ཧོར་གྱི་དམག་སྒར་ཆེན་མོའི་དབུས་ཀྱི་གུར་ཆེན་སྟོང་ཤོང་དཀར་མོའི་ནང་དུ། མར་མེའི་འོད་ལྕེ་འདར་སིག་སིག་ཏུ་གཡོ་བཞིན་འདུག །གུར་གྱི་མཐའ་འཁོར་དུ་མུན་པ་འཐིབས་ཀྱང་། གུར་དཀྱིལ་ན་གསེར་དངུལ་ལས་གྲུབ་པའི་ཤོ་ཡི་སྟེགས་བུ་དེ་གློག་འོད་ཕོག་པའི་ཟློས་གར་གྱི་སྡིངས་ཆ་ཞིག་དང་འདྲ་བར་དཀར་ལྷང་ངེར་མངོན། གུར་ནག་པོ་དེའི་ནང་དུ་ཧོར་གྱི་ཤ་རྗེན་དང་ཁྲག་གི་དྲི་མ། དེ་བཞིན་གཅན་གཟན་གྱི་དྲི་མ་རྩུབ་པོ་ཞིག་འཁོར་ཡོད་པ་དེས། མི་རྣམས་ལ་དབུགས་བསྡམ་བསྡད་ལྟ་བུའི་ཉེན་ཁའི་ཚོར་བ་ཞིག་སྤྲད་ཡོང་།

　　ཤོ་སྟེགས་ཀྱི་གཡས་གཡོན་དུ་མི་གཉིས་བསྡད་འདུག །ཡ་མཚན་པ་ཞིག་ལ། མར་མེའི་འོད་ངོགས་སུ་ཁོང་གཉིས་ཀྱི་བཞིན་རས་ལ་ཁྱད་པར་ཆེན་པོ་མི་འདུག་སྟེ། གཉིས་ཀའི་ངོ་གདོང་ཁོང་ཁྲོ་ཚ་པོ་དང་འདོད་རྔམས་ཆེན་པོས་བཟོས་པ་ལྟར་དམར་ཆིལ་ཆིལ་དང་ཤ་ཚིལ་ལྷུག་གེར་ཡོད་ལ། མ་ནེའི་འོག་ཏུ་ར་མ་ཞིག་དང་འདྲ་བའི་ཨག་ཚོམ་རིང་པོ་རེ་མདུན་དུ་གུག་ནས་སྐྱེས་འདུག མི་དེ་གཉིས་ནི་ཧོར་གུར་དཀར་དང་ཨ་ཁུ་ཁྲོ་ཐུང་གཉིས་ཡིན།

　　གླིང་གི་ཨ་ཁུ་ཁྲོ་ཐུང་གིས་གོས་ཆེན་རྒྱ་སྨུག་གི་ཕྱུ་པ་ཞིག་གྱོན་ཞིང་། དབུ་སྐྲ་རྣམས་སྤྱི་བོར་བཅིངས། ལག་པའི་ནང་གི་ཤོ་ཕོར་དེ་མཚམས་མེད་པར་འགུལ་བ་དང་མཉམ་དུ། ཁ་འགུལ་ངོ་འགུལ་ཤིག་གེར་བསྡད་ཡོད་པ་དེ་ནི། མཚན་མོ་གཟན་ཉུལ་ལ་ཆས་པའི་ཝ་མོ་ཞིག་དང་ཀུན་ནས་མཚུངས། ཁོང་གིས་ལག་པ་གཡོན་པས་རང་གི་ར་མའི་ཨ་ཚོམ་ལ་འཐེན་ཙམ་བྱེད་པ། ཡང་མིག་གཉིས་ཀྱིས་གུར་གྱི་གྲིབ་ནག་ལ་དངངས་སྐྲག་གིས་བལྟ་བ། ཡང་མྱུར་དུ་ལག་པ་སྣ་ཁུག་སྟེང་དུ་འཕུར་བ་སོགས་འགུལ་སྐྱོད་ཤིན་ཏུ་མང་། འདི་ནི་ཁྲོ་ཐུང་གི་དྲན་རྒྱུ་རྒོད་ཅིང་ཁོག་ན་གཡོ་སྒྱུ་མང་བའི་མི་ཡི་རང་གཤིས་རྡར་ཞད་དང་དངངས་སྐྲག་དེ་ལུས་ཀྱི་འགུལ་སྟངས་མང་པོའི་འོག་ཏུ་སྦེད་རྩིས་བྱེད་ཀྱིན་ཡོད།

