ཆོས་ལྡན་གངས་ཅན་ལྗོངས་ཀྱི་ཡུལ་གྲུ་རུ།།
ཡོད་ཚད་འདྲེ་ཡིས་གནོད་པའི་བབ་ཅོལ་འདི།།
ཅལ་འདྲོགས་རི་བོང་མང་པོའི་ཚོགས་དབུས་སུ།།
རྫུན་རྐྱལ་མོ་པ་མང་པོའི་འཚོ་རྟེན་ཆགས།།

རྩམ་པའི་བྲོ་བ་ལྕེ་ཡིས་མྱོང་འདོད་མེད།།
ཟབ་ཡངས་ལྔ་རིག་ཡིད་ཀྱི་སྦུག་ན་མེད།།
སྙན་འཇེབས་བོད་སྐད་ངག་ལ་མེད་པ་འདི།།
བུ་མོའི་བགྲོད་སྟངས་ཤོར་བའི་སྔ་ལྟས་ཡིན།།

ཨོ་ལོའི་སེམས་པ་བུ་མོའི་ཕྱོགས་ལ་ཤོར།།
བུ་མོའི་སེམས་པ་གསེར་དངུལ་རྒྱན་ཆར་ཆགས།།
ཨོ་ལོ་བུ་མོའི་བར་གྱི་བརྩེ་དུང་འདི།།
རྒྱུ་ནོར་ཡོད་མེད་གཅིག་གིས་རྒྱང་དུ་བྲལ།།

བྲག་ཟུར་འུག་པའི་སྐད་ངན་མཚན་མོར་ཐོས།།
ལྕང་གླིང་འཇོལ་མོའི་གྲེ་འགྱུར་ཉི་མོར་སྙན།།
འུག་པ་འཇོལ་མོའི་འཚོ་སྟངས་མི་འདྲ་བ།།
རྣམ་སྨིན་ལས་ཀྱི་འབྲས་བུ་ཡིན་པར་ངེས།།


གནག་སྣུམ་དབུ་སྐྲ་བ་མོས་མཐུག་པོར་གཡོག།།
གཞོན་ཤའི་བཞིན་རས་ཤུར་ཁའི་རི་མོས་ཁེངས།།
དྲོང་དྲོང་སྐུ་ལུས་དུས་ཀྱི་གཤིན་པོས་དཀུག།།
དྲིན་ཆེན་ཡབ་ཡུམ་འདི་ལྟར་རྒས་ནས་འདུག།།

ཕྱི་རུ་ཟང་ཟིང་རྒྱུ་ནོར་རི་མོས་ཁེངས།།
ནང་གི་གཟུངས་བཞུགས་ཤེས་བྱ་སྟོང་སེ་སྟོང་།།
ཕྱི་རྫིག་ནང་སྟོང་སྐྱིད་ལ་རེ་བ་འདི།།
གསེར་བུམ་སྟོང་པར་ཟད་པའི་སྔ་ལྟས་ཡིན།།

ལས་མེད་ཆོས་ཡོང་སྙམ་ནས་ཆོས་བཞུགས་དང་།།
ཆོས་མེད་འཇིག་རྟེན་སྐྱིད་སྙམ་སྡོམ་ཤོར་གཉིས།།
འདྲེན་བྱེད་ཟུང་དུ་ཐ་དད་སྣང་ན་ཡང་།།
དོན་དུ་གཉིས་ཀར་ཐར་པ་མེད་མཉམ་ཡིན།།

སྐྱབས་མིན་སྐྱབས་གནས་མིག་ཆུ་འཁོར་བཞིན་བརྟེན།།
དད་མིན་དད་ཕྱག་ཅལ་འདྲོགས་ཚུལ་དུ་འཚལ།།
ཆོས་མིན་ཆོས་ཀྱིས་ཐར་པ་ཐོབ་ལ་རེ།།
དེ་འདྲ་ཤཀྱའི་དབང་པོས་གསུངས་པ་མེད།།

ལས་མེད་སློང་ལངས་ཤོར་བའི་སློང་མོ་བ།།
ལྷ་སའི་ཁྲོམ་སྲང་གང་སར་འཁྱམ་ཞིང་མྱུལ།།
རེ་བའི་དམིགས་ཐག་ཆད་པའི་རྒྱབ་འཁུར་བུ།།
གཉིད་ཉལ་རྨི་ལམ་ནང་ན་ཧོབ་སད་བྱེད།།

གླིང་སྐོར་ཨ་མ་གྲངས་ཀའི་ཆེད་དུ་རྒྱུག།།
ཞབས་སྐོར་ཕོ་མོ་བརྩེ་དུང་གླེང་གྱིན་བསྐོར།།
ཆོས་མར་ཚོང་མཁན་དགེ་བར་སྐུལ་ཁུལ་ཙམ།།
ཆོས་ལྡན་ཞིང་དུ་ཆོས་མིན་བྱ་བ་མང་།།

ཡར་ཀླུང་གཙང་ཆབ་འཁུན་སྒྲའི་བཞུར་སྒྲ་སྒྲོགས།།
ཇོ་མོ་གླང་མ་ཚ་གདུང་རྔུལ་ཆུ་བཞུར།།
ཆུ་ཕྲན་ཀུ་ཅོ་བྱེ་མའི་ཐང་རུ་ཡལ།།
ས་གཞི་གོ་ལར་ཚ་བའི་ནད་ཡམས་ལྕི།།

