གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མཇལ་མ་མྱོང་བའི་མདའ་ཚན་པ་མགོན་པོ་ཚེ་རིང་།

2013-05-05 12:35:00 རིག་འབྱུང་དོན་གྲུབ་བཀྲ་ཤིས། ཀློག་གྲངས། མཆན ཡོད།

           ༡)
  ངས་མདའ་ཚན་པ་མགོན་པོ་ཚེ་རིང་ཐོག་མར་ངོ་ཤེས་ས་ནི་དྲ་ཐོག་ནས་ཡིན། དེ་ཡང་ཁ་བརྡ་དྲ་བའི་ཐོག་ནས་ཡིན། ཁ་བརྡ་དྲ་བ་འདི་ཕྱི་ལོ་༢༠༠༨ལོའི་དབྱར་ཁར་དྲ་སྒོ་ཕྱེས་པ་རེད། མདའ་ཚན་པས་ཀྱང་དུས་དེ་ནས་བཟུང་ཁ་བརྡའི་ཐོག་ལ་རྩོམ་འབྲི་འགོ་བཟུང་འདུག ངེད་གཉིས་ཐོག་མར་རྩོད་ལ་ཐུག་ས་ནི་ལྗང་བུའི་སྐོར་ལ་ཡིན། དེ་ནི་ཅོལ་ཆུང་གི་རྩོད་པ་ཞིག་ཡིན། ཅོལ་ཆུང་གི་རྩོད་པ་དེའི་སྐོར་ལ་ན་ནིང་ངེད་ཀྱིས་གསལ་བཤད་ཞིག་ཀྱང་བྲིས་དགོས་ཐུག་སོང་།  དེའི་རྗེས་སུ། ངས་རང་གི་ཆུང་དུས་ཀྱི་ཕྱིར་དྲན་འགའ་ཁ་བརྡའི་སྟེང་དུ་བཀོད་པ་དེ་ཚོའི་གཅིག་གི་མཆན་བུའི་ཁོངས་སུ། ཁོང་གིས་ངའི་ཕ་རྒན་སུ་ཡིན་ཞེས་ཐེངས་འགའ་ལ་དྲིས་འདུག རྒྱུ་མཚན། ངའི་ཕ་རྒན་གྱིས་ཧི་ནན་རྫོང་(རྨ་ལྷོ་སོག་རིགས་རང་སྐྱོང་རྫོང་ཡང་ཟེར)གི་བྲག་དམར་སློབ་ཆུང་དུ་དགེ་རྒན་ཡུན་རིང་བྱས་བ་རེེད། ངས་ཀྱང་སློབ་ཆུང་དེ་རུ་འགྲིམས། མགོན་པོ་ཚེ་རིང་གིས་ཀྱང་དེ་རུ་དགེ་རྒན་གནང་མྱོང་ཡོད་པ་འདྲ། གང་ལྟར། ངས་ཁོང་ལ་ངེད་ཀྱི་ཕ་རྒན་སྐོར་གློག་འཕྲིན་བརྒྱུད་ནས་བཏང་བ་ཡིན། ཁོང་གིས་ལན་དུ། ཁྱེད་ཀྱི་ཕ་རྒན་ངས་ངོ་ཤེས་ཀྱི་མི་འདུག་ལབ་འདུག རྗེས་སུ་ཕ་རྒན་ལ་ཡང་ངས་མགོན་པོ་ཚེ་རིང་ཨེ་ཤེས་ཟེར་ནས་ཐེངས་གཅིག་དྲིས་བ་ཡིན། ཕ་རྒན་གྱིས་ལན་དུ། ངེད་གཉིས་དགེ་གྲོགས་མ་རེད། ཁོང་རྗེས་སུ་ཞང་ཐོག་ནས་མཐོང་མྱོང་ཡོད་ཟེར།
          ༢)