　　དེའི་ཁ་གཏད་དུ། ཧོར་གུར་དཀར་རྒྱལ་པོས་སྟག་ལྤགས་ཀྱི་ཐུལ་པ་བརྗིད་ཆགས་པ་ཞིག་སྐུ་ལ་གསོལ་ཞིང་། མཚན་མོ་ཡང་ཧོར་ཞྭ་གྱོན་ནས་ལུས་སྟེང་གི་མི་མཛེས་པའི་ཆ་ག་གེ་མོ་ཞིག་སྦས་འདུག །ཁོང་ནི་ལྗོན་པ་རླུང་གིས་སྒུལ་བ་ལྟར་ཅུང་ཟད་འགུལ་བཞིན། མིག་མདངས་སེར་པོ་དེས་ཁྲོ་ཐུང་གི་བྱ་སྤྱོད་ཡོད་ཚད་ལ་གཡོ་བ་མེད་པར་ཅེར་ནས་འདུག་པ་ནི། མུན་ནག་གི་ཁྲོད་དུ་ཤ་ལ་རྔམ་པའི་མཚན་མོའི་འུག་པ་ཞིག་གིས་རང་གི་གཟན་ལ་བལྟ་བ་དང་གཉིས་སུ་མེད།

　　ཤོ་སྟེགས་ཀྱི་ཟུར་དུ་དངུལ་དཀར་གྱི་ཆང་ཕོར་ཆེན་པོ་གཉིས་བཞག་ཡོད། གུར་དཀར་གྱིས་དལ་གྱིས་ཆང་དེམ་བླངས་ཏེ། ཁྲོ་ཐུང་གི་ཕོར་པའི་ནང་དུ་ཆང་སེར་པོ་ཞིག་བླུགས་བཞིན་དུ་སྨྲས་པ།

　　"ཨ་ཁུ་ལགས། དོ་དགོང་གི་ཤོ་འདི་ལ། ངས་གསེར་གྱི་དོང་ཙེ་བཅུ་རྒྱན་དུ་འཇོག་གི་ཡིན། ཁྱེད་ཀྱིས་ཅི་ཞིག་འཇོག་གམ།"

　　ཁྲོ་ཐུང་གི་མིག་ཟུང་དོང་ཙེའི་ཕུང་པོ་དེར་འཕྲད་དུས། ཁོང་གི་མིད་པ་སྐམ་ཞིང་མཆུ་སྒྲོས་འདར་སིག་སིག་ཏུ་གྱུར། འདོད་ཧམ་གྱི་མེ་ལྕེ་ཞིག་ཁོང་གི་མིག་རྩའི་ནང་དུ་འབར་མགོ་བརྩམས། འོན་ཀྱང་རང་གི་དངངས་སྐྲག་དེ་སྦེད་པའི་ཆེད་དུ། གློ་བུར་དུ་ཆང་ཕོར་ཡར་བཏེགས་ནས་ཧུབ་ཆེན་པོ་ཞིག་བཏུངས། ཆང་གི་ཚ་ངར་དེས་ཁོང་གི་གདོང་སྔར་ལས་ཀྱང་དམར་པོར་བསྒྱུར་ཅིང་། རེ་ཞིག་རང་ཉིད་ཀྱི་རྡར་ཞད་དེ་བརྗེད་པར་བྱས།

