གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཕ་མའི་དྲིན་གཟོ་དང་འབྲེལ་བའི་མགུར་དབྱངས་ཐར་འདོད་སྙིང་གི་བདུད་རྩི་ཞེས་བྱ་བ།

2014-09-19 00:14:00 ཀོའུ་བ་བློ་བཟང་བཤད་སྒྲུབ་རྒྱ་མ ཀློག་གྲངས། མཆན ཡོད།

ཨོཾ་མ་ཎྀ་པདྨེ་ཧཱུཾཿ། 
མགོན་པོ་སྤྱན་རས་གཟིགས་ལ་གསོལ་བ་འདེབས།། 
རྒྱལ་ཁམས་སེམས་ཅན་ཐམས་ཅད་བདེ་གྱུར་ཅིག ། 
མར་གྱུར་འགྲོ་བའི་དྲིན་ལན་གསབ་པའི་ཕྱིར།། 
ཚེ་རབས་ཀུན་ཏུ་ཕན་པའི་སྨོན་ལམ་འདེབས།། 

སྐྱེ་བ་ཐོག་མ་མེད་པའི་དུས་ཤིག་ནས།། 
འཁོར་བའི་གནས་འདིར་རྒྱུན་ཆད་མེད་པར་འཁྱམས།། 
ཕ་མར་མ་གྱུར་སེམས་ཅན་འགའ་ཡང་མེད།།
དེ་ཡི་དྲིན་ལན་ཆོས་ཀྱིས་འཁོར་བར་ཤོག །

 ཟླ་དགུ་ཞག་བཅུའི་བར་དུ་ལུས་ལ་བཟུང་།། 
བཙས་ནས་ཉིན་མཚན་ཀུན་ཏུ་གཅེས་པར་བསྐྱངས།། 
དཔྲལ་བའི་མིག་དང་ཁོང་བའི་སྙིང་བཞིན་བསམ།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག །

རྙེད་དཀའི་རྟེན་བཟང་དེ་འདྲ་ཐོབ་པའི་ཚེ།། 
ཡིད་བཞིན་ནོར་རྙེད་ལྟ་བུར་དགའ་སྤྲོ་སྐྱེས།། 
ཕན་པ་ཚད་མེད་དྲིན་གྱིས་ཇི་ལྟར་བསྐྱངས།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

བརྩེ་བའི་འཛུམ་གྱིས་བསུས་ཤིང་་ནུ་ཞོས་གསོས།། 
གཉིད་དང་ལྟོ་བཅག་ཤ་ཡི་དྲོད་ལ་སྦྱར།། 
སྣབས་ལུད་མི་གཙང་ཁ་དང་ལག་པས་ཕྱིས།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

རང་གིས་སྡིག་སྡུག་གཏམ་ངན་ཁྱད་བསད་ནས།། 
འབད་པས་བསགས་པའི་རྒྱུ་ནོར་མ་ལུས་པ།།
བུ་ལ་འཕྲོད་ཚེ་བསམ་པ་འགྲུབ་སྙམ་ཤར།། 
དེ་ཡི་ལན་ཆོས་ཀྱིས་འཁོར་བར་ཤོག ། 

བསྒྲུབ་པའི་ནོར་རྫས་རང་ལ་བཞག་ན་ཡང་།། 
སྡིག་པའི་རྣམ་སྨིན་ཕ་མ་དག་གིས་འཁུར།། 
བུ་ཕྲུག་རྒྱགས་པས་བསམ་བློ་ག་ལ་ཐོངས།། 
དེ་ཡིས་དྲིན་ལན་ཆོས་ཀྱིས་འཁོར་བར་ཤོག། 

ལྷན་ཅིག་འཚོགས་ནས་གཏན་དུ་འདུག་རྩིས་བྱས།། 
གློ་བུར་འཆི་བདག་འོངས་ནས་འཁྲིད་པའི་ཚེ།།
རྒྱུས་མེད་བར་དོའི་འཕྲང་ལ་གཅིག་པུར་སོང་།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

ཀྱེ་མ་ཀྱེ་ཧུད་ཕ་མ་དྲིན་མོ་ཆེ།། 
ད་ལྟ་འགྲོ་དྲུག་བར་དོའི་གནས་གང་ན།། 
མཐོ་དམན་སྐྱིད་སྡུག་ཇི་འདྲ་སུ་ཡིས་ཤེས།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག། 

ཟས་ནོར་སྐལ་བ་རྗེས་སུ་སྐྱེལ་ལུགས་མེད།། 
དཀར་པོ་དགེ་བ་མ་གཏོགས་ར་མདའ་མེད།། 
སྐྱབས་གནས་བསླུ་མེད་བླ་མ་དཀོན་མཆོག་མཁྱེན།། 
དེ་ཡི་དྲིན་ལན་ཆོས་ཀྱིས་འཁོར་བར་ཤོག ། 

