སྒྲིབ་གཉིས་མུན༵་པས་བཏང་བའི་ཡེ་ཤེས་ཀྱི།།
འོད་སྣང་ཕྱོགས་སུ་བཞད་པའི་རྩེ་དགའ་ཅན།།
གང་ཁྱོད་སྤྱི་གཙུག་རལ་བའི་ཅོད་པན་དུ།།
སྲིད་ཞིའི་གདུང་བ་སེལ༵་བའི་དཔྱིད་དུ་བསྟེན།།

བཙོ་སྦྱངས་ངལ་བས་དག་པའི་ཀཉྪ་ནར།།
འབུམ་ཕྲག་འོད་སྟོང་རྒྱལ་བོའི་སྣང་བ་ཡིས།།
འཁྱུད་མཚུངས་མཚན་དཔེའི་གཟི་བྱིན་ལམ་མེ་བ།།
ཐུབ་དབང་ལྷ་ཡི་ལྷ་ལ་ཕྱག་བགྱི་འོ།།

དངུལ་དཀར་ཞུན་མ་འཁྱིལ་བའི་རླབས་ཕྲེང་རྩེར།།
མ་སྙིགས་འདབ་སྟོང་གྲོལ་བའི་གེ་སར་ལ།།
ཞབས་སེན་མུ་ཏིག་དཀར་བོ་སྙོམས་འཇུག་པའི།།
མཚོ་སྐྱེས་བླ་མ་དུས་གསུམ་ཀུན་ཏུ་བསྙེན།།

བརྒྱད་གཉིས་ལང་ཚོས་དཔལ་འཆང་གཞོན་ནུའི་སྐུ།།
སྙན་འཇེབས་ཟླ་བྲལ་ཡན་ལག་དྲུག་ཅུའི་གསུང་།།
ཨེ་ཝཾ་བདེ་སྟོང་ཡེ་ཤེས་རྫོགས་པའི་ཐུགས།།
མཁྱེན་པའི་དཔལ་སྩོལ་ལྷ་དེ་ཕྱག་གི་ཡུལ།།
ཀ་ཁ་སུམ་བཅུ་ཚང་བའི་ཚིག་བཅད་དོ།།

རྒྱལ་ཀུན་གསང་གསུམ་རྒྱན་གྱི་འཁོར་ལོའི་ཕུལ།།
རྒྱལ་སྲས་བྱེ་བའི་ཟློས་གར་ཀློང་ཆེན་པས།།
བྱིན་རླབས་མེ་ཏོག་མནྡར་ཡི་ཆར།།
འཛད་མེད་སྙིལ་བས་དེང་འདིར་ཤིས་པ་སྒྲུབས།།

མཛེས་སྐུ་ཤེལ་གྱི་འཁྲི་ཤིང་རྒྱས་པའི་རྩེར།།
ཡིད་འཕྲོག་ཞལ་གྱི་པདྨོ་འཛུམ་པའི་ལྟོར།།
ཚེམས་དཀར་ཟེའུ་འབྲུ་བཞད་པའི་ཚལ་ཡངས་ལས།།
ངག་རིག་སྦྲང་རྩིའི་དཔྱིད་འཇོ་བཅོམ་ལྡན་མ།།

གང་གི་རྣམ་ཐར་མུ་ཏིག་དཀར་བོའི་ཚལ།།
སྙན་ཚིག་གསེར་གྱི་སྐུད་པ་ལ་བརྒྱུས་ཏེ།།
དཔྱོད་ལྡན་རྣ་བའི་རྒྱན་དུ་སྦྱིན་པ་ལ།།
འཛད་མེད་གཟུངས་སྤོབས་བློ་ཡི་སྣང་བ་སྩོལ།།

རྣམ་ཐར་རྗེས་སུ་དྲན་པའི་ཀུན་རྟོག་གི་དྲི་བཞོན།།
དད་གསུམ་དཔག་བསམ་ལྗོན་པའི་འཁྲི་ཤིང་ལ་ཕྱོཊ་སྐབས།།
སྡེབ་ལེགས་ཡལ་ག་གཡོ་བའི་སྙན་ཚིག་གི་རང་སྒྲ།།
མཛུབ་རྩེ་གར་དུ་བསྒྱུར་པའི་རྗེས་ཤུལ་ལས་གསལ་བ།།

ཨེ་མ་ཛམྦུ་པྲྀཀྵའི་རྐང་འཐུང་གི།།
སྨིན་ལེགས་ཡལ་ག་འཐོར་བའི་ངོ་མཚར་དབྱངས།།
སྙན་པ་རྣ་བར་ལྷུང་བས་མིང་ཆགས་པ།།
དེ་ཡི་ཡུལ་གྲུ་འདོད་ཁམས་སྨད་ཀྱི་ཆ།།

ལུགས་གཉིས་དགེ་མཚན་དྭངས་མའི་རྩེ་དགའ་ཡིས།།
མངོན་དགའི་ཞིང་གི་ཕུན་ཚོགས་དཔལ་འཛིན་པ།།
རྨ་ཡུལ་གསེར་ལྡན་འཛིན་མའི་གདུལ་བྱའི་ཞིང་།།
བརྩེ་ཆེན་ཕྱག་རྒྱ་དམ་པོས་ཉེ་བར་བཅིངས།།

