གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྒྲོལ་མ།

2009-12-28 09:28:00 ཏྲི་ཏྲི། ཀློག་གྲངས། མཆན ཡོད།

བདག་གི་སེམས་ལ་ཆར་བ་བབས

དེ་རུ་མེ་ཏོག་ཅིག་བཞད་ཀྱིན་པའི་སྒང་ཡིན་ལ

མེ་ཏོག་དེའི་མིང་ལ་སྒྲོལ་མ་ཟེར

 

སྒྲོལ་མ   ཁྱོད་ཀྱི་ལང་ཚོ་ཡིས

ཞོགས་དུས་ཀྱི་ཟིལ་བ་འཁུར་ནས

ཐག་རིང་ཐག་རིང་གི་སྦྲང་ཆུང་ཞིག་དབང་མེད་དུ་བཀུགས་སོང

 

ཟླ་བ་ནི་ར་རི་ཡིས་ཡོངས་སུ་གཏམས་པས

དེ་ནི་ཁྱོད་ག་ལ་ཡིན་ཏེ་མིན་ནོ

ཁྱོད་ནི་ཇོ་མོ་གླང་མའི་གངས་རྡུལ་ཏེ

ཁྱོད་ནི་ཆུ་གཏེར་ཆེན་པོའི་སྒྲ་དབྱངས་ལས་འཁྲུངས་པའི་ལྷ་མོ་ཡིན་ནོ

 

འོ  བདག་གི་ལྷ་མོ

ས་སྒང་ནི་དེ་འདྲ་མཐོ་ལ

ཁྱོད་ནི་དེ་ལས་ཀྱང་མཐོ་བས

སྤྲིན་དཀར་གྱི་ཕུང་བོ་ནི་ཁྱོད་ཀྱི་དར་ཟབ་ཀྱི་ལྭ་བ་མ་ཡིན་ནམ

 

ཉིན་མཚན་ཀུན་ཏུ་དྲན་པའི་ཁྱོད

ལང་ཚོ་ཡི་ནུ་འབུར་ཟུང་བྲང་ཁར་ལྕི་ཞིང

དཀྱུས་རིང་མིག་ཟུང་ནི་ཐེ་ཀོར་གྱི་སྙན་ཚིག་དང་འདྲ་བར

རོ་བཅུད་དེ་ཉམས་སུ་མྱངས་ཚར་རྒྱུ་མི་འདུག

 

  སྒྲོལ་མ་ཁྱོད་ཀྱི་མིག   སྒྲོལ་མ་ཁྱོད་ཀྱི་མཆུ་སྒྲོས

སྒྲོལ་མ་ཁྱོད་ཀྱི་ཡོད་ཚད

མི་ཚེ་གང་བོའི་བརྩེ་དུང་གི་བག་དྲོའི་ཁྲོད

སྦྲང་ཆུང་དེ་ཡིས་ཚིམ་པ་མེད་པར་མྱོང་རོལ་བྱེད་ན་འདོད་ཨང

 

རྩོམ་ཁུངས། ༢༠༠༥ལོའི་གངས་རྒྱན་མེ་ཏོག

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།