བརྒྱལ་ནས་ལྟས་ངན་སྒྲོག་ལ་ལྟོས།

 

མཁས་པ་ཡོན་ཏན་བསླབ་པའི་ཚེ།

སྡུག་ཀྱང་སྲན་དུ་ཚུགས་པ་སྟེ།

རྒྱ་མཚོར་བགྲོད་པར་དཀའ་ན་ཡང༌།

ནོར་བུ་ལོན་པས་འཚེངས་ལ་ལྟོས།

 

བླུན་པོས་སྐྱིད་འདོད་ལེ་ལོས་འདའ།

མ་བསླབ་ཡོན་ཏན་ཅི་ལ་འབྱུང༌།

ཚོང་དང་ཞིང་ལས་མ་ནུས་པའི།

ཁྱིམ་པ་ཕལ་ཆེར་དབུལ་ལ་ལྟོས།

 

མཁས་པ་རང་གི་སྐྱོན་ལ་ལྟ།

དེ་ཡིས་བག་ཡོད་དགེ་ལེགས་ཐོབ།

མ་སྐྱེས་དགྲ་ཡིས་རང་སྐྱོན་ལ།

བལྟས་པས་བདེན་པ་མཐོང་ལ་ལྟོས།

 

བླུན་པོས་སྙན་གྲགས་ཁྱད་བསད་ནས།

ཅུང་ཟད་འབྱོར་ལ་ངོ་སོ་བྱེད།

རྐུ་འཕྲོག་བྱེད་པའི་སྐྱེ་བོ་ཡང༌།

རྒྱན་གྱིས་མཛེས་པར་བྱེད་ལ་ལྟོས།

 

མཁས་པ་རྟག་ཏུ་ཟོན་གནས་པས།

ནམ་ཡང་གཞན་གྱིས་བརླག་མི་ནུས།

རབ་སྣང་གཏུམ་པོས་ས་འཛིན་ལ།

གླགས་མ་རྙེད་པའི་བྱུང་ལ་ལྟོས།

 

བླུན་པོས་རྟག་ཏུ་ཟོན་གློད་པས།

ངེས་པར་གཞན་གྱིས་བརླག་པར་འགྱུར།

མ་ཞང་གྲོམ་པ་སྐྱེས་ཞེས་པ།

དོང་དུ་བཅུག་པའི་བྱུང་བ་ལྟོས།

 

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།