གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

གཅེར་བུར་བུད་པ།

2012-08-09 16:34:00 ཧོར་ནག་པ་འདྲེ་མིག ཀློག་གྲངས། མཆན ཡོད།

 

དྭངས་གཙང་གི་གཙང་བོ་མཐོང་བ་ནས            
ཚ་གདུང་གི་དབང་གིས་ང་གཅེར་བུར་བུད་པ་ཡིན
ལྭ་བ་རེ་རེ་བཤུས་ནས་ཚར་དུས
མཁའ་དབྱིངས་ནི་རང་གི་ཁྱིམ་ཚང་ཡིན་པར་འཁྲུལ་མྱོང་ཨང
 
ལུས་པོ་བཀྲུ་བ་ནི་སེམས་པ་བཀྲུ་བ་དང་ཀུན་ནས་མཚུངས
དྭངས་གཙང་གི་ཞོགས་པ་དང་བསིལ་རླུང་གི་རམ་འདེགས་འོག་ནས
ཕ་ཡུལ་ལ་ལོག་པ་ནི་རྒོད་པོ་ཞིག་མཁའ་ལ་བསྐྱོད་པ་བཞིན
རང་ཉིད་ལ་རང་དབང་གི་ཁྱིམ་ཚང་ཡོད
 
ལུག་ཁྱུ་འདེད་ས་མཐའ་ཡས་པའི་རྩྭ་ཐང་ཡོད
རི་གླུ་ལེན་ས་ཁོད་ཡངས་པའི་རི་ལུང་གི་ཁ་ཞེང་ཡོད
ཆེས་མཐོ་ས་ལ་བུད་ནས་ད་དུང་ཁོར་ཡུག་འདིར་ཀི་གསུམ་འདེབས་དུས
གཙང་བོའི་ཀློང་ན་ངས་འཁྲུས་ལ་རོལ་གྱིན་ཡོད
 
བུ་མོ་དེ་ནི་ངའི་ཚེ་གཅིག་གི་སྐྱ་ཡ་ཡིན་སྲིད
མོ་མཐོང་བ་ནས་ང་གཅེར་བུར་བུད་པ་ཡིན
ཁོར་ཡུག་དང་བག་ཆགས་ལ་ངོ་ལོག་གནང་དུས
མེ་མདའ་དང་མྱི་ཁ་ནི་ཅི་ཡང་མ་རེད་ཟེར་ན་ཆོག་གམ
 
ངས་ངེད་གཉིས་ཀྱི་གཉེན་སྒྲིག་གི་ཉི་མ་དེ་ལ་ངང་སྒུག་བྱེད་ཀྱིན་ཡོད
བརྩེ་བ་དང་རང་དབང་ལྷན་འཛོམས་ཀྱི་ཉི་མ་དེ་ནི་ཅི་འདྲའི་གཡའ་དག་པ་ཞིག་རེད་ཨང
ཕུ་ནུ་མིང་བོ་ཚོ་བགད་ཆོག་ལ
མ་སྲུ་མོ་སྨན་ཚོ་ངུས་ཀྱང་ཆོག
 
ཐ་སྙད་ཀྱིས་རང་ཉིད་གཅེར་བུར་འཕུད་དུས
མི་རྣམས་ཀྱིས་ང་ལ་གད་མོ་དགོད་ཀྱིན་འདུག
དེ་དུས་ལྭ་བ་བཤུས་ནས་ང་དངོས་སུ་ཁྲོམ་སྐོར་ལ་བུད་འགྲོ
དགོད་ཀྱིན་པ་རྣམས་ངོ་མ་སྙིང་རེ་རྗེ
མཁའ་དབྱིངས་སུ་འཕུར་བ་རྣམས་རང་དབང་གི་སྲོག་ཆགས་རེད་ཡ
ད་ནི་མགོ་བོ་གནམ་ལ་བཏེགས་ནས་དེ་དག་ལ་ཡིད་སྨོན་སྐྱེ་དོན་ཅི་རེད
 
ཁྲེལ་མེད་ཚོ
ང་ཚོ་ཆེས་ཐོག་མར་ས་ཆེན་པོ་འདིར་གཅེར་བུ་གཅེར་རྐྱང་འོངས་པ་མ་ཡིན་ནམ
ཆེས་མཐའ་མར་ཡང་གཅེར་བུ་གཅེར་རྐྱང་དུ་འགྲོ་དགོས་པས
རྒྱང་ནས་ལྟད་མོ་བལྟས་ནས་ཅི་བྱེད
འདིར་ཤོག་དང་ང་ཚོ་མཉམ་དུ་འགྲོ
                           ༢༠༡༢     ༤    ༢༥  ནམ་གུང་རང་མལ་ནས།

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།