ཤིག
ཚེ་འདིར་ཡོང་དུས་དགའ་སྤྲོ་ཁེངས།།
ཕྱི་མར་བཞུད་ཁར་སྡུག་བསྔལ་སྨྲེ།།
དགའ་སྡུག་འདྲ་མཉམ་བྱ་བ་དེ།།
ཁྱེད་དང་འུ་གཉིས་ཡོད་པ་མཚུངས།།
ཁྱེད་ཉིད་བདག་གི་ཤ་ཁྲག་འཐུང་།།
བདག་གིས་ཁྱེད་ཉིད་སྲོག་རྩ་གཅོད།།
འདྲ་མཉམ་བྱ་བ་དེ་དག་ནི།།
ཁྱེད་དང་འུ་གཉིས་སྔོན་ལས་རེད།།
ཚེ་སྔོན་ཆད་པའི་ཤ་འཁོན་འདི།།
ད་ལྟ་འདི་ནས་སྤྲོད་པ་ཡིན།།
ཕྱི་མའི་དུས་སུ་ཡང་བསྐྱར་ཡང་།།
འུ་གཉིས་གཅིག་བཟའ་གཅིག་གསོད་བྱེད།།
བདག་གིས་ཁ་ཆེམས་ཁྱིམ་མིར་བཤད།།
ཁྱེད་ཀྱི་ཁ་ཆེམས་ཆོས་རྒྱལ་ཤོད།།
ཁ་ཆེམས་མཐུན་གཏམ་ཅན་ཡིན་ན།།
ཕྱི་མ་འུ་གཉིས་རྩོད་དྲ་མེད།།
ད་ལྟ་ཁྱེད་ཀྱི་ཕུང་བོ་འདི།།
རོང་སྨྱོན་གྲྭ་རྒན་མཐེ་བར་ནས།།
གློག་དམར་ལྟ་བུའི་སྐད་ཅིག་གིས།།
ཕྱི་མའི་གྲོང་དུ་ལྷུང་བ་ཡིན།།
འདུས་བྱའི་ཐམས་ཅད་མི་རྟག་སྟེ།།
ཁྱེད་ཀྱི་ཕུང་བོ་དེ་བཞིན་དུ།།
འབྱུང་བཞིར་ཐིམ་པའི་དུས་ལ་བབས།།
བདེ་བར་གཟིམས་དང་ཤིག་རྒན་ཁྱོད།།
རྩོམ་ཁུངས། ངེད་དྲ་བ།