སྒྱུ་མའི་ཐང་སྟོང་སྣང་སྟོང་མ་གྲུབ་གཤིས།།
མི་བདེན་སྒྱུ་མའི་འཕྲུལ་རྩེན་མ་མཐོང་བའི།།
བདག་འདྲ་བློ་ངན་རྟོག་འགྱུ་མཆིས་པའི་སྡེ།། 
རྣ་བའི་མཛེས་མ་འདི་རུ་བློགས་ནས་གསོན།།

དེ་ཡང་སྲིད་པ་གངས་རིའི་མཐོངས་ཀ་ལས།། 
གཟི་བྱིན་ཉི་ཟླའི་དཀྱིལ་འཁོར་བཀྲ་བའི་མོད།། 
མུན་པའི་བསྐལ་བ་ཅིག་ཆར་འཇོམས་དང་ཆར།།
མི་མཇེད་དག་ཞིང་དགའ་འཁྱིལ་འདི་གྲུབ་སྐད།།

བསྐལ་བ་དུ་མའི་འཕེལ་འགྲིབ་ཨ་ལོང་ལས།།
སྐྱིད་རེས་སྡུག་རེས་མ་ངེས་ཆུ་ལྡན་གར།།
སྐྱེ་ཤི་ནམ་མཁའི་ངོགས་སུ་རི་མོ་བཞིན།། 
འཕྲལ་དང་འཕྲལ་དུ་འགྱུ་ཞིང་འགྱུར་བཞིན་ངོམ།།

སྤྲིན་གྱི་འདུ་འགོད་དེངས་བའི་རི་མོ་བཞིན།། 
ཕྱི་རབས་རྐང་གཉིས་ཁྱུ་ཡི་མིག་ལ་མཛེས།། 
སྲིད་པ་གངས་ཀྱི་རི་བོ་ཚར་དངར་བའི།། 
བསིལ་ལྡན་སྨན་གྱི་ཤིང་སྣ་འཁྲིལ་བའི་གནས།། 

གནས་མཆོག་ཡིད་འོང་དྲི་གཞོན་འཕུར་བ་རུ།། 
མཐུན་འཇུག་གྲགས་པ་དཀར་པོའི་གླུ་འདི་ཐོས།། 
སྔོན་ཚེ་ཡུལ་ཕྱོགས་བཀྲ་ཤིས་ཟླ་ཕྱེད་ཞེས།། 
སྟོད་ལ་རྫ་བྲག་དབུ་རྩེ་གངས་དཀར་གདེངས།། 

གངས་དཀར་བུ་མོའི་བྲང་གི་མྱོས་བུམ་ལས།།
གཅེས་དགུའི་སྲོག་དབྱུང་སྲོག་གི་རྒྱུན་འབྱུང་བའི།། 
ལྷ་ཆབ་བདུད་རྩི་སེངྒེའི་ཁ་ཆུ་ཡིས།། 
གསོས་པའི་ལྷ་གཅིག་མེ་ན་ཀ་བཞིན་མ།། 

གང་གི་སྙིང་དབུས་པདྨའི་གེ་སར་ལ།།
སྦུབས་སུ་དོག་ལྡན་བརྩེ་དགའ་རབ་ཏུ་དོག།  
ངོ་མཚར་རེ་ཁ་བཀྲ་ཤིས་རྣམ་བཀྲ་བའི།། 
དེ་ཀོ་རང་བྱུང་སྐུ་མཆོག་ཕྱམ་མེ་ལ།། 

ཉམས་དགའི་དཔལ་འཁྱིལ་གཟུགས་བོངས་ཡན་ལག་ཀུན།།
མཐོང་བའི་མོད་ལ་ལྟ་ན་སྡུག་པར་བཀྲ།།  
བཙན་ཕྱུག་འཕན་གསུམ་སྟོབས་འབྱོར་རྫོགས་པའི་གཞིས།། 
དེ་ལ་དབང་བསྒྱུར་གཡུ་རྒྱལ་དོན་འགྲུབ་པའི།།

སྙིང་དང་མིག་གཉིས་ཇི་བཞིན་གཅེས་དགུ་ཅན།། 
གསང་བའི་མཛའ་མོ་མཚོ་བྱུང་དྷུ་མ་མཆོག།
ཕུལ་བྱུང་ཡོན་ཏན་དཀྱིལ་འཁོར་རྫོགས་ལྡན་མ།། 
གང་གི་ལྷུམས་ལས་གཏེར་དུ་འཁྲུངས་བ་ཅན།།

ཀུན་གྲགས་སྒྲ་ཡི་རི་མོར་སྒྲོལ་མ་ཞེས།། 
འབོད་པ་འདི་ཀོས་སྙན་གྱི་བུ་ཡང་སྐྱོམ།།  
བརྗིད་ལྡན་ཕོ་བྲང་ཀ་ཆེན་གདུང་ལྕམ་ཁང་།། 
ཁང་བཟང་རྨད་བྱུང་བཀྲ་ཤིས་འཁྱིལ་བ་ཅན།། 

ནང་དུ་གསེར་དངུལ་ར་གན་རིན་ཆེན་མཛོད།། 
ཕྱི་ལ་རྟ་དྲེལ་མཛོ་གསུམ་ནོར་གྱིས་ཕྱུགས།།
ཁྱོན་ཡངས་འབྲུ་རིགས་སྨིན་པའི་ཞིང་ས་ལ།། 
གྲོ་འབྲས་ལོ་ཏོག་འབྲུ་རིགས་སྣ་ཚོགས་དུད།། 

སྟོན་དུས་ཞིང་བདག་མཛོད་ཁང་འབྲུ་རིགས་འཁྱིལ།། 
སྟག་གཟིག་ལྤགས་པ་དགུ་མཚན་དུ་མ་དང་།། 
བྱུ་རུ་མུ་ཏིག་པདྨ་ར་ག་དང་།། 
གཟི་མཆོང་རིན་ཆེན་མཛོད་དུ་སྤུངས་སེ་བསྟར།། 

འཁོར་གཡོག་ལག་དོ་མང་དུ་མཆིས་པ་དང་།། 
ལག་ཤེས་ཀུན་ཤེས་གསེར་དངུལ་ལྕགས་ཟངས་ལས།། 
འདོད་པའི་རི་མོ་ཅི་འདོད་འབྲི་ནུས་པའི།། 
འཁོར་གཡོག་ཕོ་མོ་ཉི་ཤུའི་གྲངས་ལྡན་ལས།།

ལག་ཤེས་ཀུན་ཤེས་སྟོབས་ལྡན་ཡེ་ཤེས་ཐོས།། 
དེ་ལ་འཇིག་རྟེན་སྲིད་ཆགས་འཁོར་བའི་ཚང་།། 
སྙིང་སྡུག་མཛངས་མ་ཡིད་ཀྱི་ཐིག་ལེ་ཅན།། 
ཟླ་བོར་རབ་དུངས་བློ་དཀར་རྣམ་བཀྲ་ལ།།  

རེ་ཞིག་དུས་ཀྱི་ཆ་ཀུན་རྫོགས་གྱུར་ཏེ།། 
ཏེ་བོར་བུ་འབྱུང་བརྡ་ཡི་རྒྱང་གླུ་དེས།། 
ཁོལ་པོའི་ལས་བཞག་ཆུང་མའི་དྲུང་འཁོད་དེ།།
ལྷུམས་མཆོག་སྙིམ་ལས་གེ་སར་བཞད་པ་འཛུམ།།