  ཕྱི་ལོ་༢༠༠༩ལོའི་དབྱར་ཁ་ནས་ངས་ཁ་བརྡའི་རྩོམ་སྒྲིག་གི་ལས་ཀ་བྱས་བ་ཡིན། ལས་ཀ་དེ་ཁྱོན་ལོ་གཉིས་ལྷག་ཙམ་བྱས་བ་ཡིན། ངེད་ཀྱིས་རྩོམ་སྒྲིག་གི་ལས་ཀ་བྱེད་རིང། ཁ་བརྡའི་ཐོག་གི་ལེགས་རྩོམ་རྩེ་གྲས་རིགས་ཕྱོགས་སུ་བསྡུས་ནས་ལོ་དེབ་ཅིག་འདོན་ཐུབ་ན་བསམ་ནས་རྩོམ་ཡིག་རྣམས་འདེམས་པ་ཡིན། ལས་དོན་དེའི་ཆེད་དུ་ཐབས་ཤེས་ཀྱང་ཐེངས་འགའ་བྱས་བ་ཡིན།   འོན་ཀྱང་། ལས་འཆར་དེ་རྗེས་སུ་འགྲུབ་མ་སོང་། གང་ལྟར་ལེགས་རྩོམ་དེ་ཚོའི་ཁོངས་སུ། མགོན་པོ་ཚེ་རིང་གིས་བྲིས་བའི་"མཚོ་ངོགས་ལ་བལྟ་སྐོར་ཕྱིན་པ"་དང་"ཨ་ཕའི་ཁ་ཆེམས"་གཉིས་ཡོད། ཨ་ཕའི་ཁ་ཆེམས་ཟེར་བ་དེ་ངས་ཐེངས་འགའ་ལ་བཀླགས་མྱོང་།  སྙན་ངག་དེའི་དུམ་བུ་ཞིག་ནི་འདི་ལྟར།
ཉིན་ཞིག་ལ་ཨ་ཕ་ཤི་འགྲོ་གི་རེད།
ནམ་ཞིག་ལ་ཤི་རྒྱུ་ཡིན་པ་སུས་ཀྱང་ཤེས་དཀའ།
ཨ་ཕ་ཤི་དུས་སུ།
ཨ་ཕའི་རོ་ཁྱེར་ལ། ལ་དྭགས། འབྲས་ལྗོངས། ཡང་ན་འབྲུག་ཁོངས་ཀྱི་བོད་ཀྱི་ས་མཚམས་ཤིག་ཏུ་ཁྱེར་ལ།
ཨ་ཕའི་རོ་བྱ་རྒོད་ལ་ཟ་ཆུག
ཨ་ཕའི་རོ་ཤ་དུ་ཁ་དང་ཀོ་དུ་ཁ་བྱོས་ལ་བྱ་རྒོད་ལ་ཟ་ཆུག
ཨ་ཕའི་རུས་གོག་རྡོ་བར་ལ་བརྡུང་སྟེ་ཞིབ་ཞིབ་བཟོས་ནས་བྱ་རྒོད་ལ་ཟ་ཆུག
ཁྱེད་ཚོས་གདོང་པར་ཁྲག་མི་འཐོར་བའི་ཆེད།
ཕྱེ་སྐྱ་ཐོབས་ཀྱི་ཐོབས་ཀྱི་རྡོ་བར་ལ་རྡུངས།
  གཞན། དུས་ཚོད་གསལ་བོ་མི་དྲན་མོད། གླེང་མོལ་ཞིག་གི་བར་གསེང་དུ་དགེ་འདུན་རབ་གསལ་གྱིས་ཕྲན་ལ། "རྩོམ་འབྲི་ན། མགོན་པོ་ཚེ་རིང་གི་མཚོ་ངོགས་ལ་བལྟ་སྐོར་ཕྱིན་པ་ལྟ་བུ་ཕྲིས་ར་"ཟེར་བའི་སྐད་ཆ་དེ་འདྲ་ཞིག་གསུངས་བ་ད་དུང་ཡང་ངའི་སེམས་ན་གསལ་ལྷང་ངེར་འདུག
         ༣)