　　"ཧ་ཧ་ཧ། ཧོར་རྒྱལ་པོ།" ཁྲོ་ཐུང་གིས་བཟི་ཉམས་དང་བཅས་བྲང་ཁོག་ལ་རྡེག་རྡེག་བྱེད་བཞིན་སྐད་ཤུགས་ཆེན་པོས་བགད་མོ་བགད། "ཁྱེད་ཀྱིས་གསེར་གྱི་དོང་ཙེ་བཅུ་འདིས་ང་ཨ་ཁུ་ཁྲོ་ཐུང་གི་མིག་དབང་འཕྲོག་ཐུབ་བསམ་ཡོད་དམ། ཁྱེད་ཀྱིས་གླིང་དཀར་པོ་འདི་ལས་སླ་པོར་ཁྱུར་མིད་བྱེད་ཐུབ་སྙམ་ཡོད་དམ།" ཟེར་ནས་ཁོང་གིས་ཤོ་ཕོར་དེ་མདུན་དུ་བསྒྲེངས་ནས་མུ་མཐུད་དེ། "གླིང་རུ་ནི་དཔའ་རྩལ་རྒོད་པའི་སྟག་གཟིག་ཤ་སྟག་ཡིན། དེའི་སྟེང་དུ་སྤྱི་དཔོན་རོང་ཚ་ཁྲ་རྒན་ཟེར་བ་དེ། འཛམ་གླིང་ན་འགྲན་ཟླ་མེད་པའི་དམག་ཇུས་མཁས་ཅན་ཡིན། ངའི་ཕུ་བོའི་བློ་ཇུས་དང་དམག་བཀོད་ནི་ལྕགས་ཀྱི་དྲ་བ་ཞིག་དང་འདྲ་བར་དམ་པོ་ཡོད་པས། ཧོར་གྱི་དམག་མིས་གླིང་གི་རི་སྣེ་ཙམ་ལའང་རྒོལ་མི་ཐུབ། ཧོར་རྒྱལ་པོ། དོ་དགོང་ངས་ཤོ་རྒྱལ་ན་ཁྱེད་ཀྱི་གསེར་འདི་དག་འཁྱེར་འགྲོ་རྒྱུ་ཡིན།"

　　ཁོང་གིས་ཁ་ཕོ་དེ་ལྟར་བཤད་ཅིང་། རང་གི་ཕུ་བོ་སྤྱི་དཔོན་གྱི་སྙན་གྲགས་ལ་བརྟེན་ནས་རང་གི་ནུས་མེད་ཀྱི་རང་བཞིན་དེ་སྦས་ཀྱང་། ཤོ་ཕོར་འཛིན་པའི་ལག་པའི་འདར་སིག་དེས་ཁོང་གི་རྫུན་རྐུབ་སྔ་མོ་ནས་བརྟོལ་ཟིན།

　　གུར་དཀར་གྱིས་ར་མའི་ཨ་ཚོམ་ལ་བྱིལ་བྱིལ་བྱེད་བཞིན། ཟུར་ཟའི་འཛུམ་མདངས་ཤིག་བསྟན། ཁོང་གིས་ཡང་བསྐྱར་ཁྲོ་ཐུང་གི་ཕོར་པའི་ནང་དུ་ཆང་བླུགས་ཤིང་། རང་གི་ཆང་ཕོར་དལ་གྱིས་དཀྲོག་བཞིན་དུ་མདུན་དུ་ཅུང་ཟད་གུག་སྟེ། སྐད་གདངས་དམའ་ཞིང་ལྕི་བའི་ངང་ནས་སྨྲས་པ།

　　"ཨ་ཁུ་ཁྲོ་ཐུང་། ཁྱེད་ཀྱི་སྐད་ཆ་དེ་བདེན་པ་རེད། ཁྱེད་ཀྱི་ཕུ་བོ་སྤྱི་དཔོན་རོང་ཚ་ཁྲ་རྒན་གྱི་དཔའ་རྩལ་དང་བློ་ཇུས་ལ་ང་ཡིད་ཆེས། གླིང་གི་རྒྱལ་ཕམ་ཡོད་ཚད་སྤྱི་དཔོན་ཁོང་གི་ཇུས་བློ་ཁོ་ན་ལ་ཐུག་ཡོད་པ་མི་ཀུན་གྱིས་ཤེས། འོན་ཀྱང་..."