རབ་དམར་བྱུ་རུའི་མདངས་འཛིན་སྒྲ་ལྡན་མའི།།
ཟླ་ཕྲེེང་བཞད་པ་བཅུ་བའི་དམར་བོའི་ཕྱོགས།།
རྫོགས་པ་གསུམ་པའི་ལང་ཚོའི་མེ་ཏོག་གི།།
འདབ་སྟོང་རྣམ་པར་བཞད་པའི་དུས་ཚེས་ལ།།

ཁྱད་ཆོས་དྲུག་ལྡན་ཀུན་བཟང་གདོད་མའི་གཤིས།།
མ་བཅོས་སོ་མའི་རིག་པ་བྱང་ཆུབ་སེམས།།
བརྗོད་བྲལ་མི་ཤིག་སྙིང་གི་ཏི་ལ་ཀཿ །
ཕྱི་གསལ་སྐུ་རུ་ལྡང་བའི་སྐད་ཅིག་ལ།།

རིགས་རུས་ཆོ་འབྲང་སྐྱོན་གྱིས་མ་སྨད་པ།།
ཡབ་གཅིག་ཐིག་ལེ་འཛིན་པའི་སྡུག་གུ།།
སྦྲུམ་པའི་མངལ་རྒྱ་གྲོལ་བའི་ལྟས་བཟང་བོས།།
རབ་ཡངས་འཛིན་མའི་ཁྱོན་ཀུན་དོག་པོར་གྱུར།།

རྣམ་སད་གོས་ཀྱི་དུམ་བུ་སྤྲིན་དཀར་གྱི།།
ག་ཤལ་ས་ལ་ལྷུང་བཞིན་ཕྱོགས་ཀྱི་ཁྱོན།།
གངས་རིའི་མཛེས་ལྡན་ཁ་བ་རི་བའི་སྡེར།།
ཕན་བདེའི་འོད་སྟོང་སྤྲོ་བའི་ཉེར་བསྡོགས་བརྩམས།།

དེ་ཚེ་གྲུབ་རིགས་ཁྱུ་མཆོག་གིས།།
བསྟན་འགྲོའི་ཕུང་རྒུད་མུན་པའི་སྨག །
སེལ་བྱེད་སྒྲོན་མེ་འདི་ཡིན་ཞེས།།
དོན་མཐུན་མཚན་གྱི་ཅོད་པན་བྱིན།།

དྲི༵་མེད༵་རྒྱལ་བསྟན་པད་མའི་ཚལ།།
གསལ་བྱེད་འོད༵་ཟེར༵་དྲ་བ་ཅན།།
གང་གི་གསང་གསུམ་སྒྱུ་འཕྲུལ་དུ།།
བསྔགས་བརྗོད་མགྲིན་པའི་སིལ་སྙན་ཁྲོལ།།

ཞབས་སྐྱེས་འཁོར་ལོས་མཛེས་པའི་རིས།།
ཆེ་དགུའི་གཙུག་ཏུ་བཀོད་དང་ལྷན།།
འཕྲོག་བྱེད་ནག་པོའི་རྩ་ལག་གི།།
སྙིང་ལ་ཟུག་རྔུའི་ཚོར་བ་བསླངས།།

དཀར་གསལ་དབང་བོའི་གཞུ་ཡི་འཁྲི་ཤིང་རྒྱུད།།
མ་ཉམས་གཙུག་ཏུ་བཏེགས་པའི་ངོ་མཚར་གྱིས།།
ལོག་རྟོག་སྐྱེ་བོའི་ཡིད་ཀྱི་ཞིང་ས་ཡང་།།
དད་གསུམ་མྱུ་གུ་སྨིན་པའི་འབྲས་ལྡན་གྱུར།།

རྒྱལ་ཀུན་ཕྲིན་ལས་རང་གཟུགས་རྟ་བདུན་དབང་།།
མཛེས་སྡུག་མཚན་དཔེའི་འོད་ཟེར་དྲ་བ་ཅན།།
ལྷོ་གླིང་རྒྱན་དུ་བཞད་དང་ཆབ་གཅིག་པར།།
ས་གསུམ་མྱ་ངན་མེད་པའི་དཔལ་ལ་བཀོད།།

བགྲང་ཡས་བསོད་ནམས་དཔལ་ལས་ལེགས་འཁྲུངས་པའི།།
བལྟས་པའི་མི་ངོམས་མཐོང་གྲོལ་མཚན་དཔེའི་སྐུ།།
གསར་ཚེས་ཟླ་བ་དཀར་བོའི་ལང་ཚོ་བཞིན།།
སྨིན་པའི་དགེ་མཚན་སྣང་བ་ཡར་ལ་ཕྱོགས།།

དེ་ནས་བཀྲ་ཤིས་རི་མོ་ཕྱོགས་རྫོགས་པའི།།
བགྲང་བྱ་གཡས་འཁྱིལ་དུང་གི་འཛུམ་གྲོལ་ཚེ།།
འབྲི་དང་ཀློག་སོགས་བརྡ་བསྟན་ཙམ་རེས་ཀྱང་།།
མཐའ་དག་ཐུགས་སུ་ཆུད་པའི་མཛད་པ་བསྟན།།

