གཅིག

　　ངས་ཇི་ལྟར་འདང་བརྒྱབ་ཀྱང་། ངའི་མིག་མདུན་གྱི་བུད་མེད་དེ་དང་ངས་ངོ་ཤེས་པའི་དཔལ་མོ་གཉིས་གཏན་ནས་གཞི་གཅིག་གི་ཐོག་ལ་འབབ་ཐབས་མི་འདུག ང་རང་ཉིད་ཀྱི་དྲན་པ་ལ་ཡིད་མ་ཆེས་པར་ལག་པས་མགོ་བོ་འཕྲུག་འཕྲུག་བྱེད་ཞོར་བུད་མེད་དེའི་གདོང་ལ་གཟབ་ནན་གྱིས་བལྟས་པ་ཡིན། འོན་ཀྱང་མོ་ནི་དཔལ་མོ་ཡིན་པར་ང་རང་རྦད་དེ་ཡིད་ཆེས་བྱེད་ཐབས་བྲལ། མོའི་མགོ་ཐོག་གི་ཨ་ཡིག་ནག་པོ་དེ་འོད་ཀྲིག་ཀྲིག་བྱེད་པ་དང་། གད་མོ་ལྷུག་ལྷུག་ཏུ་དགོད་ཅིང་ཆགས་ཉམས་དང་པྲ་ཆལ་གྱི་ཉམས་ཤིག་སྟོན་ཞོར་ཐད་ཀར་ངའི་གདོང་ལ་ལྟ་བཞིན“དེ་འདྲ་ཞིག་ལྟ་རྒྱུ་ཡོད་དམ། ང་རང་ཇེ་ཡག་ལ་བུད་སོང་ངམ”ཞེས་ཀུ་རེ་བརྩེས་བྱུང་། ངས་ཀྱང་རང་ཉིད་མོ་ལ་ཧད་དེ་ཡུན་རིང་འགོར་བ་ཚོར་ནས། ཅུང་དོགས་མི་བདེ་བའི་ངང་མགོ་བོར་འཕྲུག་འཕྲུག་བྱེད་ཞོར་མིག་ཟུང་མོ་ལས་གཡོལ་ཐབས་བྱས་པ་ཡིན།

　　ཉིན་དེར། ཕྱི་དྲོའི་ལས་ཚོགས་གྲོལ་རྗེས། ང་དང་གྲོགས་པོ་བསམ་འཕེལ་གཉིས་ཕྱི་རོལ་ཏུ་ཟ་མ་བཟའ་བར་ཕྱིན་པ་ཡིན། བསམ་འཕེལ་ནི་ངས་གསར་དུ་ངོ་ཤེས་པའི་གྲོགས་པོ་ཞིག་ཡིན། ང་ལས་ཁུངས་འདིར་ལས་ཞུགས་བྱས་ནས་ཡུན་རིང་འགོར་མེད་མོད། ཉེ་འཁོར་གྱི་མི་དག་ནི་འདྲིས་སླ་བོ་ཡོད་པས། སུན་སྣང་དང་ཁེར་རྐྱང་གང་ཡང་མ་བྱུང་། ལྷག་པར་བསམ་འཕེལ་ནི་མི་འདྲིས་སླ་བོ་ཞིག་ཡིན། དགོད་གཏམ་བཤད་རྒྱུ་མང་ལ། བསྟན་བཤིག་ཚ་པོ་རང་ཡོད། ཁོ་ནི་མི་སྣང་སྐྱིད་ཅིག་དང་། ཁམས་དྭངས་ཤིག་ཀྱང་ཡིན། ངས་ཁོ་ངོ་ཤེས་པ་ནས་བཟུང་། ངའི་གདོང་གི་འཛུམ་དང་དགོད་སྒྲ་སོགས་དམིགས་ཀྱིས་ཇེ་མང་ལ་སོང་བ་གདོན་མི་ཟ། འཛུམ་མདངས་ནི་འགོས་ནད་ལྟར་འགོས་རྒྱུ་ཡོད་ཅེས་པ་དེ་དངོས་གནས་བདེན་པར་འདུག ནམ་རྒྱུན་ཁོའི་བསྟན་བཤིག་ཚ་པོའི་གཤིས་ཀ་ཡིས་གད་མོ་ཐག་གེ་བ་རེ་བསླངས་ཡོང་། ངས་ཁོའི་གདོང་ནས་སྐྱོ་ཉམས་ཤིག་རྦད་དེ་མཐོང་མ་མྱོང་། ཕྱི་དྲོར་ལས་ཚོགས་གྲོལ་རྗེས། ངས་ཐད་ཀར་བསམ་འཕེལ་གྱི་གཞུང་ལས་ཁང་གཟས་ནས་སོང་བ་ཡིན། བསམ་འཕེལ་གྱི་ཁྱིམ་ནི་ལས་ཁུངས་ཀྱི་ཐག་ཉེ་ཞིག་ན་ཡོད་ལ། རླངས་འཁོར་ནང་བསྡད་རྗེས་སྐར་མ་བཅོ་ལྔ་ཡར་མར་གྱིས་ཐོན་སྲིད། རྫོང་ནས་སྤྱི་ལེ་བཅུ་ཙམ་སོང་རྗེས་གྲོང་རྡལ་ཞིག་ལ་སླེབས་ཐུབ། གྲོང་རྡལ་དེ་ན་བསམ་འཕེལ་གྱི་ཁྱིམ་མི་དག་ཡོད། དེ་ངས་རྗེས་ནས་ཤེས་པ་ཡིན། ཁོ་རང་ལས་ཁུངས་ནང་ཞག་སྡོད་བྱེད་ཀྱིན་མེད། ལས་ཁུངས་ནང་ཞག་སྡོད་བྱས་ཚེ། ནུབ་མོར་ཁེར་ཉལ་བྱ་མི་ཐུབ་ཟེར། དང་ཐོག་ངས་ཁོའི་སྐད་ཆ་དེ་བདེན་པར་མ་བཟུང་། སྐད་ཆ་འདིའི་རྒྱབ་ལོགས་ཀྱི་ཡང་སྙིང་ཡང་མ་རྟོགས་པས། བྱིས་པ་ལོ་གསུམ་ཅན་ཞིག་ཡིན་ནམ། ཁེར་ཉལ་མི་ཐུབ་གང་ཡིན་ཞེས་ཁོ་ལ་ཀུ་རེ་བརྩེས་པ་ཡིན། གྲོགས་པོ་ཞིག་གིས་རྫུ་ཉམས་དང་བཅས་ཏེ་བསམ་འཕེལ་གྱིས་ཁྱིམ་ན་བྱིས་པ་ལོ་གསུམ་ཅན་ཞིག་བསྙལ་ཡོད་རྒྱུ་རེད་ཅེས་བཤད། ངས་གྲོགས་པོ་དེའི་སྐད་ཆའི་མཇུག་བསྐྱངས་ཏེ་ནུབ་མོ་རེ་རེར་དེ་ལ་འོ་མ་བསྲོ་དགོས་ཞེས་ཀུ་རེ་བྱས། བསམ་འཕེལ་གྱིས་དེ་ལ་ལན་ཅི་ཡང་མི་འདེབས་པར་ང་ཚོ་དང་མཉམ་པོར་ལྷུག་ལྷུག་ཏུ་དགོད་སྲིད། རྗེས་ནས་བསམ་འཕེལ་ལ་ཆུང་མ་ཡོད་པ་ཤེས་རྗེས། ངས་བསམ་འཕེལ་གྱིས་ཁེར་ཉལ་བྱ་མི་ཐུབ་པའི་སྐད་ཆ་དེ་དྲན་གྱིན་ཡང་ཡང་ཁེར་དགོད་བྱས་པ་ཡིན། འདོད་པ་དེ་འདྲ་ཆེའམ། ནུབ་རྒྱུན་བསྲོན་མི་ཐུབ་པ་གང་ཡིན་ནམ་སྙམ་ནས་ཁེར་ལབ་ཀྱང་བྱས། ཕྱི་དྲོར་ཟ་མ་ཟོས་རྗེས། ཁོས་རླངས་འཁོར་བསྐོར་ནས་ཁྱིམ་ལ་ལོག་འགྲོ། ལན་རེར་ཟ་མ་ཡང་མི་ཟ་བར་ཐད་ཀར་ཁྱིམ་ལ་ལོག་འགྲོ།

　　ཕྱི་དྲོ་དེར་ངས་བསམ་འཕེལ་གྱི་གཞུང་ལས་ཁང་གི་སྒོ་འབྱེད་དུས། ཁོས་ད་དུང་གློག་ཀླད་མདུན་ན་མིག་ཤེལ་ཆེན་པོ་ཞིག་གདོང་ལ་བཟར་ནས་གཟབ་ནན་ངང་ལག་པ་གཉིས་མཐེབ་གཞུང་ངོས་ལ་གཏད་དེ་འཆར་ངོས་སུ་ཡི་གེ་གཏག་གིན་འདུག ང་སླེབས་པ་མཐོང་རྗེས། “ཅུང་ཙམ་སྒུགས། ཅུང་ཙམ་སྒུགས། མཇུག་བསྡུ་ཚར་ལ་ཁད་ཡིན།”ཞེས་ཡིན་ཟེར་ཞོར་ཡི་གེ་གཏག་པའི་འགྲོས་ཚད་ཇེ་མགྱོགས་ལ་བཏང་། ཅུང་ཙམ་འགོར་རྗེས། ཁོས་གཞི་ནས་ལས་མཚམས་བཞག་པ་དང་། ངལ་དུབ་ཀྱིས་གླལ་སྒྱིང་ཞིག་བྱས་ཏེ་གློག་ཀླད་ཀྱི་སྒོ་གཏན། “འགྲོ། འགྲོ། འགྲོ། ལྟོགས་ནས་ཤི་ཐལ”ཞེས་འཆད་བཞིན་ཡར་ལངས་ཏེ་ཕྱི་སྒོ་གཟས་ནས་ཕྱིན། ང་ཡང་ལྟོགས་ནས་ཕོ་བའི་ནང་ལ་སྟོང་སྒྲ་གྲག་བཞིན་ཡོད་པས། བསམ་འཕེལ་གྱི་རྗེས་བསྙེགས་ནས་བརྒྱུགས།ངེད་གཉིས་ལས་ཁུངས་ཀྱི་རྒྱ་སྒོ་ནས་ཕར་ཅུང་ཙམ་སོང་རྗེས།བུད་མེད་ཅིག་ལ་ཕྲད། དང་ཐོག་ངའི་སེམས་སུ་བུད་མེད་དེས་ང་མོའི་ངོ་ཤེས་གྲོགས་པོ་ཞིག་ལ་འཆུགས་ནས་སྔུན་བཀག་བྱུང་སྙམ། མོས་ནོར་འཆུགས་མེད་པར་ངའི་མིང་ནས་བོས་བྱུང་བས། ད་གཟོད་མོ་ནི་ངའི་ངོཤེས་ཤིག་ཡིན་ནམ་སྙམ་ནས་འདང་བརྒྱབ་པ་ཡིན། “དོན་འགྲུབ། ཁྱོད་འདི་ན་ཡོད་དམ”ཞེས་ང་ལ་འཚམས་འདྲི་བྱས་བྱུང་། ངས་རེ་ཞིག་མོ་ནི་སུ་ཡིན་དྲན་པའི་ནང་ལ་མ་ཁུག་ཀྱང་། མགོ་བོར་འཕྲུག་འཕྲུག་བྱས་ཏེ“ཡོད། ཡོད། ཡོད།”ཅེས་ཐེངས་འགར་བསྐྱར་ཟློས་སྒོས་ལན་བཏབ་པ་ཡིན། “ཁྱོད་འདི་ལ་རང་དགར་ཡོང་བ་ཡིན་ནམ།”ཞེས་ང་ལ་གཏིང་འདྲི་བྱས་བྱུང་། ངས“མིན། ང་འདིའི་ཉེ་འཁོར་ཞིག་ན་ལས་ཞུགས་བྱས་ཡོད།འདིར་ཐོན་ནས་ཡུན་རིང་འགོར་མེད”ཅེས་བཤད་པ་ཡིན། ཉིན་དེར་མོ་རང་ཅུང་བྲེལ་བ་ལངས་འདུག ཕྲག་ལ་འཕྲེད་དུ་ཁུར་བའི་ཁུག་མ་ཆུང་ཆུང་དེ་ལས་ཁ་པར་བཏོན་ཏེ་ང་ལ་སྐད་འཕྲིན་སྦྲེལ་རོགས་ཞེས་བཤད།ངེད་གཉིས་ཀྱིས་སྐད་འཕྲིན་སྦྲེལ་རྗེས། མོས་ང་ལ་གྱེས་བརྡ་ཞིག་སྟོན་བཞིན་བྱ་འཕུར་བ་ལྟར་ངའི་འགྲོ་ལམ་དང་ལྡོག་པར་བུད་སོང་།