འཁོར་ལོ་དྲུག་ལྡན་གེ་སར་ཁྲི་གསོལ་ཞིང་།། 
དཔག་ཡས་ཁྱོན་དུ་དགའ་བའི་གླུ་བླངས་ཏེ།། 
ཡུལ་ཕྱོགས་ཡུག་ཅིག་ངོ་མཚར་དང་བཅས་ཏེ།། 
སྐད་ཅིག་ངང་ལ་ལྟད་མོ་ལྟ་རུ་འུབ།། 

འཇིག་རྟེན་ཁྱོ་ཤུག་སེམས་གཅིག་ཡིན་ནམ་ཅི།། 
ལུས་ལས་བཙས་པའི་ཁྱེའུ་ཆུང་ངུ་ལ།། 
ནེའུ་ལྡིངས་ཞེས་བོས་དགའ་བའི་རྣམ་འགྱུར་སྟོང་།། 
ཆོ་ག་འདི་ཀོ་རང་རང་ཕ་མར་ཆུང་།།

ཆུང་ངུའི་ལང་ཚོ་རིམ་བཞིན་དར་བའི་མོད།། 
ལོ་བརྒྱད་ཆུང་ངུའི་དུས་སུ་མཚན་གསོལ་ཞིང་།། 
དྲི་མེད་རྒྱལ་བ་ཞེས་པའི་འབོད་པའི་སྒྲ།། 
ཁོ་ར་ཁོར་ཡུག་ཀུན་ཏུ་སྙན་པར་འགྱུ།། 

སྒྱུ་རྩལ་ཡོན་ཏན་གཙུག་ལག་རིག་པའི་གཞུང་།། 
མ་ལུས་ཐམས་ཅད་ལྷག་ཆད་བྲལ་བའི་ངང་།།  
ལག་ཤེས་རི་མོར་མཁས་ཤིང་མཁས་གྱུར་ཏེ།། 
ཕ་ལས་བུ་མཆོག་ཞེས་པའི་མཆིད་ཀྱང་གཡོ།།  

གཙུག་ལག་ལག་ཤེས་རི་མོ་འཛིན་པ་ལ།། 
དཔྱིས་ཕྱིན་ཕུལ་བྱུང་མཁས་ཤིང་དབང་འབྱོར་བའི།། 
ཕ་ཇོའི་སྙིང་ལ་མཁས་གྲུབ་དམ་པའི་སྡེ།། 
ཆེ་རྟགས་རྣམ་ཐར་གཟུགས་བརྙན་རེ་ཁ་བཞིན།།

སྔོན་ཚེ་གཙུག་ལག་རིག་པའི་ཡོན་ཏན་ལ།། 
སློབ་པར་བསྟན་པའི་ཡོངས་འཛིན་དགེ་སྦྱོང་དང་།། 
སྤྱི་གཙུག་རྒྱན་ལ་ཐོར་ཅོག་བཏེགས་པ་ཡི།། 
འཇམ་དབྱངས་བླ་མའི་རྣམ་ཐར་མིག་གི་སྨན།།  

མིག་མཐའི་ཁ་ཆུ་ཕྲོམ་ཕྲོམ་འཕྱུར་བའི་མོད།། 
ཡིད་ཀྱི་ནམ་མཁའ་བློང་བློང་གྱུར་དང་ལྷན།། 
བུ་འདི་མཁས་གྲུབ་དམ་པའི་རྣམ་ཐར་མཆོག། 
འཛིན་པའི་ཆོ་གར་དབང་བསྐུར་ཡིད་འདི་བརྟས།།

སྐྱེ་སྔོན་ཤིང་རྟ་རི་མོ་གསལ་མི་གསལ།། 
ཡིད་དཔྱོད་རྟོག་པའི་ཡུལ་ལ་མི་དཔོག་ཅིང་།།   
ངུར་སྨྲིག་དགེ་ལེགས་དམར་སེར་འདུ་བའི་དབུས།། 
སྐྲ་བྲེག་མཚར་སྡུག་ཕྱམ་མེར་བཞུགས་སུ་གསོལ།།  

དེའི་ཚེ་ལྷན་སྐྱེས་སྒེག་ལྡན་སྨན་ཆུང་མ།། 
སྟོབས་ལྡན་འབྱོར་བས་ཡུལ་ལ་ངོམ་བྱས་པའི།། 
གཡུ་རུས་ཆར་འཁྲུངས་དྭངས་སྨན་སྒྲོལ་མའི་སྤྱན།། 
མི་སྡོད་རྐང་དྲུག་གེ་སར་འཐུང་ལ་བྲེལ།། 

ལྷུན་གྲུབ་གཞས་ཡས་ཁང་བཟང་ཡིད་འོང་མཁར།། 
ཆོས་རྔ་གཎྜི་རྡུང་བའི་སྒྲ་དབྱངས་ལས།། 
བཅུ་དྲུག་སྐུ་དཔལ་རྫོགས་པ་བཙུན་པའི་སྡེ།། 
གཅིག་རྗེས་གཅིག་བྱོན་ཆོས་གླུ་མགྲིན་ལས་སྦྲེང་།། 

གཙུག་ལག་བརྡ་སྤྲོད་རིག་པའི་སྐད་བརྡ་ནས།། 
ཆེ་མཆོག་གསང་བ་ཆེན་མོའི་དཀྱིལ་འཁོར་ཀུན།། 
སྡུག་འབད་ཆོ་ག་དུ་མས་བརྩོན་བགྱིས་ཏེ།། 
མདོ་སྔགས་ཀུན་མཁྱེན་རབ་འབྱམས་སྙན་པ་འཕུར།། 

ཕ་ཡིས་གཏམ་ཐོས་མ་ཡང་དེ་བཞིན་དཔེར།། 
དགའ་བའི་སྟངས་ཀ་དཔེ་རུ་མི་དམིགས་པ།། 
དུས་ཚེ་འཕྲལ་དུ་བང་ཆེན་བྱ་མ་རྟ།། 
བཤོལ་མེད་ཆས་ལྟར་བུ་ལ་མཇལ་དུ་བརྟབ།། 

རེ་ཞིག་དུས་དང་བསྐལ་བའི་བཀོད་པའི་དབང་།། 
རྙིང་ཆོས་སྲིད་པའི་ལུགས་སྲོལ་འགྱུར་དང་བཅས།། 
གསར་བྱུང་སྒྱུ་མའི་ཆོ་འཕྲུལ་ཤར་བའི་མོད།།
རང་རང་གདམ་གསེས་འདི་ཞེས་སྨྲ་མི་ནུས།། 

མཚུངས་མེད་གཙུག་ལག་གཞུང་གི་ཤེས་བྱ་ལ།། 
ཐོགས་མེད་མཁྱེན་དཔྱོད་རྫོགས་པའི་སྤྱན་མངའ་བ།།
གང་ཁྱོད་ཆུང་ངུའི་དུས་ནས་རི་ཁྲོད་དུ།།
གཉུག་མའི་བཙན་སར་གནས་པ་ཅང་བདེན་ནམ།། 

སྐྱ་རེངས་རྟ་ཕོ་ཀུན་ནས་འབྱམས་པའི་དུས།། 
ཟུག་མེད་བདེ་ལྡན་མི་རྟག་གཡར་པོའི་ལུས།། 
རྐྱེན་ཆུང་དབང་ཤོར་འཕྲལ་དུ་ན་ཟུག་སྒྲ།། 
ངུ་ཅོ་ཆོ་ངེའི་གདུང་གཏམ་ཀུ་ཅོ་འུར།།  

