དབྱར་ཁ་འདིར
ངས་སྙན་ངག་ཅིག་གི་ཁ་བྱང་བོར་སོང་བ་འདྲ
དེའང  དོན་གྱིས་སྙན་ངག་ཅིག་གི་ཁ་བྱང་རེད་འདུག

སྙན་ངག་ཅེས་པ་འདི
སྐབས་རེར་སེམས་པ་སེམས་སུ་ངོ་སྤྲོད་ཚུལ་ཞིག་རེད་འདུག
སྙན་ངག་ཅེས་པ་འདི
སྐབས་རེར་ཁྱོད་ལ་སྐད་ཆ་གློད་ཚུལ་གཞན་ཞིག་རེད་འདུག

ད་ལྟ་བསམ་ན   སྙན་ངག་ཅེས་པ་ནི
ཁྱོད་ལ་ལྐོག་ནས་དགའ་བའི་བུ་མོ་ཞིག་ལྟར
བཤད་འདོད་པ་མཐའ་དག་མགྲིན་པའི་སྦུབས་སུ་སྦས་ནས་འདུག་མཁན་ཞིག་རེད་འདུག
                              ༢༠༢༥-༦-༡༤ཞོགས་པར།

 

མཛེས་སྡུག་གི་ཡིག་འབྲུ།

སྟོང་བའི་ལག་པ་གཉིས་ཀ

སྟོང་བའི་མིག་ཟུང་གཉིས་ཀ
སྟོང་བའི་སེམས་པ་འདིའི་ནང་དུ་འཚོ་ཐབས་བྲལ

མཛེས་སྡུག་གི་ཡིག་འབྲུ་དེ
ཧྥ་རན་སིའི་བརྩེ་དུང་གི་གྱང་ངོས་སུ་བྲིས་པའི་ཡིག་འབྲུ་དེ་དག་ཙམ་ག་ལ་ཡིན
ང་ཡི་ཨམ་ཕྲག་ཏུ་སྙིང་ཉེ་བའི་ཡིག་འབྲུ་ཧ་ཅང་མང

ཡིད་འོང་གི་རྒྱང་རིང་ལགས
དུས་ཚོད་ལ་ལགས་སོ་ཟེར་དགོས་དོན་མི་འདུག་ནའང
རང་ཉིད་ལ་ཅིས་ཀྱང་ལགས་སོ་ཞེས་ཞུ་འོས
               ༢༠༢༥-༨-༣༠ལ་འདབ་པ་རུ།

 

ལྷག་འཕྲོ།

 

གཏམ་རྒྱུད་ཅིག་གི་སྐུད་སྣེ
སེམས་པས་འདོར་མི་ཐུབ་པའི་ས་ཁྲ་དེའི་ངོ་གདོང་དང་འབྲེལ་ཨང

ལོ་རྒྱུས་ཀྱི་གླེགས་བམ་ཆེ་ཆུང་དུ་མ
སྔས་འགྲམ་གྱི་གློག་སྒྲོན་ཅི་བཞིན་ད་ལྟ་ད་དུང་ཡང་ཧ་ཅང་གསལ
མི་ལོ་མང་པོའི་སྔོན་གྱི་འུ་ཅག
གོ་ལའི་ཡང་རྩེ་རུ་གླུ་གཞས་གཏོང་མཁན་རྐྱང་རྐྱང་ཡིན

ང་ལ་སྐད་ཆ་མི་འདྲི་རོགས
སེམས་པའི་ནང་དུ་མདོག་མི་གཅིག་པའི་གཏམ་རྒྱུད་མང་དྲགས་པས
ངས་སང་ཉིན་གྱི་ཉི་རྡུལ་ཁྲོད་དུ་ད་རུང་ཅི་ཞིག་འབྲི་དགོས་པར་བསམ་བློ་བཏང་མེད
                ༢༠༢༤-༨-༣ཆབ་མདོ་རུ།

 