　　མོ་རང་སོང་རྗེས། བསམ་འཕེལ་གྱིས་གདོང་ལ་གཡོ་འཛུམ་ཞིག་དོད་དེ “སུ་རེད། སུ་རེད།”ཅེས་ཤེས་འདོད་ཆེན་པོས་ང་ལ་ཡང་ཡང་དྲིས་པས། “ངའི་སློབ་གྲོགས་ཤིག་རེད”ཅེས་བཤད་པ་ཡིན། འོན་ཀྱང་དཔལ་མོ་དང་ངེད་གཉིས་སློབ་གྲོགས་རྐྱང་རྐྱང་གི་འབྲེལ་བ་ལས་ཅུང་ཟབ་མོར་ཆགས་མྱོང་། བསམ་འཕེལ་ཁ་ཕྱིར་འཁོར་ནས་མོའི་རྒྱབ་གཟུགས་ལ་ཕྱི་མིག་ཅིག་འཕེན་བཞིན། “ཁྱོད་ཀྱི་སློབ་གྲོགས་ངོ་མ་མཛེས་མ་ཞིག་འདུག དེ་འདྲ་ཞིག་ཆུང་མར་ལེན་ཐུབ་ན། ངས་ནུབ་རྒྱུན་མོ་ལ་རྐང་བ་བཀྲུ་དགོས་ཀྱང་འགྱོད་པ་མེད”ཅེས་བཤད་བྱུང་། ངས་ཁོ་ལ་ཕུད་རྒྱག་ཅིག་བྱེད་ཞོར“ཁྱོད་ནི་གཞན་གྱི་མི་རེད། བྱིས་པ་ལྔ་ཡི་ཨ་ཕ་རེད།”ཅེས་བཤད་པ་ཡིན། ཁོས“ཆུང་མ་ལ་བཟའ་འཐོར་བྱེད། བྱིས་པ་ཚོ་གང་ཡིན་སར་ཁ་བསྐོར།”ཞེས་ང་ལ་ཀུ་རེ་བརྩེས་བྱུང་། ངས་ཁོ་ལ“བུད་མེད་འདིའི་རིགས་འུ་གཉིས་ཀས་དབང་དུ་སྡུད་ཐུབ་པའི་རིགས་མིན”ཞེས་དྲང་མོར་བཤད་པ་ཡིན། ཁོས“མཚན་གཅིག་ལ་ངའི་མལ་ཁྲིའི་ཐོག་ཉལ་རྒྱུ་བྱུང་ན། ང་ནམ་གང་བོར་མི་གཉིད་པར་མོ་རང་སྲུང་ཆོག”ཅེས་མིག་ཟུང་བཙུམས་ནས་སྟོང་འདང་བརྒྱབ་པས། ངས་ཁོ་ལ“ཆགས་གླང་། ཆགས་གླང་ངོ་མ་བོ་རེད།”ཅེས་མཚང་མིང་བཏགས་ཤིང་ཀུ་རེ་བརྩེས་པ་ཡིན། ངའི་ཕ་ཡུལ་དུ་ཆགས་སྲེད་ཅན་དེ་ཚོ་ལ་ཆགས་གླང་ཞེས་མཚང་མིང་འདོགས་སྲིད། བསམ་གྲུབ་ནི་དུ་བ་རྔུབ་འཐེན་བྱེད་རྒྱུར་དགའ་ཞིང་། རླངས་འཁོར་སྐོར་དུས་མ་ཎི་དུང་ཟེར་ནས་སྣུམ་སྒོ་ཤུགས་ཀྱིས་མནན་ཏེ་རླངས་འཁོར་གཞན་ལས་བརྒལ་རྒྱུར་དགའ། བསམ་འཕེལ་གྱིས་བཤད་པ་ལྟར་ན། ཁོ་རང་སྔོན་ཆད་མི་རྐྱལ་སྟོང་ཞིག་ཡིན་མོད། ལས་ཞུགས་བྱས་རྗེས་ད་གཟོད་ལྷོད་ལ་བབས་པ་ཡིན་ཟེར།སྔོན་ཆད་ཁོས་ཆང་འཐུང་བ་དང་དུ་བ་འཐེན་པ། རྒྱན་འཇོག་པ། འཛིང་རེས་བྱེད་པ་བཅས་མ་བྱས་པ་གཅིག་ཀྱང་མེད་ལ། བུ་མོ་ཞིག་ལ་ཐང་བུ་ཞིག་ཀྱང་བཞག་མྱོང་ཟེར། ཕྱི་དྲོར་ངེད་གཉིས་ཀྱིས་ཟ་མ་ཟོས་རྗེས། བསམ་འཕེལ་སྔར་ལྟར་ཁྱིམ་ལ་བུད་སོང་། ང་ཡང་སྡོད་ཁང་ལ་ལོག་པ་ཡིན།མལ་ཁྲིའི་སྟེང་གན་རྐྱལ་ལ་ལོག་ནས་ཅུང་མ་འགོར་བར། སིང་དིར་རེར་ཁ་པར་གྱི་སྒྲ་གྲག་པས་ངས་སྤོ་བོ་ཡིན་ནམ་སྙམ་བྱུང་།ང་ཕ་ཡུལ་དང་གྱེས་ནས་ཐག་རིང་འདི་འདྲ་ཞིག་ལ་ལས་ཞུགས་སུ་ཡོང་བར་སྤོ་བོས་སེམས་ཁུར་གནང་གིན་འདུག ཉིན་རྒྱུན་ང་ལ་འཚམས་འདྲི་བྱེད་ཅིང་། ཟ་མ་དང་ཉལ་ས། ལས་ཀའི་ལྕི་ཡང་སོགས་མང་པོ་ཞིག་འདྲི་ངེས།མི་ཞེས་པ་ནི་ལོ་ན་ཇེ་ཆེར་སོང་བ་དང་བསྟུན་ནས་སེམས་ཇེ་ཆུང་དང་ཇེ་སྙི་ལ་འགྲོ་བ་འདི་ཡང་ཆོས་ཉིད་ཅིག་ཡིན་པ་འདྲ།ཁ་པར་གྱི་འཆར་ངོས་སུ་རླུང་ནང་གི་ལས་འཕྲོ་ཞེས་རྒྱ་ཡིག་འགའ་ཤར་འདུག “དེ་རིང་ཕྱི་དྲོར་བྱ་བ་ཞིག་གི་དབང་གིས་ཁྱོད་ལ་ཁ་བརྡ་བྱེད་ཁོམ་ཡང་མ་བྱུང་།ཁོམ་ཉིན་ཞིག་ལ་མཉམ་དུ་ཟ་མ་བཟའ།ངས་ཁྱོད་ལ་མགྲོན་བྱེད”ཅེས་རྒྱ་ཡིག་གི་ལམ་ནས་བསྐུར་འདུགངས“འོ་ཡ། སྐྱོན་མི་འདུག མགྲོན་བྱ་ག་ལ་དགོས།”ཞེས་བོད་ཡིག་གི་ལམ་ནས་ལན་བྱིན་པ་ཡིན།

　　གཉིས།

　　སློབ་མཐར་ཕྱིན་རྗེས། ང་དང་དཔལ་མོ་གཉིས་བྱེའུ་ཕྲུག་གཉིས་ལ་གཤོག་ཟུང་རྒྱས་པ་ནང་བཞིན་རང་རང་ས་ནས་ནམ་འཕང་བཅད། དེ་ཡང་ངེད་གཉིས་སྔར་གནས་ནས་རང་རང་གི་ས་ལ་ཕྱིན་པ་ཙམ་ཁོ་ན་མ་ཡིན་པར།ཡུན་རིང་མ་འགོར་བར་ངེད་གཉིས་ཀྱི་བརྩེ་དུང་ལ་ཡང་གས་ཆག་ཤོར་ནས་རང་རང་གི་ས་ལ་གྱེས། སློབ་མཐར་ཕྱིན་རྗེས་ངེད་གཉིས་སྔར་བཞིན་ཐུག་འཕྲད་བྱ་ཐུབ་པ་ངས་ཡིད་ཀྱི་དགུ་ལ་ཡང་ཤར་མ་མྱོང་།ངེད་གཉིས་ཀྱིས་སློབ་ཆེན་འགྲིམ་པའི་ལོ་དེ་དག་ལ་དུས་ཚོད་ནི་དཔྱིད་མགོ་མའི་བསིལ་རླུང་འཇམ་པོ་ཞིག་དང་འདྲ་བར།ངེད་གཉིས་དང་མཉམ་པོར་སློབ་གྲྭའི་མེ་ཏོག་ར་བ་དང་སློབ་ཁང་། ཟ་ཁང་། དཔེ་མཛོད་ཁང་། སྤོ་ལོ་ཐང་། ལུས་རྩལ་ར་བ་བཅས་ནས་སོས་དལ་ངང་རྒྱུ་ཞིང་། ངེད་གཉིས་ཀྱིས་འཐམ་འཁྱུད་དང་། མཆུ་སྦྱོར། ལག་གདང་། འཆམ་འཆམ་བྱེད་པ་བཅས་ལ་གཡེང་ནས་དེ་དག་ལ་བདེན་དཔང་བྱས་མྱོང་། ལས་དབང་ནི་དངོས་གནས་མི་བསམ་ནག་ཅིག་དང་འདྲ་སྟེ། བསམ་གཟས་ནས་ངེད་གཉིས་ཡང་བསྐྱར་འཕྲད་དུ་བཅུག་བྱུང་། ལྟོས་བཅས་སུ་མོ་རང་ངའི་དྲན་ངོགས་སུ་ཅུང་བཏང་སྙོམས་ལ་གྱུར་ཅིང་། འཚོ་བའི་ཁྲོད་ག་ལེར་མག་མོག་དང་རབ་རིབ་ལ་འགྱུར་བཞིན་ཡོད་ནའང་། ཐུག་འཕྲད་ཀྱི་ཆོ་འཕྲུལ་འདིས་འདས་སོང་གི་གཏམ་རྒྱུད་དེ་དག་ལ་གདོན་ཞུགས་པ་ནང་བཞིན་ངའི་དྲན་པའི་གཏིང་རིམ་ནས་འཕག་འཚག་རྒྱག དེ་རིང་ཡང་བསྐྱར་ང་རང་དགའ་མྱོང་ཞིང་ངའི་ཆེས་ཐོག་མའི་བརྩེ་དུང་གི་མེ་ཏོག་འབུལ་སའི་བུ་མོ་དེ་དང་ཕྲད་པས། ག་ཤེད་ཅིག་ནས་ཟ་འཕྲུག་ལངས་པ་ནང་བཞིན། ཞོ་ལྟར་ཆགས་པའི་ཕྱིར་དྲན་དག་དར་བ་ལྟར་དཀྲུགས། ངས་ནམ་ཡང་བརྗེད་ཐབས་བྲལ་བ་ནི་མོའི་སྐྱེ་གཟུགས་དང་། འཛུམ་ཞལ། བསླུ་བྲིད་གཏོང་ཤེས་པའི་མིག་ཟུང་བཅས་མ་ཡིན་པར། ངེད་གཉིས་ཐེངས་དང་པོར་ངོ་ཕྲད་དུས་སུ་ཅུང་གླེན་ཚུགས་ཀྱི་བྱ་བྱེད་དང་། སྙིང་རྗེ་མོ་ཡོད་པའི་གཤིས་ཀ དྭངས་གཙང་གི་བྱིས་བློ་དང་ངོ་ཚ་ནས་གདོང་དམར་པོ་དང་ལུས་པོ་སྒོང་སྒོང་བྱེད་པའི་རྣམ་པ་དེ་དག་རེད།

