གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྙན་ངག་རིང་མོ། དབུས་ལ་སོང་བའི་སྒྲུང་། ༣

2010-03-09 11:01:00 མདའ་བཙན་པོ། ཀློག་གྲངས། མཆན ཡོད།

གཉིས་པ།  ཨ་མྱེས་ཀྱི་ཇག་གླུ།

ལོ་ངོ་སྟོང་གི་སྡུག་བསྔལ་དང་བཙའ་ཡིས་ཟིན་པའི

མཚན་མོ་འདི

གཟུགས་མེད་ཀྱི་རླུང་གི་ཁ་དོག་ཀྱང་ནག་པོ་ཡིན་ངེས་པའི

མཚན་མོ་འདི

རང་གི་བྲང་ཁ་བཞིན་འདར་ཞིང་འཁྱག་པའི

མཚན་མོ་འདི

 

ཡང་ན  ཆར་དང་ཉི་འོད་ཀྱི་གཞས་ཆུང

སེམས་ཀྱི་ལྕེ་རྩེ་ནས་རུལ་བའི་མཚན་མོ་འདི

 

གཏམ་རྒྱུད་ཀྱི་མཛེས་པ་ཡོད་ཚད

ས་སྲོད་ཀྱི་ལྕགས་མཁར་གྱིས་ཡོངས་སུ་བསྐོར་རྗེས་ཀྱི

སྐྱོ་ངལ་དང   ཁེར་ཆད་ཀྱིས་བརྡུང་བའི

ལྕགས་སྒྲོག་གི་མཚན་མོ་ཞིག

 

མཚན་མོ་འདིར  ངས

མཆི་མ་བཞིན་ཕྱོགས་སོ་སོར་འཐོར་བའི་དཔའ་བོའི་ཁྲག་ཐིགས་དག

རང་གི་ཆག་རོ་རེ་རེའི་སྟེང་ན་མེ་བཙའ་བཞིན་བཞག་ཡོད

 

ངས  རང་ཉིད་ནི

སུ་ཞིག་གི་ཆེད་དུ་རྡོ་ལའང་ཟུག་པའི་མདའ་མོ་ཞིག་ཏུ་བཏང་ཡོད་ལ

ལྕགས་ཀྱི་ལྗིད་ཤུགས་དང

སྡུག་གི་སྲ་མཁྲེགས་ལྟ་བུའི་མཚན་མོ་འདི་གཅོད་པའི

རལ་གྲི་ཞིག་ཏུ་ཡང་རྡུང་ཡོད

 

ཀྱེ  བདག་གི་བརྩེ་བ་རེ་རེས་གྲུབ་པའི་ཕུ་ནུ་ཚོ

 

སྙིང་ན་མེ་ལྟར་འབར་བའི་ཅི་ཞིག

ཁྲག་དང  བདེན་པའི་གསེབ་ན

མིག་ཆུ་བཞིན་འཚེར་བའི་ཅི་ཞིག  འཚོལ་ཏུ་འགྲོ་ཨང

སུ་ཞིག་གི་སྐྱོ་གཞས་ལས་ཀྱང་འདར་གྱིན་པའི་བརྩེ་བ་ཞིག

གཉེར་རིས་ལྟར  རྒས་དྲག་པའི་ལམ་ཆུང་འདིར་འཐིམ་ནས

ཡུན་རིང་འགོར་ལ

ཡང   རང་གི་མིག་ཆུས་ཅི་ལྟར་བཀྲུས་ཀྱང

དག་པར་དཀའ་བའི

མཚན་མོ་འདིའི་ནག་ཉེས་དང་དམར་གསོད་ཀྱི་འཇིགས་པ་དེ་བསམ་ན

 

རླུང་བུ་ཕྲ་མོ་རེས་ཀྱང  སྤྱིར་ནའང

ནད་ཡམས་དང་སྡུག་བསྔལ་གྱིས་འཚང་ཁ་བྱེད་པའི་བྲང་ཁོག་ཏུ

རྣོ་ལྕགས་ཀྱང་བཞུ་ཐུབ་པའི་ཁྲག་ཐིགས་སྦར་བྱེད་ལ

 

ཧ་ཅང་སྐྱོ་གདུང་གིས་འཐོར་གྱིན་པའི

ཆར་བ་སམ་སིམ་རེ་རེའི   གསེབ་ནས་ཀྱང

ཤི་མི་ཐུབ་པའི་སྲོག་གི་ཐ་སྙད་རེ་རེ་ལྗིད་ཏིག་གེར་མྱོང་ཐུབ

 

འདི་ལྟར   དུས་ཀྱིས་བཞག་པའི་རྨ་ཁ་ལྟ་བུའི

གསོན་ཤུགས་ཀྱི་འོད་སྣང་རྟ་རྔ་ཙམ་ཡང་མེད་པའི

མཚན་མོ་འདི་ནས

 

ངས   ཉམ་ཆུང་བའི་རང་ལ

མཆི་མའི་སྟེང་གི་ཚེ་སྲོག་ཆུ་ཐིགས་འདྲ་ཞིག་ཡོད་པར

 

དགའ་ནས    དུས་ཀྱི་ཆག་འཇིག་གི་གཡང་གཟར་ཁར་འགྱིང་བའི

གངས་རི་ཟེར་བའི་འདར་སིག་སིག་གི

སྙན་ངག་ཅིག་བྲང་ཁའི་མེ་ལྕེས་བསྒྲོན་གྱིན་ཡོད་ལ

 