དེ་ཚེ་དེ་ཡིས་འདོད་པའི་དཔལ་རྣམས་ཀུན།།
དྲི་བཞོན་ཤུགས་ཀྱིས་བསྐྱོད་པའི་རྐང་འཐུང་ཁར།།
ཅུང་ཟད་ངལ་གསོ་ཐོབ་པའི་ཆུ་ཐིགས་ལྟར།།
མི་བརྟན་གཡོ་བའི་ངང་ཚུལ་འདི་མཐོང་ནས།།

ཕུལ་བྱུང་ཡོན་ཏན་བྱེ་བ་འབྱུང་བའི་གནས།།
ངུར་སྨྲིག་མཚམས་སྤྲིན་གསལ་བ་ལི་ཁྲིའི་རྡུལ།།
འཕན་མེད་ཕྲག་ཏུ་བཞེས་པའི་རྣམ་ཐར་ལ།།
རྒྱལ་ཀུན་སྙིམ་པའི་མེ་ཏོག་སྙིང་ཁར་ཟུམ།།

སྡོམ་བརྩོན་མ་ལ་ཡ་དག་གི།།
དྲི་བསུང་སྣུམ་པོའི་དགའ་སྟོན་གྱིས།།
འཁོར་ཡུག་ཁྱོན་གྱི་དྲི་འཛིན་ལ།།
བདུད་རྩིའི་སིམ་པ་ལན་བརྒྱར་བྱིན།།

ལང་ཚོའི་མེ་ཏོག་ན་ཕྲ་ཡང་།།
མཁྱེན་རྩལ་རྫོགས་པའི་ཤེད་མོང་གིས།།
ལྔ་རིག་སྨྲ་བའི་མཁས་དབང་ཡང་།།
སེ་འུ་བཅུ་བའི་གྲལ་ལ་བཀོད།།

དགུང་གྲངས་བཅོ་བརྒྱད་ཆུ་མོ་བྱ་ཡི་ལོར།།
འཕགས་ཡུལ་མ་ག་དྷ་དང་མི་གཉིས་པའི།།
འབུམ་ཕྲག་འཇའ་ལུས་གྲུབ་པའི་གདན་ས་དེར།།
ཞབས་ཟུང་འཁོར་ལོའི་རེ་ཁཱ་རྣམ་པར་བཀོད།།

བཤད་སྒྲུབ་ནོར་བུའི་ལྷུན་པོ་ནས།།
ངེས་པ་དོན་གྱི་དགེ་བའི་བཤེས།།
མགོ་ཚ་ཨོ་རྒྱན་བསྟན་འཕེལ་གྱི།།
ཞབས་པད་གཙུག་གི་ནོར་བུས་བཏེགས།།

མཁས་པ་སྔ་མའི་བཀའ་སྲོལ་ལྟར།།
བརྒྱ་ཕྲག་གཅིག་དང་ཉེར་ལྔ་བོའི།།
གཞུང་གི་དཀའ་བའི་མདུད་རྒྱ་ཡང་།།
རྣམ་དཔྱོད་སོར་རྩེ་གཅིག་གིས་ཕྱེས།།

སྒོམ་བྱུང་སྒྲོ་འདོགས་གཅད་པའིི་ཡུལ།།
པོད་ལྔའི་གཞུང་གི་ཚིག་དོན་ཆ།།
ལན་རེ་ཟུང་རེ་ཐོས་ཙམ་གྱིས།།
མཐའ་དག་ཐུགས་ལ་སྙོམས་ཞུགས་པས།།

འཇམ་མགོན་ས་སྐྱ་པཎ་ཊི་ཏའི།།
མཁྱེན་རབ་ལས་ཀྱང་དཔང་མཐོ་ཞེས།།
འཛིན་མའི་ཁྱོན་གྱི་སྐྱེ་འགྲོའི་ཁ།།
དལ་བ་མེད་པར་བཟླས་བརྗོད་བརྩོན།།

གཞན་ཡང་མན་ང༵ག་སྦྲང་རྩིའི་བཅུད།།
འགྲེམ་མཛད་མཁས་དབ༵ང་དཔ༵ལ་གྱི་གོས།།
བཟ༵ང་བོའི་མཚན་གྱི་རྩེ་དགའ་ཅན།།
དད་གསུམ་སྙིང་གི་མཛའ་མོར་བསུས།།

རྡོ་རྗེ་འཆང་ནས་རིམ་པ་བཞིན།།
མེར་མེ་གཅིག་ལས་གཅིག་མཆེད་ལྟར།།
བརྒྱུད་པའི་གསེར་སྐུད་མ་ཉམས་པའི།།
རིག་འཛིན་གོང་མའི་སྙིང་གི་ནོར།།

ཚེ་གཅིག་འོད་སྐུར་གྲོལ་བའི་ལམ།།
སྙན་རྒྱུད་རིན་ཆེན་ནོར་བུའི་དབྱིག །
མཁའ་འགྲོའི་ཞལ་རླངས་མ་ཉམས་པ།།
མི་ཤིགས་སྙིང་གི་ཐིག་ལེར་གདམས།།

