གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྙན་ངག་ནད་པ།(ཞར་བཀོད་གཉིས་ཡོད)

2019-03-05 16:27:26 ཙ་རྡེའུ་ནག ཀློག་གྲངས། མཆན ཡོད།

 

དུས་ཚོད་ཀྱི་ལག་པས
ལྷིང་འཇགས་ཀྱི་མཚོ་མོའི་ནང་གི་ཟླ་བ་ལེན

མེ་ཏོག་ལྡུམ་རའི་ནང་ནས་ཆང་འཐུངས་རྗེས
སྤྲིན་པ་ཚོམ་བུ་ཚོམ་བུ་བསྐྱུགས
དམ་བུ་ལས་ཕྱིར་འཕྱུར་བའི་ཝུ་བ་ནི
གཡུལ་སར་འཁྱིལ་བའི་དམག་མི་ཞིག་གི་རྣམ་ཤེས་དང་འདྲ

སྙན་ངག་ནད་པ་འདེབས་མཁན་ནི
ཁེར་རྐྱང་གིས་བཏང་བའི་ངའི་བཙོན་གྲོགས་དེ་ཡིན་ནམ

                                          སྙན་ངག་འཁྱག་པ།

ཟང་ཟིང་ཐ་དག་གཏིང་བརྗེད་དུ་གྱུར་རྗེས
རང་ཉིད་རྡོ་འཁྱག་པ་ཞིག་ལྟར་མུན་པའི་རུམ་ལ་ལྷུང

ནམ་ཞིག ངས་སྙན་ངག་ཤིན་ཏུ་ཡག་པ་ཞིག་བྲིས་རྗེས
གཉིད་དུ་ཡུར་བའི་གཙང་བོ་ཞིག་གཉོར་ན་འདོད

མཁའ་དབྱིངས་ནི་ཤེལ་དྭངས་མོ་ཞིག་ལྟར་ཆག་རྗེས
བར་སྣང་དུ་བཀལ་མྱངས་པའི་འཇའ་ཚོན་གྱི་རྡུལ་ཡང་འཇིག་ངེས

                                          2019_1_30

                                           སྙན་ངག་ཚེ་ཟད།

ཉག་ག་དེ་ནས་འབབ་པའི་
ཟླ་བའི་སྐྲ་ལོ་ཟ་ཟི

ཆང་དམར་གྱི་ནང་དུ་རྐྱལ་བའི་ཝ་མོ་ཞིག་ལྟར
ཡང་ན ལྕེ་དང་མཆུ་སྒྲོས་ཀྱིས་འཁྲབ་པའི་གར་ཞིག་དང་འདྲ

སྡོང་རྒན་གྱི་རྩེ་མོ་རུ
སྨིན་ཐག་ཆོད་པའི་ཟླ་བ་ཞིག་ཡོད
དེ་ནི་རུམ་བརྒྱབ་པའི་ཆུང་གྲོགས་ཤིག་དང་འདྲ

                                            2018.12.23

 

 རྩོམ་སྒྲིག་པ། གངས་དགའ།

  (མཆོད་མེའི་པར་དབང་གཞན་གྱིས་དགོལ་མི་རུང)

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།