　　དང་ཐོག་ངེད་གཉིས་དཔེ་མཛོད་ཁང་ནས་ངོ་ཤེས་པ་ཡིན། དེ་ནི་སློབ་གྲོགས་གཞན་པ་ཚོས་དགའ་རོགས་འཚོལ་སྟངས་དང་། རོགས་ཐུག་རྒྱག་སྟངས་དེར་ཅུང་འདྲ་བོ་མི་འདུག ངའི་གྲོགས་པོ་དག་གིས་དགའ་རོགས་འཚོལ་དུས། སྤོ་ལོ་དང་ལུས་རྩལ་ར་བ། ཡང་ན་ཟ་ཁང་དང་སློབ་ཁང་གི་བར་ཁྱམས་བཅས་སུ་བུ་མོ་བློར་འབབ་རེ་མཐོང་ཚེ། ཐད་ཀར་སོང་ནས་སྐད་འཕྲིན་སྦྲེལ་བ་རེད། སྤོབས་པ་ཕྲ་ལ་འབྲེལ་འདྲིས་འཇོན་པོ་མེད་པའི་གྲོགས་པོ་ཚོས་ལྐོག་ནས་བུ་མོ་དེ་པར་བརྒྱབ་པ་དང་། དེ་ནས་གྲོགས་པོ་ཚོའི་འབྲེལ་བ་བརྒྱུད་ནས་བུ་མོ་དེ་རྩད་གཅོད་བྱེད་པ་ཡིན། མིང་ལ་ཅི་ཟེར། ལོ་རིམ་གང་ཡིན། འཛིན་གྲྭ་གང་གི་ཡིན། དགའ་རོགས་ཡོད་མེད་བཅས་ལ་རྩད་གཅོད་བྱས་རྗེས། སྐད་འཕྲིན་ལག་ལ་ཡོང་ཐབས་བྱ་ངེས། ཅུང་ཐབས་རྡུགས་དག་གིས་འཛིན་གྲྭ་མི་གཅིག་པའི་གྲོགས་པོ་ཕན་ཚུན་བར་ལ་བུ་མོ་ཚོའི་དྲ་འབྲེལ་སྐུར་རེས་བྱེད་པ་དང་། དྲ་སྦྲེལ་རྗེས་བུ་མོ་དེ་གཏན་ནས་མཐོང་མ་མྱོང་ཡང་། གང་ཞིག་ནས་མཐོང་ཁུལ་དང་ཕྲད་མྱོང་རབས། ཡིད་འཇོག་བྱས་ནས་ཡུན་རིང་འགོར་རབས་བཅས་རྫུན་གྱི་རྔ་མ་ལ་རྫུན་མཐུད་ནས་འབྲེལ་བ་འཛིན་པ་རེད།

　　ལོ་དེར་མོ་རང་གློ་བུར་དུ་སྤྱང་ཀི་ཞིག་ལུག་རའི་ནང་ལ་མཆོང་མཆོང་བྱས་ནས། ངའི་སྤྱི་འགྲོས་ལྟ་བུའི་འཚོ་བ་ལ་འགྱུར་ལྡོག་བཏང་ཞིང་། སྤྱང་ཀིས་ལུ་གུ་འཛིན་འཛིན་བྱས་ཏེ། ངའི་བྲང་ཁོག་ན་ལྷེམ་ལྷེམ་ངང་འགུལ་བའི་སྙིང་ཆུང་ལ་སྡེར་འདྲད་བྱས། དང་ཐོག་ངས་མོ་དཔེ་མཛོད་ཁང་ནས་མཐོང་། ལས་བྱ་འབྲི་སྐབས་དང་བརྩམས་སྒྲུང་ཀློག་སྐབས་ང་རང་གཅིག་པུ་དཔེ་མཛོད་ཁང་ལ་འགྲོ་རྒྱུར་དགའ། རྐྱེན་གང་ཞིག་གིས་ང་རང་མི་འདི་འདྲ་ཞིག་ལ་གྱུར་བ་མ་ཚོར་ལ། ནམ་ཞིག་ནས་འདི་འདྲ་ཞིག་ལ་གྱུར་བ་ཡང་མ་ཤེས།མཚམས་ཤིག་ནས་ང་ནི་ཁེར་འགྲོ་ཁེར་འདུག་ལ་དགའ་ཞིང་གོམས་པར་གྱུར་འདུག ལན་རེར་ཁེར་རྐྱང་གི་སྣང་བ་འགོག་མེད་དུ་སྐྱེས་ཤིང་།ཉེ་འཁོར་གྱི་མི་ཐམས་ཅད་ལ་སུན་ཏེ་སུ་ལ་ཡང་འབྲེལ་བ་འཛུགས་མི་འདོད།སློབ་མཐར་ཕྱིན་པའི་དགོང་མོ་དེར། ངས་སེམས་གཏིང་ནས་རང་ཉིད་ཀྱི་གཤིས་ཀ་དེ་ལ་ལེ་བདའ་བྱས། དགོང་མོ་དེར་ང་སྔར་བཞིན་འུར་ཟིང་གི་མི་ཚོགས་ནང་ལ་བསྲེ་མ་ཐུབ་པར་ལུས།སློབ་གྲོགས་ཚོས་ཆང་དམ་ལག་ལ་བཟུང་ནས་མཚམས་མི་ཆད་པར་ཆང་གཏུག་རྒྱག་ཞོར་གླུ་བླངས།འུར་བརྒྱབ། ཕན་ཚུན་ལ་སེམས་གཏམ་བཤད།ངས་ཀྱང་ཤེལ་ཕོར་འགའ་གཙང་བཞེས་བྱས་ཏེ་སློབ་གྲོགས་ཚོའི་འུར་ཟིང་ནང་བསྲེ་ཅི་ཐུབ་བྱས་མོད།ཅི་ཞིག་གིས་ཕྱི་ནས་འཐེན་ཞིང་ནང་ནས་འདེད་པ་ལྟར་ཁེར་རྐྱང་གི་བཟི་ཁ་ཨ་རག་ལས་ཀྱང་བཙན།ངས་རོ་ཁ་ལ་སྐྱུར་བའི་ལྦུ་རག་ཤེལ་དམ་འགའ་སྒོག་སྒོག་ངང་མིད་ཅིང་།ཅི་ཡང་མི་སྨྲ་བར་ཁོ་ཚོའི་གཞོགས་ཤིག་ནས་ཁེར་རྐྱང་མནབས་ཏེ་གཞས་ལ་རོལ་བ་ཡིན། སྙན་ངག་དང་གླུ་གཞས་ནི་ང་དང་ངའི་ཁེར་རྐྱང་གི་འདུག་རོགས་སྐྱོ་རོགས་ཡིན། སློབ་གྲྭའི་ནང་ན་ཡོད་དུས། དུས་ཚོད་མང་ཆེ་ཤོས་སུ་སྡོད་ཁང་ནང་ཉལ་བ་དང་། དཔེ་མཛོད་ཁང་ལ་སོང་ནས་སྒྲུང་གཏམ་བཀླགས་པ་ཡིན། ང་ནམ་རྒྱུན་ཁེར་འགྲོ་ཁེར་འདུག་བྱས་པས། གྲོགས་པོ་ཚོས་ང་རང་མི་མཚར་བོ་ཞིག་རེད་ཟེར།ངས་ཁོ་ཚོ་ལ་དེ་མཚར་རྒྱུ་ཆེན་པོ་མི་འདུག སྙན་ངག་པའི་མི་ཚེ་ནི་མ་གཞི་ནས་སྐྱོ་ཡུས་དང་ཁེར་རྐྱང་གིས་གྲུབ་པ་ཞིག་ཡིན། ཁེར་རྐྱང་ནི་འུར་ཟིང་ལ་མི་གོམས་པར་ལྷིང་འཇགས་ལ་འཁྲེང་བ་ཞིག་རེད་ཅེས་བདེན་ཅོག་ཅོག་གིས་སྨྲས།ང་ལ་མཚོན་ན་ཆེས་སྐྱིད་སྣང་དོད་པོ་ནི་ནད་པ་རོལ་ཚོགས་ཀྱི་གླུ་གཞས་ལྷོད་མོ་ཞིག་ལ་ཉན་ནས་བརྩམས་སྒྲུང་ཀློག་རྒྱུ་དེ་ཡིན། དེ་ནི་བུ་མོ་ཚོས་ཉལ་ཁང་ནང་སིལ་ཟས་མང་པོ་བཀྲམས་ནས་ལྷོ་ཁོ་རེ་ཡའི་གློག་བརྙན་ཡག་པོ་ཞིག་ལ་ལྟ་བ་ནང་བཞིན་རེད།

　　མོ་ཡང་དུས་རྒྱུན་དཔེ་མཛོད་ཁང་ལ་ཡོང་གིན་ཡོད་པ་འདྲ། ངས་ནམ་རྒྱུན་དཔེ་མཛོད་ཁང་ནས་མོ་རང་མཐོང་ཐུབ། ངེད་གཉིས་ཀྱིས་ཕན་ཚུན་ངོ་ཤེས་ཀྱིན་མེད་མོད། ངས་མོ་ལ་ཡིད་འཇོག་བྱས་མྱོང་། ཆ་མི་འཕྲོད་པའི་དཔེ་ཁུག་སྔོན་པོ་དེ་དང་ཇ་ཕོར་དམར་པོ་དེ་ནི་མོའི་རྟགས་མཚོན་ཆེ་ཤོས་ཤིག་ཡིན། མོ་ནི་ཤ་རིད་ཅིང་གཟུགས་ཅུང་རིང་བ་དང་།གདོང་ལ་མཛེས་འཆོས་དང་མཆུ་རྩི་བྱུགས་མི་འདུག་ལ།སྐྲ་མདོག་ཀྱང་བསྒྱུར་མི་འདུགམོས་གོན་པ་གྲས་རྒྱས་དང་མདོག་ཆེན་གྱོན་མི་དཔེ།འགྲོ་དུས་མགོ་བོ་ཅུང་ནང་ལ་སྒུར་ཞིང་།ནན་ཏན་གྱིས་གོམ་པ་དག་མདུན་ལ་སྤོ་སྲིད།མོ་རང་དཔེ་མཛོད་ཁང་ལ་ཡོང་དུས་ལན་རེར་གྲོགས་པོ་གཅིག་གཉིས་ཤིག་དང་མཉམ་པོར་ཡོང་མོད། མང་ཆེ་ཤོས་སུ་མོ་ཡང་ང་དང་འདྲ་བར་ཁེར་མ་ཡིན།ངེད་གཉིས་དཔེ་མཛོད་ཁང་གི་གྲུ་ག་ཞིག་ནས་ཕྲད་སྲིད་མོད། དེ་ནི་ཆེས་སྤྱིར་བཏང་གི་ལམ་འགྲོ་བ་གཉིས་ལམ་བར་ནས་ཕྲད་པ་ནང་བཞིན། ཕན་ཚུན་ལ་ཁ་ཡ་བྱེད་མི་སྲིད།

　　“དེབ་འདི་ཁྱོད་ཀྱི་ཡིན་ནམ།”ལོ་དེར་ང་རང་སློབ་ཆེན་ལོ་རིམ་གསུམ་པ་ཡིན། ལོ་དེར་ངའི་བྲང་གཞུང་ལ་དཔྱིད་མགོ་མའི་ཆར་བ་ཟམ་ཟིམ་བབས་པས་མེ་ཏོག་ཅིག་ལ་མྱུ་གུ་འབུས་ཤིང་འདབ་མ་རྒྱས།

　　“ཡིན། ” ངས་ཐད་ཀར་དེ་ལྟར་བཤད་པ་ཡིན། ངའི་རྣ་ཉན་ལས་ད་དུང་སེ་ལེན། སེ་ལེན། ཁེར་རྐྱང་དང་ལྷིང་འཇགས་ལ་སྐྲག་པའི་ཁྱོད་རང་ས་ཆ་གང་ན་ཡོད་ཅེས་གླུ་དབྱངས་ཤིག་གི་རྒྱུན་མཐུད་དེ་མཆེད་ཡོང་བས། ངས་ད་གཟོད་རྣ་ཉན་བླངས་མེད་པ་ཤེས་ནས། རྣ་ཉན་མར་ཕབ་ཞོར་མོའི་གདོང་ལ་བལྟས་ཏེ། “དེབ་འདི་ངའི་ཡིན། ཅི་རེད།”ཅེས་དྲིས་པ་ཡིན། མོ་རང་ཅུང་དོགས་མི་བདེ་བའི་ངང“དེབ་འདི་ཁྱོད་ཀྱིས་བཀླགས་ཚར་རམ། དེ་རིང་ང་ལ་གཡར་ཆོག་གམ།”ཟེར། “ཨུན། ཨུན། གཡར་ཆོག”ཅེས་བཤད་པ་ཡིན། ངས་ཐད་ཀར་མོའི་གདོང་ལ་བལྟས་ནས་བསྡད་པས། མོ་རང་ངོ་ཚ་ནས་ངོ་གདོང་དམར་པོ་གྱུར་ཅིང་། མིག་ཟུང་ཡང་ང་དང་གཡོལ་ནས་ངའི་མདུན་ཅོག་ཐོག་གི་སྒྲུང་དེབ་དེར་བལྟས་བྱུང་། མོའི་བྱ་བྱེད་དེས་ང་ཡང་ཅུང་དོགས་མི་བདེ་བར་བཏང་ཞིང་། ངའི་གདོང་ནི་མེ་ཡིས་བསྲེགས་པ་ལྟར་ཚ་ལམ་ལམ་བྱེད་ལ། སྙིང་ནི་བྲང་གཞུང་ནས་བཀྱིག་ཐག་གིས་བསྡམས་པའི་ལུ་གུ་ཞིག་གིས་འཕག་འཚག་བྱེད་པ་ལྟར་ཏིག་ཏིག་ཏུ་ལྡིང་བྱུང་།མོས་ང་མོ་ལ་ཧད་ནས་འདུག་པར་གོ་བ་ལོག་སྒྲུབ་བྱེད་ཨེ་འགྲོ་སྙམ། ངས་མྱུར་མོར《དུང་ཟླ་དང་དུང་ཙེ་དྲུག》ཅེས་པའི་སྒྲུང་དེབ་དེ་བླངས་ནས་མོ་ལ་གཏད་པ་ཡིན།