　　གུར་དཀར་གྱི་མིག་སེར་པོ་དེ་མུན་པའི་ཁྲོད་ནས་ཁྲོ་ཐུང་གི་གདོང་ལ་ཐད་ཀར་ཟུག

　　"སྤྱི་དཔོན་དེ་འདྲའི་མཁས་པ་ཞིག་ཡིན་ན། ཅིའི་ཕྱིར་གླིང་གི་མི་རྣམས་ཀྱིས་ཁྱེད་ལ་རྩིས་མཐོང་མི་བྱེད་པ་ཡིན་ནམ། གེ་སར་མེད་པའི་སྐབས་འདིར། ཁྱེད་ཚོ་སྟག་རོང་ཚང་ལ་གླིང་གི་རྒྱལ་པོ་བྱེད་པའི་གོ་སྐབས་ལེགས་ཤོས་དེ་སླེབས་པ་མ་ཡིན་ནམ།"

　　ཁྲོ་ཐུང་གིས་ཆང་ཕོར་མར་བཞག་སྟེ། དོགས་ཟོན་གྱི་མིག་གིས་གུར་དཀར་ལ་བལྟས། "ཁྱེད་ཀྱིས་ཅི་ཞིག་བཤད་རྩིས་ཡོད།"

　　གུར་དཀར་གྱིས་ཤོ་སྟེགས་སྟེང་གི་བ་སོའི་ཤོ་རྡེལ་ཅིག་བླངས་ཏེ་མཛུབ་མོའི་བར་དུ་རྩེ་བཞིན་མུ་མཐུད་དེ། "ངས་བལྟས་ན། ཁྱེད་ཀྱི་ཕུ་བོ་སྤྱི་དཔོན་ལ་ཞན་ཆ་གཅིག་རང་གཅིག་ཡོད། དེ་ནི་ཁོང་གི་སྙིང་གི་རྒྱ་མཚོའི་ནང་གི་ནོར་བུ་གཅིག་པུ... ཁོང་གི་བུ་སྣང་ངུ་གཡུ་སྟག་དེ་རེད།"

　　མིང་འདི་ཐོས་མ་ཐག ཁྲོ་ཐུང་གི་ལུས་ཡོངས་ལ་གྲང་ཤུར་ཤུར་གྱི་ཚོར་བ་ཞིག་བརྒྱུགས། དེ་ནི་ཁོང་གི་ཤ་ཁྲག་གཅིག་པའི་ཚ་བོ་རེད།

　　"ཨ་ཁུ། ལེགས་པར་ཉོན་ཅིག" གུར་དཀར་གྱི་སྐད་སྒྲ་ནི་དུག་སྦྲུལ་གྱིས་ལྕེ་ནར་བ་བཞིན་རྣ་བར་འཛུལ་ཡོང་། "གལ་ཏེ་སང་ཉིན་གཡུལ་སར་ང་ཚོས་མཉམ་འབྲེལ་བྱས་ཏེ། སྣང་ངུ་གཡུ་སྟག་དེ་མདའ་ཁར་དྲངས་ཏེ་བསད་པ་ཡིན་ན... སྤྱི་དཔོན་རོང་ཚ་ཁྲ་རྒན་ལ་ཅི་ཞིག་འབྱུང་ངེས་སམ། རང་གི་བུ་གཅིག་པུ་ཤི་བའི་སྡུག་བསྔལ་གྱིས་ཁོང་གི་སེམས་ཁམས་ཡོངས་སུ་རྡིབ་ནས། དམག་ཇུས་དང་བཀོད་སྒྲིག་ཐམས་ཅད་ཇུས་ཉེས་སུ་འགྲོ་ངེས།"

　　ཁྲོ་ཐུང་གི་དབུགས་ལེན་སྟངས་མགྱོགས་སུ་སོང་། ཁོང་གིས་ཁ་གདང་ཡང་སྐད་ཆ་ཚིག་གཅིག་ཀྱང་བཤད་མ་ཐུབ།

