སྒྱོགས་མདེའུ།༼རང་མོས༽
ལག་མགོ་གཉིས་རྒྱབ་ནས་བསྣོལ་ཏེ
ལུས་པོ་དྲང་དྲང་གིས་བཀའ་ཚིག་སྒྲོག་པའི་ཁྱེད་རང་གང་ནས་ཕེབས
བྲག་དམར་གཏོར་བྱེད་ཀྱི་ཐོག་རྒོད་དེའང
ཤེལ་གྱི་ཡོལ་བས་ཕྱི་རོལ་ཏུ་ཕུད་ནས
མལ་གདན་འཇམ་པོ་དངུལ་ལོར་གྱིས་བརྩིགས་པར་བྱིལ་བྱིལ་གཏོང་དུས
རྫོགས་ལྡན་གྱི་དུས་རབས་སླེབ་ཉེར་ཡོད་ཨང
ཡིན་ཡང་འདམ་ཉོག་སྒྱོ་བ་གང་ཁང་ཁུར་བའི་རྒན་པོ་ཞིག་རླུང་གིས་ཁུར་སོང་ལ
ནད་ཡམས་མཚན་མ་གང་བཟུང་བའི་བུད་མེད་ཅིག་འདྲེ་རུ་གྱུར་སོང
ཉི་འོད་ཚ་ནས་ཚ་རུ་གྱུར་ཏེ
མེ་ཏོག་འགའ་དང་བྱིས་པ་འགའ་མཉམ་དུ་སྲེག་དུས
ང་ཚོའི་ཁྱིམ་སྦུག་ན་ཆུ་དཀར་ཡོལ་གང་ཡང་མེད་པ་འདི་ཅི
རྨ་ཆུ་ནི་གམ་ནས་བཞུར་ཡང
མགྲིན་པ་ནི་བཀྲེས་པས་ངར་ཡོང
སྤང་རྩྭ་འཇོམས་བྱེད་ཀྱི་བྱེ་མའི་དམག་ཚོགས་ནི
ཁྱེད་ཀྱིས་གང་ཞིག་ནས་ཁྲིད་ཡོང་བ་ཡིན་ནམ་ཅི
མི་སེར་རེའི་ལག་ལ་ཤོག་ལོར་བརྒྱ་རེ་བཞག་ཚེ
སུས་ཀྱང་རང་གི་རྣམ་ཤེས་བཙོང་ངེས་ཞེས
ཚོགས་ཐོག་ནས་ཡང་ཡང་གླེང་དུས
བསེ་མོག་ཕོག་པའི་གསར་བུ་རྣམས
གྱོལ་མ་ལྡིང་གིས་ཁྱེད་ཀྱི་གཞུང་ལས་ཁང་དུ་འོང་ངེས
སྤྲིན་པ་སྲབ་མོ་དག་སྤྲིན་པ་མཐུག་པོས་གཡོགས་ཏེ
འགྱིག་ཁུག་སྲབ་མོ་དག་འགྱིག་ཁུག་མཐུག་པོས་གཡོགས་ཏེ
ཀུ་ཤུ་དམར་བོ་ཞིག་དང་མཚུངས་པའི་ན་ཆུང་མ་འགའ
བསམ་དབང་དྲན་དབང་མེད་པར་རུལ་མྱགས་སུ་གཏོང་དུས
ལྕགས་དང་ཐོ་བའི་བར་དུ་བཙིར་བའི་བརྩེ་སེམས་ལ
ཡང་ན་ཤ་དང་ཁྲག་གི་འདོད་གཡེམ་ལ
དངུལ་ལོར་ག་ཚོད་རིན་ནམ
ལྐོག་ནས་བླངས་པའི་ཉོ་ཚོང་གི་སྒྲ་འདི་ལ
ཉན་ཐབས་ཡེ་ནས་མི་འདུག
2009/11/16
རྩོམ་ཁུངས། ངེད་དྲ་བ།