གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ནག་པོའི་སྙན་ངག་གསར་བ་འགའ།

2015-01-15 12:33:54 ནག་པོ། ཀློག་གྲངས། མཆན ཡོད།

 IMG_1790.JPG

            ཁྱེད་གྲུབ་ཚུལ།

ཁྱེད་ལྟོགས་སྐོམ་ལས་གྲུབ།
ཁྱེད་དབུལ་ཕོངས་ལས་གྲུབ།
ཁྱེད་བསྟན་བཅོས་གྲངས་མེད་ཀྱི་རླངས་པ་ལས་གྲུབ།
ཁྱེད་སྤྲིན་པ་ནག་པོའི་ཁ་གཏད་དུ་གྲུབ།
ཁྱེད་སྒེའུ་ཁུང་ཆུང་ཆུང་ཞིག་གི་ངུ་འབོད་ལས་གྲུབ།
ཁྱེད་རྫི་བོ་ཞིག་གི་རྨི་ལམ་ལས་གྲུབ།
ཁྱེད་རྣོ་སྐུད་ཕྲ་མོའི་འཕག་འཚག་ལས་གྲུབ།
ཁྱེད་གཡུ་བྱུར་མུ་ཏིག་གི་ཕྲ་རྒྱན་ལས་གྲུབ།
ཁྱེད་མི་ཁའི་འདེག་འཇོག་ལས་གྲུབ།
ཁྱེད་གཙང་པོའི་འགོ་ཁུངས་ལས་གྲུབ།
ཁྱེད་བྱེ་མ་བཞིན་ཟགས་འགྲོ་བའི་འཁོར་བ་ལས་གྲུབ།
ཁྱེད་གློག་གི་འཁྱུག་གར་ལས་གྲུབ།
ཁྱེད་ཉིན་བྱེད་ཀྱི་གོར་མ་ལས་གྲུབ།
ཁྱེད་ཚ་གྲང་ལས་གྲུབ།
ཁྱེད་འདི་ཕྱིའི་འདོད་པ་ལས་གྲུབ།
ཁྱེད་མཚན་ལམ་རིང་མོའི་གླུ་སྐད་ལས་གྲུབ།
ཁྱེད་རྡུལ་ཕྲ་རབ་ཀྱིས་གྲུབ།
ཁྱེད་དུས་ཚོད་ཀྱི་ཟིལ་བ་ལས་གྲུབ།
ཁྱེད་རྟ་ཕོའི་འཚེར་སྐད་ལས་གྲུབ།
ཁྱེད་མ་འོངས་ལུང་བསྟན་ལས་གྲུབ།
ཁྱེད་ངག་མི་སྨྲ་བའི་རྡོ་རྗེ་ཕ་ལམ་ལས་གྲུབ།
ཁྱེད་རྫོགས་མཐའ་མེད་པའི་ཚེ་འབར་ལས་གྲུབ།
ཁྱེད་འབྲོང་གཡག་གི་འཚེར་ས་ལས་གྲུབ།
ཁྱེད་རྩྭ་རྐང་རེ་རེའི་ངུ་དངངས་ལས་གྲུབ།
ཁྱེད་གསང་བའི་ལོ་ཟླ་ལས་གྲུབ།
ཁྱེད་ལྷག་བསམ་གྱི་མྱ་ངན་ལས་གྲུབ།
ཁྱེད་འབྲི་མོའི་འོ་ཞོ་ལས་གྲུབ།
ཁྱེད་ཁ་བའི་འདུ་འགོད་ལས་གྲུབ།
ཁྱེད་གཡེར་དྲིལ་གྱི་རེ་སྒུག་ལས་གྲུབ།
ཁྱེད་རྡོག་ཁྲེས་ལྕི་མོ་ཞིག་ལས་གྲུབ།
ཁྱེད་གླག་གི་འདུ་བྱེད་ལས་གྲུབ།
ཁྱེད་ཕྱི་ནང་ལས་གྲུབ།
ཁྱེད་ས་གཞི་དང་ནམ་མཁའ་ལས་གྲུབ།
ཁྱེད་བྱེ་ཐང་ཆེན་མོའི་ངུ་ཟུག་ལས་གྲུབ།
ཁྱེད་ཕ་མའི་ཤ་མཆིན་ལས་གྲུབ།
ཁྱེད་སྲོག་གི་གོ་དོན་ལས་གྲུབ།
ཁྱེད་མི་ཡི་སྙིང་བོ་ལས་གྲུབ།
ཁྱེད་བོད་ནས་གྲུབ།