སྐྱོ་ནས   ས་སྟོང་ལུང་སྟོང་གི

བེམ་པོའི་ཚོགས་ལའང་རང་གི་རྐང་རུས་བཅག་འདྲའི་ཨག་རིང་གིས

འབོད་ཀྱིན་ཡོད

བདག་གི་སྙིང་ཀ་ནས་སྐྱེས་པའི

ལྕགས་ཀྱི་སྡོང་བོ་ལྟ་བུའི་མཚན་མོ་འདི

 

གསེར་གྱི་ལོ་མ་ལྟ་བུའི་ཚེ་སྲོག་རེ་རེ

ནག་ཐིང་ངེར

ཕྱིར་ཡོང་མེད་པའི་སྐྱོ་ངལ་གྱི་གང་ཞིག་ལ་འཐིམ་རྗེས་ཀྱི

རོ་དང

འཁྱག་པ་འདར་འདར་གྱི་མཚན་མོ་འདི་རེད

 

མཚན་མོ་འདིར  སེམས་དང

བརྩེ་བ་སྦྲེལ་བྱེད་ཀྱི་དབུས་ལམ་ཡང

བདེན་པའི་ཡིག་འབྲུ་ཡོད་ཚད

དུས་ཀྱི་རླུང་ནག་གིས་ཁུར་རྗེས་ཀྱི་གས་ཀ་མང་བའི་རྡོ་རིང་ཞིག

 

ངས  མིག་ཆུ་ཡིན་པའི་རང་གི་བྲང་ཁ་འདི་སྲུང་ནས

ད་དུང  ལྕགས་དང་རྡོ་ཡི་མཚན་མོ་ཅི་འདྲ་ཞིག

ཁེར་རྐྱང་གི་གྲི་ཁ་ནས་བསྐྱལ་དགོས

 

ངས  སྟོང་འདང་དང

རྨི་ལམ་གྱི་རྨ་ཁ་རེ་རེས་གྲུབ་པའི་རང་ཉིད་འདི

རེ་སྒུག་ཅིག་དང་འདྲ་བའི  ཅང་མེད་ལྷིང་འཇགས་ཀྱི

ཕྱོགས་བཞིའི་ཁ་ནང་དུ་ཅི་ལྟར་ཏུ་གདུག་དགོས

ལོ་རྒྱུས་ཀྱི་རྨ་ཁ་ནས

མཚན་མོ་དང  ཁྲག་དྲོན་འབབ་ནས་ཡུན་རིང་འགོར་ལ

འདར་ལྕུག་ལྕུག་གི་སྐད་ཆ་མང་བོས

བདག་གི་མགྲིན་པ་བསྡམས་ནས་ཀྱང་ཡུན་རིང་འགོར

 

ཀྱེ  བདག་གི་སྲོག་དང

བརྩེ་བའི་མེ་ལྕེ་འབར་བྱེད་ཀྱི

ཐ་སྙད་དང་འདྲ་བའི  སྤུན་ཟླ་ཚོ

 

ངེད་ཅག་གིས   རང་གི་རྩ་ལམ་ལས་ཀྱང

གསོན་ཤུགས་འབར་བྱེད་ཀྱི་དབུས་ལམ་འདི་དེད་ནས

 

ས་གཞིའི་བརྩེ་བ་འཁྱིལ་སའི་དབྱངས་ཀྱི

མཚོ་མོ་དེ་དང

བྲང་ཁའི་ཐ་སྙད་གསོག་སའི

གསལ་བྱེད་ཀྱི་གངས་རི་འདར་ལྕུག་ལྕུག་དེ་འཚོལ་དགོས

 

མིག་ཆུ་བཞིན་སྐྱོ་བའི   ཚེ་སྲོག་ཡོད་ཚད་ཀྱི

རྒྱབ་ཀྱི་ཁུར་བོ་ལྗིད་མོ་དེའང་འཚོལ་དགོས

 

ངའི  སྲོག་དང

བརྩེ་བའི་མེ་ལྕེ་འབར་བྱེད་ཀྱི

ཐ་སྙད་དང་འདྲ་བའི  སྤུན་ཟླ་ཚོ

སྤྲང་བོའི་ལག་ནང་གི་སྟོང་བ་ལྟ་བུའི

མཚན་མོ་འདིའི  ཕྲག་གོང་ནས་བུད་དང

 

ངེད་ཅག་གིས   རང་ཉིད་གཅེར་བུར་བསྒྲོན་པའི

ཁྲག་གི་ཉི་འོད་དེ

སེམས་ཀྱི་རི་སྒང་རེ་རེ་ནས

 

སྙིང་ཉེ་བའི  རྨ་ཁ་རེ་རེའི

སྡུག་བསྔལ་ལས་ཀྱང་

འཁྱག་པའི་གྲང་བ་གསོ་ཕྱིར་ཏུ་སྦར་དགོས

 

བདག་གི  སྐྱོ་ངལ་གྱི་ཕུ་ནུ

གཉིད་དང་ནད་ཡམས་ཀྱིས་བཟུང་བའི་སྤུན་ཟླ

ཁྱོད་ཀྱིས  རང་གི་ལག་མཐིལ་ནས་འབོར་གྱིན་པའི

རང་ཉིད་དེ་རྙེད་དམ

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།