རབ་དཀར་འཁྲི་ཤིང་མཛེས་མའི་དཔུང་པ་དང་།། 
ཐིག་ལེའི་བཅུད་འདོམས་ལྟེ་བའི་རི་མོ་རུ།། 
དེ་བཞིན་རྫི་མ་དོག་པའི་སྤྱན་དཀྱུས་ཀུན།། 
མི་བཟོད་གཟེར་ཆེན་དུ་ཁས་གདུང་བྱས་སོ།།

དེ་ལྟར་མི་རྟག་གཟུགས་ལ་གཙེར་བའི་དབང་།། 
མཚོ་བྱུང་དྷུ་མ་དབང་མེད་སྐུ་ལུས་ལ།། 
ཟུག་ངུའི་སྟངས་ཀ་སྐད་དང་དུ་མར་བསྟན།། 
དེ་མཐོང་སྙིང་གྲོགས་སེམས་ལ་མི་བཟོད་གདུང་།།

ཟབ་ཡངས་གསོ་རིག་རྒྱ་མཚོའི་གཏིང་དཔག་ལ།། 
འཇུག་ངོགས་ཐོགས་མེད་གྱུར་བའི་གཏམ་དེ་ཡིས།། 
གཡུ་རྒྱལ་དོན་འགྲུབ་ཇོ་བོའི་ཐུགས་འཕྲོག་སྟེ།། 
འབོད་པའི་གཡབ་མོ་ལས་སུ་ཅི་མང་བསྐུལ།། 

ཆེད་དུ་བཀས་བསྐུལ་ཕོ་ཉ་འབྱོར་དང་བསྟུན།། 
ཟུག་གཟེར་ཀུན་འཇོམས་གསེར་ཁབ་ཐུར་མ་ཡིས།། 
གང་གི་མཛའ་མོའི་ན་ཟུག་གཞོལ་པའི་མོད།། 
སྙན་པའི་གཏམ་གྲགས་བསྔགས་པ་དུ་མར་འབབ།། 

ལྷན་སྐྱེས་མཛེས་སྡུག་བཞིན་མཆོག་ཐིག་ལེའི་བཅུད།། 
རང་རང་མིག་ལ་མཛེས་པར་མི་མཐོང་མོད།། 
རྣམ་གཡེངས་རྗེས་ཆགས་གཡོ་མེད་སྤྱན་མངའ་མར།། 
ཉིན་མཚན་གཉིས་མེད་སྣང་བརྙན་ཝ་ལེར་བཀྲ།།

དྲི་ཞིམ་ཤངས་བུ་དགའ་བསྐྱེད་མཆེད་པ་ལས།། 
མདངས་བཀྲ་རས་ཡག་རེ་ཁ་དཔྱངས་བ་ཅན།། 
རྨི་ལམ་གཉིད་ཀྱི་ཆོ་ག་བྱ་བ་རུ།།  
གཞོན་ནུ་མ་གང་འདོད་པས་གདུང་ཞིང་གདུང་།། 

ངོ་ཚ་དང་ལྡན་བཞིན་ལ་དམར་བཀྲ་ཞིང་།། 
ཅིས་ཀྱང་ཡིད་ལ་བརྣག་པའི་ཆོ་ག་ནི།། 
དྲི་མེད་རྒྱལ་བ་གཉིད་དུ་ཡུར་བའི་ཤག།
ཆོམ་རྐུན་འཇབ་བུའི་སྟངས་ཀ་ཅིས་མི་འདོད།། 

ཕྱི་ཉིན་ཐོ་རངས་རྟ་ལྗང་ཤིང་རྟའི་ཟུང་།། 
སྲིད་འདིའི་མངའ་བདག་ལྷུན་པོའི་སྙན་ཀོར་དུ།། 
རྒྱན་སྤྲས་མཚར་སྡུག་དཔལ་ལས་དཔྱངས་བའི་འཕྲུལ།། 
མཐོང་བའི་མིག་ལ་ཤིན་ཏུ་མཛེས་ཤིང་མཛེས།། 

འདོད་ལྡན་དགའ་མགུར་སྒྱུ་མའི་བདེ་བ་ཆེ།། 
མ་མྱོང་འདོད་ལྡན་གཞོན་ནུ་ཀུན་གྱིས་གཤིས།། 
སྙིང་ལ་སྡུག་གུ་མིག་སྨན་གསར་ཕྱམ་མེ།། 
སྒྲོལ་མ་སྤྱན་གྱིས་མཛེས་འཛུམ་པདྨའི་འབྲས།། 

རྣམ་དག་རས་ཀྱི་གཟུགས་བརྙན་དཀྲིས་པ་ཅན།། 
དྲི་མེད་རྒྱལ་བ་འཇིམ་སྐུ་མ་ལགས་ཕྱིར།། 
བརྩེ་འཛུམ་ལྕགས་ཀྱོ་རྣོ་མྱུར་གཟུ་བོའི་མཚོན།། 
མ་འཐེབ་འཐེབ་ན་གདམ་གསེས་གང་དུ་བྱ།། 

ཀྱུར་ཀྱུར་བྱིའུའི་གྲེ་སྙན་སྒྲོག་པ་དང་།། 
ཅིལ་ཅིལ་མཆིལ་བས་མགྲིན་གླུ་སྒྲོག་པའི་ཚལ།། 
ཡལ་ག་བརྐྱང་བརྐུམ་ལག་གདང་སྦྲེལ་འདྲ་ཅན།། 
མིག་གི་སྣང་ངོར་བརྩེ་བའི་མེ་ཏོག་ཕྱེས།། 

གསང་སྟངས་གར་ལས་དྲི་མེད་རྒྱལ་བའི་ཡིད།། 
གཡུ་ཡི་སྒྲོལ་མའི་བྲང་ལ་འཁྲིལ་བྱས་ཤིང་།། 
དཔེར་འོས་མ་མཆིས་ཆང་གིས་ར་བཟིའི་ཟོལ།། 
གྲག་པ་གཏམ་ངན་མྱོང་ན་བདེ་སྟེར་བཤད།། 

གཡུ་རྒྱལ་དོན་འགྲུབ་དྲུང་ལ་ལྐོག་འདུན་བཞིན།། 
ལྷ་གཅིག་སྒྲོལ་མས་ཅི་མཛད་ཞུས་པའི་མོད།། 
ཁྲོ་ཞལ་གཏུམ་ལྡན་ཐུགས་རྒྱལ་བཞེངས་པའི་མོད།། 
དྲི་མེད་རྒྱལ་བའི་སྲོག་ཀྱང་འཕྲོག་པར་བརྩམས།། 

ཐོས་པའི་སྙིང་ན་མཐོང་བའི་སྤྱན་བརླན་པའི།། 
བཙན་པོའི་ཐུགས་དཀྲུག་མགོ་ལ་རྡོ་རྗེའི་ཁྲིམས།། 
མ་བསམ་མགོ་ལ་དབང་མེད་བབས་པའི་གཏམ།། 
ཕ་མའི་སྙིང་ཆུང་འབྱིན་པའི་མཚོན་ལས་ངར།། 

བྲེལ་བརྟབ་གློག་གི་འཁྱུག་གར་ཐོགས་པ་བཞིན།། 
གུས་བཅས་མཇིང་པ་སྒུར་བའི་རྣམ་འགྱུར་ལས།། 
བསམ་མེད་བུ་འདིའི་སྲོག་ལ་མགོན་མཛོད་ཅེས།། 
པུས་བཙུགས་ཐལ་མོ་སྙིམ་དོག་དུ་མར་བརྩམས།། 