　　“དེ་རིང་མ་སྤྲད་ཀྱང་ཆོག འགོར་འགྱངས་བྱས་ཀྱང་མི་སྐྱོན།ནམ་བཀླགས་ཚར་ན་ནམ་སྤྲད་ཆོག”ཅེས་གསལ་འདེབས་བྱས་པ་ཡིན།

　　“དེ་ན་ངས་བཀླགས་ཚར་རྗེས་འཁྱེར་ཡོང་། དངོས་གནས་བཀའ་དྲིན་ཆེ”ཞེས་བཤད་རྗེས་དཔེ་ཆ་གཡོན་ལག་གི་མཆན་ལ་བཙིར་ནས་ང་དང་གྱེས།

　　ངས་མོའི་རྒྱབ་གཟུགས་དེ་མཐོང་ལམ་ནས་རྒྱང་མིག་ཆད་རགས་བར་མིག་སྐྱེལ་བྱས་ཤིང་།ཐེངས་དང་པོར་མོ་ལ་འཕྲད་དུས་ངས་མོ་ལ་བག་ཆགས་ཡག་པོ་ཞིག་འཇོག་མ་ཐུབ་སྙམ་ནས་རང་ཉིད་ལ་ལེ་བདའ་བྱས་པ་ཡིན།

　　གསུམ།

　　ཉིན་དེར་ང་རང་མོའི་གདོང་ཁོ་ན་ལ་ཧད་ནས་བསྡད་པའང་མིན།མོའི་མགོ་ཐོག་ཏུ་ཨ་ཡིག་དཀར་པོ་ཞིག་འགྲེང་འདུག་པ་ལ་བལྟས་ནས་བསྡད་པ་ཡིན། དང་ཐོག་ངས་དེ་ནི་སྐྲ་འཛེར་གྱི་ཐོག་ལ་བཏགས་པའི་མཛེས་ཆས་ཤིག་རེད་སྙམ། ཞིབ་ཏུ་བལྟས་དུས། དེ་ནི་མཛེས་ཆས་ཤིག་གཏན་ནས་མ་ཡིན་པར། གས་སྲུབས་ཀྱི་བར་གསེང་ནས་མུན་ནག་ནང་ལ་འཕྲོ་ཡོང་བའི་ཉི་འོད་ལྟ་བུའམ་ཆར་རྗེས་ཀྱི་འཇའ་ཚོན་ལྟ་བུ་ཞིག་རེད། དེ་ནི་དངོས་སུ་མཐོང་རྒྱུ་ཡོད་མོད།ལག་པས་འཛིན་ཐུབ་པའི་རིགས་སུ་མི་ཐེ། ཨ་ཡིག་དཀར་པོ་དེ་དྭངས་ཤིང་གསལ་བར་མོའི་མགོ་ཐོག་ན་གྱེན་ལ་འགྲེང་འདུག

　　ཉིན་འགའ་འགོར་རྗེས། མོས་ལག་ལ《དུང་ཟླ་དང་དུང་ཙེ་དྲུག》ཅེས་པའི་སྒྲུང་དེབ་དེ་བཟུང་ནས་ང་རང་འཚོལ་དུ་ཐོན་བྱུང་།

　　“ངོ་མ་བཀའ་དྲིན་ཆེ། དེབ་འདི་ཧ་ཅང་ཡག་བྱུང་།”ཞེས་བཤད་ཞོར། ལག་ནང་གི་སྒྲུང་དེབ་དེ་ང་ལ་གཏད།ངས་སྒྲུང་དེབ་དེ་ལེན་ཞོར“བཀླགས་ཚར་རམ།མགྱོགས་པ་ལ།”ཞེས་ཧ་ལས་པའི་ཉམས་ཀྱིས་བཤད་པ་ཡིན། སེམས་སུ་མོའི་དཔེ་ཀློག་གི་འགྲོས་ཚད་ཅི་འདྲའི་མགྱོགས་པ་ལ།རང་ལས་ལྡབ་འགྱུར་གྱིས་མགྱོགས་འདུག་སྙམ་ནས་ཡིད་སྨོན་ཞིག་ཀྱང་ཤོར།

　　“ཁ་སང་ནས་བཀླགས་གྲུབ་མོད།ཁ་སང་ང་རང་དཔེ་མཛོད་ཁང་ལ་མ་ཡོང་བས། ཁྱོད་དང་མ་ཕྲད།”ཅེས་བཤད་བྱུང་།

　　ངས་དང་ཐོག་དེབ་འདི་ཀློག་དུས་ཕལ་ཆེར་བདུན་ཕྲག་གཅིག་གི་དུས་ཚོད་སྤྱད་ནས་བཀླགས་ཚར་བ་ཡིན། ངས་མོ་ལ“མྱུར་མོར་བཀླགས་ཚར་འདུགདཔེ་ཀློག་གི་འདུ་ཤེས་དྲག་པ་ཚོ་གཞན་དང་མི་འདྲ”ཞེས་ངོ་བསྟོད་བྱས་པ་ཡིན།

　　“ག་ལ་ཡིན། ག་ལ་ཡིན།”ཞེས་བཤད་ཞོར་མོ་རང་གད་མོ་ལྷུག་ལྷུག་ཏུ་བགད་བྱུང་།དེ་དུས་མོ་རང་སྙིང་རྗེ་མོ་ཞེ་དྲག་ཡོད། ངེད་གཉིས་ཁ་བརྡ་ལ་གཡེང་བས་སྐད་མཐོན་པོ་ཕྱིན་པ་ཡང་མ་ཚོར། མཉམ་འཇོག་བྱེད་དུས་གཡས་གཡོན་མདུན་རྒྱབ་ཀྱི་སློབ་མ་ཚོས་སུན་སྣང་གི་སྒོ་ནས་ངེད་གཉིས་ལ་མིག་ཅེར་རེར་བལྟས་འདུག མིག་མདངས་ལས་ཁོང་ཚོའི་དཔེ་གཟིགས་ལ་བར་ཆད་བཟོས་པའི་འཁང་ར་ཞིག་མངོན་པར་བྱེད། ང་རང་གིས་ཕྱོགས་གཅིག་ནས་བུ་མོ་ཁོང་ལ་ཁ་བརྡ་བྱེད་པའི་བྲེད་ཤ་དང་། ཕྱོགས་གཞན་ནས་སློབ་གྲོགས་ཚོའི་དཔེ་གཟིགས་ཀྱི་ལྷིང་འཇགས་དཀྲོགས་པའི་འཚབ་སྣང་གཉིས་སྐྱ་འཐབ་པའི་ཚུལ་གྱིས་ལུས་སེམས་གཉིས་ཀ་བློང་བློང་པོར་གྱུར། མོས་མི་མང་པོ་ཞིག་དགའ་བོ་མེད་པར་མཐོང་བས། ལྕེ་སྣར་ཞིག་བྱས་ཏེ་སྐད་མགོ་དམའ་མོས“ང་འགྲོ་ནི་ཡིན”ཞེས་བཤད་ཞོར་ང་ལ་གྱེས་བརྡ་བཏང་སྟེ་བུད་སོང་།

　　ངས་མོ་ལ《དུང་ཟླ་དང་དུང་ཙེ་དྲུག》ཅེས་པའི་སྒྲུང་དེབ་དེ་གཡར་བ་ནས་བཟུང་། ངེད་གཉིས་ངོ་ཤེས་སུ་ཆགས་སོང་། གྲོགས་པོར་ཆགས་པ་ཡིན་ཞེས་བཤད་ཀྱང་ཆོག་པ་འདྲ། ལན་རེར་ངེད་གཉིས་དཔེ་མཛོད་ཁང་གི་གྲུ་ག་ཞིག་ནས་ཕྲད་ཡོང་ལ། གྲོགས་པོ་རྙིང་བ་ཞིག་ལྟར། ཕན་ཚུན་ལ་འཚམས་འདྲི་བྱས་པ་ཡིན་ལ། མ་བགྲོས་རང་མཐུན་ངང་ཕན་ཚུན་ལ་ལག་བརྡ་བྱེད་པ་དང་འཛུམ་མདངས་བསྟན་པ་ཡིན། ངེད་གཉིས་སློབ་གླིང་མི་གཅིག་པས།དུས་རྒྱུན་དུ་ཕྲད་མི་སྲིད་མོད།མོ་རང་སྔར་བཞིན་དཔེ་མཛོད་ཁང་ལ་འོང་བཞིན་འདུག་པས།ལན་རེར་ངེད་གཉིས་དཔེ་མཛོད་ཁང་ནས་ཕྲད་སྲིད།

　　ཉིན་དེར་ངས་མོའི་མགོ་ཐོག་གི་ཨ་ཡིག་དཀར་པོ་དེ་མཐོང་རྗེས།མུ་མཐུད་དུ་སེམས་རྣལ་ལ་ཕབ་ནས་དཔེ་ཆ་ཀློག་འདོད་མ་སྐྱེས་ལ།དར་ལུང་རྣ་བའི་བུ་ག་ལ་རྒྱུ་བའི་གླུ་གཞས་དེ་ལ་ཡང་སེམས་གཏད་ནས་ཉན་འདོད་མ་བྱུང་།ཨ་ཡིག་དཀར་པོ་དེ་ཅི་ཞིག་ཡིན་ནམ་སྙམ་ནས་སྡོམ་གྱི་དྲྭ་རྒྱ་ལྟ་བུའི་བསམ་གཞིག་ཁྲོད་ཚུད་ཅིང་།རྒྱུན་ལྡན་མིན་པའི་སྣང་བརྙན་འདི་སྐད་ཅིག་ཉིད་བློ་ཡིད་ལ་ཤོང་མ་ཐུབ་པར་མཚར་སྣང་ཆེན་པོ་སྐྱེས།ལན་རེར་རང་ཉིད་ལ་མིག་འཁྲུལ་བྱུང་ངམ་སྙམ་ནས་ཐེ་ཚོམ་བྱས་མོད། གཟུགས་འཛིན་གྱི་མིག་དང་དྲན་འཛིན་གྱི་སེམས་གཉིས་ཀས་ང་ལ་དེ་ནི་འཁྲུལ་སྣང་ཞིག་མིན་པར་མངོན་སུམ་དུ་སྣང་བ་བདེན་དཔང་བྱས།དགོང་མོར་ཕྱིར་མལ་ཁང་ལ་སླེབས་རྗེས། ངས་མལ་གྲོགས་ཚོར་ངོ་མཚར་བའི་སྣང་ཚུལ་དེ་བཤད་པ་ཡིན།འོན་ཀྱང་ཁོ་ཚོ་གཏན་ནས་ང་ལ་ཡིད་ཆེས་ཀྱིན་མི་འདུག

　　“ངས་དེ་རིང་བུ་མོ་ཞིག་གི་མགོ་ཐོག་ན་ཨ་ཡིག་ཅིག་ཤར་འདུག་པ་མཐོང་།ངོ་མ་ཟེར་བ་ཡིན”ཞེས་རྟིང་གནོན་བྱས་ཏེ་བཤད།

