གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྙན་ངག་པ་ཞིག་ལ་ཕུལ་བ།(ཞར་བཀོད་དགུ་ཡོད)

2018-08-11 09:37:55 ཀླུ་རྡོར། ཀློག་གྲངས། མཆན ཡོད།

IMG_2586.JPG

ཁྱོད་རང་ང་སར་ཡོང་ནས་མེ་ཆ་གཡར།།
ཅི་བྱེད་དྲིས་པས་ཁྱོད་ཀྱི་ར་སྐོར་ནང་།།
སྡུག་བསྔལ་རྩྭ་ལྡུམ་རབ་ཏུ་འཛིང་པ་དེ།།
ང་ཡི་སྙན་ངག་དག་གིས་བསྲེག་གོ་ཟེར།།
ཕྱིར་ཉིན་ཁྱོད་ཀྱི་ཁང་པའི་རྒྱལ་རོལ་ཏུ།།
ཕོ་རོག་ནག་ཆུང་འགའ་ཡིས་ཙག་འགྱུ་བྱེད།།
ང་ཡི་སྙན་ངག་དག་ཀྱང་མེ་རུ་འབར།།
དུ་བའི་ནང་དུ་ཁྱོད་རང་འགྲོ་བ་མཐོང་།།
            
                      བླ་བྲང་།  

ནམ་སྟོད་རྨི་ལམ་ནང་དུ་འཇམ་དབྱངས་བཞད་པས།།
དབུ་ཞྭ་སེར་པོ་ཞིག་མནབས་རྐང་ཐང་ཕེབས་བྱུང་།།
ཨ་ཁུ་ཡུལ་ལ་ཕེབས་སམ་ལན་གཅིག་ཞུས་པས།།
རི་བོ་དགེ་འཕེལ་མཆོག་ལ་འགྲོའོ་གསུངས་བྱུང་།།
ཨ་ཁུས་ཕྲུག་གཟན་སྣེ་མོ་སྡོག་གིན་ཕེབས་ཐལ།།
མདོ་ཡི་ཚིགས་བཅད་སྐོར་ཞིག་རུམ་ལ་བཅུག་ཐལ།།
སླར་ཡང་སྐུ་ཤམ་ཐུ་བ་བརྫེས་ཀྱིན་ཆས་ཐལ།།
སྔགས་ཀྱི་མན་ངག་འགའ་རེ་ཤུལ་ཏུ་ལུས་ཐལ།།
ནམ་སྨད་རྨི་ལམ་ནང་དུ་ཨ་པ་ཨ་བློས།།
རྟ་རྒོད་རྐྱང་དམར་ཞིག་ཞོན་"པུ་ར"ཁུར་ནས།།
ང་ཡི་ཧྲག་དམག་འདི་ཞེས་ཀི་ལྡིར་བྱས་བྱུང་།།
ཨ་རྒྱ་གང་ལ་འགྲོ་ཞེས་ལན་གཅིག་ཞུས་པས།།
སྔོ་ལ་གཡུ་རྩེ་བསྟོད་དུ་འགྲོའོ་གསུངས་བྱུང་།།
ནམ་ལངས་རྨི་ལམ་ནང་དུ་སེང་གེ་ཞིག་གིས།།
གཡག་ཅིག་ཤི་བའི་རོ་ལ་ལྕེ་ལྡག་བྱེད་སྐབས།།
གློ་བུར་སྟག་ཅིག་མཆོངས་ནས་སེང་གེ་དེ་ཡི།།
རལ་བ་སྔོན་མོའི་ནང་ལ་ཁྲག་ཐིགས་ཙར་བྱུང་།།

                      ལས་ལ་བསྐོས་པ།

གུས་པ་གཉིད་མ་སད་ཀྱིས་འཁོར་བར་འཁྱམས།།
ལམ་མདོ་ཞིག་ནས་མ་བུ་གཉིས་དང་ཕྲད།།
མ་ཡིས་སྡུག་བསྔལ་མཚོན་བྱེད་མེ་ཁ་གསོ།།
བུ་ཆུང་དལ་ལ་ལ་ངང་རྩེད་རྡོ་སྒྲིག།
ང་ཡིས་གདུང་རུས་དཀར་པོའི་གླིང་བུ་དེ།།
འབུད་ཀྱིན་འབུད་ཀྱིན་འཁོར་བའི་མཐའ་ལ་བལྟས།།
གང་དུ་ལས་ཀྱི་སྤྲུལ་བ་བཤིག་པ་མཐོང་།།
གང་དུ་ཆུ་ནང་ཉི་མ་འབར་བ་མཐོང་།།