ཁྲོ་ཞལ་གཏུམ་པོའི་རང་གཤིས་མི་འགྱུར་ཞིང་།། 
རིགས་དམན་གཡོ་ཅན་ཆོ་གས་སྒྲོལ་མའི་ཡིད།། 
བསླུ་བྲིད་གདོས་ཐག་ཅིས་བཅིངས་ཆོ་ག་འདི།། 
གཡུ་རྒྱལ་དོན་འགྲུབ་བདག་ལ་མཐོང་ཆུང་ངོ་།།  

གསང་སྟབས་ལྐོག་འདུན་འཇུག་པའི་སྤྱོད་ངན་འདི།། 
མཐའ་བཞིའི་ཁྱོན་དུ་མི་ཡིས་མིར་བསྒྲགས་ཏེ།། 
བདག་གི་སྙན་པའི་པྲོག་ཞུ་བརྡབས་པ་ལ།། 
འགྱུར་མེད་བཀའ་ལུང་ཁྲིམས་ཀྱི་མཚོན་ཆ་བརྡར།། 

ནང་འཁོར་ཁོལ་པོ་གསང་ཉུག་མཁས་པ་བཞིན།། 
དྲི་མེད་རྒྱལ་བ་བསྟན་བཤིག་དམ་ཉམ་གྱིས།། 
ལྷ་གཅིག་མཆོག་ལ་གཡོ་སྒྱུའི་ཟོལ་བྱས་ཅེས།། 
མ་ཉེས་ཁ་གཡོག་ཁས་རྒྱག་སྤུ་གྲི་ཕྱར།། 

ལྷ་གཅིག་སྒྲོལ་མ་ཤག་ཏུ་བཅུག་བྱས་ཏེ།། 
ཕྱི་རོལ་ཁོར་ཡུག་མིག་ལ་མི་མཐོང་ཞིང་།། 
སྙིང་ལ་དགའ་སྟེར་དྲི་མེད་རྒྱལ་བའི་ཞལ།། 
མཐོང་སྐལ་ལྟ་ཅི་སྐད་ཀྱང་མི་ཐོས་སོ།། 

སོ་སོའི་སྙིང་གི་ལག་གདང་སྦྲེལ་བྱས་པར།། 
རིགས་རུས་ཆོ་འབྲང་དབང་གིས་མི་འདོད་པའི།། 
ཟུག་ངུ་དུ་མར་བསྐྱེད་པ་ཅིའི་ཕྱིར་རམ།། 
བསྐལ་བ་དུས་ཀྱི་གདམ་གསེས་བསམ་མི་ནུས།། 

དྲི་མེད་རྒྱལ་བའི་ཡིད་ཀྱི་ནམ་མཁའ་རུ།།  
སྐུ་སྲོག་གནངས་བའི་ཕ་མ་འདི་གཉིས་ལ།། 
མི་འདོད་ངལ་བ་སྟེར་བ་མ་ལགས་སོ།། 
སྙམ་ཞིང་གདུང་བའི་མིག་ཆུ་བཞིན་ལ་འཁྲིགས།། 

ལྷ་གཅིག་ཤག་འདི་མུན་པའི་བཙོན་ར་བཞིན།། 
ཆོ་ངེའི་སྒྲ་འབྱིན་ཁོལ་པོ་ནང་གཡོག་སྡེ།། 
ཡིད་ཀྱི་ངོར་ལ་རྣམ་རྟོག་མ་མཛེས་ཤིང་།། 
མ་འགྱངས་གནས་ཚུལ་ཇོ་བོའི་སྙན་ལ་བསྐུར།། 

ཇོ་བོ་འདི་ཉིད་གདུག་སྤྱོད་ཆེ་ཞེས་ཀྱང་།། 
ཤ་ཁྲག་དང་འབྲེལ་བུ་མོ་འདི་ཉིད་ལ།། 
ལྟ་རུ་འོངས་ནས་སྤྱོད་པ་མ་རབས་འདིས།། 
གཡུ་ཚང་ཁྱིམ་བརྒྱུད་ཁ་སྐྱེངས་བགྱིས་སོང་སྐད།། 

སྔོན་ཚེ་བཙན་པོ་ཞང་ཞུང་བཙན་པོའི་བློན།། 
གཞི་བྱེས་དཔུང་གཅིག་ཁམས་སུ་གཞིས་ཆགས་ཏེ།། 
གཡུ་སྒར་རྒྱས་བཏབ་གཡུ་རྒྱལ་དོན་འགྲུབ་བདག། 
ད་རེས་མ་ལེགས་བུ་མོས་ཕ་བླ་བཙོང་།། 

སྟོབས་ལྡན་དབང་ལ་འབྱོངས་བའི་གཉེན་སྡེབ་པ།། 
སྔོན་བྱོན་རང་ལུགས་གཙང་མའི་ལུགས་བཟང་ལ།། 
ང་རང་རིགས་བརྒྱུད་ཆད་ཁའི་བུ་མོ་འདིས།། 
རྐང་འདྲེན་བརླག་པར་བྱས་པས་སེམས་འདི་སྐྱོམ།། 

ཡང་སྒོས་ནང་རྐུན་སྟོབས་ལྡན་ཡེ་ཤེས་ཀྱི།། 
ཁྱི་རྒྱུད་དྲི་མེད་རྒྱལ་བ་བསྟན་དགྲ་འདི།།
ཚུར་མཐོང་ཕྱམ་མེ་བཙུན་པའི་འདྲ་གཟུགས་ལ།། 
ནང་ལ་དུག་ལྔའི་མེ་ལྕེ་མཆེད་ནས་འདུག། 

བསམ་མེད་ཅོལ་ཆུང་ཅི་བཤད་བདེན་འཛིན་པའི།། 
བློ་མེད་བུས་པ་ཇི་བཞིན་བཀའ་ཉན་མ།། 
ང་རང་གཡུ་རྒྱལ་དོན་འགྲུབ་གྲགས་པ་ལ།། 
སྔོན་ལ་མ་བྱུང་ཁྱོད་འདྲ་ཨ་རེ་རྡུགས།། 

རིགས་རུས་ཆོ་འབྲང་རྨད་བྱུང་ཆེ་ལྡན་ལ།། 
སྨྱན་སྦྱོར་ཆོ་གའི་ཟློས་གར་མི་འཛིན་པར།། 
གང་བྱུང་བྱུང་རྒྱལ་ལས་སུ་འཇུག་པ་འདི།། 
གཅམ་ཚིག་གཡོ་ཅན་བདུད་ཀྱིས་འཁྱེར་བ་ཡིན།། 

ཕྱིས་འབྱུང་སྒྲ་གྲག་འགྱུ་བ་སྐྱུག་པའི་ལུད།། 
མི་མཛེས་སྙན་མཚན་བརླག་པའི་རྐང་འདྲེན་འདི།། 
མི་མཐོང་ཡུལ་མེད་མིང་མེད་མ་བགྱིས་ན།། 
བསྐལ་བའི་དུས་ཀུན་གྲག་པའི་སྒྲ་འདིས་གཙེར།། 

