གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

གཡག་རོག་རོག

2015-03-26 11:36:00 ཨ་སྐྱབས་དར་རྒྱས། ཀློག་གྲངས། མཆན ཡོད།

  
  མུན་རུབ་སོང་།
  མུན་དངོས་འབྲེལ་རུབ་སོང་། ལྟོས་དང་། ཟླ་འོད་མོག་མོག་ཅིག་ལས་མི་འདུག གྲང་ངར་ཆེ་ལ་ལྷགས་རླུང་ལྡང་བས། སྐར་ཚོགས་ཀྱང་གདུང་བས་གཟིར་གྱིན་གདའ།
  དགེ་འདུན་གྱིས་གཡག་རོག་རོག་ཅིག་ལྷས་རའི་ནང་ནས་བཙན་གྱིས་ཕྱི་རོལ་དུ་ཁྲིད།
  ལྷས་རའི་ཕྱི་རོལ་དུ།དགེ་འདུན་གྱིས་རྒྱ་ཚོང་པ་དེ་ལ་ཁ་པར་ཞིག་བཏང་ཡང་ཁ་པར་ལ་སྙིང་ རྗེ་སྤུ་ཙམ་མེད་པར "དགོངས་པ་མ་ཚོམས། ཁྱེད་ཀྱི་ཁ་པར་ནང་གི་ སྒོར་མོ་ཚར་འདུག"ཅེས་སྒོར་མོ་ཟད་པའི་མུག་སྐད་སྒྲོག་གིན་འདུག
  དགེ་འདུན་གྱིས་རང་གི་ཁ་པར་ནང་གི་སྒོར་མོ་ཟད་དེ་ཉིན་ཁ་ཤས་འགོར་ཟིན་པ་གཞི་ནས་དྲན།འདི་ནི་དགེ་འདུན་ལ་མཚོན་ན་ཆེས་རྒྱུན་ལྡན་གྱི་བྱ་བ་ཞིག་ཡིན་པས་ད་ལྟ་ཁོ་ལ་གོམས་ལོབས་སུ་གྱུར་འདུག
  གཡག་རོག་རོག་ནི་ཆུང་དུས་ནས་དགེ་འདུན་དང་མཉམ་དུ་མེ་ཏོག་དང་ཆར་ བའི་ཁྲོད། ཁ་བ་དང་གྲང་རླུང་གི་ནང་ནས་ལྷན་དུ་ནར་སོན་པ་ཡིན་མོད། ད་ལྟ་ ཁོའི་འཚོ་གནས་ཀྱི་ཆེད་དུ་གཡག་རོག་རོག་བཤས་རར་ཕབ་དགོས་པས། དགེ་ འདུན་གྱི་སེམས་སུ་སྙིང་རྗེ་སྐྱེས། མིག་ལ་མཆི་མ་འཁོར། ཁ་ནས་དངན་པ་ཤོར།
  འོན་ཀྱང་དགེ་འདུན་ལ་འཚོ་གནས་ཀྱི་ཐབས་བཀོད་གཞན་ཡོད་དམ། ཁོ་ལ་ ལག་རྩལ་མེད། ཤེས་རིག་མེད། འཇོན་ཐང་མེད། ཡོང་སྒོ་མེད། ཁོ་ནི་ནོར་དང་ མཉམ་དུ་ནར་སོན་ལ། ནོར་དང་ལྷན་དུ་རྒས་སོང་།
  ཟླ་འོད་ཁྲོད་དུ།དགེ་འདུན་གྱིས་རྐང་འཇབ་ལག་འཇབ་ཀྱིས་གཡག་རོག་རོག་ཁྲིད་དེ་རྫོང་མཁར་གྱི་བཤས་ཁང་འགྲམ་དུ་ཡོང་།