　　གུར་དཀར་གྱིས་འཛུམ་མདངས་དང་བཅས་ཆང་དམར་པོ་དེ་ས་ལ་ཐིགས་པ་འགའ་བླུགས་ནས་མཇུག་བསྡུས་པ།

　　"གླིང་དམག་ཕམ་པའི་'ཇུས་ཉེས་'ཡོད་ཚད་སྤྱི་དཔོན་གྱིས་ཁུར་དགོས་བྱུང་དུས། གླིང་གི་དཔའ་རྟུལ་ཚོས་ཁོང་ལ་ཡིད་ཆེས་བྱེད་མི་སྲིད། དེའི་སྐབས་སུ། ང་ཧོར་གུར་དཀར་གྱིས་ཁྱེད་ལ་རྒྱབ་སྐྱོར་བྱས་ཏེ། གེ་སར་དང་སྤྱི་དཔོན་གྱི་ཚབ་ཏུ། ཁྱེད་རང་ཨ་ཁུ་ཁྲོ་ཐུང་གླིང་གི་རྒྱལ་པོ་དངོས་གནས་དེར་བསྐོ་ཆོག འདི་ནི་ཕུ་བོ་སྤྱི་དཔོན་གྱི་གྲིབ་མའི་འོག་ནས་བུད་དེ་རྒྱལ་པོ་བྱེད་པའི་གདམ་ག་ཉག་གཅིག་དེ་རེད།"

　　གུར་གྱི་ནང་དུ་དབུགས་ཆད་པ་ལྟ་བུའི་ཁུ་སིམ་ཞིག་ཆགས།

　　ཁྲོ་ཐུང་གི་ལག་པའི་ནང་གི་ར་ཅོའི་ཤོ་ཕོར་དེ་ལྗིད་ཏིག་གེར་གྱུར། འདི་ནི་གསེར་གྱི་རྒྱན་འཇོག་ཙམ་མ་ཡིན་པར། རང་གི་ཕ་ས་དང་། རང་གི་ཤ་ཁྲག་གི་ཕུ་བོ། ད་དུང་ཉེས་མེད་ཀྱི་ཚ་བོ་བཅས་མཉམ་དུ་འཚོང་བའི་ཚོང་ལས་ཤིག་རེད།

　　ཁྲོ་ཐུང་གི་རྣ་ལམ་དུ་སྤྱི་དཔོན་ཁྲ་རྒན་གྱིས་ཁོང་ལ་བཀའ་བཀྱོན་གནང་བའི་སྒྲ་དང་། ཚ་བོ་སྣང་ངུས་ཁོང་ལ་ཨ་ཁུ་ཞེས་འབོད་པའི་བྱིས་དུས་ཀྱི་སྐད་སྒྲ་དག་ཤར་ཡོང་། འོན་ཀྱང་དེ་མ་ཐག་ཏུ། གླིང་གི་མི་རྣམས་ཀྱིས་ཁོང་ལ་བལྟ་བའི་སྣང་མེད་དང་ཁྱད་གསོད་ཀྱི་མིག་མདངས་དང་། གསེར་ཁྲིའི་སྟེང་དུ་འགྱིང་བའི་གེ་སར་གྱི་སྣང་བརྙན་དེ་མིག་ལམ་དུ་འཕྱུར་ཡོང་བས། ཁོང་གི་སྙིང་ནང་གི་ཕྲག་དོག་གི་དུག་ཆུ་དེ་ཡང་བསྐྱར་ཁོལ་མགོ་བརྩམས།

　　"གལ་ཏེ་ཕུ་བོ་ལ་ཇུས་ཉེས་བཀལ་ཞིང་... གེ་སར་མེད་སོང་ན... ང་རང་གླིང་གི་རྒྱལ་པོ་ཡིན།"

　　འདོད་ཧམ་དང་དབང་ཆའི་འདོད་རྔམས་ཀྱིས་ཁོང་གི་མི་གཤིས་ཀྱི་འོད་མདངས་མཐའ་མ་དེ་ཡང་མུན་པར་བསྒྱུར། ཁོང་གི་གདོང་དམར་པོ་དེའི་སྟེང་དུ་རྔུལ་ཆུའི་ཐིགས་པ་ཟར་ཟུར་དུ་བཞུར། བྱ་ལག་མང་བའི་མཛུབ་མོ་དེ་དག་གིས་ཤོ་ཕོར་ཤུགས་ཀྱིས་བསྒྲེངས་ཏེ། མིག་ཟུང་བཙུམས་ནས་གསེར་གྱི་སྟེགས་བུའི་སྟེང་དུ་ཤུགས་ཀྱིས་གཡུགས།

　　"ཁྲོག་ཁྲོག་ཁྲོག... ཏག་ཏག་ཏག..."