ཞེས་པའི་གཏམ་ཞོར་བུ་མོ་གཞོན་ནུ་མ།། 
ཁྲོ་ཞལ་གཏུམ་པོའི་ཟོལ་འཆང་ཕ་ཇོའི་དྲུང་།། 
མཇིང་བའི་གུས་སྟེགས་ཚིག་འཇམ་དབུགས་འཚང་ཞར།། 
གདུག་སྤྱོད་འཇིགས་རུང་ཆོ་ག་བཟློག་བྱོས་ཅེས།།

བརྩེ་ལྡན་སྙིང་གྲོགས་དྲི་མེད་རྒྱལ་བ་ལ།། 
བཀའ་བཙན་རྡོ་རྗེས་ཨར་ལ་མི་གཏད་པར།། 
སྙིང་དབུས་གེ་སར་དོག་པ་རོལ་སྤྱོད་པའི།། 
གང་དང་སྨྱན་གྱི་ཆོ་ག་ལེན་པར་ཞུ།།

དེ་ལྟར་སྙིང་ཆུང་འདར་བའི་རྣམ་འགྱུར་ལས།། 
ཞུས་པའི་ཚིག་ཀྱང་འདར་ཞིང་གཡོ་བ་ཅན།། 
མཚན་མོ་ཟླ་འོད་ནུབ་པར་མནལ་པའི་ཕྱིས།།
འདོད་པའི་བདེ་སྟེར་འོད་དཀར་འགྲིབ་ལྟར་མཐོང་།། 

མི་འཇིགས་སྟོབས་ལྡན་གཡུ་རྒྱལ་དོན་འགྲུབ་དེའི།། 
ཐུགས་ཀྱི་ནམ་མཁའ་འཕྲལ་དུ་ཁྲོས་པའི་མོད།། 
དཔག་ཚད་ཁྱོན་ཀུན་འདར་ཞིང་དངངས་བྱས་ཀྱང་།། 
དེ་ཡང་རེ་ཞིག་ཞི་བར་དེངས་སྲིད་དམ།། 

ཕྱི་རོལ་བཀོད་པ་གཡུ་ཡི་ཤིང་རྒྱས་ཤིང་།། 
ནང་གི་གྱང་ལ་འོད་དཀར་བཀྱེད་པའི་ཤུལ།། 
ཤིང་རྙིང་རྩེ་ལ་ཐག་པས་དམ་བཏགས་པའི།། 
དྲི་མེད་རྒྱལ་བའི་མགྲིན་ལས་སྐྱུག་པའི་གླུ།། 

མི་ཕྱེད་མཛའ་བའི་ཚིག་སྙན་གྲེ་བའི་གླུ།། 
སྙིང་དབུས་གེ་སར་འཐུང་བའི་རྐང་ཐུང་གིས།། 
རྒྱང་ནས་དིར་དིར་བླངས་པར་བླགས་པའི་མོད།། 
ཁྲོས་པའི་ཞལ་འགྱུར་བཀའ་ཡང་ཡང་བར་བྱུང་།།  

ཁྲོ་ཞལ་བཀའ་ལུང་ཉི་ཟླའི་གཟི་བྱིན་ལ།། 
སྒྲ་གཅན་ཁྲོས་པའི་ཁ་རླངས་ནག་པོ་ལྟར།། 
སྟོབས་ལྡན་ཤེད་མོང་རྫོགས་པ་ཇོ་བོའི་དྲུང་།། 
འདར་ཞིང་གཡོ་བའི་རྣམ་འགྱུར་བཅོས་མེད་ངང་།།

རིངས་པར་སྟོབས་ལྡན་ཡེ་ཤེས་ཁྱོ་ཤུག་གཉིས།། 
མཇིང་བའི་གུས་བཀོད་ཕོ་བྲང་ཕྱིར་དུ་ཐོན།། 
སྲོག་ལ་བསྡོས་པའི་བུ་ཕྱིར་ཕ་འཆི་ཞེས།། 
མ་ཡིས་ཕ་མིན་བུ་ཕྱིར་མ་བཟུང་སྟེ།། 

འགྱུར་མེད་བཀའ་ལུང་དག་གིས་སྲོག་ལོངས་ཞེས།། 
མིག་གི་མཁའ་ལས་ཆར་བའི་ཆུ་འབྱོ་ཞིང་།། 
ས་ལ་འགྱེལ་ཞིང་ཐལ་མོ་སྙིམ་དོག་སྦྱར།། 
ཕ་ཡང་མ་བཞིན་གཉིས་མེད་སྙིང་རྗེར་སྣང་།།

དུས་ཚེ་བཀའ་ལུང་ལྗིད་ལྡན་ཡར་བསྡོས་ཏེ།། 
ཁྲོ་ཞལ་གཏུམ་པོ་ཞི་བའི་ངང་ཞུགས་ཏེ།།  
བརྩེ་ཆེན་སྤྱན་གཡོ་ཐང་ནས་ཡར་འཐེན་ཀྱང་།། 
བདེན་ནམ་སྙམ་ཞིང་ཐང་ལ་སྤེལ་མར་འགྱེལ།། 

རབ་གསལ་མུན་འཐིབས་ཤག་སྟོངས་མྱ་ངན་དུ།། 
མཛའ་མཐུན་དང་བྲལ་གདུང་བས་མྱོས་གྱུར་ཏེ།། 
ཤ་སྐམ་བཞིན་འགྱུར་ལྷ་གཅིག་ཡིན་ནམ་མིན།།
འཕྱང་མོ་ཉུག་པའི་སྣང་བརྙན་ཕྱི་རུ་ངོམ།། 

དེ་དང་ཆབས་ཅིག་སྙིང་གྲོགས་གཞོན་ནུ་གང་།། 
མུན་པའི་བཙོན་ལས་ཕྱི་རུ་མངོན་ཕྱུང་སྟེ།། 
རབ་དགའི་ཞལ་འཛུམ་ཕ་མ་ཙམ་མིན་པར།། 
གང་ཞིག་རབ་བརྩེ་མཛའ་མོ་དེ་ཉིད་དོ།།  

དེ་ནས་མུན་ནག་དོང་ལས་ཕྱིར་ཕྱུངས་བའི།། 
གང་དེའི་མིག་ལ་འོད་དཀར་འཆར་བ་ན།། 
མིག་གིས་འོད་ཀྱི་ཐིག་ལེ་མི་ཐེག་ཀྱང་།། 
ཡན་ལག་ཐམས་ཅད་ཕྲ་ཞིང་ཕྲ་བར་མཐོང་།། 

དེ་མཐོང་མིག་གི་མཁའ་ལས་ཆར་འཇོ་ཞིང་།། 
འཕྲལ་དུ་འུབ་པ་བདེན་ནམ་སྙམ་པའི་བློས།། 
འཇུ་ཞིང་མི་གཏོང་རེ་ཞིག་ག་ལ་བར།། 
དགའ་འཁྱིལ་བརྩེ་ཆེན་ཆོ་གའི་ངང་ལ་འཁྲིལ།།

གཡོ་མེད་ཚངས་ཐིག་མཛའ་བའི་སྟོང་སྐུད་ལས།།
སྦྲེལ་བའི་མི་ཕྱེད་གཉེན་གྱི་ཆོ་ག་ལ།། 
ཡུལ་ཕྱོགས་དུ་མའི་མགྲོན་རྣམས་ཕྱམ་གཅིག་ངང་།། 
འཁོད་དེ་དགའ་བའི་ཆང་ལ་ཞབས་དག་སྤྱོད།། 

