བཤེར་འཚོལ།
གློ་བུར་བའི་རྟོག་འགྱུ།
ཞེན་ཆགས་རྦ་རླབས་དྲག་འཕྱུར་ཡང་། །
སྒྱུ་འཕྲུལ་དྲ་བར་ཡུན་འཐམ་པས། །
སྙན་ཚིག་པད་མའི་གེ་སར་གྱིས། །
ཡིད་ཀྱང་བདེ་བའི་ཚལ་དུ་བསྐྱལ། །
འཆི་མེད་ལྷ་ལས་ཉམས་དགའ་བ། །
སྤང་གཞུང་དབྱར་གྱི་མཛེས་སྡུག་གིས། །
འཛུམ་དཀར་མེ་ཏོག་གྲོལ་བྱས་པས། །
ཕྱག་སོར་རྩེ་ལ་སྙན་ངག་བསྐྲུན། །
སྙིགས་དུས་འཁོར་བའི་བས་མཐའ་ན། །
དགའ་སྐྱོའི་གསང་བ་ངག་གིས་ཀྱང་། །
བསྒྲུགས་པའི་ཉམ་ཆུང་མི་དེ་ལ། །
མཚོ་བྱུང་དགེ་ལེགས་འཕེལ་ལོ་སྐད། །
དེ་ཡི་འཁྲིས་ཀྱི་ན་ཆུང་མ། །
རབ་རྒྱས་ཀུན་དགའི་ཞིང་དྲུང་སྟེ། །
ནང་སེམས་འཚོལ་རོགས་བྱས་གྱུར་པ། །
མཆོག་གི་ལྷ་དེས་གནང་ངམ་ཅི། །
གཙང་བོའི་རླབས་ཕྲེང་ཡང་བསྟར་དེར། །
ཉ་མོའི་འཁྱུག་གར་རྩལ་རྫོགས་ཀྱང་། །
རྣམ་དག་བདེན་པའི་གྲུ་ཁ་ནས། །
སྙན་དབྱངས་གཡུ་ཆུང་དྲུག་དཀར་སྒྲུབ། །
སྣ་ཚོགས་འཁོར་བའི་སྲུབ་ཀ་རུ། །
རེ་དོགས་འཆིང་རྒྱས་བསྡམས་རུང་སྟེ། །
མཁའ་མཐར་ཟླ་བའི་རིག་བྱེད་ཀྱིས། །
ཡིད་ལ་བདེ་བའི་ངལ་གསོ་སྦྱིན། །
ས་ལ་བཀྲ་བའི་མེ་ཏོག་ཚོམ། །
ལག་གིས་འཐུ་ཡང་ཅི་ཟད་མོད། །
དེ་ལྟ་རྒྱུ་སྐར་ཁྲི་སྟོང་གིས། །
ཟླ་བའི་འཛུམ་ལ་ཅི་ཡང་ངལ། །
གནས་པའི་མལ་གྱི་ཁྲི་སྟེང་ནས། །
གཉིད་ཀྱི་ལས་སུ་མ་ཞུགས་པར། །
སྙན་ཚིག་མེ་ཏོག་འཐུ་བྱེད་དེ། །
ཁེར་རྐྱང་སྣང་བའི་ཀློང་དུ་རྒྱུག །
རྩོམ་སྒྲིག་པ། ལྷ་སྐྱིད།
རྩོམ་ཁུངས། ངེད་དྲ་བ།