མཁས་མང་སྐལ་ལྡན་ཤིང་རྟའི་ཉེར་དྲངས་པའི།།
རྒྱལ་དབང་པད་མ་ཀ་རའི་དགོངས་པའི་བཅུད།།
སྡེ་གསུམ་ཀློང་དགུའི་ཆོས་ཚུལ་གཱངྒ་མ།།
རྫོགས་པར་ཁོང་དུ་བསྐྱིལ་བའི་གྲགས་པ་འབར།།

དེ་ཚེ་བུ་རམ་ཤིང་བས་སྡེ་སྣོད་གསུམ།།
རང་སྲས་འོད་སྲུང་ཆེན་པོར་གཏད་པ་ལྟར།།
ཐུབ་བསྟན་སྤྱི་དང་གསང་བ་སྙིང་ཐིག་གི།།
གདམས་ཟབ་རྨད་བྱུང་ཆོས་ཀྱི་གན་མཛོད་གཏད།།

བྱམས་བརྩེའི་གྲིབ་བསིལ་ཡངས་པའི་འཁོར་ཡུག་ཁྱོན།།
སྲིད་ཞིའི་ཚ་གདུང་མིང་གི་ལྷག་མ་རུ།།
བྱེད་པའི་འཕགས་རིགས་བཤེས་གཉེན་གཞན་དང་གཞན།།
བསྟེན་པའི་སྐལ་བཟང་ཆོ་ག་རྫོགས་ཡོད་མིན།།

རྨོངས་པའི་བརྟན་པ་འཕྲོག་བྱེད་ནོར་གྱི་ཕུལ།།
མང་ཐོས་འོད་བརྒྱ་འབར་བའི་སྣང་བ་ཅན།།
ཡེ་གསང་རྫོགས་ཆེན་པད་མའི་རྩ་ལག་ཏུ།།
སྨིན་པས་ཐང་ལྷོད་བགྱིད་ལ་ཡིད་མ་རངས།།

འོན་ཀྱང་ཚིག་སྐམ་འཇའ་རིས་ཚོན་བརྒྱ་བ།།
མཚར་དུ་རྫོགས་ཀྱང་ལྔ་ལམ་ལ་ཚེ།།
ཞི་བའི་དཔལ་ལ་ཉེ་བར་ཕན་པའི་ཟོང།།
གནམ་སྟོང་ཟླ་བའི་རྗེས་སུ་བསྙེག་སྙམ་ནས།།

སྔོན་བྱོན་གྲུབ་རིག་བཞད་ལྡན་ནགས་ཀྱི་ལྗོང་།།
ཡིད་འོང་རྡོ་བས་གཅལ་བཀྲམ་གཞལ་མེད་ཁང་།།
བྱིན་རླབས་དྲི་བསུང་འཐུལ་བའི་ལྡིང་ཁང་དུ།།
རིམ་གཉིས་ཏིང་འཛིན་འགུགས་ལ་གཅིག་ཏུ་དྲིལ།།

རྙེད་དཀའ་འཇིག་སླ་དལ་འབྱོར་ཤིང་ལོའི་འདབ།།
ཟིན་མེད་བྱ་བཞག་ལྷོ་ཡི་དྲི་ལེན་མས།།
ཚུལ་མིན་ཡུལ་དྲུག་སྒྱུ་མའི་ཐང་ཆེན་དུ།།
ཁྱེར་བའི་ཕྱི་ཐག་སྟུང་བ་དེ་དང་དེར།།

མི་བརྟན་གཡོ་བ་གྱ་གྱུའི་ལང་ཚོ་ཅན།།
རང་སེམས་ཞི་བར་བསྒྱུར་བའི་དྲང་སྲོང་གིས།།
མཆོག་ཏུ་མི་འགྱུར་གཉུག་མའི་ཏིང་འཛིན་ལ།།
སྙོམས་འཇུག་བགྱིས་པའི་རྣམ་ཐར་སུ་ཡིས་གཞལ།།

སྒྲོན་དྲུག་འོད་གསལ་ནང་དབྱིངས་རིག་པའི་གདངས།།
རྟོགས་གོམས་མཐའ་རུ་ཕྱིན་པའི་ཉམས་ལེན་གྱིས།།
ལྷུན་གྲུབ་སྣང་བ་བཞི་ཡི་རྩལ་རྫོགས་པའི།།
གསང་ཆེན་ཨ་ཏིའི་ཤིང་རྟ་གཞན་ཡོད་མིན།།

དེ་ཡང་སྤྱི་མཐུན་ལས་དམན་མཐུ་བཙན་པོས།།
དགེ་ལེགས་ཕན་བདེའི་མྱུ་གུ་གཅོད་པའི་མཚོན།།
ངན་སྤྱོད་ཀླ་ཀློ་གདུག་པའི་མེ་ཡི་ཆར།།
ཁ་བ་དཀར་བོའི་མུ་འཁྱུད་མཐོངས་སུ་བབ།།

དགེ་སྡིག་མི་རྩི་རྒྱུ་འབྲས་ལོག་པར་སྤྱོད།།
ཡ་རབས་བྱ་བ་མི་སྲིད་ཐན་དུ་བལྟས།།
བསྟན་འཛིན་མཆོག་རྣམས་ཁྲིམས་ལ་སྦྱར་བ་སོགས།།
ཆེར་སྙིགས་དུས་ཀྱི་རང་མཚང་རྡོལ་བའི་སྐབས།།

