གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཁ་དོག་མེད་པའི་མཚན་མོ།

2012-07-03 15:25:00 ཆོས་ཤུལ་གསང་བདག ཀློག་གྲངས། མཆན ཡོད།


བུ་མོས་རྨི་ལམ་རྨི་བཞིན་འདུག  
རྨི་ལམ་ལས་རྟ་ཕོའི་རྨུག་སྒྲ་ཧྲུག་ཧྲུག་ངང  
ཐག་རིང་ལ་ཡལ  
ཐག་རིང་ན་ཅི་ཞིག་ཡོད

རླངས་འཁོར་གྱི་འུར་ཟིང་ཡལ་ཞིང
མི་ཚོགས་ཀྱི་ཧབ་དགོད་འཇགས་རྗེས
ངས་ཁེར་རྐྱང་གི་མཚན་མོ་ཞིག་རུམ་ཡོད
ཁ་དོག་མེད་པའི་མཚན་མོ་ཞིག་རུམ་ཡོད
མུན་པ་དང་མཉམ་དུ     ཆར་ཆུ་དང་འགྲོགས་ཏེ
ཁ་དོག་མེད་པའི་མུན་པ་དང་ཆར་ཆུ་སྒོམ་ཡོད

རྨ་ཆུ་ནི་ཁྱོད་ཀྱིས་ཕུད་པའི་མིག་ཆུ་དང་འདྲ་བར
ཐག་རིང་དུ་བཞུར་གྱིན་འདུག
རྨ་ཁུག་དང་པོ་ནས་ཞི་བདེ་རྒྱ་མཚོར་འདྲེས་ཤིང
ཡུལ་མི་སྣང་སྐྱིད་དག་གི་སེམས་འགྱུ་དང་རྟོག་པ་བཏེགས་ཏེ
ལན་རེར་འུར་ཟིང་གིས་བཞུར་ཅིང
སྐབས་རེར་ཁུ་སིམ་ངང་བབས
ཁ་དོག་མེད་པའི་མཚན་མོ་དང་འདྲ་བར
དལ་གྱིས་བཞུར   ངང་གིས་བཞུར
ང་ཡི་རྨ་ཆུ   ང་ཡི་རྨི་ལམ
རྒྱང་ནས་རྒྱང་དུ་བཞུར་བར་གྱིས
ང་ཡི་རྨ་ཆུ   ང་ཡི་རྨི་ལམ
      སྤྱི་ལོ༢༠༡༢ལོའི་ཟླ༦པའི་ཚེས༡༤དགོང་མོ་རང་མགྲོན་ཁང་དུ་སྦྱར།




 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།