འདིར་འཚོགས་རྒན་གཞོན་སེར་སྐྱ་ཕོ་མོ་རྣམས།། 
དུས་རྒྱུན་ཕ་མའི་དགེ་རྩ་སྒྲུབ་ལ་རེམ། 
འདི་འདྲའི་ལ་ཡོག་རང་ལ་ཡོང་ངེས་ཡིན།། 
ཕ་མའི་དྲིན་ལན་ཆོས་ཀྱིས་འཁོར་བར་ཤོག ། 

དལ་བའི་རྟེན་བཟང་ལན་གཅིག་ཐོབ་དུས་འདིར།། 
མི་ཚེ་དོན་མེད་སྡིག་ལ་གཟད་གྱུར་ན།། 
མ་འོངས་གཤིན་རྗེའི་ཁྲིམས་རྭར་འཇིགས་པ་ཆེ།། 
ཚུལ་འདིར་ད་ནས་བསམ་བློ་གཏོང་རན་ཡིན།། 

ཐོག་མེད་དུས་ནས་བསགས་པའི་སྡིག་ལྟུང་ལ།། 
འགྱོད་སེམས་དྲག་པོས་གཤགས་སྦྱངས་མ་བྱས་ན།། དཀར་ནག་ལས་ཀྱི་འབྲས་བུ་འཆོར་བ་མེད།། 
རྣམ་སྨིན་ཐོག་ཏུ་བབས་ཚེ་འགྱོད་ཀྱང་འཕྱི།། 

རྒྱུ་ནོར་མི་རྟག་རྩ་ཁའི་ཟིལ་བ་འདྲ།། 
ཚེ་སྲོག་རླུང་ནང་མར་མེ་ཇི་བཞིན་གཡོ།། 
འདི་ཕྱི་ཀུན་ཏུ་ཕན་པ་དམ་པའི་ཆོས།། 
ལེ་ལོ་མེད་པར་མྱུར་དུ་སྒྲུབ་ན་ལེགས།། 

དེང་སང་སྙིགས་མའི་མི་རྣམས་འགྱུར་ལྡོག་ཆེ།། 
འགྲོགས་ཡུན་རིང་ན་ལྷག་པར་ཇེ་ངན་ཡིན།།
ངན་སེམས་འཆང་བ་བསོད་ནམས་ཟད་པའི་རྒྱུ།།
མི་ལ་ངན་སེམས་མ་འཛིན་སྙིང་གཏམ་ཡིན།། 

དམ་ཆོས་ཟབ་མོ་ཚུལ་བཞིན་སྒྲུབ་འདོད་ན།། 
དཀོན་མཆོག་གསུམ་དངོས་མཚན་ལྡན་བླ་མ་ལ།། 
དད་གུས་བརྟན་པོ་འགྱུར་བ་མེད་པ་དགོས།། 
འདི་ནི་མེད་མི་རུང་ངོ་ཤེས་ལྡན་རྣམས།། 

ལུས་ཀྱིས་ཕྱག་མཆོད་སྐོར་བ་སྨྱུང་གནས་དང་།། 
ངག་གིས་གཟུངས་སྔགས་ཡིག་དྲུག་བཟླས་བརྗོད་དང་།། ཡིད་ཀྱིས་བླ་མ་ལྷ་ལ་གསོལ་འདེབས་རྣམས།། 
ལུས་ངག་ཡིད་གསུམ་དགེ་ལ་སྦྱོར་ཚུལ་ཡིན།། 

བླ་མ་དགེ་འདུན་སྡེ་ལ་བསྙེན་བཀུར་དང་།། 
རྟེན་གསུམ་བཞེངས་དང་ཚེ་ཐར་སྲོག་བླུ་སོགས།། 
དགེ་རྩ་གང་བསྒྲུབ་ཕ་མའི་དོན་ཡིན་པས།། 
ཕ་མ་སེམས་ཅན་སངས་རྒྱས་ཐོབ་ཕྱིར་བསྔོས།། 

རྒྱལ་བའི་གསུང་རབ་མགུར་དུ་བཞེངས་བ་ལ།། 
ཚིག་དོན་ལེགས་པར་ཉན་པའི་མི་ཡོད་དམ།། 
གཏན་གྱི་བདེ་སྐྱིད་སྒྲུབ་ཚུལ་བཞག་པ་ལ།། 
ཇི་བཞིན་ལག་ཏུ་ལེན་པའི་མི་ཡོད་དམ།། 