མེ་ལྕེས་དམུས་ལོང་གི་ཟོལ་གྱིས་བལྡགས
ཁོག་པར་ལག་སྙོབ་ཇི་ལྟར་བྱས་ཀྱང
རླུང་གི་བྱ་བྱེད་དེ་སྐད་ཅིག་ལ་འགགས་པས
ཁོང་གསེང་གི་མིག་ཆུ་དེ་ཕ་ཡུལ་ནས་ས་རུ་ཟགས
འཛམ་གླིང་ནས་གཙང་པོར་གྱུར
           2014/10/8ཉིན་པེ་ཅིང་དུ།

             དཀྱིལ་འཁོར།

སྐྱེ་བ་མཚོན་བྱེད་དུ་སྔགས་ཡིག་འགའ་བསླབས
ལྕེ་རྩེ་ལ་ཁྲག་གི་རི་མོ་བྲིས
ལམ་གྱི་ན་ཟུག་དྲན་ནས དུས་ཚོད་ཀྱིས་གཟུགས་དང་སྒྲ་བོར
གློག་དམར་ནི་འཆི་ཕོའི་བར་གསེང་དུ་འཁྱུག

ཁུ་ཁྲག་གཙང་པོ་བཞིན་སྐམ
བཙོན་ནས་བླངས་པའི་གླུ་སྐད་ཐོས
ཆང་རག་གི་གདོང་དང་ཆགས་པ་མཐོང

སྤར་མོས་ཟིན་ཚད་ཀྱིས་མེ་ཏོག་ཅིག་གི་ཚེ་སྲོག་བསླུས
ཚིག་དང་ཐ་སྙད་ཀྱི་གསང་བ་ནི
ཕ་རོལ་གྱི་རྫི་བོ་དེའི་ནམ་མཁའ་ནས་ཤུགས་ཆེན་པོས
འུར་ཟིང་མེད་པར རྩྭ་མགོའི་ཟིལ་བ་བཞིན་འཐོར་བར་བྱེད

རྨི་ལམ་མམ་འཇིགས་སུ་རུང་བའི་ཞེད་སྣང་དེ་ལས་སྒྲོལ་བར
ངས་ཀྱང་འཕག་འཚག་བྱེད།

“གཟུགས་མེད་ཀྱི་འདུས་བྱས་འཚོལ།”
          2014/10/23ཉིན་པེ་ཅིང་དུ།

            ཕྱི་རོལ་ཏུ་སྨྲས་པ།

སྨྲ་ལྕེ་སྦྲིད་བྱེད་དུ་བཟའ་བཏུང་བརྗེད་པར་གྱུར

སྐྱེ་འཆིའི་གཡུལ་འཐབ་ཀྱི་དབང་གིས
རང་གི་གོམས་ལོབས་སུ་གྱུར་བ་དག
མིག་དང་རྣ་བས་ཟིན་ཚད་དག ལམ་གྱི་གདམ་ཀ་དག
རླུང་གིས་གསེད་ཀྱིན་པའི་དྲི་བཙོག་པོ་དག
ཚེགས་མེད་དུ་ཀློག་ཐུབ་པའི་ཀེ་རི་སེའི་གསུང་རབ་དག
སྐོང་དགོས་པའི་རེའུ་མིག་དག
འཁོར་བའི་དཔེ་རུ་བཀོད་པའི་སྲོག་གི་ཆུང་མ་དང་མོའི་ནང་མི་དག
མེ་ལོང་ངོས་ཀྱི་རྡུལ་ཕྲ་རབ་དག
གཡུ་ངོར་སོང་བའི་སྤུན་ཟླ་དག རྟ་ཕོ་དག
སོས་དལ་བག་ཕེབས་ངང་གཞན་ནས་བསྐྱུར་བའི
དམུས་ལོང་གི་འཚོ་བ་དེའང་བརྗེད་ཚར

ལྕག་ཚན་མཐོན་པོར་ཕྱར་ནས
ཕྱེ་ལེབ་ཁྲ་ཁྲ་དེ་དབུགས་ཧལ་ཧལ་གྱིས་གཙེས་རྒྱུ་མང་དྲགས་པས
སྟོན་ཀའི་ཡོལ་བར་ཁ་དོག་མེད་པའང་བརྗེད་ཚར
          2014/10/26ཉིན་པེ་ཅིང་དུ།

 

(མཆོད་མེའི་པར་དབང་གཞན་གྱིས་དགོལ་མི་རུང)
 

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།