ཁྱི་ཁ་ཚུམས།
ཀ་ལིའི་ནང་གི་ཀླད་པ་སྟོང་བ་ཅན།།
ཁ་ནས་བཤད་ཚད་མི་གཙང་ཕུང་བོ་ཅན།།
ག་ཤེད་ཅིག་ནས་ཡོང་བ་མི་ཤེས་མོད།།
ང་རྒྱལ་མ་གཏོགས་ཡོན་ཏན་ངས་མ་མཐོང་།།
ཅ་ཅོའི་ཚིག་གི་འཕྲོ་ན་ཚིག་མཐུད་ནས།།
ཆ་མེད་མི་ལ་སྙོན་འཛུགས་བྱེད་མཁན་ཁྱོད།།
ཇ་དམར་ལྟ་བུའི་ཆང་གིས་བཟི་མེད་ན།།
ཉ་ཉོག་དེ་འདྲ་མང་པོ་མ་ལབ་རོགས།།
ཏ་ཐཱ་ག་ཏའི་རྗེས་འཇུག་ཡིན་ཟེར་བའི།།
ཐ་ཆད་གྲྭ་གཟུགས་འགའ་ཡི་སྐྱོན་ཁྱེར་ནས།།
ད་ལྟའི་དུས་ཀྱི་ཆོས་པ་ཡོད་དོ་ཅོག།
ན་རཀ་སྐྱེ་ཞེས་སྡིགས་ན་ཐལ་ཆེ་འདུག།
པ་ཊུའི་ཁྲི་ལ་བཞུགས་པའི་སྐྱེས་བུ་འགས།།
ཕ་མེས་རིག་གཞུང་སྤྱི་བོར་བཀུར་བ་དང་།།
བ་བྱུང་འོ་མ་ལྟ་བུའི་ལྷག་བསམ་གྱིས།།
མ་གྱུར་འགྲོ་དོན་མཛད་ན་སྡང་དོན་ཅི།།
ཙ་གེ་ཙིག་གེ་བཤད་པས་མི་ཆོག་པར།།
ཚ་ཚ་འུར་འུར་སྐུར་འདེབས་བྱེད་མཁན་ཁྱོས།།
ཛ་ཡའི་རྗེས་འཇུག་བཟང་པོའི་ཡོན་ཏན་རྣམས།།
ཝ་ལེར་མ་མཐོང་བ་འདི་ལས་རེ་བཙོག།
ཞ་ཉེ་དངུལ་གཉིས་ཁ་ཁ་མི་ཁོར་ན།།
ཟ་མས་རྒྱགས་རྗེས་ཁ་རོག་བསྡད་ན་ཡག།
འ་རི་འུ་རིའི་ཉོག་གཏམ་དེ་དག་ལ།།
ཡ་མཚན་རྩི་མཁན་བླུན་པོ་མ་གཏོགས་མེད།།
ར་གན་གསེར་དུ་བརྫུས་འདྲའི་མི་ངན་གྱི།།
ལ་གཏམ་ལུང་གཏམ་དག་ལ་ཡིད་ཆེས་ནས།།
ཤ་རུས་གཅིག་པའི་ནང་མི་མཁས་ཆེན་ཚོ།།
ས་བཤད་རྡོ་བཤད་དེ་འདྲས་མ་སྨོད་ཅིག།
ཧ་ལམ་བདེན་གཏམ་འཆད་པའི་ལྕེ་མེད་པའི།།
ཨ་ཉོག་བསམ་མེད་ཁྱོད་ཀྱི་ཁྱི་ཁ་ཚུམས།།
༢༠༡༤ ༡༡ ༡
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།