                      དགེ་འདུན་ཆོས་འཕེལ།  

མགར་ཁང་སྦུབས་སུ་སྔགས་པས་རལ་བ་སིག།
མེ་དང་ལྕགས་བརྡར་གསེར་ཞུན་ཆུ་བོ་བཞུར།།

ཐང་ག་རྙིང་སོང་ཞིག་སྟེང་རྐང་པ་སྤོས།།
སྨོན་ལམ་ལོག་པའི་ལྷ་འདྲེ་གཡུང་དུ་ཕབས།།

ལྗོངས་སུ་མགོ་བོ་མ་ཤོང་ཁྱབ་འཇུག་གི།
རྐང་པ་གཡར་བྱས་མིའུ་ཐུང་སྤྲང་བཞིན་མྱུལ།།

ལ་མོ་སྣ་ཚོགས་བརྒལ་ཞིང་མེ་ཏོག་འཐུས།།
ཆུ་བོ་ཆེ་ཆུང་རྐྱལ་ཞིང་ཁ་ལག་བཀྲུས།།

མཁའ་འགྲོའི་མོ་མཚན་ནང་ལ་མཛུབ་མོས་དཀྲུགས།
ས་འགྲོའི་ཟླ་མཚན་བདུད་རྩིར་བྱབས་ཁྲུས་བྱས།།

ས་འོག་མནན་པའི་གཡག་གི་སུག་པ་རྙེད།།
ཕོ་བྲང་ཟེ་བར་ཉི་མའི་རྣ་ཆ་བཏགས།།

ཞག་སྨད་ཅིག་ལ་དུང་གི་རྭ་ཅོ་སྐྱེས།།
དགུང་སྲོད་ཅིག་ལ་གསེར་གྱི་བུམ་པ་ཆག།

                       2016 8 14 ཉིན།

                  ངས་རྐང་འཇབ་ལག་འཇབ་ཀྱིས་ཁྱོད་འཚོས་ཏེ་ཡོད།  

ངས་འཁོར་བའི་ནགས་འདབས་ཕར་བལྟས་པས།།
བྱ་ཁྭ་སྐྱག་མང་པོས་ཁྱི་རོ་བཏོག།
ངའི་སྐྱེ་བ་སྔོན་མའི་ཡུ་མོ་ཁྱོད།།
ཚུལ་དེ་ལ་འདྲོགས་པའི་ངང་ཚུལ་ལྟོས།།
ངས་ཤིང་ཁང་སྐྱ་བོའི་སྒོར་བལྟས་པས།།
ཆུང་བྱིས་པ་མང་པོས་རྩེད་རྡོ་སྒྲིག།
ངའི་སྐྱེ་བ་འདི་ཡི་ཆུང་འདྲིས་མ།།
རའི་གྲུ་ཟུར་ངུ་བའི་ངང་ཚུལ་ལྟོས།།

                     བཟའ་ཚང་།

བུའུ་ཏཱ་ལིང་གིས་གོ་རེ་བཙོངས་བཙོངས་ནས།།
བསགས་དངུལ་འཁྱེར་ཏེ་རྒན་མོར་ངོ་འཕུར་ཉོས།།
གནམ་འོག་མཛེས་མ་དང་པོ་ཕན་ཅིན་ལེན།།
སྒེའུ་ཁུང་ཕྱེས་ཙམ་ཞི་མིན་ཆིན་ལ་ཐུག།
གལ་ཏེ་བུའུ་སུང་ཁྱིམ་ན་ཡོད་རྒྱུ་ན།།
རྒན་མོ་བཱང་ཚང་ཁྱིམ་མཚེས་མིན་རྒྱུ་ན།།
འཁོར་བ་ཁ་གསོ་རྒྱབ་འགེབ་ཁོ་ནའང་མིན།།
བཟའ་ཚང་སྤྱང་ཀི་ལུ་གུ་རྩེད་པ་འདྲ།།

                         ཐང་སྟོང་གི་སྐད་འབོད།

དུས་ཚོད་ལོང་པས་ཁྱི་རྒན་སྔོན་པོ་ཁྲིད།།
འཁོར་འདས་གཉིས་པོ་ལྕགས་ཐག་བཞིན་དུ་འཐེན།།
འགྲུལ་པ་གཏོལ་མེད་འགའ་ཡིས་སྐད་འབོད་བྱེད།།
ཐབ་མེ་ལམ་ལམ་འབར་བ་ཅིའི་ཕྱིར་ཨང་།།
འདི་ན་འཁོར་པ་དོ་རུ་བརྩིགས་པའི་གདང་།།
བྱི་བ་མགོ་སེར་མང་པོས་ཟ་བཞིན་མཆིས།།
འདི་ན་དཔའ་རྒོད་གཡུལ་དུ་ཆས་པའི་རྟ།།
སྟོད་ཐག་དྲུད་ནས་རི་ཀླུང་གཤགས་ཏེ་འབྲོ།།

