ང་རང་ཡང་བུད་མེད་ཡིན།
རང་གི་རང་དོན་ཡུལ་གྱི་སྤྱི་དོན་དང༌།།
རྒྱལ་བོའི་རྒྱལ་སྲིད་སྤྲང་བོའི་འཚོ་ཐབས་སོགས།།
ཆེ་ཆུང་བྱ་བ་གང་དང་གང་བྱེད་ཀྱང༌།།
མེད་དུ་མི་རུང་བ་ནི་བུད་མེད་ཡིན།།
—དགེ་ཆོས།
སྲོལ་རྒྱུན་གྱི་ཉིང་བཅུད་དང་དེང་རབས་ཀྱི་དཔལ་ཡོན།
ལྷན་གཅིག་ཏུ་དཀྲུགས་པའི་འབྲི་མར་སེར་བོ།
དུས་རབས་ཀྱི་ཁྱད་ཆོས་དང་ཤེས་བྱའི་ཉིང་བཅུད།
ལྷུར་ལེན་གྱིས་བཏུང་བའི་གངས་ལྷ་མེ་ཏོག
མིའི་རིགས་ཚེ་སྲོག་གི་རྒྱུན་བཟང་ཁུར་དུ་ལེན་ཞིང༌།
ཤེས་རབ་ཀྱིས་ཕྱུག་པའི་བསམ་བློའི་འདབ་མ།
ཡངས་པར་གྲོལ་བའི་དཔག་བསམ་ལྗོན་ཤིང༌།
དུས་རབས་གསར་བ་བློ་གྲོས་ཀྱིས་བསུ་ཞིང༌།
སྲོལ་རྒྱུན་བཟང་བོ་རང་གཤིས་སུ་ཐིམ་པའི་མཛེས་པའི་སྲིན་མོ།
བླ་སྲོག་གི་གསེང་ལ་སྣུམ་ལྟར་ཞག་པའི།
མཛེས་ཕུལ་ཆེན་པོ་ཞིག་གི་ལྐོག་གྱུར་དང་བསླུ་བྲིད།
ཁམས་ཡོངས་སུ་ཁྱབ་པའི་འོད་ལྟར།
སེམས་ཅན་གྱི་སྣང་ངོ་ན་རྟག་ཏུ་བརྟན་པའི་ཉི་ཟླ་སྐར་གསུམ།
དེ་ནི་བུད་མེད་ཅེས་པའི་ཕྱི་ཤུན་ཙམ་མ་ཡིན་ལ།
བུད་མེད་ལ་བསྔགས་བརྗོད་བཏང་བའི་སྙན་ཚིག་སྐམ་པོའང་མིན།
དེ་ནི་ལྐོག་གྱུར་གྱི་ཆབ་རོམ་འོག་ན་ལྷུང་ལྷུང་བཞུར་བའི་བླ་སྲོག་ཅིག
དོན་ལྡན་གྱི་འཚོ་བ་ཐབས་མཁས་ཀྱིས་ལྷུར་ལེན་བྱེད་པའི་མིག་དཔེ་ཞིག
མི་གཤིས་ཀྱི་བུམ་པའི་ནང་ལ་ཉེས་སྐྱོན་གྱི་དྲི་ངད་སེལ་བའི་ནོར་བུ་ཞིག
ཡངས་པའི་བློ་རྒྱ་རུ་ཕྲག་དོག་དང་སེར་སྣ། མནར་གཅོད།
གདུང་བ་ཐ་དག་ཤོང་བའི་ནམ་མཁའ་ཞིག
ཟབ་པའི་བསམ་དགོངས་སུ་སྙིང་རྗེ་དང་ལྷག་བསམ། བློ་གྲོས།
སྤྱོད་བཟང་ཡོད་ཚད་རུམ་པའི་བང་མཛོད་ཅིག
ཕྱི་ཤུན་ལ་རྒས་གཉེར་ཆགས་ཀྱང༌།
ཡང་སྙིང་ན་མུ་ཏིག་གསོ་བའི་ཉ་ཕྱིས་ཤིག
དེ་ནི་ངའི་དབང་བོ་རྣམ་ལྔ་ཡིན།
དོན་ལྔ་སྣོད་དྲུག་ཡིན།
མགོ་བོ་ཡལ་ལག་ཡིན།
ཤ་ཁྲག་ཟུངས་་བཅུད་ཡིན།
དེ་ནི། ངའི་འདུ་ཤེས་དང་བསམ་བློ་ཡིན།
བླ་སྲོག་དང་རྣམ་ཤེས་ཡིན།
དེ་ནི་ངའི་ལན་བུ་ཡིན།
པགས་སྐྱི་ཡིན།
སེན་མོ་ཡིན།
ནུ་འབུར་ཡིན།
བུ་སྣོད་ཡིན།
རུས་རྐང་ཡིན།
འདི་དག་ཡོད་ཚད་ང་རང་ཡིན།
ང་རང་ཡང་བུད་མེད་ཡིན།
བུད་མེད་ནི་སྲིན་མོ་ཡིན།
སྲིན་མོ་ནི་ཚེ་སྲོག་གི་འབྱུང་ཁུངས་ཡིན།
ཚེ་སྲོག་གི་འབྱུང་ཁུངས་ནི་མཐར་ཐུག་གི་ནང་སྙིང་ཡིན།
རྩོམ་ཁུངས། སྙན་ངག་དེབ