སྐྱིད་དུས་འབྱོར་བས་ཕོངས་ཀྱང་སེམས་རྩ་དྲོ།།
སྡུག་དུས་མི་ཤ་ཟོས་ཀྱང་ཕན་པ་མེད།།
ལས་ཀྱི་རང་གཤིས་གྱོང་བའི་ལམ་མདོ་ནས།།
རྫུན་གཟུགས་ཐོད་དུ་བཟུང་ནས་བཟོད་བསྲན་བྱས།།
མི་ཡུལ་ལོང་བ་འགྲིམས་ནས་ལྟོ་བ་བགྲང་།།
ཕྱི་ཡི་པགས་པ་ཚ་བས་ཟེར་གྱི་གས།།
ལོ་ཟླའི་མཇུག་མ་དྲུད་པའི་མཐའ་མར་དེར།།
ལག་སྟོང་མཆན་དུ་བཅུག་ནས་སྡོད་ཐབས་བྲལ།།
སྐྱོར་འཐེན་མགོ་འདྲེན་བྱེད་པའི་རྒྱབ་དཔུང་མེད།།
བདག་མེད་ས་མཐར་འཁྱམས་པའི་སྤྲང་ཕྲུག་ངའི།།
དྲན་རྟེན་སོར་གདུབ་ཁུར་ནས་ཁྱོད་རང་བཙལ།།
ཁྱོད་ཀྱི་བརྩེ་བ་ཁུག་པའི་ལས་དབང་ཡོད།།
བཟང་འབྲེལ་ངན་འབྲེལ་ཟེར་བའི་རྣམ་རྟོགས་མེད།།
གཡོ་དང་སྒྱུ་མའི་བཟོས་པའི་ཁ་ཕོ་མེད།།
ཅིང་མེད་རི་ལ་འཁྱམས་པའི་ལམ་བར་ནས།།
བརྩེ་བའི་བྲང་ཤ་རློན་པ་ཁྱོད་དང་སྦྱར།།
ལྷན་འགྲོག་འཚོ་བའི་རྨང་གཞི་ཡུན་མ་རིང་།།
བྲལ་ཁའི་མཆི་མར་སྟེར་བའི་ལན་མ་རྙེད།།
གཏན་གྲོགས་འདུན་མ་དགོས་ཞེས་ཞུ་མ་ཕོད།།
དམར་ཆུང་སྙིང་གི་གསེབ་ནས་ཁྲག་དམར་འཛགས།།
ང་ལ་གཏན་སྡོད་བྱེད་སའི་ཡུལ་ཞིག་མེད།།
ཁྱོད་རང་བསུ་མ་བྱེད་པའི་ཐོབ་ཐང་དམན།།
སྙིང་གཏམ་ལག་པས་སྐྱོར་བའི་དུས་སྐབས་དེར།།
ཡིད་ཀྱི་རྒྱ་མཚོ་སྐྱོམས་པའི་གྲང་བ་འཕྱུར།།
བྲལ་བའི་དུས་ཚོད་སྐད་ཅིག་ཙམ་གྱིས་སླེབས།།
སྐྱིད་ཀྱི་འཚོ་བར་སྡུག་གི་སྔ་མ་སྐྱེས།།
ཁྱོད་ཀྱིས་སྤྲོ་ཉམས་བཏོད་པའི་ངང་ཚུལ་དེ།།
བདག་སེམས་མཆི་མས་བསྣོལ་བའི་ས་བོན་ཡིན།།
དེ་རིང་ངེད་གཉིས་བྲལ་བའི་དུས་ལ་བསླེབས།།
ཕན་ཚུན་འཁྲེང་ནས་མཆི་མ་སེམས་ལ་ལྷུང་།།
བརྩེ་བའི་འདམ་དུ་བྱིངས་པའི་མི་སེམས་གཉིས།།
ཡང་ཡང་ཐུགས་པའི་སྨོན་པ་ཤུགས་དྲག་བཅང་།།
ཚ་བའི་རྒྱ་མཚོ་འཕྱུར་བའི་རྒྱ་གར་ཡུལ།།
གར་སོང་རང་དབང་ཅན་གྱི་རྒྱལ་ཁབ་ཤིག།
ཁྱོད་ཀྱིས་མིག་ཆུས་བརླན་པའི་བདག་གི་སེམས།།
གར་སོང་རང་དབང་མེད་པའི་འདར་སིག་སིག།
ཕུ་ནུ་གཉེན་ཉེ་བཞག་ནས་རྒྱང་བཞུད་བྱས།།
དམར་པོའི་ལྟ་གྲུབ་འོག་ནས་གསང་བྲོས་བྱས།།
སྟག་ཤར་སྙིང་ཤ་ཅན་གྱི་རང་ཚུགས་དེ།།
ཁྱོད་དང་བྲལ་ཉིན་སྟར་མའི་ཁུང་བུར་འཛུལ།།
འདུས་མཐར་བྲལ་བའི་ཁྲིམས་ལ་གཡོལ་ཐབས་མེད།།
བྲལ་བའི་ཐ་མར་འཛོམས་པ་རྨི་ལམ་ཙམ།།
སྨོན་པ་བརྒྱ་ཕྲག་སྟོང་ལ་བསྐུར་ནའང་།།
བརྩེ་བའི་གཅོང་ནད་སེལ་བའི་སྐུ་རིམ་ཙམ།།
གཞན་ཡུལ་ལུང་བའི་འཚོ་བར་སྐྱོ་གར་ཞིག།
མྱ་ངན་ལྕི་མོ་སྡོང་ལོ་འཐོར་འཐོར་བྱེད།།
ལང་ཚོའི་དུས་ཚིགས་རྫོགས་པའི་ཧྲག་བར་ནས།།
ལས་འདི་ཕར་ལ་གཡུགས་ཀྱང་ཚུར་ལ་ཡོང་།།

རྩོམ་ཁུངས། ངེད་དྲ་བ།