　　“དེ་ན་ངའི་མགོ་ན། ཧ་ཡིག་ཡོད་དམ་ཨ་ཡིག་ཡོད།”ཅེས་བཤད་ཞོར།བཀྲ་ཤིས་ཀྱིས་མགོ་བོ་ངའི་མདུན་ལ་བསྲིངས་ནས་ང་ལ་ཀུ་རེ་བརྩེས་བྱུང་།ལ་ལས་ང་ལ“སྙན་ངག་པའི་སྐད་ཆ་ནི་སྒྱུ་རྩལ་གྱིས་ཕྱུག་པ་ཞིག་རེད”ཅེས་བཤད་ཅིང་།ལ་ལས“ངས་ཀྱང་བུ་མོ་ཚོའི་ལུས་སྟེང་ནས་ཨ་ཡིག་མཐོང་མྱོང་། གཅིག་གིས་མི་ཚད་གཉིས་མཐོང་མྱོང་། བྲང་ངོས་ན་ཨ་ཡིག་ལོག་ལོག་གཉིས་འདུག”ཅེས་ཁ་བཙོག་བཤད་བྱུང་། ངས་སྙན་ངག་ཐར་ཐོར་རེ་ཡང་འབྲི་མྱོང་བས།སློབ་གྲོགས་ལ་ལས་ངའི་མིང་ནས་མི་འབོད་པར་ཐད་ཀར“སྙན་ངག་པ”ཞེས་འབོད། བསྟོད་བསྔགས་དང་ཟུར་ཟ་གང་ཡིན་ཡང་། ངས་དེ་ལ་དོ་སྣང་ཆེན་པོ་བྱེད་ཀྱིན་མེད།དང་ཐོག་ཅུང་མི་ལོབས་མོད།རྗེས་ནས་འབོད་གྲངས་ཀྱང་མང་བས་ང་ཡང“སྙན་ངག་པ”ཞེས་པའི་ཆོ་ལོ་འདིར་གོམས་པར་གྱུར་ཏེ། ཁོ་ཚོས“སྙན་ངག་པ”ཞེས་འབོད་དུས་ངས་ཀྱང“ཨོ” དང“ཨུན”ཞེས་ཨ་ལན་བྱིན་པ་ཡིན།

　　“ཡུམ། ངས་རྫུན་བཤད་ཀྱིན་མེད། ངོ་མ་ཨ་ཡིག་ཅིག་མཐོང་སོང”ཞེས་བདེན་ཅོག་ཅོག་གིས་བཤད་པ་ཡིན། མཐར་ང་རང་འུ་ཐུག་ནས“ཡུམ་དུམ་པ་བཅུ་གཉིས”ཞེས་མནའ་ཚིག་གིས་བསྒྲུབས་པ་ཡིན།དེ་དུས་བཀྲ་ཤིས་ཀྱིས་ཀུ་རེ་རྩེ་མཚམས་བཞག་ནས“བུ་མོ་དེ་སུ་རེད”ཅེས་དྲིས་བྱུང་།

　　“མིང་མི་ཤེས།དེ་རིང་དཔེ་མཛོད་ཁང་ནས་མཐོང་བ་ཡིན”ཞེས་བཤད་པ་ན།ལ་ལ་ཞིག་ད་དུང་ཡང་ང་ལ་ཡིད་མི་ཆེས་པར་རྫུན་ལབ་ཀྱིན་འདུག་སྙམ་ནས་ང་ལ་ཁ་ཡ་མི་བྱེད་པར་ཉལ། ལ་ལ་ཞིག་གིས“ང་ཚོ་སང་ཉིན་ལྟ་བར་འགྲོ”ཞེས་ལན་སྟབས་བདེ་ཞིག་བྱིན། ང་དང་དཔལ་མོ་གཉིས་ཀྱིས་དང་ཐོག་རོགས་ཐུག་རྒྱག་དུས། ངས་ཀྱང་དཔལ་མོ་ལ། དང་ཐོག་ཁྱོད་རང་མཐོང་དུས་ཁྱོད་ཀྱི་མགོ་ཐོག་ནས་ཨ་ཡིག་དཀར་པོ་ཞིག་མཐོང་སོང་ཞེས་བཤད་མོད། མོས་ཡིན་མིན་གང་ཡང་མི་བཤད་པར་གད་མོ་ལྷུག་ལྷུག་ཏུ་བགད་བྱུང་།

　　སློབ་སྐབས་དེའི་མཇུག་རྫོགས་ལ་ཉེ་སྐབས། དཔལ་མོ་དང་ངེད་གཉིས་ཀྱིས་ད་གཟོད་སྐད་འཕྲིན་སྦྲེལ་བ་ཡིན། ངས་དཔལ་མོའི་སྐད་འཕྲིན་སྦྲེལ་འདོད་ནས་ཡུན་རིང་འགོར་ཡོད་མོད། གོ་སྐབས་འོས་འཚམ་ཞིག་མ་བྱུང་ལ། རང་ནི་བུ་མོ་ཚོའི་མདུན་ནས་བག་འཁུམས་ཏེ་སྡོད་པའི་རིགས་ཡིན་པས། སྤོབས་པ་བསྐྱེད་ནས་སྐད་འཕྲིན་སྦྲེལ་རོགས་ཞེས་ཟེར་མ་ཕོད།དབྱར་གནང་མ་བཏང་བའི་སྔོན་ལ་ངས་ལག་ཏུ་འཕྲིན་ཡིག་ཅིག་འབྱོར།དཔལ་མོ་དང་ངེད་གཉིས་ཀྱི་གཏམ་རྒྱུད་ཀྱི་དབུ་ཁྱུད་ཀྱང་འདི་ནས་བྲིས་པ་ཡིན། ཉིན་དེར་ངས་ཇ་ཕོར་ནང་ཆུ་ཁོལ་ཚ་མོ་ཞིག་ལེན་དུ་སོང་ནས་ཕྱིར་སླེབས་དུས།ངའི་མདུན་ཅོག་ཐོག་གི་སྒྲུང་དེབ《འབྲེལ་བ་མེད་པའི་མི》ཞེས་པའི་བར་ལ་ཤོག་ལྷེ་གཅིག་ཁུག་ལྟེབ་བྱས་ནས་བཞག་འདུག

　　གྲོགས་པོ་ཁམས་བཟང་།

　　གུས་མོ་ནི་ཡར་སྔོན་ཁྱོད་ལ་དཔེ་དེབ་གཡོར་མཁན་གྱི་བུ་མོ་དེ་ཡིན། ཁྱོད་ཀྱིས་ནམ་རྒྱུན་དཔེ་ཀློག་ཐུབ་ཀྱིན་འདུག་པས། སྔ་མོ་ནས་ཡི་རང་གནང་གིན་ཡོད།ང་ཡང་དཔེ་ཀློག་དང་རྩོམ་འབྲི་ལ་དགའ་བོ་ཡོད། ཉེ་བའི་ཟླ་གཅིག་གི་ནང་ངས་ལོ་རྒྱུས་གཡུ་ཡི་ཕྲེང་བའི་སྟོད་ཆ་ཀློག་མགོ་བརྩམས་པ་ཡིན། འོན་ཀྱང་བཀླགས་ནས་ཤོག་ངོས་མང་པོ་མི་འགོར་བར་ལུས་སེམས་ངལ་དུབ་ཀྱིས་མནར་ཡོང་། ངས་རྒྱུན་དུ་སྒྲུང་དེབ་གཅིག་དང་སྦྲགས་ནས་ཀློག་གིན་ཡོད།ང་ལ་མཚོན་ན་ལོ་རྒྱུས་དང་རྣམ་ཐར།རྟོགས་བརྗོད།རང་རྣམ་སོགས་ཀྱི་དེབ་དག་ཀློག་རྒྱུར་དཀའ་མོ་འདུགཁྱེད་ཀྱིས་ང་ལ་དཔེ་ཀློག་གི་ཐབས་ཤེས་སླ་མོ་ཞིག་བཤད་ན་ཆོག་གམ། ལོ་འདིའི་དབྱར་གནང་བསླེབ་ལ་ཉེ་བས། སྒྲུང་དེབ་ཁ་ཤས་བཀླག་འཆར་ཡོད། གྲོགས་པོ་ཁྱེད་ཀྱིས་ང་ལ་སྒྲུང་དེབ་ཡག་པོ་འགའ་འོས་སྦྱོར་བྱ་རོགས།ངས་ནམ་རྒྱུན་ཁྱེད་ཀྱི་མདུན་ཅོག་ངོས་ལ་མཉམ་འཇོག་བྱས་པས་ཁྱོད་ཀྱིས་སྒྲུང་དེབ་ཡག་པོ་རྐྱང་རྐྱང་ཀློག་གིན་འདུག དེ་བས་ཅིས་ཀྱང་སྒྲུང་དེབ་ཡག་ཤོས་འགའ་འོས་སྦྱོར་གནང་རོགས། ཁྱེད་རང་སྟབས་བདེ་བོ་ཡོན་ན་ངའི་སྐད་འཕྲིན་སྦྲེལ་རོགས།

　　ངས་དབུགས་ཐེངས་གཅིག་གིས་མོའི་འཕྲིན་ཡིག་བཀླགས་རྗེས། དེ་མ་ཐག་དགའ་སྣང་ཆེན་པོས་མོའི་སྐད་འཕྲིན་སྦྲེལ་བ་ཡིན། མོའི་དྲྭ་མིང་ལ་རྨས་མ་ཞེས་བོད་ཡིག་གི་མིང་བཏགས་འདུག

　　“སུ་ཡིན།”

　　“ང་ཡིན། ཁྱོད་ལ་དཔེ་ཆ་གཡོར་མཁན་དེ་ཡིན།”ཞེས་གསལ་བཤད་བྱས་པ་ཡིན།

　　“ངས་ཀྱང་ཁྱོད་ཡིན་རྒྱུ་རེད་བསམ་ཡོད།”

　　“ཁྱོད་ཀྱིས་ངའི་སྐད་འཕྲིན་ལ་བསྒུགས་ཡོད་དམ།”ཞེས་བཤད་པ་ཡིན། འོན་ཀྱང་མོས་ཐད་ཀར་ང་ལ་ལན་མ་བྱིན་པར། འགུལ་རིས་སྙིང་རྗེ་མོ་ཞིག་བསྐུར་བྱུང་། ཉིན་དེར་ངས་དཔེ་མཛོད་ཁང་ནས་ཡུན་རིང་ཞིག་ལ་ཁ་པར་ཕུར་ནས་བསྡད་པ་ཡིན། མོས་ང་ལ་སྒྲུང་དེབ་ཡག་ཤོས་འགའ་ངོ་སྤྲོད་ཟེར་བས། ངས་ལྷ་བྱམས་རྒྱལ་གྱི་བརྩམས་ཆོས་དག་ངོ་སྤྲད་མོད། མོས་ཆ་ཚང་བཀླགས་གྲུབ་འདུག མཐར་William Somerset Maughamདང Albert Camusཀྱི་བརྩམས་སྒྲུང་ཁ་ཤས་ངོ་སྤྲད་པ་ཡིན། རྒྱུ་མཚན། སྐབས་ཐོག་དེ་ཏག་ཏག་ལ་ངས་ཁོང་གཉིས་ཀྱི་སྒྲུང་དེབ་ཁ་ཤས་བཀླགས་གྲུབ་པ་མ་ཟད།ཁོ་གཉིས་ཀྱི་རྩོམ་གཤིས་ལ་ཡང་དགའ་བོ་ཆགས་ཡོད།དེ་མིན་སྒྲུང་དེབ་གྲགས་ཅན་ཁ་ཤས་ཀྱང་ངོ་སྤྲད་པ་ཡིན། 《གདོང་འབོག》དང《ལོ་བརྒྱའི་ཁེར་རྐྱང》ཞེས་པའི་སྒྲུང་དེབ་གཉིས་མོ་ལ་གཡར་རྒྱུའི་ཁས་ལེན་ཡང་བྱས་པ་ཡིན།ངེད་གཉིས་ཀྱིས་ཁ་བརྡ་གློད་དེ་ཏབ་ཅིག་འགོར་རྗེས། ངས་མོའི་མིང་འདྲི་རྒྱུ་བརྗེད་པ་དྲན་ནས“ཁྱོད་ཀྱི་མིང་ལ་ཅི་ཟེར། རང་ཉིད་ངོ་སྤྲོད་ཅིག་གནང་རོགས”ཞེས་བཤད་པ་ཡིན།

　　“ངའི་མིང་ལ་དཔལ་མོ་ཟེར། ཕ་ཡུལ་ནང་ཆེན་གྱི་ཡིན།”

　　“ཁྱོད་ལོ་རིམ་དུ་བའི་ཡིན།”

　　“ཁྱོད་ནི་ཉེན་རྟོག་པ་ཡིན་ནམ། ཉེན་རྟོག་པས་ཉེས་དོན་རྟོག་དཔྱོད་བྱེད་པ་དང་འདྲ”ཞེས་གད་མོ་བསླངས། དེའི་མཇུག་ལ“ཨ་ལ། ཀུ་རེ་ཡིན། ང་ལོ་རིམ་གཉིས་པའི་ཡིན། ”ཞེས་ཡི་གེ་འགའ་གཏགས་ནས་བསྐུར་བྱུང་།

　　“འོ་ཡ།”ཞེས་ལན་སྟབས་བདེ་ཞིག་བྱིན་ནས་བཞག་པ་ཡིན།

　　“ཁྱོད་ཀྱིས་ཀྱང་རང་ཉིད་ངོ་སྤྲོད་གནང་རོགས།”