　　བ་སོའི་ཤོ་རྡེག་དཀར་ནག་གཉིས་སྟེགས་བུའི་སྟེང་དུ་འགྲིལ་ནས་མཐར་མཚམས་ཆད་དུས། ཤོ་མིག་ནག་པོ་བཅུ་གསུམ་པ་དེ་གྱེན་ལ་བསྟན་འདུག ཤོ་མིག་ནག་པོ་དེ་དག་ནི། སང་ཉིན་ཧོར་དམག་གི་རལ་གྲིའི་འོག་ཏུ་དམར་གསོད་ཐེབས་རྒྱུ་ཡིན་པའི་ཚ་བོ་སྣང་ངུ་གཡུ་སྟག་གི་ཤི་ལ་ཁད་ཀྱི་མིག་ཟུང་དང་འདྲ་བར། ཨ་ཁུ་ཁྲོ་ཐུང་གི་གདོང་ལ་ཐད་ཀར་ཅེར་ནས་འདུག

　　གུར་དཀར་གྱིས་མགོ་བོ་བསྒུར་ནས་ཤོ་མིག་ལ་བལྟས། དེ་ནས་ཁོང་གི་ར་མའི་ཨ་ཚོམ་གྱི་གསེང་ནས་འཇིགས་སུ་རུང་བའི་བགད་མོ་ཞིག་མཁའ་དབྱིངས་སུ་འཕུར།

　　"ཨ་ཁུ་ཁྲོ་ཐུང་། ཁྱེད་རྒྱལ་སོང་། གསེར་འདི་དག་ཁྱེད་ཀྱི་ཡིན། ད་ནི་སྣང་ངུ་གཡུ་སྟག་ངའི་ལག་ཏུ་སྤྲོད་ཅིག"

　　ཁྲོ་ཐུང་གིས་འདར་སིག་སིག་གི་ལག་པ་གཉིས་བརྐྱངས་ཏེ། གསེར་གྱི་དོང་ཙེ་དེ་དག་རང་གི་པང་དུ་བསྡུས། འོན་ཀྱང་། གསེར་དེ་དག་ལ་རེ་བ་བྱས་པ་ལྟར་གྱི་དྲོད་འཇམ་ཞིག་མེད་པར། འཁྱགས་རོམ་ལྟར་གྲང་ཤུར་ཤུར་ཞིག་ཡིན་པ་དང་། གསེར་གྱི་དོང་ཙེའི་ཟུར་སྣེ་རྣོན་པོ་དེས་ཁོང་གི་ལག་མཐིལ་བསྣད་དེ་ན་ཟུག་ཅིག་སྤྲད་བྱུང་། གསེར་གྱི་འོད་མདངས་དེས་ཁོང་གི་གདོང་དམར་པོ་དེ་སྔར་ལས་ཀྱང་འཇིགས་སུ་རུང་བ་ཞིག་ཏུ་བསྟན། ཁོང་གིས་སྣང་ངུ་གཡ་སྟག་ཧོར་ལ་སྤྲོད་ཐབས་བཤད་ཟིན་པའི་སྐད་ཅིག་མ་དེར། ཁོང་གི་ཁོག་པའི་ནང་དུ་སྟོང་ཧང་ངེ་བ་ཞིག་ཏུ་གྱུར་པ་ཚོར།

　　ཧོར་གུར་དཀར་རྒྱལ་པོ་ཡར་ལངས་ཏེ། སྣང་མེད་དུ་གུར་གྱི་ཕྱི་རོལ་ཏུ་ཐོན་སོང་། གུར་དཀར་ལ་མཚོན་ན། ཁྲོ་ཐུང་ནི་མི་ཞིག་མ་ཡིན་པར། གླིང་དཀར་པོའི་སྒོ་ལྕགས་འབྱེད་བྱེད་དང་། སྤྱི་དཔོན་གྱི་སྙིང་ལ་གྲི་འཛུགས་བྱེད་ཀྱི་ལག་ཆ་བཙོག་པ་ཞིག་ལས་མ་འདས། ལྡེ་མིག་གིས་སྒོ་ཕྱེས་ཚར་བས། ད་ནི་དེ་ལ་རིན་ཐང་ཅི་ཡང་མེད།

