ལྷག་བསམ་གངས་དང་དུང་ལ་འགྲན་ནུས་བྲལ།། 
ཀུན་ཕན་ངག་སྒོ་འཇམ་པོའི་སྨྲ་ལྕེ་བྲལ།།
ཁྱེད་མགུ་ཁོང་མགུའི་གཤིས་སྤྱོད་དེ་བས་བྲལ།།
བསེ་རུ་ལོག་སྤྱོད་པ་ཡིས་རང་ཉིད་མཐོང་།།

མཐོ་སར་སྤྲེལ་ལད་རྔ་མ་གང་བྱུང་གཡུགས།། 
དམའ་སར་མགོ་བོ་བརྡུང་བའི་གཏུམ་སྤྱོད་ཅན།།
མཐོ་དམའི་བར་ན་གཡོ་སྒྱུར་བྱང་ཆུབ་པ།། 
ཁ་བྲལ་རིང་ལུགས་བསེ་རུ་རེད་ཅེས་ཟེར།། 

ཆོལ་ཁའི་ཞེན་ཁོག་མེ་ལྕེས་རང་གཞན་སྲེག།
མ་རིག་ཞགས་པ་ནག་པོས་རང་གཞན་བཅིངས།། 
ཆོལ་གསུམ་བོད་མིར་གནམ་སའི་ཁྱད་པར་ཕྱེ།། 
བྱ་ངན་སྤྱོད་ངན་སྤེལ་མཁན་བསེ་རུ་ཡིན།། 

གང་ཤེས་དཔེ་མཁྱུད་ཐབས་ལ་འབད་པ་དང་།། 
མ་ཤེས་ཤེས་མདོག་རྫུ་བག་སྟོན་པ་དང་།། 
མཁས་ཉམས་ཁེངས་དྲེགས་ངོ་འབག་གྱོན་མཁན་དེ།། 
བཙོན་རྒན་བསེ་རུ་ཡིན་ན་དགའ་བ་ལ།། 

བརྡ་དག་མཁན་པོའི་མིང་གྲགས་མེད་དང་གཅིག།
སྒྱུ་རྩལ་མཁས་པའི་སྙན་གྲགས་མེད་དང་གཉིས།།
རྩོམ་རིག་སྨྲ་བའི་མཚན་སྙན་མེད་དང་གསུམ།། 
མེད་པོ་བསེ་རུ་ཡིན་པ་སྐྱོ་བ་ལ།། 

མི་ཚེ་གཡོག་ལ་འདུར་བའི་བྲན་ཁོལ་ང་།།
དགེ་སློབ་ཀུན་ལ་སྡང་བའི་སྡང་དགྲ་ང་།།
ཤེས་ཡོན་ལམ་བཟང་འགོག་པའི་བདུད་པོ་ང་།།
རིགས་ཀྱི་ཞབས་ནས་འདྲེན་མཁན་བྱེད་པོ་སུ།།

དམའ་སར་བསྡད་ན་བྱབ་ཆུང་བསེ་རུ་ཟེར།།
བྱམས་བརྩེས་བསྐྱངས་ན་གཡོ་སྒྱུ་ཆེ་ཞེས་ཟེར།།
ཁུ་སིམ་ལས་ལ་འབད་ན་ལྐུགས་པ་ཟེར།། 
འཇིག་རྟེན་འདི་ལ་ང་ཆེ་ང་བཙན་མཁོ།།

སེམས་དང་སེམས་པ་འདྲེས་པའི་བར་མཚམས་ནས།།
འཛུམ་མདངས་འཛུམ་གྱིས་བསུ་བའི་བར་གསེང་ནས།། 
དགེ་སློབ་དམ་ཚིག་མཐུན་པའི་ཉིན་མོ་ནས།།
རིགས་ཀྱི་དོན་ཆེན་སྒྲུབ་ལ་ངལ་མི་འགྱུར།།

འཇིག་རྟེན་ལྟ་ལུགས་གཅིག་ལ་མཐོང་ལུགས་གཉིས།།
འཇིག་རྟེན་མཐུན་སྣང་ཆོས་ཤིག་སུ་ཡིས་སྟོན།། 
འཇིག་རྟེན་གོ་ལ་ནམ་ཞིག་མ་འཇིག་བར།། 
འཇིག་རྟེན་ལྟད་མོ་ཕར་ལྟ་ཚུར་ལྟ་རེད།།

ཀུན་ཕན་བསམ་པ་དཀར་པོ་ཉི་ཟླ་བཞིན།། 
འཇིག་རྟེན་མུན་པ་སེལ་བའི་མཆོག་གྱུར་ཡིན།།
ཀུན་གནོད་སྦྱོར་བ་རྩུབ་པོ་དུག་རླངས་བཞིན།།
འཇིག་རྟེན་མུན་པར་བརྫངས་པའི་ནད་ཡམས་ཡིན།།

རྩོམ་ཁུངས། ངེད་དྲ་བ།