མིང་མི་དྲན་པའི་དུས་ཚོད་ཁ་ཤས
སྨག་ནག་པའི་མཚན་མོ་འདིར་དཔེ་བླངས་ནས་བཤད་ན་ཆོག་གམ

འཆི་བའི་ཡིག་འབྲུ་རེ་རེ
གློ་ཉེ་བའི་ཁྱོད་དང་ཁ་ཐག་རིང་དུ་གྱུར་པས
ད་ལྟ  མེ་འོད་འཁྱག་པ་འདིར་རྒྱབ་གཟུགས་གླན་མཁན་ག་ཚོད་ཡོད

༡༩༩༩ལོར་ཕ་ཡུལ་དུ་རླུང་བུ་ལྡང་སྲིད
རླུང་ལྡང་བ་ནི་ཧ་ཅང་སྙིང་ཉེ་བ་ཞིག
སྙིང་ཉེ་ཚུལ་དེའང  ཁྱོད་ཀྱི་གོམ་སྟབས་ལ་འབྲེལ་བ་ཡོད
               13/2/2025

འཚོ་བ་གླེང་ཟིན    
འདས་སོང་གླེང་ཟིན
གླེང་ཟིན་པ་དེ་དག་གི་རྗེས་སུ
ངས་ཁྱོད་ཀྱི་སྒོ་འགྲམ་དུ་ཁྱོད་ལ་བསྒུག

དགུན་ཁ་འདི
མེ་འོད་བཞིན་དྲོན་པོ་ཞིག་ཡིན་ན
དགུན་ཁ་འདི
ཁྱོད་ཀྱི་སྒོ་འགྲམ་བཞིན་འཆར་ཡན་དང་ལྡན་པ་ཞིག་ཡིན་ན
ངའི་སྙན་ངག་འདིའི་ཁ་ཞེང་ཅུང་ཙམ་ཆེ་ངེས
              ༢༠༢༤-༡༢-༡༦ལའོ།།
 

ཞོགས་པ་དེར
ལམ་ཕྲན་གྱི་གཡས་གཡོན་ཀུན་དུ
ལྗོན་པ་རེ་རེས་ཅི་ཞིག་སྒུག་སྙམ་གྱིས
ཁྱོད་ལ་ཕུར་ཚུགས་སུ་ཅེར

ངའི་དོག་དྲགས་པའི་མིག་མདངས་དེའི་ནང་དུ
མི་གཅིག་གི་གྲིབ་གཟུགས་ལས་ཤོང་ཐབས་མི་འདུག་པས
ཁྱོད་རང་ཧབ་ཐོབ་ཀྱིས་སེམས་པའི་གཏིང་དུ་བྲིས

ཞོགས་པ་དེར   ཞོགས་པ་དེར
ངས་ཁྱོད་ཁོ་ན  སེམས་པའི་ཟབ་སུ་རུ་བྲིས་པས
སྙན་ངག་འདི་ཁ་ཞེང་ཧ་ཅང་ཆུང
               ༢༠༢༤-༣-༡༠ལ། 

                                                                                                      __ཡང་ན་སྙན་ངག་ནང་གི་ལེའུ།

དབྱར་ཁ་ཚེས་ལ་ཉེ་བས
ཁྱོད་ཀྱི་ཕ་ཡུལ་དུ་མེ་ཏོག་བཞད་ཟིན་ནམ

འཇིག་རྟེན་འདི་ཧ་ཅང་ཆུང་བས
ཁ་པར་གྱི་འཆར་ཤེལ་ནང་གི་འདྲ་པར་ཙམ་ལས་མེད་མོད
འུ་གཉིས་ལ་བར་ཐག་ཧ་ཅང་རིང

སྐབས་རེར  ཆ་མེད་པའི་ཁྱོད་ཀྱི་ཕ་ཡུལ་དེ
ངའི་རྣམ་ཤེས་ཀྱི་གཏིང་དུ་སིམ་ན་བསམ

སྙན་ངག་འདི་སྙན་ངག་གཞན་ཞིག་སྟེ
སྙན་ངག་ནང་གི་ལེའུ་གཞན་ཞིག
                 ༢༠༢༤-༥-༡༧ཉིན།