　　“ངའི་མིང་ལ་དོན་འགྲུབ་ཟེར”

　　“ཁྱོད་ཀྱི་མིང་ངས་སྔ་མོ་ནས་ཤེས་ཡོད།”

　　“ཁྱོད་ཀྱིས་ང་རང་རྩད་གཅོད་བྱས་སམ།”

　　“མ་བྱས། ཁྱོད་ཀྱི་མིང་འབྲི་དེབ་ལས་མཐོང་བ་ཡིན།”ཞེས་བཤད་བྱུང་།

　　བཞི།

　　སློབ་གྲྭའི་དབྱར་གནང་བཏང་རྗེས། ངེད་གཉིས་ཀྱིས་སྔར་བཞིན་ཁ་པར་འབྲེལ་ལམ་བརྒྱུད་ནས་ཁ་བརྡ་བྱས་ཤིང་། དུས་རྒྱུན་འཕྲིན་སྟེགས་ཁག་གི་སྙན་ངག་དང་སྒྲུང་གཏམ་སོགས་ཕན་ཚུན་ལ་བརྒྱུད་བསྐུར་དང་འོས་སྦྱོར་བྱས་པ་ཡིན། ལན་རེར་རྩོམ་ཡིག་ཐུང་ངུ་རེ་ལ་རང་ཉིད་ཀྱི་བཀླགས་ཚོར་ཡང་གླེང་བ་ཡོད། གུང་གསེང་ཚར་རྗེས་ངེད་གཉིས་ཀྱིས་ངོ་ཐུག་རྒྱུའི་དུས་བཅད་བྱས་པ་ཡིན། དུས་ཚོད་ནི་རྟ་ཕོ་སྲབ་མེད་ཅིག་ལ་གཤོག་པ་ཐོགས་པ་ནང་བཞིན་ཁད་ཀྱིས་འདས་སོང་། ངེད་གཉིས་ཕྲད་དུས་ཕྱི་དྲོ་ཞིག་ཡིན། ཉི་མ་ནུབ་རིར་ཡལ་ནས། ནུབ་ཕྱོགས་ཀྱི་རི་ཟོམ་དང་ཁང་རྩེག་མཐོན་པོ་དག་གི་སྟེང་ན་ལུས་པའི་ཉི་མའི་རྗེས་ཤུལ་གྱི་འོད་སྣང་དེ་དག་ཡང་ཇེ་གཉོམ་དང་ཇེ་ཆུང་ལ་སོང་བས་རིམ་གྱིས་ས་རུབ་སྟེ་རྒྱང་མིག་ཆད།ངས་དཔེ་མཛོད་ཁང་གི་མདུན་ནས་མོ་རང་ཏབ་ཅིག་ལ་བསྒུགས་རྗེས། མོ་རང་གཞི་ནས་སླེབས་བྱུང་། ངའི་སེམས་སུ་གལ་ཏེ་ང་རང་མིག་འཁྲུལ་བ་མིན་ཚེ། དེ་རིང་ཡང་དཔལ་མོའི་མགོ་ཐོག་གི་ཨ་ཡིག་དེ་མཐོང་ངེས་སྙམ། ཨ་ཡིག་འདི་ཅི་ཡིན་གྱི་གཏམ་རྒྱུད་ཁ་གསལ་མོ་ཞིག་མོ་ལ་འདྲི་དགོས་སྙམ།

　　མོས“སྒུག་ཡུན་རིང་སོང་། དཀའ་བྱུང་ངམ།”ཞེས་ཚུར་ང་ལ་འཚམས་འདྲི་བྱས་བྱུང་།

　　ངས“མ་དཀའ་ཐལ། མ་དཀའ་ཐལ།”ཞེས་བཤད་ཞོར། མོའི་མགོ་ཐོག་གི་ཨ་ཡིག་དེ་ཡོད་མེད་ལ་བལྟས་པ་ཡིན། མོས་ངས་འཛེམ་དོགས་སྤུ་ཙམ་མེད་པར་མོ་ལ་ཅེར་བསྡད་པས། གདོང་དམར་པོར་གྱུར་ཏེ་མགོ་བོ་སྒུར། མོའི་བྱ་སྤྱོད་དེས་ང་ཡང་ཡུལ་ཡུལ་པོར་བཏང་བྱུང་། ངས་བསམ་གཟས་ནས་མོ་ལ་བལྟས་འདུག་པ་ལྟ་བུའི་ཚོར་བ་ཞིག་སྟེར་བས། ང་ཡང་དོགས་མི་བདེ་བར་བཏང་།

　　“ངས་ཁྱོད་ཀྱི་མགོ་ཐོག་གི་ཨ་ཡིག་དེ་འཚོལ་བཞིན་ཡོད། དེ་དུས་ཁྱོད་ཀྱིས་ངའི་ལག་ནས་དཔེ་ཆ་གཡོར་དུས། ངས་ཁྱོད་ཀྱི་མགོ་ཐོག་ཏུ་ཨ་ཡིག་དཀར་པོ་ཞིག་ཤར་ཡོད་པ་མཐོང་། དེ་རིང་རིག་རྒྱུ་མི་འདུག”ཅེས་གསལ་ཁ་ཆོད་པའི་སྒོ་ནས་དྲང་མོར་བཤད་པ་ཡིན།

　　མོས་ང་ལ་ལན་མི་འདེབས་པར་གད་མོ་ལྷུག་ལྷུག་ཏུ་བགད་བྱུང་།

　　“ཅི་རེད”ངས་ཧ་མ་གོ་བར་འདི་ལྟར་དྲིས་པ་ཡིན།

　　“གཞན་པས་ཁྱོད་ཀྱི་གདོང་ན་མེ་ཏོག་བཞད་འདུག་ལྟ་བུའི་རྫུན་ལབ་སྟེ་ཀུ་རེ་བྱེད་པ་རེད། མགོ་ཐོག་ན་ཨ་ཡིག་ཤར་འདུག་ཅེས་པའི་ཀུ་རེ་འདི་ངས་ཐེངས་དང་པོར་གོ་བ་ཡིན།”ཞེས་གད་མོ་ལྷུག་ལྷུག་ཏུ་བགད་བྱུང་།ང་ཡང་མོ་དང་མཉམ་པོར་བགད་པ་ཡིན།དང་ཐོག་མོས་ང་ལ་དཔེ་ཆ་གཡོར་དུས།ངས་ཨ་ཡིག་དཀར་པོ་དེ་མཐོང་སོང་། ངོ་མ་མཐོང་སོང་། འོན་ཀྱང་དེའི་རྗེས་ནས་མཐོང་རྒྱུ་མི་འདུག ལྷག་པར་དེ་རིང་མོ་དང་ཉེ་བར་བཅར་ནས་གཟབ་ནན་ངང་ཨ་ཡིག་དེ་བཙལ་བ་ཡིན་མོད། གཏན་ནས་མ་རྙེད།མལ་གྲོགས་ཚོས་ང་ལ་ཡིད་ཆེས་མི་བྱེད་ལ།དཔལ་མོ་རང་གིས་ཀྱང་མོའི་མགོ་ཐོག་ན་ཨ་ཡིག་ཅིག་ཡོད་པ་གཏན་ནས་ཤེས་ཀྱིན་མི་འདུག ཉིན་དེར་ང་རང་མིག་འཁྲུལ་བྱུང་བའམ་ཡང་ན་རང་ཉིད་ཀྱིས་ཨ་ཡིག་དཀར་པོ་ཞིག་རྟོག་བཟོ་བྱས་པ་ཡིན་མིན་སོགས་ལ་རང་ཉིད་ཀྱང་ཐེ་ཚོམ་སྐྱེས་བྱུང་། ངས་དཔལ་མོ་ལ་མུ་མཐུད་དུ་ཨ་ཡིག་དཀར་པོ་དེའི་སྐོར་མ་གླེང་བར། གདོང་ན་མེ་ཏོག་བཞད་པའི་དགོད་གཏམ་དེ་ཁས་ལེན་བྱས་པའི་ཚུལ་གྱིས་མོ་དང་མཉམ་པོར་བགད།དགོང་མོ་དེར་དཔལ་མོ་དང་ངེད་གཉིས་དཔེ་མཛོད་ཁང་གི་སྒོ་ནས་རྐང་རྩེད་སྤོ་ལོའི་ར་བ་ལ་ཕྱིན་པ་དང་། རྐང་རྩེད་སྤོ་ལོའི་ར་བ་ལ་ཡང་སྐོར་བ་མང་པོ་བརྒྱབ།སྔ་རྗེས་སུ་མོས་ང་དང་ཁ་བརྡ་དེ་འདྲ་མི་བྱེད་ལ། ལན་རེར་ལྐུགས་པའི་བརྟུལ་ཞུགས་འཛིན། ང་དང་ཉེ་བར་ཡང་མི་གཅར་པར་དོགས་ཟོན་གྱིས་ཚུལ་དུ་ང་དང་གོམ་པ་གང་གི་ས་ནས་མགོ་བོ་བསྒུར་ཏེ་འགྲོ། མོའི་གདོང་ལ་སྐག་རྫས་ཉུང་ཙམ་དང་མཆུ་རྩི་ཡང་ཉུང་ཙམ་བྱུགས་འདུག ཁོག་སྨད་ལ་རྫི་དོར་ལྷུག་ལྷུག་ཅིག་གྱོན་པའི་འོག་ལ་ལྷམ་དཀར་པོ་ཞིག་གོན་ཞིང་། ཁོག་སྟོད་ལ་ཕུ་མེད་ཀྱི་ནང་གོས་དཀར་པོ་ཞིག་གི་ཐོག་ལ་ཕྱི་གོས་ནག་པོ་ཞིག་གོན་འདུག སྐྲ་ནི་ལྷོ་ཁོ་རེ་ཡའི་བུ་མོ་ཚོའི་སྐྲ་ཚུགས་ལྟར་བཏོད་མི་འདུག་པར།མགོ་ལྟག་ནས་བསྡམས་ཏེ་ཐུར་བསྣར་ཡོད་ལ། དེ་ནི་མཐོ་འབྲིང་སློབ་མ་ཞིག་གི་རྣམ་པ་དང་འདྲ་ཞིང་ཤ་ཚ་མོ་ཡོད། མོའི་གཟུགས་པོའི་རིང་ཚད་ཕལ་ཆེར་ང་དང་མཉམ་ལ། བུ་མོ་ཚོ་ལས་གཟུགས་པོ་ཅུང་རིང་བའི་གྲས་སུ་ཐེ་ཁོ་ཐག་རེད། ཐེངས་དང་པོར་ངེད་གཉིས་ཀྱིས་འདི་ལྟར་རོགས་ཐུག་བརྒྱབ་སྟེ་སློབ་རའི་ནང་གི་ཆེས་རྣམ་དག་གི་བརྩེ་དུང་གི་གཏམ་རྒྱུད་ཅིག་ལ་བློས་བསླངས་བྱས་པ་ཡིན། ལོ་དེར་དུས་ཚོད་ནི་ནར་མ་སོན་པའི་བྱིས་པ་ཞིག་གི་རྐང་བ་རྡོ་ལ་ཐོགས་པ་ནང་བཞིན། དཔེ་མཛོད་ཁང་དང་། ཟ་ཁང་། སྤོ་ལོ་ཐང་། མེ་ཏོག་ལྡུམ་ར། སློབ་གྲྭའི་སྒོ་ཁའི་ཆུ་འགྲམ། ཇ་ཁང་དང་འཚིག་ཇ་ཁང་བཅས་སུ་ཁ་སྦུབས་སུ་ཡང་ཡང་འགྱེལ། དེ་དུས་སློབ་རའི་མཐའ་ཁ་ཐག་ཉེ་ཡི་མཁའ་དབུགས་ལ་བརྩེ་དུང་གི་ཕྱི་ཐག་དང་ཁྲེལ་གཞུང་གི་དྲི་བསུང་ཐུལ། དཔལ་མོ་དང་ངེད་གཉིས་ཀྱིས་ལག་པས་ལག་པར་འཇུས། སེམས་པས་སེམས་པར་གླན། ངེད་གཉིས་ནི་གཤོག་པ་ཐོགས་པའི་རྐང་དྲུག་གཉིས་དང་འདྲ་བར་གཅིག་རྗེས་གཅིག་གིས་བསྙེགས་ཏེ་མཁའ་ནས་འཕུར་ལྡིང་བྱས།