  ཕྱི་ལོ་ཉིས་སྟོང་བཅུ་ལོའི་དབྱར་ཁར་ཨ་ཁུ་པད་མ་འབུམ་གྱི་རྩར་ཕྱིན་པའི་སྐབས་ཅིག་ལ།  ཨ་ཁུ་པད་མ་འབུམ་གྱིས་དེབ་ཤོག་སྒམ་གསུམ་བསྐུར་དགོས་ཡོད། འུ་གཉིས་སྦྲགས་ཁང་ལ་ཅིག་འགྲོ་ཟེར། ངེད་གཉིས་ཀྱིས་དེབ་ཤོག་སྒམ་གསུམ་དེ་འཁྱེར་ནས་སྦྲགས་ཁང་ལ་ཕྱིན་པ་ཡིན། ངས་དེབ་འདི་དག་སུ་ལ་བསྐུར་གི་ཡོད་དམ་ཟེར་ནས་དྲིས། ཨ་ཁུ་པད་མ་འབུམ་གྱིས་ལན་དུ། འདི་ཚང་མ་མགོན་པོ་ཚེ་རིང་ལ་བསྐུར་གི་ཡོད་། མགོན་པོ་ཚེ་རིང་གིས་ཁོང་ལ་ཚང་མ་བསྐུར་ཤོག་ཟེར་གི མི་དེས་དེབ་ཅིག་ཀློག་གི་ར་ཀློག་གི་ར། རྒྱ་ཡིག་གི་དེབ་ཀྱང་མང་པོ་ཀློག་གི་འདུག དེབ་རྐྱང་རྐྱང་ལ་འཐམས་ནས་བསྡད་འདུག་ཟེར།
         ༤)
  ཁ་བརྡའི་སྟེང་དུ་མགོན་པོ་ཚེ་རིང་གིས་བྲིས་རྩོམ་བརྒྱ་ལྷག་སྤེལ་ཡོད་པ་རེད། དེ་དག་མདོར་དྲིལ་ལ་བརྗོད་བྱ་ཆབ་སྲིད་ལ་འབྲེལ་བ་དང་སྐད་ཡིག་ལ་འབྲེལ་བ། ལོ་རྒྱུས་ལ་འབྲེལ་བ་བཅས་རེད། ཁོང་གི་བྲིས་རྩོམ་གཅིག་པོ་མ་ཡིན་པར་ཁོང་གིས་བཏབས་པའི་མཆན་བུ་དེ་དག་གི་ཁྲོད་ན་ཡང་ལེན་རྒྱུ་མང་པོ་ཡོད། ཁོང་ནི་བརྗོད་བྱ་བྱེ་བྲག་པ་གཅིག་གི་སྒང་ལ་བགྲོ་གླེང་བྱས་ན། དེའི་གཏིང་ཟབ་ས་ལ་འཛུལ་འགྲོ་མཁན་ཞིག་ཡིན།  ལྷག་པར་དུ་བརྡ་སྤྲོད་ཀྱི་སྐོར་ལ། དགེ་འདུན་རབ་གསལ་དང་ཁང་གསར་རྡོ་རྗེ་སོགས་དང་མཉམ་དུ་བགྲོ་གླེང་བྱས་བའི་མཆན་བུ་ཡིད་འཕྲོག་པ་མང་པོ་བཀླགས་རྒྱུ་ཡོད། ད་དུང་། ད་ལྟ་ངེད་ཀྱི་དྲན་ངོས་སུ་ཡོད་པ་ལྟར་ན། མཁས་དབང་ཐུབ་བསྟན་སྦྱིན་པས་དགེ་འདུན་རབ་གསལ་ལ་བརྡ་སྤྲོད་སྐོར་གྱི་དེབ་གསར་ "སྨྲ་སྒོའི་ལྡེ་མིག་" ཟེར་བ་དེར་ཞུས་དག་ཅིག་གཏོང་རོགས་ཟེར་ནས་རེ་སྐུལ་ཞུས་བའི་སྐབས་སུ། རབ་གསལ་གྱིས་མཁས་དབང་ཐུབ་བསྟན་སྦྱིན་པར། ཁ་ཎ་སྒྲ་ན་མགོན་པོ་ཚེ་རིང་ཡོད་རེད། ཁོང་བརྡ་སྤྲོད་ལ་མཁས་པ་རེད། ཁོང་ལ་ཡང་ཅིག་སྟོན་ཐུབ་ན་ཡག་པོ་ཡོད་རེད་ཟེར་ནས་གཞེན་སྐུལ་བྱས་བ་ཡིན་ཟེར།