  བཤས་ཁང་གི་སྒོ་འགྲམ་དུ། རས་ཞྭ་དཀར་པོ་གྱོན་པའི་ཁ་ཆེ་བའི་ཚོང་པ་དང་། ཀོ་སྟོད་ནག་པོ་གྱོན་པའི་རྒྱ་ཚོང་བ་ཚོས་སྔ་མོ་ནས་དགེ་འདུན་འདྲ་བའི་ནོར་ལྐོག་ ཚོང་རྒྱག་མཁན་ཚོ་བསྒུགས་ནས་འདུགམ་གཞི་དགེ་འདུན་གྱིས་ཁྲིད་འོང་བའི་གཡག་རོག་ རོག་ནི་གཟུགས་བོངས་ཆེ་ལ་ཤ་ཤེད་བཟང་ཡང་། རས་ཞྭ་དཀར་པོ་གྱོན་པའི་ཁ་ཆེ་བའི་ཚོང་དཔོན་བཤས་ཁང་སྒོ་འགྲམ་གྱི་མེ་ཕུང་གི་གམ་ནས་ཚུར་འོང་ཏེ།གཡག་རོག་རོག་གི་རྒྱབ་ཐོག་ལ་ཁོའི་དཀར་ཞིང་རྒྱག་པའི་ལག་པས་ཉུག་ཉུག་བྱེད་ཞོར།
  "ཨ་རོགས། འབྲོག་པ་རྒད་པོ། གཡག་གི་ཤ་ཚོན་པོ་མ་རེད། སྒོར་ག་ཚོད་དགོས"ཞེས་དྲིས།
  "ལབ་མ་རྒྱག གཡག་བཤས་འབྲོང་འདྲ་བ་འདི་ནོར་བརྒྱའི་ཁྲོད་ནས་བཙལ་ཡང་རྙེད་དཀའ"དགེ་འདུན་ལ་སྣང་དོགས་སྤུ་ཙམ་མེད་པར་དེ་ལྟར་ལབ།
  "དྲང་མོར་ཤོད་ཡ།ངས་སྒོར་སྟོང་གཉིས་སྟེར་ག་འདྲ་རེདཅེས་ཀོ་སྟོད་ནག་པོ་གྱོན་པའི་རྒྱ་ཚོང་པས་ཀྲུང་ཧྭ་རྟགས་ཅན་གི་ཐ་མག་སྔོ་ལྷོག་ལྷོག་འཐེན་ཞོར་གཡག་རོག་རོག་གི་རྒྱབ་ཏུ་རེག་ཞོར་དེ་ལྟར་ཟེར།
  "དཔེ་མི་སྲིད། དཔེ་མི་སྲིད།"
  དགེ་འདུན་གྱི་དེ་ལྟར་ལབ་ཀྱང་སེམས་སུ། ཚོང་དཔོན་གྱིས་རིན་གོང་འདི་འདྲའི་དམའ་མོ་ཞིག་ལབ་ཡོང་བ་ཡིད་ལའང་མ་ཤར།
  སྡེ་མི་ཚོས་དཔྱིད་ལོ་སར་གྲ་སྒྲིག་བྱེད་ཀྱིན་ཡོད། དགེ་འདུན་གྱི་ཆུང་མ་རྫོང་སྨན་ཁང་དུ་ཡོད་པས་ཁོའི་ད་ལྟ་སྒོར་མོ་མང་པོ་ཞིག་གྲ་སྒྲིག་བྱེད་དགོས་པ་ཡིད་ལ་དྲན།
དགེ་འདུན་ཡང་བསྐྱར་རས་ཞྭ་དཀར་པོ་གྱོན་པའི་ཁ་ཆེ་བའི་ཚོང་པ་དང་། ཀོ་སྟོད་ནག་པོ་གྱོན་པའི་རྒྱ་ཚོང་དཔོན་གྱི་གམ་དུ་བཅར་ཏེ།
  "ཡ། ཚོང་དཔོན་ལགས། ཀུ་རེ་མ་རྩེ། དོན་ངོ་མ་ངའི་གཡག་འདིར་སྒོར་ག་ ཚོད་སྟེར་ཐུབ་ཀྱིན་འདུག"
  "སྟོང་གཉིས་དང་ཉིས་བརྒྱ།"
  ཁ་ཆེ་བའི་ཚོང་པས་དེ་ལྟར་བཤད།