སྒྱིད་ལུགས་ཕག་པ་ཟས་ཀྱི་དོན་དུ་རྒྱུག།།
ཡར་ཐོན་དེ་ཕོས་ཐོ་རངས་ནམ་ལངས་ཤེས།།
འདོགས་ཁྱི་ངར་པོས་བདག་པོར་མཇུག་མ་ཧྲིལ།།
དེ་འདྲའི་དུད་འགྲོ་མགོ་ནག་མིའམ་སྙམ།།

བསང་གི་དུ་བ་རི་བོའི་སྤོ་ནས་འཕྱུར།།
རླུང་རྟའི་དར་ཚོན་རི་བོའི་རྩེ་ནས་གཡོ།།
ཀྭི་ཀྭི་བསོ་བསོ་ནམ་མཁའི་དབྱིངས་སུ་གྲགས།།
ཆོས་ཀྱི་སྙིང་པོ་བྱང་སེམས་རུས་སྦལ་སྤུ།།

གནག་སྣུམ་སྐྲ་ལོ་སྤྲེལ་གྱི་སྤུ་ལ་འགྲན།།
མཛེས་པའི་བཞིན་རས་རྫས་འགྱུར་ཚོས་ཀྱིས་བཏུམས།།
ངག་གི་སྐད་ཆར་ཕུང་གསུམ་ཐ་སྙད་མང་།།
དེ་འདྲའི་གཞོན་ནུ་གདོན་འདྲེའི་ཁྱུར་ཡང་མིན།།

རྣར་སྙན་བསྟོད་ར་གཅིག་གིས་ཁེངས་པ་སྐྱེས།།
ཤ་ཚའི་སྨད་ར་གཅིག་གིས་དཔའ་ཞུམ་གྱུར།།
རྣར་སྙན་ཤ་ཚའི་དགེ་སྐྱོན་མི་ཤེས་པའི་།།
དེང་དུས་གཞོན་ནུ་གྲོགས་མའི་ཚོགས་ལས་མང་།།

ལྦུ་ཆང་ཉོ་དུས་འཇུངས་པའི་གཡའ་དང་བྲལ།།
སྐྱུག་པ་སྐྱུགས་སྐྱུགས་བར་དུ་འཐུང་དགོས་ཟེར།།
ནད་མནར་སྨན་བཅོས་སྨན་རིན་མཐོ་སོང་ཞེས།།
སེར་སྣ་བྱེད་ལུགས་མི་ཤེས་གླེན་པ་ཁྱུ།།

གང་ལྟར་ཅི་བྱས་ལས་ཀྱི་འབྲས་བུར་འགྱུར།།
ལས་ཀྱི་བདག་པོ་རང་ཉིད་ཁོ་ན་ཡིན།།
རྒྱུ་མེད་རྐྱེན་མེད་བདེ་དང་སྡུག་བསྔལ་མེད།།
བདེ་སྡུག་ལས་ལས་བྱུང་བས་རིག་པ་འགྲིམས།།


ནོར་དག་གསོག་པ་བདེ་བའི་ཆེད་དུ་ཡིན།།
ཆོག་ཤེས་མེད་པར་སྡུག་བསྔལ་མྱོང་ན་ནི།།
བདེ་བའི་ཆེད་དུ་རྒྱུ་ནོར་གསོག་པ་ཡང་།།
སྙིང་པོ་མེད་པའི་ལོ་གསུམ་བྱིས་པའི་རྩེད།།

ཆུ་སློག་ས་ཡོམ་ནད་ཡམས་འཆི་རྐྱེན་མང་།།
འཚོ་རྐྱེན་གཅིག་པུའི་ཟས་ཀྱང་རྫས་འགྱུར་འབག།།
རང་བཞིན་རྒས་ནས་ཤི་བ་རེ་རེའི་དུས།།
ཐ་མལ་ནད་མེད་གནས་གྱུར་དང་དོད་གྱིས།།

ཆུ་འདི་ཚེ་སྲོག་ཀུན་གྱི་རྩ་བ་ཡིན།།
འཐུང་ཆུ་དྭངས་གཙང་གནས་པ་དོན་པོ་ཡིན།།
སྔོན་བྱོན་བྷོ་ཊའི་ཡུལ་གྱི་མཁས་པ་ཚོས།།
ཆུ་ཡིས་ཕན་གནོད་སྨན་དུག་མིན་ཞེས་ཟེར།།

གནམ་སྔོན་སྤྲིན་དཀར་རྒྱུ་བ་བོད་ཀྱི་ཡུལ།།
གཏེར་ཆུ་རང་དགར་བཞུར་བ་བོད་ཀྱི་ཡུལ།།
མཁའ་དབུགས་དྭངས་གཙང་གནས་པ་བོད་ཀྱི་ཡུལ།།
བོད་ཡུལ་གཏན་དུ་འདི་ལྟར་གནས་པར་ཤོག།།
ཤོ་ཤར་ཚེ་རིང་རྒྱལ་པོས་་་་་་་༢༠༡༣ལོའི་ཟྮལ་བ་༤པར་ལྷ་སར་མགྲོན་ཁང་ཞིག་ཏུ་སུག་བྲི་བྱས།
 

རྩོམ་ཁུངས། ངེད་དྲ་བ།