གསར་མཐོང་འཁྲུལ་སྣང་ར་རིའི་རྡུལ།།
འཆི་བ་བྲལ་བའི་བདུད་རྩི་ཞེས།།
སྟོང་འུར་ནམ་མཁའི་འབྲུག་གི་སྒྲས།།
འཛིན་མའི་ཁྱོན་ལ་ཕུང་བ་སྦྱིན།།

དཔལ་སྟུག་བཅུད་ཀྱིས་ཡོངས་གཏམ་པའི།།
ཕ་ཆོས་ནུ་ཞོས་མྱོས་བུམ་ལ།།
ལོག་རྟོག་སོ་རྣོན་སྟ་རེའི་དབལ།།
བཏབ་པས་བསྟན་སྲོག་ལྷག་མར་བྱས།།

དུས་འདི་ཉིད་ན་འདྲེན་པ་མཆོག །
བརྩེ་བྲལ་མི་ཡི་སྲིན་པོ་འགས།།
བགྲང་བྱའི་འཁྱུད་འཁོར་ཉེར་གཉིས་བར།།
འཇིགས་རུང་མུན་པའི་འོབས་སུ་བཅུག །

ཤུགས་དྲག་ཞུགས་ཁའི་ས་བོན་ཚིག་པོ་ལས།།
མེ་འབྲས་གཡུལ་དུ་སྨིན་པའི་རེ་སྒུག་ལྟར།།
གྱ་གྱུའི་ཀུན་རྟོག་ཡོན་པོའི་ཆུ་རིས་ཀྱིས།།
མ་ནོངས་དུས་འདིར་ལུས་པ་སྲིད་མཐའ་ཙམ།།

འོན་ཀྱང་འདམ་ལས་སྐྱེས་པའི་པད་མ་ལ།།
འདམ་གྱི་དྲི་མས་གོས་པ་མེད་པ་ལྟར།།
གང་ཐུགས་ནགས་མའི་འཁྲི་ཤིང་རྒྱས་པའི་ཁར།།
ཉམས་རྟོགས་མྱུ་གུ་སྨིན་པའི་གྲོགས་སུ་གྱུར།།

ངོ་མཚར་འགྱོག་འགྲོ་བདུན་གྱི་ཤུགས་འཆང་བ།།
སྣང་བྱེད་བདག་པོའི་འགྲོས་ཀྱིས་མཚོན་མིན་པའི།།
ཐེག་མཆོག་རྡོ་རྗེ་རྩེ་མོའི་འཕྲུལ་ཐབས་ཀྱིས།།
མཐར་ཐུག་སྐུ་བཞིའི་རྒྱལ་ས་མངོན་དུ་བྱས།།

ལོག་ཞུགས་གོར་མའི་བ་དཔང་མཐོ་བ།།
མཐའ་བྲལ་རིག་ལམ་རྡོ་རྗེའི་མེ་ཆར་གྱིས།།
བསྙོལ་བའི་གྲགས་དཀར་སྐྱེ་བ་ལྔ་བའི་དབྱངས།།
ཕྱོགས་ཀྱི་བུ་མོའི་ཐོས་འཛིན་རྒྱན་དུ་བྱས།།

ཆེར་སྙིགས་སྔོ་བསངས་མཛེས་མའི་གདོང་བ་ལས།།
ངན་རྟོག་སྤྲིན་གྱི་འཚུབ་མ་ཉམས་སྨད་དེ།།
གཡོ་རྒྱུའི་དུག་ཆར་འབེབས་པའི་མཚམས་འཇོག་སྐབས།།
ཞབས་ཟུང་གསེར་གྱི་ཤིང་རྟ་རང་ཡུལ་བསྐྱོད།།

མེ་ཕོ་འབྲུག་གི་གནམ་ལོ་ནས།།
འཆད་རྩོད་རྩོམ་པའི་ཕྲིན་ལས་ཀྱིས།།
རྒུད་པའི་དཔུང་ལ་སྐྱེངས་པ་སྦྱིན།།
ཐུབ་བསྟན་མེ་རོ་རྨང་ནས་གསོས།།

མཁྱེན་བཟང་ལྷ་ཡི་ཡུར་བ་རུ།།
སྡེ་གསུམ་ཆོས་ཚུལ་ཉལ་འགྲོའི་རྒྱུན།།
ཕུལ་བྱུང་འདྲེན་པའི་ཤིང་རྟ་ཞེས།།
ས་གསུམ་གྲགས་པ་དཀར་བོས་གཏམས།།

ངང་བ་གཡུ་འབྲུག་འདུ་བའི་ཁུགས་སོ་རུ།།
ཐུབ་བསྟན་བཤད་སྒྲུབ་བཀྲ་ཤིས་ཆོས་འཁོར་གླིང།།
རྟེན་དང་བརྟེན་པའི་བཀོད་པ་རབ་བསྐྲུན་ཏེ།།
ཕུན་ཚོགས་ཕན་བདེའི་སྒོ་འཕར་ཡངས་པོར་ཕྱེས།།

