གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རྨི་ལམ་གྱི་འགྲེལ།

2016-10-10 15:37:38 གཡུ་རྔོག་ལུང་རྟོགས། ཀློག་གྲངས། མཆན ཡོད།


                         ༡
དོ་ཞག་གནམ་མཐའི་སྐར་མ་ངུ་བཞིན་འདུག།
སྨྲེང་བ་རླུང་བུ་དག་གིས་གཏོར་བཞིན་འདུག།
འགྱུ་འཕྲོའི་རྒྱུད་སྐུད་དལ་གྱིས་འཐེན་གྱུར་ན།།
དོ་ཧའི་དངུལ་གྱི་མེ་ཏོག་འཐོར་ཀྱང་སྲིད།།
སང་ཞོགས་རྨི་ལམ་བུ་མོ་གཅེར་ཉལ་མ།།
ཉི་ཟེར་ཐོག་གིས་གནས་དབྱུང་བཏང་གྱུར་ཚེ།།
སྨུག་པའི་སྐེ་དཀྲིས་བཅིངས་པའི་རི་བོའི་ཚོགས།།
གནམ་སྔོན་འདེགས་པའི་ཀ་བ་མིན་ཀྱང་སྲིད།།
                       ༢
རྩྭ་ལོའི་ཟིལ་བར་གནས་བཅས་དྲི་ཟའི་གྲོང་།།
རླུང་བུའི་སྤུ་གྲི་ངར་མའི་སོ་ཁར་འཕྱོ།།
མེ་ལྕེའི་རལ་བ་ཁམ་པའི་བརྗིད་རྔམ་འདར།།
སོ་མར་གྱུར་པའི་རྨི་ལམ་དེ་དག་ཀྱང་།།
ལུས་པོ་རྗིད་གྱོང་མ་གྱུར་སྔུན་སོ་དེར།།
ལྗང་བུའི་ཚོགས་ལྟར་ལང་ཚོ་རྙེད་པར་རེ།།
                      ༣
ཁ་བའི་བཀྲེས་པར་གྱུར་བའི་དགུན་ཁ་འདིར།།
རྡུལ་འཚུབ་དམར་བོ་དག་གིས་རི་ལུང་གི།
སྔུན་དང་རྒྱབ་སོ་ཀུན་ཏུ་བྱེ་མ་གཏོར།།
སྐད་ཅིག་དྲན་རྫོགས་རེ་བ་འདི་ལྟར་བྲིས།།
བྲག་ངོས་རྦབ་ཆུ་ལུང་བའི་ཕུ་ཆུ་ཀུན།།
རྐང་བ་འབུམ་ལྡན་གང་གཱའི་སྟོབས་སྙེད་དུ།།
གྱུར་ཏེ་རང་བྱུང་མ་མའི་བྲང་གཞུང་ཀུན།།
བརྩེ་བའི་བརླན་གྱིས་བྲན་པར་གྱུར་ན་ཨང་།།
ཡང་གཅིག་བཤད་ན་རྐྱེན་གྱི་གཡང་གཟར་ཏུ།།
རྒྱུ་བའི་ཚོགས་ནི་འདུས་བྱས་མིན་ནམ་ཨང་།།
   
                       2015/12/12/ མཚན་གུང་སྦྱར།


རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།