བདུད་བཞི་བཅོམ་ལ་མཉམ་བཞག་མཚོན་གྱི་འཁོར་ལོ་འདི།།
  བྱང་ཆུབ་ཤིང་གི་དྲུང་དུ་བསྐོར་བའི་འབྲས་བུ་ལ།།
  མཚན་དཔེ་རི་མོའི་རྒྱན་པའི་ཤཱཀྱ་ཐུབ་པའི་སྐུ།།
  རྩྭ་མཆོག་གྲོང་ནས་མྱ་ངན་འདས་བ་དེ་ལ་འདུད།།
   ངས་འདི་གར་ཤཱཀྱ་ཐུབ་པ་མྱ་ངན་ལས་འདས་བའི་སྐུ་འདྲ་བོད་ལ་བཞེངས་སྲོལ་མེད་པའི་དོགས་སློང་བྱེད་འདོད་པ་ལས་དགག་སྒྲུབ་བྱ་འདོད་མེད། སངས་རྒྱས་ཤཱཀྱ་ཐུབ་པའི་བསྟན་པ་རྒྱལ་ཁབ་མ་འདྲ་བ་མང་པོ་ཞིག་ལ་དར་ཡོད།དཔེར་ན་སིངྒ་ལ་དང་ཐྰེ་ལེན་ཊི་། ཝེ་ཏི་ནམ་།ཐ་ན་རྒྱ་ནག་སོགས་མང་པོར་དར་ཡོད།  ལུང་པ་དེ་དག་ན་བདག་ཅག་གི་སྟོན་པ་མྱ་ངན་ལས་འདས་བའི་སྐུ་འདྲ་མང་པོ་མཐོང་རྒྱུ་ཡོད་པས་ང་ཚོས་ལུང་པ་དེ་དག་རུ་ཡོད་མེད་དོག་པ་ཅི་ཡང་བྱེད་དགོས་དོན་མི་འདུག་མོད།
  འོན་ཀྱང་བོད་ཀྱི་སེ་འབྲས་དགེ་གསུམ་གཙོ་བྱས་བའི་མདོ་སྟོད་སྨད་ཀྱི་དགོན་པ་དག་ན་བདག་ཅག་གི་སྟོན་པའི་སྐུ་མྱ་ངན་ལས་འདས་བའི་སྐུ་འདྲ་ཞིག་ད་ལྟའི་ཆར་མཐོང་མྱོངས་མཁན་དཀོན་པོ་རེད་སྙམ།  དེས་རྐྱེན་ཕྲན་གྱིས་འདིར་དོག་སློང་ཕྲན་བུ་ཞིག་བྱེད་འདོད་བྱུང་།  དོག་སློང་འདི་ཡང་ཤེས་འདོད་ཀྱི་དབང་གིས་ཡིན་པ་དྲ་གྲོགས་ཚོས་མཁྱེན་པར་མཛོད།
   སྤྱིར་བདག་ཅག་གི་སྟོན་པ་འཁྲུངས་རབས་ཀྱི་ལོ་རྒྱུས་དང་འབྲེལ་བའི་ཞལ་ཐང་སོགས་མང་པོ་ཡོད།དེ་དག་གི་ནང་དུ་སྟོན་པ་འཁྲུངས་ཚུལ་ནས་མྱ་ངན་ལས་འདས་བར་རི་མོ་མདོར་བསྡུས་ཙམ་ཞིག་མཆིས་མོད།འོན་ཀྱང་བོད་རང་གི་སྟོན་པའི་སྐུ་བརྙན་བཞེངས་སྲོལ་ཞིག་ལ་སྟོན་པ་མཉམ་བཞག་གི་སྣང་བརྙན་མ་གཏོགས་མྱ་ངན་ལས་འདས་བའི་སྐུ་རྒྱལ་ཁབ་གཞན་ན་ཡོད་པ་བཞིན་མི་འདུག