ས་གཞི་གཡུ་ཡི་མེ་ལོང་དག་པ་རུ།།
རྩྭ་ལྗང་མྱུ་གུའི་ཤམ་བུ་བཀྲམ་པའི་ཕང་།།
ས་ལུས་ཁྱུ་ཚོགས་རྩེ་བའི་དོ་ར་དེར།།
གཞེན་འདེབས་ཚིག་གི་མེ་ཏོག་ཅུང་ཟད་གཏོར།།

གཡའ་རྫ་གང་ནས་བབ་པའི་ཉལ་འགྲོ་མས།།
དཀར་འཛུམ་ལྦུ་བ་འགྲེམ་པའི་མུ་ཏིག་ཚལ།།
དྲི་བྲལ་སྒེག་ལྡན་འཆི་མེད་རྫིང་རིང་དུ།།
རྒྱུ་སྐར་བདག་པོའི་དཔུང་ཚོགས་བཀྲམ་པ་བཞིན།།

བགྲང་ཡས་འདབ་སྟོང་འཛུམ་པའི་གེ་སར་གྱི།།
རྡུལ་ཕྲེང་གསེར་གྱི་ཕྱེ་མ་བརྡལ་བའི་གཞིར།།
བུང་བའི་ན་ཆུང་མགྲིན་པ་གྲོལ་བའི་གླུས།།
དྲི་ཟའི་རྒྱུད་མང་སྟོང་གི་དཔལ་ལ་འགྲན།།

ལྷུགས་ལྷུགས་འདབ་གཤོག་སྟོང་དུ་གྲོལ་བ་ཡིས།།
མཛེས་མཛེས་མིག་གི་གཟི་ལེན་པད་དཀར་ལྗོན།།
ལྡེམ་ལྡེམ་རླུང་གིས་བསྐྱོད་པའི་གར་སྟབས་ནི།།
ལྷག་ལྷག་དད་པའི་ལྷ་ཕྱག་འཚལ་བ་བཞིན།།

མཚར་སྡུག་དབྱར་གྱི་དཔལ་མོ་དར་བ་མོས།།
འདུ་བྱས་ཛཱ་ལི་ཀ་དང་ཀ་མ་ལ།།
དགུན་གསུམ་འཐོར་རླུང་དྲག་པོའི་འཕྲུལ་འཁོར་གྱིས།།
བསྙིལ་བས་མི་རྟག་སྣང་ཤེས་གསལ་བར་མཚོན།།

དེ་ལྟའི་ཡིད་འོང་ཆོས་ཀྱི་མདུན་ས་དེར།།
ཆོས་བརྒྱད་དུག་ཆུའི་རྫིང་ལ་མི་ཆགས་པར།།
གཉུག་སེམས་ཨུཏྤལ་མཛེས་པའི་དགའ་ཚལ་དུ།།
ཏིང་འཛིན་བཅུད་ཀྱིས་འཚོ་བའི་སྐྱེས་ཆེན་དང་།།

དགག་སྒྲུབ་རིགས་པའི་ཆ་ཤས་ཕྲ་མོས་ཀྱང་།།
ཀུན་རྨོངས་ལོག་རྟོག་ལྕུག་མའི་འཆིང་ཐག་རྒྱ།།
གྲོལ་ཏེ་ཐུན་མིན་རིག་པའི་གཞུང་འཛིན་པ།།
གཅིག་ལས་གཅིག་མཚར་ཕན་ཚུན་འགྲན་བཞིན་ལྷགས།།

དེ་ཚེ་རབ་ཡངས་འཛིན་མའི་དོ་ར་རུ།།
ཐུབ་བསྟན་བཤད་སྒྲུབ་ཀ་མ་ལ་ཡི་ཚལ།།
ལྷུགས་པར་གྲོལ་བའི་ཟབ་གསལ་སྦྲང་རྩིའི་བཅུད།།
གཞིབ་པའི་སྐལ་བཟང་མཐའ་ནི་གཞལ་ཡོད་མིན།།

བརྒྱུད་ལྡན་བླ་མའི་ཐུགས་བརྩེའི་རལ་ཀླུང་ལས།།
སྙན་རྒྱུད་ཆོས་དཀར་ཛ་ཧུའི་བུ་མོའི་རྒྱུན།།
བབ་པ་མི་ཤིག་སྙིག་གི་ཡོལ་གོ་རུ།།
བསྐྱིལ་བའི་མོས་ལྡན་སྐལ་བ་བཟང་བོར་བྱས།།

དེ་ནས་ཐུན་མོང་གདུལ་བྱའི་སྣང་ངོ་རུ།།
ཞིང་འདིར་མཛད་པ་རེ་ཞིག་རྫོགས་ཚུལ་གྱིས།།
བདག་ནི་ཀུན་མཁྱེན་དྲི་མེད་འོད་ཟེར་དང་།།
དགོངས་པའི་ཆུ་བོ་མ་ལུས་གཅིག་འདྲེས་ཏེ།།

མངོན་དགའ་ལ་སོགས་དག་པའི་ཞིང་རྣམས་སུ།།
རྒྱལ་སྲས་སྤྱོད་པ་རྒྱ་མཚོར་དབང་འབྱོར་བས།།
ཐུགས་རྗེ་བྱིན་རླབས་སྔར་ལས་ལྷག་པ་ཡིན།།
ཞེས་སོགས་ངོ་མཚར་གདམས་ངག་ཞལ་ཆེམ་དང་།།

