རྟགས་དང་རྟེན་འབྲེལ་མོལ་བའི་ཁ།།
ལས་དང་རྒྱུ་འབྲས་འཆད་པའི་ཁ།།
ཆོས་དང་འཇིག་རྟེན་འབྱེད་པའི་ཁ།།
ཁ་འདི་སྣང་བ་མཐའ་ཡས་ཡིན།།

བཟང་ངན་དཀར་ནག་རྩོད་པའི་ཁ།།
བདེ་སྡུག་སྤངས་བླངས་འདྲེན་པའི་ཁ།།
ལེགས་ཉེས་དགེ་སྡིག་གླེང་བའི་ཁ།།
ཁ་འདི་མ་ངེས་ཀུན་འབྲེལ་ཡིན།།

སེམས་ཀྱི་སྣང་ཚུལ་རྗོད་པའི་ཁ།།
དྲན་པའི་གདུང་ཚུལ་འཇལ་བའི་ཁ།།
བློ་ཡི་འཆར་ཚུལ་གཞལ་བའི་ཁ།།
ཁ་འདི་ཡིད་སེམས་ཕོ་ཉ་ཡིན།།

བསྟོད་པའི་འཇའ་དར་སྒྲོན་པའི་ཁ།།
སྨོད་པའི་མཆིལ་ཞགས་འཕེན་པའི་ཁ།།
གཏམ་གྱི་བརྗོད་པ་ཕུལ་བའི་ཁ།།
ཁ་འདི་ལྷ་མིན་འདྲེ་མིན་ཡིན།།

མི་བུ་ལྷ་རུ་བཞེངས་པའི་ཁ།།
ཕལ་བ་ཁྱི་རུ་ལབ་པའི་ཁ།།
ཐ་མ་འདྲེ་རུ་བགྲང་བའི་ཁ།།
ཁ་འདི་ཀུན་བཏགས་མཁན་པོ་ཡིན།།

གོང་ལ་ངོ་དགའ་གཏོང་བའི་ཁ།།
བར་ལ་མཐུན་ལམ་འཚོལ་བའི་ཁ།།
འོག་ལ་ཟུར་ཟ་བྱེད་པའི་ཁ།།
ཁ་འདི་ཕྱི་ཁྲ་ནང་ཁྲ་ཡིན།།

ཤགས་ཀྱི་ཀུ་རེ་འཐེན་པའི་ཁ།།
རྫུན་གྱི་འཁོར་ལོ་སྒྱུར་བའི་ཁ།།
ལབ་ཀྱི་རྒྱལ་ཁམས་མྱུལ་བའི་ཁ།།
ཁ་འདི་སྒྱུ་མའི་སྣང་འཕྲུལ་ཡིན།།

ཀུན་ཏུ་དགའ་བ་གནོང་བའི་ཁ།།
ཡོངས་སུ་ཁྲོ་བ་འགྱིད་པའི་ཁ།།
རེ་འགར་བཏང་སྙོམས་བཟོ་བའི་ཁ།།
ཁ་འདི་རྣམ་རྟོག་གཞི་མ་ཡིན།།

དགྲ་ལ་ཞེ་སྡང་རྩང་བའི་ཁ།།
གཉེན་ལ་ཞེ་ཆགས་སློང་བའི་ཁ།།
གཞན་ལ་གཏི་མུག་སྟེར་བའི་ཁ།།
ཁ་འདི་དུག་གི་ཕུང་བོ་ཡིན།།

ཁ་འདི་བདེ་ན་ཀུན་དང་མཐུན།།
ཁ་འདི་མང་ན་ཀུན་ཀྱང་སུན།།
ཁ་འདི་ཉུང་ན་གྲོགས་ཀྱང་དཀོན།།
ཁ་བཤད་རན་ཙམ་གནང་བར་གལ།།

ཁ་རུ་ཟོས་ཟོས་ཟས་ཀྱང་མིན།།
ཁ་ནས་བཤད་བཤད་ཚིག་ཀྱང་མིན།།
ཁ་ཡོད་ལག་ཡོད་ལྡན་པ་ཞིག །
ཁ་དོན་མཚུངས་བར་གྱིས་དང་རབ།།

ཁ་འབོད་ཙམ་གྱིས་དོན་མི་ཆོད།།
ཁ་ཡག་ཙམ་གྱིས་མཐའ་མི་བརྟན།།
ཁ་རྗེ་དབང་ཐང་རྒྱས་འདོད་ན།།
ཁ་མིན་དོན་ལ་བརྩོན་པ་དགོས།།

ཁ་བཤད་དགེ་བས་སངས་མི་རྒྱས།།
ཁ་ཁོག་མ་འདྲེས་འགྲོགས་མི་རིང་།།
ཁ་སེམས་སྣང་བ་མཐུན་པ་ཞིག །
ཁ་དགེ་ཡོང་བར་འབད་དེ་གཙོ།།

ཁ་མཆུ་ཡོང་བ་ཁ་ཡིས་ལན།།
ཁ་ངོ་དམར་བ་ཁ་ཡིས་ཉོས།།
ཁ་ལས་མི་དགེ་ཐམས་ཅད་རྩ།།
ཁ་རུ་ཐུག་པ་ཤེས་ན་ལེགས།།

ཁ་འདིས་མི་བཤད་དགུ་བཤད་དང་།།
ཁ་འདིས་མི་ཟ་དགུ་ཟ་ཡིས།།
ཁ་དང་ཁོག་ལ་མི་དགེ་ཞིག །
ཁ་ཡིས་བསླངས་བ་ཉུང་ཉུང་མིན།།

ཁ་ལ་སྐྱོན་ཆ་མང་ན་ཡང་།།
ཁ་ལ་ཡོན་ཏན་དེ་ལྟར་མང་།།
ཁ་བརྡ་བརྗོད་པ་ཁ་ཡི་དཔལ།།
ཁ་བདེ་ལྕེ་མྱུར་ཁ་ཡིས་གསོས།།

ཁ་སྐད་ཡི་གེ་ཁ་ལ་རག །
ཁ་ཏ་སློབ་གསོ་ཁ་ལ་ཐུག །
ཁ་ཏོན་དགེ་སྦྱོར་ཁ་ལ་བརྟེན།།
ཁ་ལག་བཞེས་པ་ཁ་ཡི་དྲན།།

ཁ་འདི་དགེ་ན་རྒྱལ་ཁམས་སྐྱིད།།
ཁ་འདི་དམ་ན་ཕྱི་ཐག་རིང་།།
ཁ་འདི་འཆམ་ན་ཞི་བདེ་ཡོང་།།
ཁ་འདི་དྲོ་ན་བཀྲ་ཡང་ཤིས།།