༡སྤྲིན་པ་གནམ་ལ་ལྡང་ཡང་།།
སེམས་པ་ཆུ་བོའི་གཞུང་རེད།།
ཆར་ཞོད་ཆེ་བའི་ཞོགས་པར།།
སེམས་གཏམ་གནམ་ནས་ཤོར་སོང་།།

༢རྟ་ཕོའི་སྟེང་གི་རྫི་གླུ།།
རྨིག་པས་མེ་ཏོག་གཏོར་སོང་།།
ཆུང་འདྲེས་ཨ་ལན་སང་སང་།།
སྐྱི་བསེར་རླུང་བའི་གདངས་རེད།།

༣སྟོད་ཀྱི་ཆུ་བོ་ཤང་ཤང་།།
སྨད་ཀྱི་འོ་མ་ཤག་ཤག།
བར་གྱི་གསེར་བུམ་ལམ་ལམ།།
སེམས་ཀྱི་ཕྱི་ནང་ཁྱོད་ཡིན།།

༤རླུང་ལ་སྤྲིངས་བའི་ཤོག་འཕྲིན།།
མི་ཚེ་གང་གི་གཏམ་ཡིན།།
འགྱུར་མེད་རྡོ་རྗེ་ང་ཡིན།།
ང་ཡི་དགའ་དགའ་ཁྱོད་ཡིན།།

༥སྟོན་གྱི་སྡོང་ལོ་གསེར་རེད།།
གསེར་གྱི་ལམ་བུ་ཐང་རེད།།
མཆུ་སྦྱོར་མཉེན་མོ་གློག་རེད།།
ཚོར་བ་རྣོན་པོ་འཆར་རེད།།

༦རྟ་ཁ་ལྷོད་ཀྱིས་བགགས་ཏེ།།
སེམས་གཞས་དལ་གྱིས་འཐེན་དུས།།
རླུང་བུ་རྒྱུ་ཕྱོགས་རྒོད་པས།།
སྤྲིན་པ་ལྷོ་རུ་འཕུར་སོང་།།

༧ཉི་མའི་འོད་ཐིག་སྒང་ལ།།
ལག་ཟུང་རི་མོའི་གྲིབ་རིས།།
བསམ་དབང་མེད་པར་བཀོད་པ།།
རྟག་ཏུ་དྲན་པའི་རང་སྣང་།།

༨ཉི་མའི་འོད་ཆེན་གླགས་ལ།།
མར་གྱི་རང་གཟུགས་ཤོར་ནས།།
ཞུ་འདོད་བསམ་པ་ཡོད་ཀྱང་།།
ཁ་བ་མར་མར་བབས་སོང་།།

༩དུངས་བའི་ཉི་འོད་ཉིན་ལ།།
སྡང་བའི་ཟླ་འོད་མཚན་ལ།།
འཇིག་རྟེན་ཉི་ཟླ་ཟུང་རེད།།
མི་སེམས་རི་མོ་ནང་རེད།།

རྩོམ་ཁུངས། ངེད་དྲ་བ།