  སྤྱིར་སྟོན་པའི་བསྟན་པ་ང་ཚོ་བོད་ལུང་པ་ལས་ཐེག་དམན་གྱི་བསྟན་པ་དར་བའི་གོང་གི་རྒྱལ་ཁབ་དེ་དག་ལ་སྔོན་དུ་དར་ཡོད།
   རྒྱལ་ཁབ་དེ་དག་ལ་སྟོན་པ་མྱ་ངན་ལས་འདས་བའི་སྐུ་བརྙན་བཞེངས་སྲོལ་དར་ནས་དུས་རབས་མང་པོ་ཕྱིན་ཡོད།སྤྱིར་སྟོན་པའི་མཛད་རིམ་ཆ་ཚང་ཞིག་བཞེངས་དགོས་ཚེ།ངེས་བར་དུ་སྟོན་པ་མྱ་ངན་ལས་འདས་བའི་སྐུ་འདྲ་བཞེངས་དགོས་བར་འདོད།  འོན་ཏེ་བོད་ཀྱི་མི་རྣམས་རྣམ་རྟོག་ཤུགས་ཆེན་ཡོད་པས་སྟོན་པ་མྱ་ངན་ལས་འདས་བའི་སྐུ་འདྲ་བཞེངས་ན་རྟེན་འབྲེལ་མི་ལེགས་པར་བསམ་པ་ཡིན་སྲིད།
   ནང་པའི་གཞུང་ལུགས་མང་པོ་ན་ཡང་སྟོན་པས་བདུད་བཞི་བཅོམ་ཚུལ་གསུངས་ཡོད།
  དེ་ཡང་བྱང་ཆུབ་ཤིང་དྲུང་དུ་སང་ཉིན་ཐོ་རངས་ལ་མངོན་པར་རྫོགས་པའི་སངས་རྒྱས་ཀྱི་ཡོད་ན།དེ་རིང་དགོང་མོ་ལྷའི་བུའི་བདུད་བཅོམ་པ་དང་།དེ་ནས་ཐོ་རངས་ཀྱི་དུས་སུ་ཉོན་མོངས་བའི་བདུད་བཅོམ་པ་རེད།ཐ་མ་རྩྭ་མཆོག་གྲོང་ནས་ཕུང་པོའི་བདུད་དང་འཆི་བདག་གི་བདུད་བཅོམ་ཚུལ་སོགས་གསུངས་ཡོད་པས་དེར་རྣམ་རྟོག་ཞིག་སྐྱེས་དགོས་དོན་མི་འདུག་སྙམ།
  མ་ཟད་གཞུང་ལུགས་མང་པོ་ཞིག་ན་སྟོན་པའི་སྐུ་གཟུགས་དེ་སྡུག་བདེན་གྱི་ཕུང་པོ་ཡིན་མིན་ལ་རྩོད་པ་ཡང་མང་པོ་ཡོད།  བདག་ཅག་གི་སྟོན་པའི་མཛད་པ་བཅུ་གཉིས་ཞེས་ཐུན་མོང་གི་སྣང་ངོར་མཛད་པ་བསྟན་པའི་ནང་གི་ཐ་མ་དེ་རྟག་འཛིན་ཅན་གྱི་སྣང་ངོར་མྱ་ངན་ལས་འདས་བ་བསྟན་པ་འདི་རེད།འོན་ཀྱང་བོད་མི་རྣམས་རྣམ་རྟོག་གིས་འཕོངས་སྟེ།  མཛད་པའི་ཐ་མའི་སྐུ་འདྲ་ཞིག་བཞེངས་པ་ལ་ཡང་རྟེན་འབྲེལ་སོགས་འགྲིག་མིན་གྱི་དབང་གིས་མ་བཞེངས་ཚེ་ཆ་མ་ཚང་བ་ལྟ་བུ་འདུག་སྙམ།
