གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མཚན་མོ་ཞིག་ལ།༼རང་མོས༽

2013-05-02 14:34:00 སྐྱབས་ཆེན་བདེ་གྲོལ། ཀློག་གྲངས། མཆན ཡོད།


མཚན་མོ་ཞིག་ལ
ཆང་ཁང་གྲངས་མེད་པ་ཞིག་མཆོད་མེ་གྲངས་མེད་ཀྱི་ཚུལ་དུ་བཞད
སྙན་ངག་པ་རྣམས་ཀྱི་ལང་ཚོ  མར་ཁུ་དང་མཉམ་དུ་ཐགས1

མཚན་མོ་ཞིག་ལ
ཁྱོད་ཀྱིས་གཏམ་རྒྱུད་བཤད་ནས
ང་རང་ལུང་སྟོང་ཞིག་ཏུ་ཁྲིད
ལུང་བའི་ཕུག་གི་ཁ་མ་གྲག་པའི་བུ་མོས2
ང་ལ་སྐྱེ་བ་གསུམ་གྱི་སྡུག་བསྔལ་བཤད

མཚན་མོ་ཞིག་ལ
ཅེ་སྤྱང་གི་ངུ་ཟུག་དང་རོལ་མོ་བའི་ཆོ་ངའི་ཁྲོད་དུ
ང་རང་གཅེར་བུར་བུད་དེ
གངས་དང་ལྷགས་པ་ལུས་ལ་གྱོན
ཐག་རིང་ལ་འགྲོ་རྩིས་བྱས
སེམས་ཀྱི་བརྩེ་བ་ཡོད་ཚད
ལམ་ལམ་དུ་འཁྱུག་པའི་གློག་དམར་ལ་བསྲེ་རྩིས་བྱས

མཚན་མོ་ཞིག་ལ
 རླུང་འཚུབ་ཀྱི་ནང་གི
ཉེས་མེད་ཉེས་འགེལ་བྱས་པའི་རྣམ་ཤེས་འཁྱམ་པོ་དག་གི
རུས་པ་རྣོན་པོས ང་ཡི་སོག་སྲུབས་ལ་རྨ་ཁ་བཏོད
དགུ་ཚིགས་ཀྱི་དཔུང་བའི་ངོས་སུའང་རྨ་ཁ་བཏོད
            ༢༠༡༣ལོའི་ཟླ་༤བའི་ཚེས་༣༠ཉིན་ལན་ཀྲུ་ནས་བྲིས།

1 ཐགས་ནི་འབྲོག་སྐད་དེ། བཤེར་བའི་རིགས་དལ་མོར་འཛད་ཀྱིན་པའི་དོན།
2 བོད་ཀྱི་དམངས་སྒྲུང༼མི་རོ་རྩེ་སྒྲུང༽ནང་གི་མི་ཞིག

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།