                         སྡེ་འདབས་ནས་སྐྱག་པ་གཏོང་ཞོར་དྲ་རྩོམ་སྐོར་ཞིག་བཀླགས་པ།

རྩོམ་འགས་འཕྲིན་སྟེགས་བརྩད་ནས་རྡུང་རེས་རྒྱག།
རྩོམ་འགས་དོན་ནོར་བསྟན་ནས་ཁ་མཆུ་སློང་།།
རྩོམ་འགས་ཡིག་ནོར་དྲུད་ནས་གཟུ་བ་བྱེད།།
རྩོམ་སྡེ་འདི་ལ་ཕྱི་གྱོད་ནང་གྱོད་མང་།།
སྙན་ངག་ཚང་གི་ཞི་ལུའི་མགོ་བཅག་པ།།
བརྩམས་སྒྲུང་ཚང་གི་བུ་མོའི་ཆེད་དུ་ཟེར།།
འབོལ་རྩོམ་ཚོ་བའི་ལབ་ཙེ་མེར་བསྲེགས་པ།།
ཆོས་ལུགས་ཤོག་ཁའི་རྟ་ཁྱུ་དེད་པས་ཟེར།།
དེ་ལྟར་སྡེ་འདབས་བརྒྱུད་ནས་སོང་པ་ན།།
བོའུ་སྐད་འགའ་ཡང་རྒྱུན་དུ་ཐོས་པ་དང་།།
དགོན་པའི་བླ་གྲྭ་རེ་ཟུང་དབྱིག་པ་བཟུང་།།
དམར་ལམ་ལམ་དུ་གྱོད་ཀྱི་བཤིག་མ་བྱེད།།
གུས་པ་སྡེ་བ་འདི་དང་འབྲེལ་བ་ཅི།།
གུས་པ་ལུང་པ་འདི་དང་མི་འབྲེལ་ཅི།།
སྡེ་ལམ་ཞོལ་མར་བུད་ནས་ཕྱིར་བལྟས་ཚེ།།
དུ་བ་སྔོན་པོ་འཕྱུར་བའི་རང་ཁྱིམ་མཐོང་།།

                         འཆར་སྒོའི་དཔེ་འཇོག

འུ་ཚོའི་རྒྱུད་ཀྱི་སྐབས་ཐོག་འཆར་སྒོ་འདི།།
རྟ་ནག་འཕུར་ཤེས་ཤིག་གི་རྔོག་རིང་འདྲ།།
ལ་ཡར་འཐེན་སྐབས་སྤྲིན་ནག་ཁོལ་མ་རེད།།
ལ་ཐུར་ལྷོད་སྐབས་མཚོ་རླབས་གཡོ་བ་རེད།།

འུ་ཚོའི་རྒྱུད་ཀྱི་རྟོག་པའི་འཆར་སྒོ་འདི།།
འདུ་ཁང་དམར་པོ་ཞིག་གི་གཡེར་དྲིལ་འདྲ།།
འཁོར་འདས་རླུང་བུས་བསྒུལ་ཚེ་གཅོང་སྐད་འབྱིན།།
ཆོས་སྐད་ལྷང་ལྷང་གོ་དུས་ལྷ་ཡུལ་འགྲོ།

འུ་ཚོའི་རྒྱུད་ཀྱི་སྣང་བའི་འཆར་སྒོ་འདི།།
ཕར་སྣོལ་ཚུར་སྣོལ་འཁོར་བའི་སྡོམ་རྒྱ་འདྲ།།
བདག་འཛིན་ཐག་པ་སྟོང་ཕྲག་སུ་ཡིས་འཛིན།།
དེ་ལ་ལྕེབས་པའི་དྲང་སྲོང་སུ་ཡིས་བྱེད།།

                                ༢༠༡༨ ༧ ༣༡

                       སྙན་ངག་གིས་ཚོང་བརྒྱབ་པ།

ང་ཡི་ཁང་ཆུང་ཉི་འོད་འཁྱིལ་བའི།།
མཛོད་ཁང་མི་གཅིག་མི་ཐར་ས་རུ།།
ལྕགས་ཀྱི་སྒམ་ཆུང་ཉི་འོད་འཁྱིལ་བར།།
ང་ཡི་སྙན་ངག་སྐོར་ཞིག་བཙན་ཡོད།།
དེ་ཉིན་ངོ་ཤེས་ངོ་ཤེས་ཤིག་གིས།།
དེ་ཤེས་ཨ་ཁུ་ལོ་ལོ་ཟེར་ནས།།
དངུལ་དཀར་རྟ་རྨིག་མ་འགའ་བཟུང་སྟེ།།
ཚོངས་རོགས་ཟེར་ནས་ཞུ་བ་བྱས་བྱུང་།།
སྤྱིར་བཏང་གུས་པས་ཁོག་རྩིས་བརྒྱབ་ཀྱང་།།
ང་ཡི་སྙན་ངག་གཅིག་གི་གོང་ཚོད།།
འབྲོག་པ་ཞིག་གི་དབྱར་ས་མིན་ན།།
རོང་པ་ཞིག་གི་ལུད་ས་ལོས་ཡིན།།
ཚོང་འདི་མི་རྒྱག་སེམས་ཐག་གོར་མ།།
ཚོང་འདི་རྒྱག་ན་དཀར་བོ་དགེ་བ།།
ཕྱིར་ཉིན་སྲང་ནས་ཐུག་པ་འཐུང་སྐབས།།
སྤྲང་པོ་ཞིག་གིས་ལག་པ་བཟེད་ནས།།
དོང་ཙེ་ཁེར་མ་སྟེར་རོགས་ཞུས་པས།།
ང་ཡིས་དུ་ཤུབས་ཐོག་ཏུ་བྲིས་པའི།།
སྙན་ངག་ཅིག་གིས་སྦྱིན་པ་བཏང་བཞག།


རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།