རྨད་བྱུང་ཕྲིན་ལས་སྣང་བའི་མུ་འཁྱུད་ཀྱིས།།
ཟླུམ་པོར་བཅིངས་པའི་སྐུ་སྐྱེ་རྟ་བདུན་དབང་།།
སླར་ཡང་གདུལ་བྱའི་དཔལ་དུ་འཇུག་པ་ཡི།།
ཞལ་བཞེས་འདུས་པ་ཡོངས་ལ་བརྩེ་བས་གནང།།

དགུང་གྲངས་དོན་བརྒྱད་ཆུ་མོ་བྱ་ཡི་ལོའི།།
ཟླ་ཕྲེང་ལང་ཚོ་འཛུམ་པའི་ཐ་མའི་ཆ།།
དཀར་ཕྱོགས་རྫོགས་པ་གསུམ་པའི་ཐུན་མཚམས་ལ།།
སྒྱུ་འཕྲུལ་གཟུགས་སྐུའི་བཀོད་པ་དབྱིངས་སུ་བསྡུས།།

རླབས་ཆེན་བསོད་ནམས་ཤིང་རྟས་ཉེར་དྲངས་པའི།།
རྒྱལ་སྲས་སྤྱོད་པ་ས་འཛིན་སྤོ་ན་མཛེས།།
མཛད་ཕྲིན་དགེ་ལེགས་སྣང་བ་འབུམ་འགྱེད་དེ།།
རེ་ཞིག་ཞི་བའི་དབྱིངས་སུ་གཟིམས་པར་གྱུར།།

སྐབས་དེར་གཉུག་སེམས་ལྷ་ཡི་ཌཱཀི་མས།།
ཉི་ཁྲི་ཆིག་སྟོང་ལས་རླུང་སྙིག་མའི་སྲོག །
དོགས་མེད་ཟོས་པས་རབ་སྔངས་ནོར་འཛིན་མ།།
ལུས་ཀུན་འདར་བཞིན་གྱེན་དུ་འཕགས་སྙམ་བྱུང་།།

ཆེ་བ་སྟོང་ལྡན་དུ་མའི་གཙུག་གི་རྒྱན།།
གདུང་སྐུ་ཞུགས་ལ་སྦྱངས་པའི་ངོ་མཚར་དགེས།།
རྣམ་མང་གདུལ་གདུལ་བྱའི་བསོད་ནམས་ས་གཞི་ལ།།
ཕན་དང་བདེ་བའི་ལོ་ཏོག་ཅི་ཡང་བསྐྲུན།།

འཕོ་ལྟུང་ཟུག་རྔུའི་སྤྲོས་པ་རང་སར་དག །
འཕོ་མེད་རིག་སྟོང་ཆོས་སྐུའི་རང་ཞལ་མཐོང་།།
འཕོ་འགྱུར་རྟོག་པའི་དྲ་བ་དབྱིངས་སུ་ནུབ།།
འཕོ་ཆེན་འཇའ་ལུས་རྡོ་རྗེའི་གོ་འཕང་གྲུབ།།

ཨ་ཧོ་བརྒྱུད་གསུམ་བླ་མའི་ལམ་སྲོལ་མཆོག །
ཆོས་ཕུང་བརྒྱད་ཁྲིའི་ཡང་སྙིང་རྫོགས་པ་ཆེའི།།
མན་ངག་སྙིང་གི་དབུས་སུ་སུམ་པ་ཡི།།
མོས་ལྡན་བདག་ཅག་སྐལ་བ་བཟང་སྙམ་སེམས།།

ད་ལྟ་ལེགས་བཤད་ཟེར་བརྒྱ་འཛུམ་པའི་རླབས།།
ཕྱོགས་སུ་འགྲེམ་པའི་བཤེས་གཉེན་ཨ་དིའི་བུ།།
གཞན་སྐྱེན་རྟ་བདུན་ཤིང་རྟས་ཉེར་དྲངས་ཏེ།།
ཞི་དབྱིངས་ཆུ་ལྷའི་ཕང་བར་ཡིབས་འདིས་སྐྱོ།།

སྲས་བཅས་རྒྱལ་བའི་ཕྲིན་ལས་ཟློས་པའི་གར།།
སྐྱབས་གཅིག་མཚུངས་མེད་བླ་མ་རིན་པོ་ཆེ།།
དྲན་པའི་གདུང་བ་དྲག་པོ་དུས་ཀུན་ཏུ།།
སྙིང་ལ་ཉལ་བའི་རེ་ཁཱ་གསུབ་དུ་མེད།།

གང་གསུང་པདྨའི་རྫིང་བུ་ལ་བརྟེན་པའི།།
ཚངས་སྤྱོད་ངུར་སྨྲིག་གསལ་བའི་ངང་མོ་འབུམ།།
དྲན་པ་ཙམ་ལས་མིག་གི་དགའ་སྟོན་དུ།།
འགྱུར་བ་མེད་འདིས་སྙིང་ཁུང་ཆུ་བཞིན་གྲང་།།

ལྔ་ཕྲག་ལག་འགྲོ་གདུག་པའི་ཁ་རླངས་ཀྱིས།།
ཐུབ་བསྟན་འཛིན་མའི་ཁྱོན་ཀུན་སྒྲིབ་འདོད་པས།།
ཉེས་སྤྱོད་སྣ་དགུའི་གང་གི་མདུན་ས་ཡང་།།
སྟོང་ལ་ཕྱོགས་པས་མགོན་ཁྱོད་ལྷག་པར་དྲན།།

