གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཀ་རྩོམ་མུ་ཐི་ལིའི་ཕྲེང་བ།

2016-01-11 17:41:20 གཡུ་རལ་ཅན། ཀློག་གྲངས། མཆན ཡོད།

ཀ་ཕུར་འདམ་ལ་བཏབ་པའི་བློ་ཡི་གུར།།
ཁ་རྒོད་ལྕེ་རྒོད་སྟོང་སྒྲས་སྐྱོམ་པ་ཡིས།།
ག་ལེར་ཡོམ་བཞིན་ཐང་ལ་འགྱེལ་བྱེད་པ།།
ང་ཡིས་བསམ་ན་རི་བོང་གནམ་རྡིབ་དཔེ།།

ཅ་རེ་དཔེ་ཀློག་ཐོས་བསམ་ཡན་པར་བཏང་།།
ཆ་ཙམ་བློ་ངོར་སྦྱང་བ་མེད་ན་ཡང་།།
ཇ་ཆང་ཁ་ནས་རིགས་ཀྱི་བདེ་སྡུག་གླེང་།།
ཉ་དང་ཉུང་མ་བསྲེས་པའི་དཔེ་རུ་བསམ།།

ཏ་ཐཱ་ག་དའི་སྐུ་ཙམ་སྐྱབས་མཆི་ནས།།
ཐ་མལ་ལས་ལས་ལྡོག་སྙམ་སྐྱ་སེར་དག།
ད་ཕན་དཔེ་ཀློག་མི་ཕྱོགས་ཐན་ལྟས་ཉིད།།
ན་བའི་མི་ལ་སྨན་དཔྱད་ཀློག་པ་ཙམ།།

པ་ཊུའི་རང་མིང་གསོལ་བའི་ཁེངས་རློམ་པ།།
ཕ་རོལ་དགག་བྱའི་གནད་ལ་རབ་ཏུ་རྨོངས།།
བ་གླང་ལྟ་བུའི་བརྟུལ་བཞུགས་མཆོག་འཛིན་པ།།
མ་མ་ཉིད་ཀྱང་མ་མིན་སྒྲུབ་པར་དོགས།།

ཙ་ར་བོར་ཏེ་རྩེ་མོར་འཆིང་བྱེད་པ།།
ཚ་ཁུ་འཐུང་བའི་སྐོམ་པ་སེལ་མིན་ཟླ།།
ཛ་ཧུའི་བུ་མོའི་རེ་བ་ཀུན་སྐོང་ལ།།
ཝ་ཡི་བརྟུལ་བཞུགས་བཟུང་སྟེ་རྒྱང་དུ་བཀྱེད།།

ཞ་ར་གླང་འཇུག་རྣམ་ཐར་སྐྱོང་བ་དག།
ཟ་ཟི་སྒྲ་ཡིས་ཀུ་ཅོ་འདོན་ལ་མཁས།།
འ་འུར་སྒྲོ་འདོགས་མི་ཆོད་གཏམ་གྱི་བྱུར།།
ཡ་མཚན་སྙམ་པའི་ཆོས་ནི་གཅིག་མ་མཐོང་།།

ར་མ་རྒྱལ་མོའི་ཨོག་ཚོམ་ཆ་བྱད་འཛིན།།
ལ་ཤས་ཕོ་མོའི་ཆ་ལུགས་གོ་ཟློག་པ།།
ཤ་ཁྲག་ཚོད་མེད་བསྲེས་པའི་དུད་འགྲོའི་གཤིས།།
ས་ཆེན་ཨ་མ་ཡིན་ཡང་བཟོད་པར་དཀའ།།

ཧ་ལས་ངོ་མཚར་བསྐྱེད་ཕྱིར་སྤེལ་མིན་ཏེ།།
ཧ་ཧ་ཧོ་ཧོས་སྒྲོག་གཏམ་དེ་བས་མིན།།
ཨ་མཚར་ཀུ་རེས་དོན་གྱི་གནད་འབྱིན་པ།།
ཨ་སྟོང་ཙམ་དུ་ཟད་ན་མཐོལ་ལོ་བཤགས།།

       ༢༠༡༥/༥/༡༥ཉིན་ངྷི༔ཚ་དགོན་གྱི་གནའ་གྲོང་རི་དྭགས་ནགས་ནས་རྫོགས་པར་སྦྱར།


(མཆོད་མེའི་པར་དབང་གཞན་གྱིས་དགོལ་མི་རུང)


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།