དུས་ཚེ་མཛའ་མོའི་མིག་ལ་མུ་ཏིག་ཆུན།། 
དཔྱངས་ཐག་འཐེན་པ་ཇི་བཞིན་བཀྲ་བའི་མོད།། 
རང་རང་སྙིང་ལ་ཡི་རངས་སྨོན་པའི་འབྲས།། 
དུད་པ་འདི་ཉིད་བསམས་ཤིང་དགའ་སྤྲོ་འཕེལ།།  

ལོ་དང་ཟླ་བ་མི་སྡོད་ཤིང་རྟའི་འགྲོས།། 
བགྲང་ཡས་བསྐལ་བ་དུ་མ་ཕྱིན་པའི་རྗེས།། 
ཕ་མ་རྒས་ཤིག་ཁོག་པའི་རྣམ་འགྱུར་ལ།། 
མི་སྡུག་རྒ་བའི་རེག་བྱས་འཇོམས་འདིས་གཅོང་།། 

མགྲིན་སྔོན་སྐྱུག་པའི་མདངས་ལྡན་མིག་གི་མདངས།། 
བཅུ་དྲུག་ཉི་ཤུའི་སྐུ་ན་རྫོགས་ཤུལ་དུ།། 
ཤེད་མོང་སྟོབས་ལྡན་གཟུགས་བོངས་ཉམས་པའི་ཤུལ།། 
འཁར་བ་འདྲུད་ཅིང་སྐད་ཀྱང་ལྡབ་མ་ལྡིབ།། 

སྐྱེ་ཤིའི་འཁོར་ལོ་འགྲོས་གསུམ་འཁོར་བའི་ཀློང་།། 
མ་མཐོང་རི་མོ་རྟེན་འབྲེལ་དུས་རྫོགས་པའི།། 
ལྷུམས་ཀྱི་ཟེའུ་འབྲུ་ལས་བཞད་ནེའུ་ལྡིངས་ཁྱུ།།  
གཅིག་ལས་གཉིས་སོགས་འཕེལ་ཞིང་མང་དུ་བདོ།། 

དེ་དག་ལང་ཚོའི་འཁྲི་ཤིང་རྒྱས་པ་དང་།། 
རྒ་བས་རེག་པའི་ཇོ་བོ་རྒུད་པའི་མཐར།།
ཉི་ཚེའི་སེན་མོ་བརྡབས་པའི་སྒྲ་ཡི་སྤུན།། 
འདི་སྣང་སྲིད་པའི་དུས་ཡུན་དཔེ་རུ་འཕྱ།། 

བསམ་པ་ནང་གི་རི་མོ་འབུམ་སྟོང་ལས།། 
ཕྱེད་འགྲུབ་ཕྱེད་ལྷག་ཕྱེད་ལ་བུ་ཚ་འབད།། 
དུས་ཆོས་གནམ་གྱི་བཀའ་ཡིག་བང་ཆེན་གྱིས།། 
དལ་ཅིག་ཇ་ཡུན་ཙམ་ལ་གཅོང་རོང་ཡུལ།། 

རྒ་བའི་ལང་ཚོ་ནུབ་པར་དྲངས་བྱས་ཏེ།། 
བསམ་པའི་ནང་ལ་མི་ཤོང་མཆི་མ་འཁྲིགས།། 
ལུས་རྒུད་སེམས་ལ་བསམ་པའི་ཡོ་ལང་བདོ།།
ཅིས་ཀྱང་མི་ཤོང་རྣམ་རྟོག་དུ་མས་གཙེ།།

རབ་དཀར་ཐོར་ཅོག་རླུང་གི་བསྐྱོད་པའི་ཤུལ།། 
མརྒད་མདངས་མཐུ་ཆུ་ཤེལ་གཡང་ཊིའི་ཤེལ།། 
སྤྱན་ལ་མནབས་ཤིང་ལང་ཚོ་རྒུད་གྱུར་པ།། 
གཅིག་ལས་གཅིག་བདའ་ཇི་བཞིན་མནལ་པར་གྱུར།། 

སྔོན་ཚེ་མཐུན་འཇུག་དགའ་མགུར་བདུད་རྩིའི་ཆང་།། 
སྐྱེད་མོའི་ཚལ་བཟང་ངོགས་སུ་ཞབས་དག་དུས།། 
མི་ཕྱེད་རྡོ་རྗེའི་དབང་བསྐུར་ཇོ་བོ་སོགས།། 
གཟིམས་པར་ཞལ་ཕྱོགས་ནུབ་རིའི་ཕྱོགས་སུ་མནལ།།

དུས་ཕྱིས་ཕོ་བྲང་གཟི་བརྗིད་ལྷང་ངེ་བ།། 
ལྷམ་མེར་རྣམ་བཀྲ་བརྗིད་ལྡན་སྟག་ལྤགས་སྟེང་།། 
དྲི་མེད་རྒྱལ་བ་ཇོ་བོར་དབང་བསྐུར་ཞིང་།། 
ལུགས་འབྱུང་ཤིང་རྟའི་འཁོར་ལོ་དགའ་འཁྱིལ་ལེ།།  

དཀར་འཇམ་ཡག་ཅིག་ཁྱབ་པའི་ཆོ་ག་ལས།། 
སྤྱི་གཙུག་རལ་བའི་ཐོར་ཅོག་མཛེས་པའི་ཞྭ།།
སྔོན་བྱོན་ཇོ་བོའི་འཕྲེང་ལ་མཆོད་གསོལ་བའི།།
མཚན་འདོགས་ཆོ་ག་སྤེལ་བའི་འདུས་རྔ་རྡུང་།།  

རྨད་བྱུང་སྤྱོད་པའི་ཀུན་སྤྱོད་དང་ལྡན་པའི།།
ཡུལ་དེའི་ཁྱོན་ཀུན་ཞི་བདེའི་དཔལ་སྤྱོད་ཅིང་།། 
མགྲིན་གཅིག་མེ་ཏོག་མཚན་གྱི་ཅོད་པན་ནི།། 
སེངྒེའི་དཔལ་འབར་ཞེས་པའི་པྲོག་ཞུ་བཏེགས།།

འདི་སྣང་སྲིད་པའི་གདོས་ཐག་རྣ་གཅུའི་རྫས།། 
ཡང་ཡང་སྲིད་ལ་འདྲེན་པས་གཅུས་པའི་མུར།། 
བརྐམ་པའི་དབང་གྱུར་དེ་ཡང་རྐང་དྲུག་ཁྱུ།། 
པདྨའི་སྦུབས་སུ་རོར་ཆགས་ཀུམ་པ་བཞིན།།

རྟ་དྲེལ་མཛོ་གསུམ་རིན་ཆེན་ཟོང་གི་མཛོད།། 
ཀུན་ནས་སྤུངས་བ་གདམ་པར་འདས་པའི་ཟོང་།། 
མཐོང་བའི་མིག་གིས་མི་དཔོག་རབ་སྤུངས་ཀྱང་།། 
མི་འཚེངས་བསགས་བསྒྲུབ་འཚོལ་སྙིང་འཁོར་བའི་གཤིས།། 

ཅི་ཙམ་སྤྱད་ཀྱང་སྲེད་པའི་ཡོ་ལང་ཅན།། 
དེ་ལྟར་འདོད་ལྡན་བརྐམ་པའི་སྙུན་ཐོགས་ཏེ།། 
འབྱོལ་མེད་ནོར་ལ་སྲེད་ཅིང་ཆགས་འགྱུ་ཞིང་།། 
མཁོས་མེད་ཟོང་རོ་དག་ཀྱང་ཚགས་སུ་བྱ།།  