   གང་ལྟར་བདག་ཅག་གི་སྟོན་པའི་བསྟན་པ་དར་སའི་ལུང་པ་གཞན་དང་བསྡུར་ནས་བཤད་ན།ང་ཚོ་བོད་པ་ཚོ་ལུང་པ་གཞན་ལས་རྣམ་རྟོག་གི་མཇུག་མ་རིང་པོ་ཞིག གང་ནས་དར་མིན་མི་ཤེས་ཀྱང་དེའི་བག་ཆགས་ཤུགས་ཆེན་ཞིག་བོད་མི་རྣམས་ཀྱི་སེམས་སུ་འཇགས་འདུག་པ་འདི་ཡ་མཚར་བ་ཞིག་རེད། འདི་ནི་ཆོས་ལུགས་ཀྱི་ཤུགས་རྐྱེན་ཞིག་ཡིན་ནམ་མི་རིགས་ཀྱི་གཤིས་ཀ་ཞིག་གང་ཡིན་མི་ཤེས།
   ཡང་ཕྱོགས་གཞན་ཞིག་ནས་བསམ་བློ་བཏང་སྟེ་དཔྱད་ན། བོད་མི་རྣམས་མི་རིགས་གཞན་ཞིག་ལས་རི་བོང་ཅལ་འདྲོགས་ཀྱི་རྗེས་འབྲངས་ལ་ཡང་དགའ་མཁན་ཞིག་རེད།དཔེར་ན།མི་སྐད་གྲགས་ཅན་ཞིག་གིས་བཤད་ཚེ་དེ་བདེན་པར་འཛིན་པ་དང་བཟུང་ནས་དེའི་ལྡོག་ཕྱོགས་སུ་བཤད་ཚེ་མཁས་བླུན་ཆ་ཚང་གིས་དགག་སྒྲུབ་ཚ་བོ་རེ་སྤྲོད་ཀྱི་ཡོད།
   ངས་འདིར་དཔེ་མཚོན་ཞིག་གི་སྒོ་ནས་བཤད་ན།བོད་ཀྱི་རྒྱལ་ས་ལྷ་སའི་གཙུག་ལག་ཁང་གི་སྟོན་པའི་སྐུ་བརྙན་དེ་བཤད་རྒྱུན་ཞིག་ལ།བདག་ཅག་སྟོན་པ་དགུང་ལོ་བཅུ་གཉིས་ཀྱི་ཚད་ཞིག་ཡིན་ཚུལ་བོད་མི་རྣམས་ཀྱི་རྣ་ལམ་དུ་བྱང་ཡོད།གཙུག་ལག་ཁང་གི་སྟོན་པའི་སྐུ་བརྙན་དེ་རབ་བྱུང་གི་རྟེན་ཅན་གྱི་སྐུ་བརྙན་ཞིག་ཡིན་པ་ཚང་མས་གསལ་བོ་མཐོང་ཡོད།   གལ་སྲིད་དེ་ལྟར་ཡིན་ན་བདག་ཅག་སྟོན་པ་དགུང་ལོ་བཅུ་གཉིས་ཀྱི་དུས་སུ་ད་རུང་ཁྱིམ་པའི་རྟེན་ཅན་ཡིན་པས་བཤད་ཚུལ་དང་གནས་ཚུལ་གཉིས་འགལ་བ་ཡིན་མོད།ང་ལྟ་བུ་ཞིག་གིས་འདི་ལྟར་བཤད་ན་དད་པའི་རྗེས་འབྲངས་པ་ཚོ་ང་ལ་ཚིག་པ་ཟ་སྲིད། འོན་ཀྱང་ཚིག་པ་ཟོས་ཀྱང་དངོས་བོའི་གནས་ཚུལ་དང་བཤད་ཚུལ་གཉིས་འགལ་ཡོད།  དེ་མིན་གཞན་ཞིག་རི་བོང་ཅལ་འདྲོགས་ཀྱི་རྗེས་སུ་འབྲང་བ་ང་ཚོའི་དུས་རབས་འདི་ལ་ཡང་།