           ༥)
  ང་རང་མགོན་པོ་ཚེ་རིང་གི་བྲིས་རྩོམ་ཁག་དང་མཆན་བུ་དག་བཀླགས་མྱོང་མཁན་ཞིག་ཡིན་པའི་ཆ་ནས། ཁོང་གི་བྲིས་རྩོམ་མང་ཆེ་བར། བརྗོད་པ་ཐུང་ཞིང་གོ་བདེ་བ། བརྗོད་བྱའི་དོན་གསལ་བ། ཚིག་རྣོ་བ་བཅས་ཀྱི་ཡོན་ཏན་དག་འཛོམས་ནས་ཡོད། འོན་ཀྱང་། ཁོང་གིས་བཏབས་པའི་མཆན་བུའི་ཁོངས་སུ། ལྐུགས་པ་དང་གླུའུ་ནག བླུན་རྒན། རོང་སྐྱག སྨྱོན་པ་སོགས་ཀྱི་ཐ་སྙད་དག་ཀྱང་མཐོང་རྒྱུ་ཡོད་ལ། ཁོང་ནི་གཞན་གྱིས་བྲིས་བ་ལ་མཐའ་གཅིག་ཏུ་གུས་བཀུར་ཞུ་མཁན་དང་ལེགས་སོ་ཟེར་མཁན་ཞིག་ཀྱང་མ་རེད། ཁོང་ལ་སོ་སོས་གང་བསམ་པ་དང་དྲན་པ་དེ་གཞན་ལ་མི་བསྟུན་པར་ཁ་ཐུག་ཁ་ཐུག་ལ་བྲིས་ནས་འགྲོ་བའི་གཤིས་ཀ་ཞིག་ཀྱང་འདུག་དྲན་ཡོད།
           ༦)
  རྩོམ་རིག་ཆེད་མཁས་བསྟན་འཛིན་བདེ་སྐྱིད་ཀྱིས་བོད་ཡིག་ལ་བར་སྟོང་འཇོག་དགོས་བའི་བསམ་ཚུལ་ཞིག་དབྱིན་ཡིག་ཏུ་བྲིས་བ་རེད། རྗེས་སུ་བོད་ཡིག་ཏུ་ཁོང་གི་ཨ་ཕས་བསྒྱུར་འདུག བསྟན་འཛིན་བདེ་སྐྱིད་ཀྱི་རྩོམ་དེ་ལ་དབྱིན་ཡིག་གི་དྲ་བ་དང་བོད་ཡིག་གི་དྲ་བའི་ཐོག་ཏུ་བགྲོ་གླེང་ཤུགས་ཆེ་བྱུང་བ་རེད། སྐབས་དེར། བོད་ཡིག་དྲ་བ་ཁག་ཏུ་བསམ་ཚུལ་དེར་དགག་པ་རྒྱག་མཁན་ཧ་ཅང་མང་པོ་བྱུང་ཡོད། འོན་ཀྱང་། མགོན་པོ་ཚེ་རིང་ནི་བསྟན་འཛིན་བདེ་སྐྱིད་ཀྱི་བསམ་ཚུལ་དེར་རྒྱབ་སྐྱོར་ཞུ་མཁན་ཐོག་མའི་གྲས་ཡིན་། དེའི་སྐོར་ལ་ཁོང་གིས་མཆན་བུ་འདི་འདྲ་ཞིག་བྲིས་ཡོད།   "བོད་ཡིག་འབྲི་སྟངས་ལ་ བསྒྱུར་བཅོས་ཤིག་ བྱེད་དགོས་ཀྱི་འདུག་ ཅེས་ སྔོན་མ་ཞིག་ནས་ བཤད་བསྡད་ཀྱི་ཡོད། དེ་ནི་ ང་བཅོས་སྒྱུར་ལ་ དགའ་དྲགས་པ་དང་། སྲོལ་རྒྱུན་ལ་ སྡང་དྲགས་ནས་ མིན་པར། ལག་ལེན་ཁྲོད་ དཀའ་ངལ་ མང་པོ་ཞིག་ མཐོང་གི་ཡོད་པ་དང་། དཀའ་ངལ་དེ་ སེལ་བ་ལ་ བསམ་བློ་མང་པོ་ཞིག་ གཏོང་ཁུལ་བྱས་ནས་ བཤད་གི་ཡོད་མ་གཏོགས་ བསམ་བཏང་དྲན་སྐྱེན་དང་ མ་བརྟག་གཡམ་རྒྱུགས་ བྱས་ནས་བཤད་གི་ཡོད་པ་མ་རེད། གསར་ཞེན་ཆེ་མདོག་གིས་ བཤད་གི་ཡོད་པའང་མ་རེད། མང་པོ་ཞིག་ལ་ བོད་ཡིག་ཀློག་པའི་ དགའ་སྣང་བརླག་གི་ ཡོད་པ་ དངོས་སུ་མཐོང་ན་ དེ་ལ་ཐབས་ཤེས་ཤིག་ བྱེད་དགོས་པ་རེད་མ་གཏོགས་ བོད་ཀྱི་བུ་གུའི་ སློབ་སྦྱོང་ རྐུབ་ན་ཡོད་ ཟེར་ནས་ རྒྱུག་རྡུང་བཏང་ནས་ ཡོང་ཐུབ་ཐབས་ ཁོ་རང་ ཡོད་པ་མ་རེད།"
          ༧)
  ཕྱི་ལོ་༢༠༡༡ལོར་སྟོན་ཁར་ཕ་ཡུལ་ནས་ཕྱིར་ལོག་པའི་རྗེས་ནས་མགོན་པོ་ཚེ་རིང་ན་འདུག མགོན་པོ་ཚེ་རིང་ན་ནས་སྐུ་ཚེའི་འཕེན་པ་མ་རྫོགས་བར་དུ། ཨ་ཁུ་པད་མ་འབུམ་ཁོང་ལ་བལྟ་རུ་ཐེངས་གཉིས་ཕྱིན་པ་ཡིན་ཟེར། ཁོང་སྐུ་སྙུང་ནས་ཟས་ཁོག་ནས་འཇུ་མ་ཐུབ་པར་ཕྱིར་སྐྱུགས་དགོས་བའི་གནས་སྟངས་ཀྱི་སྐབས་སུ་ཡང། ཁོང་གིས་དེབ་ཀློག་མཚམས་འཇོག་གི་མི་འདུག་ཟེར། ད་དུང་། བྲུ་ཤ་ཟེར་བའི་ཡུལ་གྲུ་དེའི་སྐོར་ལ། རྒྱ་ཡིག་གི་ཡིག་ཚགས་ཁག་དང་དབྱིན་ཡིག་གི་རྒྱུ་ཆ་མང་པོ་འཚོལ་བསྡུ་བྱས་འདུག་པ་མ་ཟད་དེ་དག་གི་སྐོར་ལ་ཅིག་འབྲི་དགོས་ཀྱང་ཟེར་གི་འདུག་ཟེར། བདུན་གསུམ་གྱི་སྔོན་དུ་ཁོང་ལ་ཁ་པར་གཏོང་དུས། ཁོང་གིས་སྐད་ཆ་མང་པོ་བཤད་མི་ཐུབ་པར་། ད་འུ་གཉིས་ཀྱིས་མཚམས་འཇོག་ཟེར་གི་འདུག་ཟེར། གང་ལྟར། ཡིད་སྐྱོ་བ་ཞིག་ལ་བོད་ཀྱི་རྩོམ་པ་པོ་ངར་མ་འདི་ང་ཚོ་དང་གཏན་དུ་གྱེས་སོང་། རྩོམ་ཐུང་འདི་ནི་དམ་པ་ཁོང་ལ་རྗེས་དྲན་གྱི་སླད་དུ་ཡིན།
 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།