གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མཉམ་པ་ཆེན་པོའི་ཆོས་ཉིད།

2009-10-28 11:56:00 རྡོ་གྲུབ་འཇིགས་མེད་བསྟན་པའི་ཉི ཀློག་གྲངས། མཆན ཡོད།

༅༅།།མཉམ་པ་ཆེན་པོའི་ཆོས་ཉིད་མཐའ་བཞིའི་སྤྲོས་བྲལ།།ཀུན་སྣང་སྒྱུ་མའི་ལང་ཚོར་རྟག་ཏུ་སྣང་བའི།། ངོ་མཚར་བསམ་གྱིས་མི་ཁྱབ་འཇམ་པའི་རྡོ་རྗེའི།།སྣང་སྟོང་གཟུགས་སྐུའི་དཀྱིལ་འཁོར་དེ་རིང་སྟོན་ཤོག།དག་ཆེན་ཡེ་ཤེས་རོལ་མོ་འབུམ་དུ་འབར་ཞིང་།།རྨད་བྱུང་འཕྲུལ་གྱི་རོལ་མོས་འཇིག་རྟེན་ཁྱབ་མཛད།།གྲགས་སྙན་རོལ་མོ་སྟོང་ལྡན་འཇམ་པའི་རྡོ་རྗེ།།ཕུལ་བྱུང་ཕྲིན་ལས་རོལ་མོས་སྲིད་འདི་སྐྱངས་ཤོག།སྒྱུ་འཕྲུལ་དྲ་བ་ཆེན་པོ་ཡེ་ཤེས་གཅིག་ཉིད།།མཁའ་ཁྱབ་ཞི་དང་ཁྲོ་བོའི་གར་གྱིས་རྩེན་པའི།།རྣམ་རོལ་སྣང་བ་འབུམ་ལྡན་འཇའ་པའི་རྡོ་རྗེ།།གཟུངས་དང་སྤོབས་པའི་ཆར་ཆེན་སྙིང་ལ་སྙོལ་ཤོག།ཐོགས་མེད་སྤོབས་པའི་བླ་གྲོས་མཚུངས་པ་མེད་ཅིང་།།མི་འཇིགས་སངྒེའི་སྒྲ་དབྱངས་ལྷུག་པར་འཇོ་བའི།།མཐའ་ཡས་གདུལ་བྱ་སྨིན་མཛད་འཇམ་པའི་རྡོ་རྗེ།།ཚུལ་གཉིས་སྣང་བ་དམ་པས་བདག་ཡིད་ཁྱབ་མཛོད།།སྐྱེ་དང་འཆི་བའི་མཚན་མ་ངང་གིས་ཞི་བས།།རྟག་ཆེན་གཞོན་ནུའི་འཇོ་སྒེག་ཅིར་ཡང་ངོམས་པའི།།མཁྱེན་གཉིས་ཡེ་ཤེས་སྐུ་ཅན་འཇམ་པའི་རྡོ་རྗེས།།མཚན་རྫོགས་སྐུ་ཡི་དཀྱིལ་འཁོར་མངོན་དུ་སྟོན་ཤོག།ལམ་ལམ་མཚན་དཔེའི་སྣང་བ་སྟོང་དུ་འཇོ་ཞིང་།།མཐིང་མདོག་རལ་བའི་ཟུར་ཕུད་ལྡེམ་ལྡེམ་གཡོ་བཞིན།།ཞིང་མང་འོད་བརྒྱས་འགེངས་མཛད་འཇམ་པའི་རྡོ་རྗེས།།དྲན་དང་རྟོགས་པའི་ཆར་ཆེན་ཡིད་ལ་ཕོབ་ཤོག།འོད་བཟང་རལ་གྲིའི་འཁྲུལ་འཁོར་ཀུན་ཏུ་སྐྱོད་ཅིང་།།འཁྲིལ་ལྡེམ་ཞི་བའི་ཉམས་བཟང་འཛད་པ་མེད་པས།།ལྷ་ཀླུའི་དྲེགས་པ་ཟིལ་གནོན་འཇམ་པའི་རྡོ་རྗེས།།བྱིན་རླབས་མེ་ཏོག་ཆར་ཆེན་རྟག་ཏུ་སྙོལ་ཤོག།གོ་ཆ་ཆེན་པོ་བགོས་པའི་འཁོར་གྱི་དབུས་ན།།མི་ཤིགས་དྭངས་མའི་སྐུ་མཆོག་ལྷམ་མེར་གསལ་ཞིང་།།སྨོན་ལམ་ཆེན་པོའི་གཟི་བརྗིད་མཚུངས་ཟླ་མེད་པས།།འཕགས་མཆོག་འཇམ་པའི་ལྷ་དེས་བྱིན་རླབས་སྩོལ་ཤོག།ཅེས་པའང་གཞོན་ནུ་འཇིགས་མེད་པས་ཡང་ཀླུང་པདྨ་བཀོད་དུ་བྱི་བ་ཟླ་བའི་ཚེས11ཀྱི་སྔ་དྲོ་བྲིས་པའོ།། 

རྩོམ་ཁུངས། མགོ་ལོག་ཁུལ་རྩོམ་སྒྱུར་ལས་ཁུངས་ཀྱིས་བསྒྲིགས་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།