　　ལྔ།

　　དགོང་མོ་དེར་ང་རང་གཏན་ནས་གཉིད་མ་ཁུག ངས་དཔལ་མོའི་མགོ་ཐོག་གི་ཨ་ཡིག་ནག་པོ་དེ་དྲན་ཞོར་དཔལ་མོ་ངེད་གཉིས་ཀྱི་འདས་ཟིན་པའི་གཏམ་རྒྱུད་དག་ལ་བསྙེལ་གསོ་བྱས། ངའི་དྲན་ངོགས་ཀྱི་དཔལ་མོ་དང་དེ་རིང་ངོ་ཕྲད་པའི་དཔལ་མོ་གཉིས་གཏན་ནས་མི་གཅིག་གི་ཐོག་ལ་འབབ་མི་འདུག སྐད་ཆ་བཤད་སྟངས་དང་གོན་པ་གྱོན་ལུགས་སོགས་གང་གི་ཐད་ནས་བལྟས་རུང་ངས་མོ་དཔལ་མོ་ཡིན་པ་གཏན་ནས་ཁས་ལེན་བྱ་ཐབས་བྲལ། ངེད་གཉིས་དང་ཐོག་འཕྲད་དུས། ངས་མོའི་མགོ་ཐོག་ནས་ཨ་ཡིག་དཀར་པོ་ཞིག་མཐོང་མྱོང་། རྗེས་ནས་བསྐྱར་དུ་མཐོང་རྒྱུ་མ་ཡོད་ལ། གྲོགས་པོ་ཚོས་ཀྱང་ངས་རྫུན་ལབ་ཀྱིན་འདུག་སྙམ་པས་ངས་རང་ཉིད་ལ་མིག་འཁྲུལ་བྱུང་སོང་སྙམ་མོད། དེ་རིང་ཡང་བསྐྱར་དཔལ་མོའི་མགོ་ཐོག་གི་ཨ་ཡིག་མཐོང་བས། ངའི་དྲན་ངོས་ལ་དང་ཐོག་མོ་རང་མཐོང་དུས་ཀྱི་ཨ་ཡིག་དེ་དྲན་གསོ་བྱས་བྱུང་། དེ་བས་དེ་དུས་ངས་མཐོང་བའི་ཨ་ཡིག་དེ་ནི་རང་ཉིད་ལ་མིག་འཁྲུལ་བྱུང་ནས་མཐོང་བ་ཞིག་མིན་པར་ར་སྤྲད། དང་ཐོག་དཔལ་མོའི་མགོ་ཐོག་གི་ཨ་ཡིག་དེ་ནི་དཀར་ཞིང་གསལ་བ། ནག་ནོག་དང་མི་གཙང་བ་སོགས་གང་ཡང་མེད་པ་ཞིག་ཡིན་པ་དྲན་མོད། དེ་རིང་དེའི་མདོག་ནག་པོར་གྱུར་འདུག ངས་དེ་ལྟར་མལ་སའི་ནང་ནས་ལུས་པོ་གཡས་གཅུ་གཡོན་གཅུས་བྱེད་ཞོར་ཨ་ཡིག་ནག་པོ་དང་དཀར་པོ་གཉིས་ལ་འབྲེལ་བ་ཅི་ཞིག་ཡོད་མིན་ལ་འདང་བརྒྱབ་པ་ཡིན། དེ་ནི་རྩིས་འབྲས་ཐོབ་དཀའ་བའི་གྲངས་རིག་གི་རྩིས་ཕྲེང་ཞིག་དང་འདྲ་བར་མགོ་ན་བར་བྱེད།ཨ་ཡིག་དེ་ང་མ་གཏོགས་གཞན་གྱིས་མཐོང་མི་ཐུབ་པ་ཅི་ཡིན་ནམ་སྙམ། ཐ་ན་དཔལ་མོ་རང་གིས་ཀྱང་མོའི་མགོ་ཐོག་ན་ཨ་ཡིག་ཅིག་ཡོད་པ་ཤེས་ཀྱིན་མི་འདུག བློ་ངོར་ཤོང་དཀའ་བའི་སྣང་ཚུལ་དེ་དག་གིས་སྡོམ་གྱི་དྲ་རྒྱ་ལྟ་བུ་བསླེས་ཤིང་། ང་ནི་སྡོམ་རྒྱ་དེར་ཚུད་དེ་འཕག་འཚག་བརྒྱབ།

　　ཕྱི་དྲོ་བསམ་འཕེལ་ངེད་གཉིས་ཀྱིས་ཟ་མ་ཟ་སྐབས། ངས་བསམ་འཕེལ་ལ་དཔལ་མོའི་མགོ་ཐོག་གི་ཨ་ཡིག་དེ་མཐོང་མིན་དྲིས།

　　“ཁྱོད་ཀྱིས་དཔལ་མོའི་མགོ་ཐོག་གི་ཨ་ཡིག་ནག་པོ་དེ་མཐོང་བྱུང་ངམ།”

　　“དཔལ་མོ་སུ་རེད”

　　“འུ་གཉིས་ཚུར་ཡོང་སྐབས་ཕྲད་པའི་བུ་མོ་དེ་རེད།”

　　བསམ་འཕེལ་གྱིས“ཨ་ཡིག་ནག་པོ”ཞེས་མཚར་ཉམས་ཀྱི་སྒོ་ནས་འདང་ཞིག་བརྒྱབ་རྗེས། “ངས་མོའི་མགོ་ཐོག་ལ་ལྟ་རྒྱུ་བརྗེད་ནས་མོའི་ཁོག་སྨད་ཀྱི་ཨ་ཡིག་ཕྲ་མོ་གཉིས་ལ་ཧད་སོང”ཞེས་བཅོས་འཛུམ་དང་སྦགས་ནས་བཤད།

　　“ཨ།”ངས་བསམ་འཕེལ་གྱི་སྐད་ཆ་དེའི་དོན་མ་རྟོགས་པས་དྲི་བའི་ཁེངས་པའི་མིག་ཟུང་གིས་ཁོ་ལ་ཅེར་རེར་བལྟས་ཏེ། ཁོས་ཡང་བསྐྱར་གསལ་ཁ་ཆོད་པ་ཞིག་བཤད་རྒྱུ་ལ་རེ་སྒུག་བྱས་ནས་བསྡད་པ་ཡིན།

　　“དོར་ཐུང་འོག་གི་རྐང་བ་ཕྲ་མོ་གཉིས་ལ་ཟེར་བ་ཡིན།”ཞེས་གསལ་བཤད་བྱས་བྱུང་།

　　“དེ་ཤ་འབྱར་གྱི་རྐང་ཤུབས་ནག་པོ་ལས་ཨ་ཡིག་ནག་པོ་མ་རེད། ཆགས་གླང་།”ཞེས་ཁོ་ལ་མཚང་དྲུས་ནས་ཁྲོ་ཉམས་བསྟན་པ་ཡིན།

　　“དེ་ཁྱོད་ཀྱི་ཆུང་མ་ཡིན་ནམ།འཚིག་པ་དེ་འདྲ་ཟོས་ནས་ཅི་བྱེད།ཕྲག་དོག་བྱེད་ཀྱིན་ཡོད་དམ།”ཞེས་ང་ལ་ལྡོག་འདྲི་བྱས་བྱུང་། སྐད་ཆ་དེ་དག་གིས་ང་རང་ཁ་སྐྱེངས་པར་བྱས།

　　“ཕྲག་དོག་བྱེད་ཀྱིན་མེད།སྤོ་ཡང་ལང་གིན་མེད།”ཅེས་མྱུར་མོར་རང་ཉིད་ལ་དག་སེལ་བྱས་པ་ཡིན།ངས་བསམ་འགྲུབ་ཀྱིས་ཨ་ཡིག་ནག་པོ་དེ་མཐོང་ཐུབ་ཀྱིན་མེད་པ་ཤེས་རྗེས། ཡང་བསྐྱར་ཁོ་ལ་ཨ་ཡིག་ནག་པོའི་སྐོར་མ་གླེང་། ཡར་སྔོན་ཨུ་ཚུགས་བྱས་ནས་ཨ་ཡིག་མཐོང་བའི་སྐོར་བཤད་སྐབས། སློབ་གྲོགས་ཚོས་ང་ལ་ཡིད་ཆེས་མེད་པར་ངས་རྫུན་ལབ་ཀྱིན་འདུག་སྙམ་པའི་བཟོ་ལྟ་དེ་ཡང་ཡང་ངས་མིག་ལ་ཤར་བས།ཐེངས་འདིར་ངས་བདེན་པ་ལ་བརྩོན་ལེན་དང་མཐོང་སྣང་ལ་དག་སེལ་གང་ཡང་མ་བྱས།

　　“ཁྱོད་ཀྱི་གྲོགས་མོ་ནི་རྒྱ་མོ་ཞིག་དང་འདྲ་བོ་འདུག ཕྱི་ཚུལ་ནས་བོད་མོ་ཞིག་ཡིན་པ་རྦད་དེ་ཐག་གཅོད་དཀའ”

　　“སློབ་ཆེན་ཡིན་སྐབས་མོས་གྱོན་པ་འདིའི་རིགས་མི་གོན།”ཞེས་དཔལ་མོའི་ཚུལ་མཐུན་མིན་པའི་གྱོན་ལུགས་ལ་དག་སེལ་བྱས་པ་ཡིན།

　　ཉིན་དེར་དཔལ་མོས་ང་ལ་ཁ་ཡ་མ་བྱས་ན།ངས་མོ་དཔལ་མོ་ཡིན་པ་གཏན་ནས་ཤེས་རྒྱུ་མ་རེད། ངེད་གཉིས་གྱེས་པའི་ལོ་འདི་དག་གི་འཚོ་བའི་འཇམ་རྩུབ་ཁྲོད་དཔལ་མོ་དོན་དག་ཅི་ཞིག་ལ་འཕྲད་པ་དང་། འགྱུར་བ་འདི་འདྲ་ཞིག་བྱུང་རྐྱེན་ངས་མི་ཤེས་མོད། ད་ལྟའི་མོ་ནི་བསླུ་བྲིད་ཀྱི་མིག་ཟུང་གིས་སྐྱེས་པ་རྣམས་ལ་ཡིད་དགུག་ཐུབ་པ་དེའི་རིགས་རེད། གདོང་ལ་སྐག་རྫས་སྟུག་པོ་དང་མཆུ་རྩི་དམར་པོ་བྱུགས་པ་མ་ཟད། མགོ་སྐྲ་སེར་པོ་བསྒྱུར་བའི་ཁར་ཟིང་པོར་བཟོས་འདུག ཁོག་སྟོད་ལ་ནང་གོས་ཕུ་མེད་ཅིག་གྱོན་པ་དང་། དེའི་སྟེང་ལ་སྟོད་གོས་སྔོན་པོ་ཞིག་ལ་ཟྭ་སྒྲོག་མ་འཐེན་པར་གོན་འདུག ཐུང་ཞིང་སྲབ་པའི་ཕུ་མེད་ཀྱི་ནང་གོས་དཀར་པོ་དེས་མཁྲང་རྒྱས་ཀྱི་འོ་འཛིན་གཉིས་སྒྲིབ་ཐུབ་ཀྱིན་མི་འདུག་ལ། དམར་སྨུག་གི་ནུ་ཁེབས་ཀྱང་གསལ་མི་གསལ་ཞིག་མངོན་འདུག སྐེད་པའི་མཚམས་ཀྱི་ཤ་རྗེན་པར་མངོན་ཞིང་། ལུས་སྨད་དུ་དོར་ཐུང་སྐྱ་བོའི་འོག་ལ་སྐུད་པ་ཕྲ་མོས་དྲ་བ་ལྟར་སྦྲེལ་ཏེ་བཟོས་པའི་ཤ་འབྱར་ནག་པོ་ཞིག་གྱོན་འདུག་པ་དང་། དེ་དང་འཚམ་པོ་ཡོད་པའི་རྟིང་མཐོའི་ལྷམ་ནག་པོ་ཞིག་ཀྱང་གྱོན་འདུག མོའི་གཟུགས་པོ་ནི་སྤྱིར་ཐུང་རྒྱུ་མེད་པའི་ཁར་ཐེངས་འདིར་རྟིང་མཐོའི་ལྷམ་གྱོན་ཡོད་པས། གཟུགས་པོ་རིང་པོར་མངོན་འདུག མོ་ནི་སྔར་ལྟར་ལུས་ཀྱི་ཤ་རིད་པ། བྱད་བཞིན་གཅེས་པོ། དེའི་ཁར་འཛུམ་ཤེས་པའི་མིག་ཟུང་དང་མཁྲང་རྒྱས་ཀྱི་མྱོས་བུམ་ལྷེམ་ལྷེམ་འགུལ་བ་བཅས་ཀྱིས་སྐྱེས་པ་ཞིག་ཡིན་ཚེ་འདོད་པའི་སྤུ་ལོང་གཡོ་བར་བྱེད་པ་ཐེ་ཚོམ་མེད། དགོང་མོ་དེར་ངེད་གཉིས་ཀྱིས་ཁ་བརྡ་གློད་སྐབས། ངས་ཡང་བསྐྱར་ཨ་ཡིག་དེའི་སྐོར་ལ་དྲི་བ་དྲིས་པ་ཡིན།