ད་ནི་མཉེས་གཤིན་ཨ་ཤྭད་ཐ་ཡི་ཚལ།།
བོར་ནས་གྲགས་སྐམ་ཆུ་ཤིང་དར་མ་ལ།།
རེ་བའི་ངན་མཚང་བཀོད་མའི་ཆུ་བཞིན་དུ།།
མཐའ་དབུས་ཀུན་ཏུ་ལུད་པ་དེས་ཀྱང་སྐྱོ།།

རང་སེམས་དྲི་བྲལ་འཆི་མེད་ལམ་ཡངས་པོར།།
གསལ་བའི་སྐྱོ་སྣང་ཆུ་འཛིན་དྲ་བ་ལས།།
ལྟ་བྱེད་མཆི་མའི་གྲུ་ཆར་འགྲམ་པའི་སར།།
ལྷུང་བ་ཀུ་མུད་གསར་བའི་དོག་པ་བཞིན།།

འོན་ཀྱང་ཀུན་གཞིའི་དར་དཀར་ངོས་ཡངས་ལ།།
ལས་དམན་ཚོན་བརྒྱས་རི་མོར་བྲིས་པའི་གཟུགས།།
མངོན་པར་གསལ་བ་ཐུབ་ཆེན་ཕྱག་གིས་ཀྱང་།།
བསྐྱོད་དུ་མེད་ན་གཞན་གྱིས་ཅི་བྱར་ཡོད།།

དེས་ན་འགྲོ་ཀུན་སྲིད་པའི་གཅོང་རུང་དུ།།
དཀར་མིན་ལས་ཀྱི་ཆུ་བོས་བར་མེད་དུ།།
ཁྱེར་བ་དེ་སྲིད་བྱིན་རླབས་ལྦུ་ཕྲེང་གིས།།
ཉེ་བར་སྐྱོངས་ཤིག་འདྲེན་མཆོག་ཐུགས་རྗེ་ཅན།།

འདིར་འབད་དགེ་ཚོགས་ཟླ་བའི་འཛུམ་ཟེར་གྱིས།།
ཐུབ་བསྟན་ཀུ་མུད་དགོད་པའི་ནགས་ཀློང་དང་།།
རྣམ་མང་སྐྱེ་དགུའི་ཕན་བདེའི་ཆུ་གཏེར་ཆེ།།
ཀུན་ནས་དར་ཞིང་རྒྱས་པའི་རྒྱུར་གྱུར་ཅིག །

བདག་ཀྱང་བདག་ལྟའི་འཆིང་བ་དམ་པོ་ལས།།
ཐར་ནས་ཐར་བའི་ཁང་བཟང་ཉམས་དགའ་བར།།
ལུས་ཅན་ལུས་པ་མེད་པ་ཐམས་ཅད་ཀུན།།
འདྲེན་པའི་འདྲེན་པ་མཆོག་གི་དཔལ་ཐོབ་ཤོག །

ཚེ་རབས་ཀུན་ཏུ་དཔལ་མགོན་བླ་མ་ཡི།།
ལེགས་བཤད་བདུད་རྩིའི་དགའ་སྟོན་ངོམས་མེད་དུ།།
འཐུང་བས་རླབས་ཆེན་བྱང་ཆུབ་སྤྱོད་པ་ཡིས།།
རྒྱལ་བའི་དམ་ཆོས་མཐའ་དག་འཛིན་གྱུར་ཅིག །

ཅེས་རིས་མེད་བསྟན་འགྲོའི་སྤྱི་དཔལ་སྐྱབས་རྗེ་མུན་སེལ་རིན་པོ་ཆེའི་རྣམ་ཐར་བསྡུས་པ་འདི་ནི་སྔར་ཚིག་ལྷུག་གི་ལམ་ནས་བྲིས་པ་ཞིག་ཡོད་པ་བླ་མ་ཚེ་རིང་རྒྱ་མཚོས་རྣམ་ཐར་མཐོང་བ་དོན་ལྡན་འབྲི་སྐབས་ཞིབ་གཟིགས་གནང་ནས་ལེགས་ཆ་རྣམས་དེར་བྲིས་པས་དར་སྤེལ་མ་བྱས་པ་དེ་ཉིད་ཀྱི་འགོ་བརྗོད་དང་དང་མཇུག་རྩོམ་གཞིར་བྱས་ཏེ་བོད་རབ་བྱུང་བཅུ་བདུན་པའི་མེ་ཕག་ལོའི་ཟླ་ ༦ ཚེས་ ༡༤ ཉིན་མགོ་གྲྭ་ཨོ་རྒྱན་དཔལ་འབྱོར་གྱིས་རྫོགས་པར་བྲིས་པ་འདིས་ཀྱང་ཚེ་རབས་ཀུན་ཏུ་དཔལ་མགོན་བླ་མ་དམ་པ་གང་དེའི་རྗེས་སུ་འཛིན་པའི་རྒྱུར་གྱུར་ཅིག སརྦ་མངྒ་ལཾ།།།།

        (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།