  དགེ་འདུན་གྱིས་ཕུ་ཐུང་ས་ལ་དྲུད་ཞོར་ཡང་བསྐྱར་ཁ་ཆེ་བའི་ཚོང་དཔོན་གྱི་ གདོང་ལ་གཟབ་ལྟ་བྱས།
  "འོ་ན། ཁྱོད་རང་གིས་གོང་ཞིག་ཤོད་དང་།"
  ཀོ་སྟོད་ནག་པོ་གྱོན་པའི་རྒྱ་ཚོང་དཔོན་གྱིས་དགེ་འདུན་གྱི་ཕུ་ཐུང་ནང་དུ་ལག་པ་བསྲིངས་བྱུང་།
  "སྒོར་སྟོང་ལྔ་དགོས། ང་ད་རུང་ཁྱིམ་དུ་ལོག་དགོས་པས་རིན་གོང་ཆེས་སྟབས་བདེ་བྱས་པ་ཡིན།"
  "མིན།"
  "འོ་ན། སྒོར་སྟོང་གཉིས་དང་སུམ་བརྒྱ་སྟེར། བཙོང་རྒྱུ་ཨེ་ཡིན།"
  "མིན། གཏན་ནས་མིན"
  དགེ་འདུན་གྱིས་མགོ་བོ་ཏྲ་རུ་གཡུག་གཡུག་བྱས།
  ཁ་བ་མ་བབས་པའི་ཡར་སྔོན་གྱི་ཉིན་དེར།དགེ་འདུན་གྱིས་སྡེ་དཔོན་སྐྱབས་ལོ་ལ་དངུལ་སྐྱེད་མཐོན་པོ་བྱས་ཏེ་བསྐྱིས་པའི་སྒོར་མོ་དེས། ཁོའི་ཆུང་མའི་ལུས་ཟུངས་གསོ་ཆེད། ཀོ་སྟོད་ནག་པོ་གྱོན་པའི་རྒྱ་ཚོང་པ་ལ། ཤ་རྐང་ཡ་ཤིག་ལ་སྒོར་སྟོང་གཅིག་ལྷག་སྟེར། ཨ་ཙི། ད་ལྟ་ཁོའི་ངའི་གཡག་འབྲོང་འདྲ་བ་འདིར་སྒོར་སྟོང་གཉིས་མ་གཏོགས་མི་སྟེར་ཟེར། དགེ་འདུན་ཀོ་སྟོད་ནག་པོ་གྱོན་པའི་ཚོང་དཔོན་གྱི་གདོང་གི་ཉམས་དང་། བཤད་པའི་གཏམ་དེས་རང་ཉིད་ཀྱི་རྣ་བ་ལའང་ཡིད་མི་ཆེས་པར་གྱུར།
  "ཨ་ཁུ་འབྲོག་པས་གཡག་བཙོང་རྒྱུ་མིན་པ་འདྲ"ཞེས་ཁ་ཆེ་བའི་ཚོང་དཔོན་གྱིས་དེ་ལྟར་ལབ་ཞོར་མེ་ཕུང་གམ་དུ་ལག་པ་བསྲོ་རུ་སོང་།
  "ཁྱོད་ཀྱིས་མི་བཙོང་ན། ང་ལ་ཡང་བཀོད་པ་མི་འདུག"
  ཀོ་སྟོད་ནག་པོ་གྱོན་པའི་རྒྱ་ཚོང་དཔོན་གྱིས་སླར་ཡང་ཐ་མག་རྐང་གཅིག་ལ་མེ་སྒྲོན་ཞོར་ཁོ་ཡང་མེ་ཕུང་གམ་དུ་སོང་།
  འདི་ནི་བཤས་ཁང་སྒོ་འགྲམ་གྱི་ཚོང་པ་ཚོའི་འགྲོ་ལུགས་ཤིག་རེད། ད་ལྟ་བཤས་འཚོང་བྱེད་མཁན་གྱི་མི་ཚོས་དམར་ལྷབ་ལྷུབ་འབར་བའི་མེ་ཕུང་གི་འགྲམ་དུ་ཤོ་ རྒྱན་བཞག་ནས་དགའ་བཞིན་འདུག དགོད་ཀྱིན་གདའ།
