འདི་ལ་བསུང་ལྡན་གྱི་མེ་ཏོག།།
སྣ་བའི་ཞིང་ས་ནས་མ་རྙེད།།
རྡོག་པའི་སྣེ་མོ་ན་རྒྱུ་བའི།།
རྡེའུར་གསེར་བུ་ཞིག་སྦྲུམ་ཡོད།།

ཕར་སྒོས་མཆུ་མཚོན་གྱི་རི་མོ།།
འགྲམ་པའི་སྤུ་སྟེང་ལ་མ་བཞག།
ཁྲག་གི་ཆུ་ཆེན་གྱི་གཞུང་ལ།།
གཏམ་གྱི་ཕ་བོང་ཞིག་བཞེངས་ཡོད།།

འཚོ་བའི་སྒྲུབ་ཕུག་ནས་སྒོམ་ན།།
བརྩེ་བའི་འཇིག་རྟེན་དེ་མཐོང་འོངས།།
ལས་ཅན་དག་སྣང་གི་མཁའ་འགྲོ།
བུ་མོ་ཁྱོད་རང་ལས་མི་ཆོག།

ཁ་སང་རི་ཁྲོད་ནས་བབས་པའི།།
སློང་འཛིན་གསོལ་སྙོམས་ཀྱི་དྲང་སྲོང་།།
དབྱུག་པའི་འཛིན་ལེན་གྱི་འགལ་བས།།
བུ་མོའི་མདུན་ས་ན་འགྱེལ་འདུག།

གཡོ་ཅན་སྐུ་ངོ་ཡི་མཆོད་པའི།།
བུ་མོའི་མགྲོན་ངོ་དེ་མ་ལོན།།
སེམས་ཀྱི་རྟ་ཕོ་ལ་བཅིབས་ནས།།
འོད་ཀྱི་གནས་མལ་ལ་ལོག་འོངས།།

སོ་དཀར་འཛུམ་ཆུང་གི་ལན་དུ།།
སྐྲ་ལོའི་མེ་ཏོག་དེ་གཏོར་སོང།།
ད་ནི་མིག་ཤེལ་ཡང་ཕུལ་ནས།།
བག་ཕེབས་ངལ་གསོ་ལ་ཆས་འགྲོ།

དམ་བཅའི་བྱེ་མ་ཡི་ཐང་ནས།།
བུ་མོས་གུར་བརྒྱངས་ཞིག་བྱས་སོང་།།
ད་ནི་འགྱུར་མེད་ཀྱི་ཆུ་ནས།།
དམར་པོའི་མེ་ཁ་དེ་འབུད་དོ།།

འུ་གཉིས་གཡེངས་ས་ཡི་ཚལ་ན།།
གློག་གི་མཚར་ཆས་དེ་མི་འདུག།
སེམས་ཀྱི་རོལ་ཆ་དེ་དཀྲོལ་ན།།
སྐྱིད་པའི་སྣང་དེ་རྫོགས་ཡོང་།།

རྩོམ་ཁུངས། ངེད་དྲ་བ།