འཁོར་བའི་འདོད་ཡོན་སྒྱུ་མའི་ཞགས་ནག་དེས།། 
གཡོ་མེད་བཅིངས་བའི་ཚུལ་འདི་མཐོང་བའི་མིག། 
མི་བཟོད་གདུང་བའི་སྙིང་རྗེའི་ཆུ་ཆེན་གྱིས།། 
འདོད་ཞུགས་མེ་ཀློང་འཕྲལ་དུ་གཞོལ་པའི་ཕྱིར།། 

ལན་གཅིག་སྙིང་ཆུང་གེ་སར་བཞད་པའི་དབུས།། 
མཛེས་འཛུམ་ཞལ་ལྡན་མཛའ་མོ་གང་དེ་ཡིས།། 
སྒྱུ་མའི་ཆོ་འཕྲུལ་ལྟད་མོར་མཁས་པའི་དྲུང་།། 
ཆོ་འཕྲུལ་རྩལ་རྫོགས་སྒྱུ་མའི་གར་འཁྲབས་སོ།།

ཤར་ཕྱོགས་མཐོངས་ཡངས་རྒྱུན་འབྱམས་བར་སྣང་ལས།། 
ཀུན་ཕན་རྟ་བདུན་ཤིང་རྟ་འཁོར་བའི་དུས།། 
གསེར་དེམ་བུམ་བཟང་བཏུང་བའི་ཆང་དཀར་བཅུད།། 
དངུལ་ཤམ་རྒྱན་མཛེས་ཕོར་བའི་ནང་བླུགས་པ།།  

བདུད་རྩིའི་ལྦུ་བ་ཆལ་ཆིལ་ཕྲེང་བརྩེགས་ཤིང་།། 
བདུད་རྩིའི་ངོགས་སུ་དགྱེས་ཞལ་ཤར་བའི་མོད།། 
འཕྲལ་དུ་གནས་འགྱུར་སྣང་བའི་མེ་ལོང་ངོགས།། 
འདི་སྣང་མྱོང་བའི་ཆགས་སྡང་མ་སྤངས་པར།། 

བཀོད་པ་མི་མཇེད་སྒྱུ་མའི་ཐང་དང་རི།། 
མཐའ་མེད་ཕ་རོལ་བྱང་ཐང་མི་མེད་སར།། 
ཆིབས་པ་ཅང་ཤེས་རྔོག་རིས་འཇའ་འཁྱིལ་གོང་།།
བསམ་མེད་མཐའ་བྲལ་ལྗོངས་སུ་འབྱོལ་བྱས་ཏེ།། 

ཏེ་བོར་མིག་གིས་ཀུན་ཏུ་གཟིགས་པའི་མོད།། 
མ་མཐོང་མ་གྲག་ཐང་སྟོང་ཡུལ་ལ་འབྱོར།། 
གནས་འདི་གང་ཞེས་འདྲི་ཚིག་སུ་ལ་བྱ།། 
དེ་བཞིན་གང་དུ་གཤེགས་དང་འགྲོ་བར་བྱ།། 

ཕར་བལྟས་རི་ཆུང་དེ་རུ་ཕྱིན་པ་དང་།། 
མཚོ་མོ་རང་བྱུང་གཡུ་མཚོ་ལྟེམ་མེར་འཁྱིལ།། 
རབ་ཡངས་མཁའ་བྲལ་ཆུ་འཛིན་ལྡིང་ཁང་ལས།། 
དབང་ཕྱོགས་ལྷུན་པོ་འབིགས་བརྗིད་གཅིག་ལས་མཐོ།། 

དེ་དག་དབུ་ལ་ལ་ཐོད་བཅིངས་འདྲའི་སྤྲིན།།
དེ་འོག་འབྱིན་འཇུག་ངང་བའི་ཁྱུ་དང་ཁྱུ།། 
གཅིག་རྗེས་དུ་མ་འདེད་ཅིང་འཕུར་ནས་འོངས།། 
མཐའ་མེད་བྱང་ཐང་འདི་ཀོ་ཅི་དང་གང་།།

དེ་ནས་གཡས་ཕྱོགས་རི་བོའི་གུད་ཅིག་ཏུ།། 
ར་ཁྱུའི་རྗེས་འདེད་གནག་རྫི་ན་ཆུང་མ།།
རྫི་གླུ་སིང་སིང་ལེན་པའི་གྲེ་ཐོགས་ཅན།།  
གཅིག་པུ་ཚུར་འོངས་སྐད་བརྡ་བསྒྱུར་བ་ན།།

དེ་ཡང་མཐོང་ན་སྡུག་གུ་དགའ་འཁྱིལ་ཅན།། 
ལྷུན་གྲུབ་ལང་ཚོ་དཔལ་གྱིས་མི་སྒེག་ཀྱང་།། 
མིག་གིས་མཐོང་བའི་མཐར་ལ་དགའ་འཕེལ་ཞིང་།། 
ཡུལ་དེའི་མཐུན་འཇུག་ངང་ལས་ཁང་གསར་བསྐྲུན།།

ཡུལ་དེའི་མི་རྣམས་གཅིག་ལ་གཅིག་སྡང་ཞིང་།། 
ནང་འཁྲུག་མི་བཟློག་དམེ་ཤི་གྱོད་སོགས་བདོ།། 
མ་བསམ་དབང་གྱུར་བཀོད་པའི་རི་མོ་ལས།། 
གཏན་གྱི་མཛའ་མོར་ཐོབ་པ་དེ་དང་ལྷན།། 

ལྟོགས་གྲིར་འཆི་བའི་དབུགས་རྒྱུན་ཆད་དམ་ཆད།། 
འཁྱག་གྲིར་འདར་བའི་སོ་སྒྲ་འཆའ་ཞིང་འཆའ།།
བྱད་བཞིན་ཐལ་བའི་མདངས་མཐུ་གོས་ངན་གྱོན།། 
ལག་པའི་སེན་མོ་ལྷུང་ཞིང་གས་ཀ་ཐོན།། 

ཆགས་ལྡན་དགའ་བའི་སྦྱོར་སྟབས་ཆོ་འཕྲུལ་ལས།།
ལུས་ཀྱི་ཆོ་གས་བསྐྱེད་ཅིང་བཙས་པའི་ཁྱུ།། 
བདོ་ཞིང་དེ་དག་འཁྱག་ལྟོགས་ཤི་བའི་དོགས།། 
རེ་དོགས་ར་བའི་ལྕགས་ལས་ཕྱིར་མི་ཐར།། 

ངམ་གནག་གཡོ་ཅན་ཝ་མོའི་འདུར་རྒྱུག་དང་།།
བསྡོངས་ནས་སྦྲེལ་བའི་སྒྲོ་ལྡན་མཐེབ་ལོང་མ།།
སྡུག་འབད་མདའ་མོ་རྔོན་པའི་མདའ་འཁྱེར་ཏེ།། 
སྡིག་པའི་ལས་བགྱིས་རི་དྭགས་གསོད་ཅིང་གསོད།།

རྫ་བྲག་མཐོན་པོའི་བྱ་རྒྱལ་གཟན་འཁོར་དང་།།
རི་ཞོལ་རྔོན་པ་མདའ་འཁུར་གཤེད་མ་གཉིས།།
རང་རང་ཚང་གི་མལ་གྱི་ཕྲུ་གུའི་ཆེད།།
འདུར་རྒྱུག་བྲེལ་བྲེལ་བརྟབ་པ་ཤིན་ཏུ་མཚུངས།།