  དགེ་ཆོས་ལགས་ཀྱིས་གངས་སེང་མེད་ཚུལ་ཞིག་གསུངས་དུས་ཆ་ཚང་གིས་དེའི་རྗེས་སུ་འབྲང་སྟེ།གངས་སེང་ཟེར་བ་ཞིག་མེད་ཚུལ་བོད་ནང་གི་སློབ་ཆེན་གྱི་དགེ་རྒན་དང།ཤེས་ཡོན་པ་ཚང་མས་མ་གྲོས་གཅིག་མཐུན་ལྟ་བུའི་དུས་རབས་ཉི་ཤུའི་ལོ་རབས་བརྒྱད་བཅུ་ནས་བཟུང་།དེ་རིང་ད་རུང་དགེ་ཆོས་ཀྱི་གསུངས་རྒྱུན་ལ་དད་མོས་བྱེད་ཀྱི་ཡོད། ཡིན་ཡང་དེང་སང་གངས་ནང་ན་དོམ་དཀར་བོ་ཡོད་པ་མངོན་སུམ་དུ་མཐོང་ཡོད། མ་ཟད་སྟག་དཀར་བོ་ཡང་མང་པོ་མཐོང་ཡོད།དེ་ཡིན་ན་རིག་པས་དཔྱད་ན་གངས་སེང་གངས་ནང་དུ་ཡོད་ཆོག་པ་མ་ཟད།མདོག་ཀྱང་དཀར་བོ་ཡིན་ན་ཆོག་པས་ཚངས་དབྱངས་རྒྱ་མཚོའི་གསུངས་པ་དང་འགལ་མེད་དུ་གྱུར་ཡོད།  དེས་རྐྱེན་མཁས་པ་ཚོས་བཤད་ཚུལ་ལ་མགོ་བོ་གུག་གུག་དང་ཐལ་མོ་སྦྱར་རྐྱང་བྱས་ན་རང་མགོ་རང་གིས་སྐོར་བ་དང་གཅིག་མཚུངས་རེད།མཁས་བའི་གསུང་ཚུལ་ལ་རིག་པས་དཔྱད་རྒྱུ་གལ་ཆེན་ཡིན་སྟབས་བདག་ཅག་གི་སྟོན་པས་ཀྱང་དཔྱད་པ་བྱེད་དགོས་ཚུལ་གསལ་བོ་བྱས་ཏེ་གསུངས་ཡོད་པ་འདིར་འབྲི་དགོས་བ་མི་འདུག་སྙམ།  རྟོན་པ་བཞི་ཡི་ནང་ཡང་གང་ཟག་ལ་མི་རྟོན་ཆོས་ལ་རྟོན་ཅེས་གསུངས་བ་འདི་ཅི་འདྲའི་གནད་འཁེལ་བ་ཞིག་རེད།  གང་ལྟར་གོང་གི་དོག་པ་འདི་དག་དྲ་ཐོག་གི་དཔྱད་བརྗོད་པ་ཚོས་བདག་ལ་གསལ་བྱེད་ཞིག་གནང་ཐུབ་པའི་རེ་བ་ཤིན་ཏུ་ནས་ཆེ།ལྷག་པར་དུ་ཡང་གདན་ས་ཁག་གི་དགེ་བཤེས་གསེར་རི་འདྲ་བོ་ཚོས་གསལ་བྱེད་གནང་ཚེ་དེ་ལས་ལྷག་པའི་བཀའ་དྲིན་ཆེ་བ་གང་ན་ཡོད།
  རིག་པའི་གཏམ་ལས་འཁྲུངས་བའི་མཛའ་མོ་འདི།།
  དད་པའི་རྗེས་འབྲང་ཚོགས་ཀྱིས་མི་འདོད་ཀྱང་།།
  དཔྱོད་ལྡན་རིག་པའི་བུ་ལ་བག་མར་སྦྱིན།།
  ཆོས་ཀྱི་རྗེས་འབྲང་བུ་ཆུང་སྐྱེ་ལ་ཤིན་ཏུ་རེ།།
                        ༢༩/༡༠/༢༠༡༢ལ་བྲིས།

རྩོམ་ཁུངས། ངེད་དྲ་བ།