  ཉིན་དེར། དགེ་འདུན་གྱིས་ཤ་རྐང་ཡ་ཞིག་ཉོས་ནས་ཁྱིམ་དུ་ལོག ཁོའི་ཡིད་ལ་ཆུང་མ་དྲན།ཆུང་མའི་སྐམ་ཅིང་རུད་པའི་ངོ་གདོང་ལ་སྐྱོ་བའི་འཛུམ་ཞིག་བསྡུས་འདུག་པ་དྲན། ཡིད་ཕངས་པ་ཞིག་ལ། ཤ་ཉོས་རྗེས་དགེ་འདུན་གྱི་འཕྲུལ་རྟའི་ནང་གི་སྣུམ་ ཟད་འདུགའོན་ཀྱང་དགེ་འདུན་ལ་སྣུམ་བླུག་སྤྱད་ཀྱི་སྒོར་མོ་མེད་པས་ལེ་དབར་ལྔ་ལྷག་ལ་ ཡར་སྔོན་དང་འདྲ་བར་འཕྲུལ་རྟ་དེད་ནས་རྐང་ཐང་དུ་ཡོང་།
  མཚན་མོ་དེར།ཆར་བ་བབས།ཆར་བ་ཤུགས་ཀྱིས་བབས་པས་དགེ་འདུན་གྱི་ལུས་ཡོངས་ རློན་ཤུར་ཤུར་དང་། འདར་སུག་སུག་བྱེད།
  ཁོས་ནུབ་ཚལ་ཡང་བཏུང་མ་འདོད་པར་ངལ་དུབ་ཁྲོད་གཉིད་དུ་ཡུལ། དགེ་འདུན་བཤས་ཁང་གི་སྒོ་འགྲམ་དུ་ཙོག་ནས་ཡར་སྔོན་གྱི་དོན་དག་ལ་དེ་ལྟར་ཕྱིར་དྲན་ བྱས།
བཤས་ཁང་སྒོ་འགྲམ་གྱི་མེ་ཕུང་དམར་ལམ་ལམ་བྱེད། མཚན་མོའི་དུས་ཚོད་བཞི་པ་ཡོལ་ཟིན།
  ཟླ་འོད་མོག་མོག་དེ་གར་སོང་མི་ཤེས་ཀྱང་སྒོ་ཁྱིའི་ཟུག་སྐད་གཉོམ་པོ་ཞིག་རླུང གིས་ཁྱེར་ནས་དགེ་འདུན་གྱི་རྣ་འགྲམ་དུ་བསྐྱལ།
  དགེ་འདུན་གྱི་མཁྲིག་མའི་མགོའི་དུས་ཚོད་འགྲོ་བ་ཧ་ཅང་མགྱོགས། ཧ་ཅང་མགྱོགས།
  དུས་ཚོད་ཀྱི་གོམ་འགྲོས་དང་བསྟུན་ནས་དགེ་འདུན་སྡོད་མི་ཚུགས་པར་བྲེལ་བ་ལང་། འཚུབ་ཆ་སྐྱེས།
  གྲང་རླུང་ངར་མ་དེས་དགེ་འདུན་གྱི་ལག་པ་དང་། རྐང་པ། ངོ་གདོང་བཅས་ འཁྱག་སིབ་བེར་བཏང་། གྲང་ཤུར་ཤུར་བྱེད།
དགེ་འདུན་འུ་ཐུག་སོང་།
  དགེ་འདུན་མེ་ཕུང་གམ་དུ་བཅར་དེ་ཚོང་དཔོན་གཉིས་ལ་མིག་རིག་རིག་གི་བལྟས་ཀྱང་ཁོ་ཚོས་དེ་ལ་ཁ་ཡ་མི་བྱེད་པར་དགེ་འདུན་གྱིས་མི་གོ་བའི་རྒྱ་སྐད་ཀྱི་ཁ་བརྡ་བྱེད་ཞོར་ཤོག་ཤོ་རྒྱག་གིན་འདུག
  དགེ་འདུན་གྱིས་འདི་ལྟར་ཁ་རོག་གེར། ཁུ་སིམ་མེར་སྒུག་འདོད་ག་ལ་ཕོད། ད་ལྟ་ཁོས་བཤས་ཚོང་བྱེད་བཞིན་པ་དྲན་མ་ཐག་རྒྱུད་པ་འདར། ལག་པ་འཁོབ། སེམས་པ་སྐྱོ།