　　“ཁྱོའི་མགོ་ཐོག་གི་ཨ་ཡིག་དེ་ཅི་ཞིག་རེད། དེའི་མདོག་ནག་པོར་གྱུར་འདུག”

　　“དང་ཐོག་ཨ་ཡིག་དཀར་པོ་ཟེར་ནས་ངའི་ལང་ཚོའི་མེ་ཏོག་སད་ཀྱིས་བཅོམས་ཤིང་། ངའི་བརྩེ་དུང་གི་ཐང་ཆེན་ལ་ཐན་པ་བཏང་། ཁྱོད་ཀྱིས་ཡང་བསྐྱར་ང་ལ་མགོ་བསྐོར་གཏོང་འདོད་པ་ཡིན་ནམ”ཞེས་འབྲེལ་མེད་ཀྱི་སྐད་ཆ་ཁ་ཤས་བཤད་ཅིང་། དང་ཐོག་ངེད་གཉིས་ཁ་ཁར་སོང་བའི་དོན་དེ་ང་ལ་ཁག་འགེལ་བྱས་བྱུང་།

　　“དེ་འདྲ་མི་ལབ་རོགས། འུ་གཉིས་ནི་དུས་ཚོད་དང་བར་ཐག་གིས་ཁ་ཁར་གྱེས་པས། བརྩེ་དུང་གི་གས་ཆག་དེ་ང་གཅིག་པོ་ལ་ཁག་འགེལ་བྱས་ན་ག་ལ་འགྲིག”ཅེས་རང་ཉིད་ལ་དག་སེལ་བྱས་པ་ཡིན།དེའི་རྗེས་ནས་ངས་ཨ་ཡིག་ནག་པོ་དེའི་སྐོར་མ་གླེང་བར། ཐད་ཀར་ཁ་བརྡ་བྱེད་ཕྱོགས་བསྒྱུར་ནས་མོ་ལ“ཉེ་ལམ་འཚོ་བ་ཅི་འདྲ་རེད། ལས་ཀ་ཅི་ཞིག་གཉེར་བཞིན་ཡོད”ཅེས་བཤད་པ་ཡིན།

　　“གསང་བ་ཡིན”ཞེས་བཤད་བྱུང་། དེའི་འཕྲོར། “ཨ་ལ་ཀུ་རེ་ཡིན། ལས་ཀ་ཡག་པོ་ཞིག་གཉེར་རྒྱུ་མ་རྙེད།གཞུང་གི་རྒྱུགས་ལ་འབད་ཞོར་རང་ཁ་གསོ་ཐབས་ཁོ་ན་བྱས་ནས་བསྡད་ཡོད“ཅེས་བཤད་བྱུང་།

　　“དེང་སང་མཐར་ཕྱིན་སློབ་མ་མང་པོ་ཞིག་གི་གནས་བབ་དེ་འདྲ་རེད། དངོས་གནས་དཀའ་མོ་རེད། ”ཅེས་མོའི་སྐད་ཆ་ལ་རྒྱབ་སྐྱོར་དང་བསམ་ཤེས་བྱས་པ་ཡིན།

　　“བདེན་པ་རང་རེད། རྒྱུགས་འཕྲོད་རྒྱུ་དེ་དངོས་གནས་དཀའ་མོ་འདུག”ཅེས་ཤུགས་རིང་འཐེན།

　　“ཁྱོད་ཀྱིས་ད་བར་སྙན་ངག་འབྲི་བཞིན་ཡོད་དམ།”

　　“སྙན་ངག་མ་བྲིས་ཡུན་རིང་འགོར་ཡོད། དུས་འདིར་སྒོར་མོ་བཙལ་རྒྱུ་ལས་གལ་ཆེན་ཞིག་མི་འདུག”ཅེས་བཤད་བྱུང་། འཕྲོར་མཐུད་ནས“སྤྱི་ཚོགས་ཐོག་ལ་ཐོན་རྗེས། སྒོར་མོའི་གལ་ཆེན་རང་བཞིན་ཤེས། སློབ་གྲྭ་ན་ཡོད་དུས་སུ་ལས་ཞུགས་ཐད་ཀྱི་དཔེ་ཆ་མང་པོ་མ་བལྟས་པར་འགྱོད་པ་སྐྱེས་བྱུང་།”ཞེས་དབུགས་ཐེངས་གཅིག་གིས་ད་ལྟའི་གནས་བབ་ལ་འུ་ཐུག་གི་སྐད་ཆ་མང་པོ་བཤད་བྱུང་།

　　“ངོ་མ་དེ་འདྲ་རེད།”ཞེས་མོའི་སྐད་ཆ་ལ་བདེན་ཁ་བྱིན།

　　“ཆེན་པོ་དང་འཇོན་པོ་བཤད་མ་བཤད་མེད། མི་ནི་མཐར་གཏུགས་ན་འཚོ་གནས་ལ་འབབ་དགོས་པ་རེད།”ཅེས་བཤད་བྱུང་།

　　“ཁྱོད་ཀྱིས་ད་དུང་སྙན་ངག་འབྲི་བཞིན་ཡོད་དམ”ཞེས་ང་ལ་དྲིས་བྱུང་།

　　“ངས་ད་དུང་གཅིག་གཉིས་ཤིག་འབྲི་ཁུལ་བྱེད་བཞིན་ཡོད་མོད། སྔོན་ལྟར་མང་པོ་འབྲི་ཐུབ་ཀྱིན་མི་འདུག”ཅེས་དྲང་མོར་བརྗོད་པ་ཡིན།

　　“ང་རང་སློབ་མཐར་ཕྱིན་རྗེས་སྙན་ངག་འབྲི་རྒྱུ་ཕར་ཞོག དཔེ་ཆ་ཞིག་ཆ་ཚང་བཀླགས་པའང་མེད”ཅེས་བཤད།

　　“ངས་ད་དུང་དཔེ་ཆ་གཅིག་གཉིས་ཤིག་ཀློག་ཁུལ་བྱས་ནས་བསྡད་ཡོད།”ཅེས་མོའི་རྒོལ་ལན་བྱིན་པ་ལྟར་ལན་ལྡོན་པ་ཡིན།

　　“ཁྱོད་ངར་བ་རེད།”ཅེས་ལན་སྟབས་བདེ་ཞིག་བྱིན་པ་ལས། ང་ལ་རྒོལ་ལན་དང་འགྲིག་མིན་གྱི་སྐད་ཆ་གང་ཡང་མ་བཤད། ངས་དཔལ་མོ་ངེད་གཉིས་སློབ་གྲྭ་ན་ཡོད་དུས་ཀྱི་སྐད་ཆ་དེ་དག་དྲན་བྱུང་། དེ་དུས་མོའི་སྣང་བ་ཨ་སྔོན་དགུང་ཡིན། ཕུགས་བསམ་དང་དགའ་ཕྱོགས་ཡོད་མཁན་ཞིག་ཀྱང་ཡིན། རྗེས་ནས་འཚོ་བ་ལ་དཀའ་ཁག་ག་འདྲ་ཡོད་ཀྱང་། མི་རྣལ་མ་ཞིག་དང་། ཕ་སྐད་མ་ཡིག་འདི་ལ་དུང་བ་བླ་ལྷག་ཡོད་མཁན་ཞིག་བྱེད་ངེས་ཡིན་ཞེས་བཤད་མྱོང་། བུ་མོ་ཚོའི་ཁྲོད་ན་དཔལ་མོ་ལྟ་བུ་ཉུང་ཉུང་རེད་བསམས་པས། ངས་སྔར་བས་ཀྱང་དཔལ་མོ་ལ་མཐོང་ཆེན་དང་ཡིད་སྨོན་བྱས་པ་ཡིན། ཡིན་ཡང་འཚོ་བ་ཟེར་བ་འདི་ནི་གཟུགས་མེད་ཀྱི་བཙན་འཛུལ་བྱེད་མཁན་ཞིག་སྟེ། དེས་ང་ཚོ་ལ་ཅི་ནུས་གང་ཐུབ་སྒོས་འཕྲོག་བཅོམ་དང་གཉའ་གནོན་བྱེད། ལོ་འདི་དག་གི་རིང་དཔལ་མོའི་གཤིས་ཀ་རྦད་དེ་འགྱུར་འདུག མོ་རང་དཀའ་ཁག་ཅི་ཞིག་ལ་ཕྲད་པ་དང་། ཅི་ཞིག་གིས་མོའི་ལུས་སྟེང་གི་རང་གཤིས་བཙན་པོ་དེ་ལ་རྡོག་བརྫིས་བཏང་བ་མི་ཤེས་མོད། ད་ལྟའི་མོ་ནི་བློ་རྩེ་གཅིག་བསྒྲིམས་གྱིས་འཚོ་བ་ལ་འབད་མཁན་ཞིག་ཏུ་གྱུར་འདུག

　　དྲུག

　　ཉིན་ཞིག་ལ། བསམ་འཕེལ་གྱིས་ང་ལ་དཔལ་མོར་ཉལ་རྩལ་ཡོད་རབས་ལབ་ནས་ང་ལ་ངོམ་སོ་བྱེད་པ་མ་ཟད། ཁྱོད་ཀྱི་སློབ་གྲོགས་དེ་ཆང་འཐུང་ན་ངར་རབས་བཤད། དེ་དུས་དཔལ་མོས་ཆང་ཁང་ནས་ལས་ཀ་གཉེར་བཞིན་ཡོད་དམ་སྙམ་ནས་ང་ལ་སེར་སྣ་ཞིག་ཐོན། བསམ་འཕེལ་གྱིས་དཔལ་མོ་ལ་ཉལ་བོ་བྱས་པ་ཤེས་རྗེས། གློ་རྡེག་ལ་ཡིད་སེམས་བློང་བློང་པོར་བཏང་ཞིང་། ངའི་སེམས་སུ་རྩ་ཆེན་ལ་བཟུང་བའི་ངེད་གཉིས་ཀྱི་ཕྱིར་དྲན་དེ་དག་ཀྱང་ལག་ནང་གི་དཀར་ཡོལ་ས་ལ་ལྷུང་བ་ནང་བཞིན་ཆག་གྲུམ་ཤོར། མོ་རང་ཡང་སྙིང་དོན་དག་ཅི་ཞིག་ལ་འཕྲད་དེ་མི་འདི་འདྲ་ཞིག་ལ་གྱུར་བ་ཡིན་ནམ་སྙམ། དེའི་རྗེས་སུ་དཔལ་མོར་ཕྲད་དུས། མོ་རང་རྒྱ་མི་ཞིག་དང་གཉེན་བསྒྲིགས་ཟིན་ལ། བྱིས་པ་ཞིག་གི་ཨ་མར་གྱུར་འདུག རང་རློམ་གྱིས་རྒྱ་སྐད་ལབ་ལ། རླངས་འཁོར་རྫིག་པོ་ཞིག་ཀྱང་བསྐོར་འདུག གདོང་ལ་སྐྱིད་ཉམས་ཀྱིས་ཁེངས་ཤིང་ཕྱོགས་གང་ནས་བལྟས་ཀྱང་ལོ་ན་བཞི་བཅུའི་སྔས་མགོ་དང་སུམ་བཅུའི་རྟེན་མ་བྱས་པའི་བུད་མེད་ཅིག་ལ་མི་འདྲ་བར་རྒས་ཉམས་ཤིག་རྦད་དེ་མཐོང་རྒྱུ་མི་འདུག སྔར་བཞིན་མཛེས་མའི་ཉམས་དོད་ཅིང་།མེ་ཏོག་ནང་གི་སེར་ཆེན་ལྟ་བུའི་བཀྲག་མདངས་འཚེར། འོན་ཀྱང་ངས་ཡང་བསྐྱར་མོའི་མགོ་ཐོག་གི་ཨ་ཡིག་ནག་པོ་དེ་མཐོང་བྱུང་།དེ་ཧ་ཅང་ཉམ་ཆུང་དང་ཁེར་རྐྱང་གིས་འགྲེང་ཞིང་། ནག་ནོག་དང་ལྗན་ལྗུན་གྱིས་སྦགས་ཏེ་བཀྲེས་ལྟོགས་ཀྱིས་མནར་བའི་རྒད་པོ་ཞིག་འཁར་བ་ལ་ཁེན་པ་ནང་བཞིན་ལུས་འདུག

རྩོམ་སྒྲིག་པ། ལྷ་སྐྱིད།
 

རྩོམ་ཁུངས། ངེད་དྲ་བ།