གཞོན་པའི་དུས་རྫོགས་རྒ་བའི་ནད་ཀྱིས་གདུང་།། 
ཕས་བཤད་བུས་བཞག་མ་ལ་རྡོ་དབྱུག་གཞུ།།
མ་རབས་ཀུན་ཤེས་ཕ་མའི་བཀའ་འཇོག་པའི།།
ཐ་ཆད་སྤྱོད་ངན་མ་བསླབས་འཛིན་མཁས་ཅན།། 

བུ་གསུམ་གཡས་དང་བུ་མོ་གཉིས་བཅས་ལྔ།།
འབྱོར་བ་དང་བྲལ་སྡིག་པའི་ཟས་བསྟེན་ཕྱིར།། 
ལྟོ་གོས་གཉིས་ཕྱིར་རི་དྭགས་བཤོར་དུ་སོང་།། 
ཚེ་སྟོད་ཤེད་མོང་ཆ་ཙམ་མ་མཆིས་ཤིང་།།

རྒུད་དང་རྒ་བའི་དབང་གྱུར་མིག་ཀྱང་ལོང་།། 
རྣོ་ཆོད་རལ་གྲིའི་ངར་ཤུགས་མ་ཡོད་ཅི།། 
རྒས་པའི་དབང་གྱུར་རི་དྭགས་རྗེས་མི་ཆོད།། 
དམར་ནག་རྭ་ཅོ་མི་ཐེག་ཁྲག་རྭ་ཅན།། 

འགྱེལ་ཞིང་འགྱེལ་བའི་ཤྭ་ཕོ་ཞིག་མཐོང་སྟེ།། 
རལ་གྲིའི་ཤུབས་ནས་གྲི་བཏོན་སྙིང་ལ་བཏབ།། 
བྲང་སྙིང་རལ་གྲི་བཏབ་ཤུལ་ཁྲག་དམར་འཕྱོ།། 
ཤྭ་ཕོ་བཤས་ཤིང་ཤ་དང་རྭ་འཁྱེར་ཏེ།།

རྗེས་ཆགས་བུ་དང་བུ་མོ་ཆུང་མ་ལ།།
ཞལ་ཕྱོགས་རྒྱང་ནས་ཇེ་ཉེར་ཕྱིན་པའི་དུས།།
བུ་ཡིས་ཕ་ཞེས་འབོད་པའི་སྒྲ་སྒྲོག་ཅིང་།།
ཆུང་མ་སྒོར་བུད་སྔུན་བསུས་ཁྱིམ་དུ་ཕྱིན།། 

ཞག་གཅིག་འཁོར་ལོ་རྫོགས་པའི་ཕྱིན་ཉིན་དེར།།
ཐོ་རངས་ཆུང་མ་བུ་དང་བུ་མོ་བཅས།། 
མཚོ་ཆེན་གཡས་འཁྱིལ་ངོགས་སུ་འཇུག་བྱ་ཞེས།།
མགྲིན་གཅིག་བློ་བབས་དེ་རུ་ཉེར་བསྡོགས་བྱས།།

བརྩེ་འཛུམ་བཞིན་དཀར་མཛའ་བའི་དུས་ཀྱི་ངོགས།། 
དུས་ཚེ་རླབས་ཞགས་ནག་པོའི་ཞགས་པ་ཡིས།།
མཚོ་ངོགས་འགྲམ་རྒྱུ་བུ་ཆུང་དྲངས་བ་ན།། 
མ་ཡིས་དེ་མཐོང་མ་དང་བུ་གཉིས་ཟུང་།། 

མཚོ་རླབས་འཕྱུར་བས་སྲོག་དབུགས་ཤོར་བ་དང་།། 
དེའི་རྗེས་བུ་རྒྱུག་བུ་མོ་ཐམས་ཅད་རྒྱུག། 
ཨ་མ་ཞེས་འབོད་ལྷན་གཅིག་མཚོ་ཡིས་དྲངས།། 
ཕ་ཡིས་དེ་མཐོང་གདུང་བའི་ཆོ་ངེ་འདོན།། 

སྔ་ཕྱིར་གཉིས་མེད་རང་ཡང་མཚོ་རུ་ལྕེབས།། 
སྲོག་གི་ལྷག་མ་མཚོ་ལ་སྐྱེལ་བ་དང་།། 
ཤི་བའི་སྡུག་བསྔལ་དུ་ཁ་སྣང་བའི་གར།།
སྒྱུ་མའི་ཆོ་འཕྲུལ་སྣང་བརྙན་མངོན་སུམ་བཞིན།།

མི་རིང་མི་ཐུང་བཅུ་གཉིས་ཡུན་གྱི་ལོར།།
སྡུག་འབད་ལས་བགྱིས་ཟིན་ཙམ་མ་ཟིན་འདྲའི།།
འཁོན་ལ་མཐུན་པ་བཟའ་ཚང་མི་རྟག་ཆོས།།
རྗེས་ཆགས་འཁོར་བ་དེ་ཡང་རྫོགས་པར་བགྱིས།། 

དེ་ལྟར་སྒྱུ་མའི་ཆོ་འཕྲུལ་མཛད་པ་ལ།། 
བདེན་པའི་ཡུལ་ཞེས་འཁོར་བའི་ཆོས་དང་ནོར།། 
བརྐམ་པའི་ཆགས་པ་དེངས་ཤིང་ཞི་གྱུར་ཏེ།། 
ཆོས་འདོད་འཁོར་བའི་སྡུག་བསྔལ་དུ་ཁས་གཙེར།།

རྟོག་སྒྲུང་གཟུགས་བརྙན་མེ་ལོང་ངོགས་ཀྱི་འཇའ།། 
འདི་ནས་མི་སྣང་དབྱིངས་སུ་ཡར་ལ་དེངས།། 
ཚིག་རིས་མདའ་མོ་སྣང་བ་ལངས་ཤོར་བའི།།
སྤྲིན་གསེབ་བྱ་རྒྱལ་སྙིང་ལ་ཅིས་མི་འཐེབ།།

མ་བཏགས་ཐོལ་བྱུང་ངག་གི་ཆོ་ག་ལ།། 
རང་བབས་ཚིགས་བཅད་སྒྱུ་མའི་མེ་ལོང་འདི།། 
ཡིག་གཟུགས་ལྕེ་མཆུའི་སྡེབ་སྦྱོར་འཕྲུལ་སྒྱུར་གར།། 
མཐོང་རྟེན་གཟུགས་བརྙན་ཆུང་ངུ་ཡོད་དམ་ཅི།། 

སྙན་ངག་སྒྱུ་མའི་བུ་མོ་ཤེལ་གྱི་མཁའ།། 
ཕྱི་གསལ་ནང་གསལ་སྒྲིབ་མེད་ལྷང་ངེ་ལ།། 
བསྐལ་བ་མ་སྟོང་དེ་སྲིད་འཇུག་གྱུར་ཏེ།། 
ངག་རིག་རྒྱ་མཚོའི་དབུས་སུ་རྩེན་གྱུར་ཅིག།
    ཤར་ཕྱོགས་ནགས་ཀྱི་བཀོད་པ་རྒྱས་པའི་དབུས་ནས་དུས་ཚོད་གསུམ་གྱི་ནང་ལ་སྒ་འཇོག་རྟ་འཇོག་དུས་གཅིག་ཏུ་བཀོད་པའོ།།