  དགེ་འདུན་དང་འདྲ་བའི་འབྱོར་བ་ཞན་པའི་འབྲོག་པ་ཚོས་མཚན་མོའི་དུས་སུ། ནོར་རྣམས་ལྐོག་ནས་བཤས་ཚོང་བྱེད་མཁན་ཚོར་སྤྲོད་ཀྱིན་ཡོད།
  ཡིད་སྐྱོ་བ་ཞིག་ལ། རས་ཞྭ་དཀར་པོ་གྱོན་པའི་ཁ་ཆེ་བའི་ཚོང་དཔོན་དང་། ཀོ་སྟོད་ནག་པོ་གྱོན་པའི་རྒྱ་ཚོང་དཔོན་ཚོས་ཀྱང་ད་ལྟ་སྤྱི་ཚོགས་ཐོག་གི་འགྲོ་ལུགས་ ཤེས་པས། ཁོ་ཚོས་ནམ་གསལ་ཡོང་ན་དགེ་འདུན་གྱིས་གཡག་ཕྱིར་ཁྱིམ་དུ་དེད་ འགྲོ་མི་ཕོད་པ་སྔོན་ནས་ཤེས་ཡོད།
  དགེ་འདུན་ཆད་པ་ལ་སྐྲག་དགོས། མི་ཁ་ལ་དོགས་དགོས། སྡིག་པ་ལ་འཛེམ་ དགོས།
  གྲང་རླུང་ཤུར་ཤུར་དུ་ལྡང་། མུན་པ་ཧ་ཅང་ནག ནམ་གསལ་ལ་ཉེ།
  བཤས་ཚོང་བྱེད་མཁན་ཚོའི་བློ་རིག་ཤིན་ཏུ་གསལ། ཚོང་ཧ་ཅང་རྒྱུག
  དུས་དེར་དགེ་འདུན་འདྲ་བའི་ལྐོག་ཚོང་བྱེད་མཁན་ཚོར་འཇིགས་སྐྲག་ཆེ། ཁོམ་པ་མེད།
  ཕར་བལྟས་ན། བཤས་ཉོ་མཁན་ཚོར་བྲེལ་བ་ཅུང་ཙམ་ཡང་མི་འདུག གཏན་ནས་མི་འདུག
  དགེ་འདུན་འུ་ཐུག་ནས་ཀོ་སྟོད་ནག་པོ་གྱོན་པའི་རྒྱ་ཚོང་དཔོན་གྱི་ཕྲག་པར་ ལག་པས་རྡེབ་ཙམ་བྱས། ཁོས་ཀྲུང་ཧྭ་རྟགས་ཅན་གྱི་དུ་བ་སྔོ་ལྷོག་ལྷོག་འཐེན་ཞོར་
  "ཅི་རེད། གཡག་བཙོང་རྒྱུ་ཡིན་ནམ།"
  "ཡིན། ཁྱོད་ཀྱིས་ངའི་ཁ་ངོ་ལ་བལྟས་ནས་སྒོར་བརྒྱ་བསྣན་ན་ཆོག་གམ།"
  "ཆོག་གི འུ་གཉིས་ངོ་ཤེས་རྙིང་པ་རེད།"
  "ཐུགས་རྗེ་ཆེ།"
  "ཧ་ཧ། དེ་འདྲ་ལབ་ག་ལ་དགོས། འུ་གཉིས་ད་རུང་མུ་མཐུད་ནས་ཚོང་རྒྱག་དགོས།"
  "ཡ་ཡ། གཞུགས་ཕྱོགས་ཀྱང་ངས་ཁྱོད་བཙལ་ཡོང་།"
  ཁོར་ཡུག་ཧྲིལ་བོ་ནག་རོག་གེར་འདུག
  དགེ་འདུན་མུན་ནག་ཁྲོད་དུ་གང་ཞིག་ལ་ཆས་སོང་།

  (མཆོད་མེའི་པར་དབང་གཞན་གྱིས་དགོལ་མི་རུང)

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།