　　གུར་ཆེན་སྟོང་ཤོང་གི་ནང་དབུས་སུ། ཨ་ཁུ་ཁྲོ་ཐུང་གཅིག་པུར་ལུས། མར་མེའི་འོད་དེ་ཤི་ལ་ཁད་དུ་གྱུར་ཅིང་། ཁོང་གིས་པང་གི་གསེར་གྱི་དོང་ཙེ་ཞིག་མཐོ་རུ་བཏེགས་ནས་དེའི་ངོས་སུ་བལྟས། གསེར་གྱི་ངོས་སུ་འཕྲོས་པའི་རང་གི་གདོང་བརྙན་དེ་མཐོང་དུས། ཁོང་ལ་དངངས་སྐྲག་ཅིག་སྐྱེས། དེ་རུ་མངོན་པ་ནི་གླིང་གི་རྒྱལ་པོ་ཞིག་མིན་ལ། སྨུག་པོ་གདོང་གི་དཔའ་བོ་ཞིག་ཀྱང་མ་ཡིན། དེ་རུ་མངོན་པ་ནི་གོས་ཆེན་རྒྱ་སྨུག་གྱོན་ཞིང་གདོང་དམར་བ། མིག་ཀོང་དོང་དུ་ལྷུང་བའི་ཉམ་ཐག་དང་། ཕྲག་དོག །འདོད་ཧམ་བཅས་ཀྱིས་རང་གི་ཚ་བོ་དམར་བསད་བཏང་ཞིང་ཕུ་བོ་ལ་ཇུས་ཉེས་དཀྲིས་པའི་བདུད་ཀྱི་གཡོག་པོ་ཐབས་ཆག་ཅིག་གི་གཟུགས་བརྙན་རེད།

　　གློ་བུར་དུ། གུར་གྱི་ཕྱི་རོལ་ཏུ་ཧོར་དམག་ཁྲི་སྟོང་མང་པོའི་རྟ་ཡི་རྨིག་སྒྲས་ས་གཞི་གཡོ་བ་ལྟར་གྲགས་མགོ་བརྩམས། དེ་ནི་གླིང་ལ་རྒོལ་བའི་དམག་བརྡ་རེད། རྨིག་སྒྲ་དེ་དག་ནི་ས་ཐོག་ཏུ་བརྫིས་པ་མ་ཡིན་པར། ཁྲོ་ཐུང་རང་ཉིད་ཀྱི་བྲང་ཁོག་དང་སྙིང་གི་སྟེང་དུ་རྡོག་རྫིས་བཏང་བ་ལྟར། ཁོང་གི་དབུགས་ལེན་སྟངས་ཡོངས་སུ་འགག་པར་བྱས།

　　ཁྲོ་ཐུང་གི་ལག་པའི་ནང་གི་གསེར་གྱི་དོང་ཙེ་དེ་ས་ལ་ལྷུང་སྟེ་ "ཏིང་" ཞེས་པའི་སྒྲ་སྐྱོ་པོ་ཞིག་རྣ་བར་ལྷུང་། ཁོང་གི་བྱ་ལག་མང་བའི་ལག་པ་གཉིས་ཀྱིས་རང་གི་མགོ་བོ་དམ་པོར་བཟུང་སྟེ། རང་གི་ལག་པར་འགོས་པའི་མཐོང་མི་ཐུབ་པའི་སྤུན་ཟླའི་ཁྲག་དེ་ལ་ཅེར་ནས་མུན་པའི་ཁྲོད་དུ་ཙོག་པུར་ལུས་སོ། །

　　_______

　　མུ་འབྲེལ་རྩོམ་ཡི«གླིང་སྒྲུང་གི་སྒྲོན་མེ»ལས་“ཁྲོ་ཐུང་གི་མཚན་མོ་གཅིག”ཅེས་པ་འདི་ནི་གླིང་སྒྲུང་སྒྱུ་རྩལ་གྱི་མི་གཤིས་འཚོལ་བཞིན་པའི་གྲོག་མ་ཆུང་ཆུང་ཞིག་གིས་རྩོམ་རིག་སྒྱུ་རྩལ་གྱི་མཚན་ལྗོངས་ལ་ཕུལ་བའི་མཆོད་མེ་ཞིག་ཏུ་འགྱུར་བར་ཤོག།

རྩོམ་སྒྲིག་པ། དབང་མོ། 

རྩོམ་ཁུངས། ངེད་དྲ་བ།