ཐར་བར་འདྲེན་བྱེད་ཐུགས་རྗེའི་ལྕགས་ཀྱུ་ལ།། 
དད་པའི་ཨ་ལོང་ཅན་གྱི་མི་ཡོད་དམ།། 
ཕ་མའི་དྲིན་ལན་ཚུལ་བཞིན་འཇལ་བ་ལ།། 
དཀའ་སྤྱད་སྙིང་རུས་ཆེ་བའི་མི་ཡོད་དམ།། 

དེ་སྐད་དུ་ཡང་ཕྱོགས་མེད་རྒྱལ་ཁམས་པའི།། 
དད་པ་ཅན་གྱི་སེར་སྐྱ་ཕོ་མོ་རྣམས།། 
དམ་པའི་ཆོས་ལ་ཡང་དག་བསྐུལ་པའི་ཕྱིར།། 
དབེན་པའི་རི་ཁྲོད་ཅིག་ནས་སྨྲས་པ་ཡིན།། 

འོད་དཔག་མེད་དང་སྤྱན་རས་གཟིགས་མགོན་མཁྱེན།། ངན་སོང་འཁོར་བའི་སྐྱེས་སྒོ་གཅད་དུ་གསོལ།། 
དམིགས་ཡུལ་ཉམས་ཐག་འགྲོ་ལ་ཐུགས་རྗེས་གཟིགས།། མཐོ་རིས་ཐར་བའི་ལམ་སྣ་དྲངས་དུ་གསོལ།། 
   ཅེས་ཕ་མའི་དྲིན་གཟོ་དང་འབྲེལ་བའི་མགུར་དབྱངས་ཐར་འདོད་སྙིང་གི་བདུད་རྩི་ཞེས་བྱ་བ་འདི་ནི།  གཅིག་ཏུ་རང་ལ་རེ་ལྟོས་ཆེ་བའི་དད་པ་ཅན་ཨ་འབྱུང་སྡེ་བའི་སྔགས་འཆང་དགེ་འཕེལ་གྱིས་སྡེ་གཞུང་གིས་མ་ཎྀ་འཛུགས་སྐབས་སུ་མ་ཎྀ་སྐུལ་རྒྱུ་འདི་འདྲ་ཞིག་དགོས་ཞེས་ཡང་ཡང་ནན་ཆེ་བར་བསྐུལ་བའི་ངོར། རྒྱལ་ཁམས་མྱུལ་བའི་ལྡོམ་བུ་བ། ཀོའུ་བ་སྤྲུལ་མིང་བ༧བློ་བཟང་བཤད་སྒྲུབ་རྒྱ་མཚོས་དམ་པ་གོང་མའི་གསུང་ལ།  རྗེས་བཟློས་ཀྱི་ཚུལ་དུ་ཅུང་ཟད་རྒྱས་བསྡུས་རན་པ་ཞིག་སྦྱར་བ་འདི་རྣ་བས་ཐོས་ཚད་ཐམས་ཅད་ཀྱི་ངན་སོང་གི་སྐྱེས་སྒོ་ཁེགས་པར་ཤོག་ཅིག  །

  ༧མདོ་སྔགས་རིག་གནས་དང་བཅས་པར་གཞན་དྲིང་མི་འཇོག་པའི་མཁྱེན་རབ་ཀྱི་ཀློང་བརྡོལ་བའི་ཀོའུ་བ་བློ་བཟང་བཤད་སྒྲུབ་རྒྱ་མཚོ་མཆོག་ནི།   ཕྱི་ལོ༡༩༠༤ལོར་སྐུ་འཁྲུངས་པ་དང་། ཕྱི་ལོ༡༩༤༦ལོར་སྐུ་མྱ་ངན་ལས་འདས་སོ།།  གསུང་འབུམ་པོད་བཅུ་གཅིག་ལྷག་མཛད་མོད།  རིག་གནས་གསར་བརྗེ་ཆེན་མོའི་དྲག་རླུང་ཁྲོད་དུ་ཐིམ་སོང་བ་དང་ད་ལྟ་ཐར་ཐོར་རེ་ལྷག་ཡོད་པ་གསུང་འབུམ་པོད་གཉིས་ཙམ་ཡོད་དོ།།
ཁོང་གི་སྐུ་པར་འདི་ནི་ལྷ་རིས་པ་ཨ་མདོ་བྱམས་པའི་ཕྱག་བྲིས་ཡིན། ཞོ་བཟང་དགེ་འདུན་ཚུལ་ཁྲིམས་ཀྱིས་མཁོ་སྤྲོད་བྱས་པའོ།།

       
           (མཆོད་མེའི་པར་དབང་གཞན་གྱིས་དགོལ་མི་རུང)
 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།