བརྩེ་བ་གྱེར་བའི་གླུ
མི་སེམས་ཤོག་དཀར་མེ་ལོང་ངོས་ལ།།
བརྩེ་བའི་རི་མོ་སྔོན་ནས་བྲིས་པ།།
སུས་ཀྱང་ཀློག་འགྲེལ་བྱེད་ཐབས་བྲལ་བའི།།
སྙན་ངག་ཅིག་གི་དོ་ཟླ་མིན་འགྲོ།
འདྲིས་ཤིང་འགྲོགས་པའི་ལོ་དང་ཟླ་བ།།
དུས་ཀྱི་རླུང་བུས་ཕར་ལ་བདས་ཀྱང་།།
ད་ལྟ་དྲན་པའི་གཞུ་ལ་འགུག་དུས།།
གདུང་བའི་མདའ་མོ་སྙིང་ལ་ཟུག་འགྲོ།
ཁྱོད་དང་ང་གཉིས་འཕྲད་པའི་ས་སྲོད།།
ང་ཡི་བློ་ལ་གློག་བརྙན་ཤར་འདྲ།།
ང་ཡི་ཚིག་དག་ཁྱོད་ཀྱི་རྣ་བར།།
གཞས་དང་མཚུངས་ཞེས་ཁྱོད་ཀྱང་ཟེར་བྱུང་།།
གཞོན་པའི་བློ་བྲིད་ཡིན་ནམ་ཅི་ཞིག།
སྙིང་ཐུབ་སྙིང་གི་ཚི་ལུ་འདྲ་བོར།།
བརྩེ་སེམས་ཆུ་ལ་འོ་མ་བཞིན་དུ།།
ཐུན་གཅིག་རྨི་ལམ་འདྲ་ཞིག་མིན་ཤོག།
བར་ཐག་རི་དང་གཙང་བོས་བཅད་ཀྱང་།།
སེམས་པས་ཁྱོད་ལ་ཡང་སྐོར་བསྐྱར་སྐོར།།
མི་འདོད་རྐྱེན་ངན་སད་དང་སེར་བས།།
བརྩེ་བའི་འདབ་མ་རྙིད་ཐབས་མི་འདུག།
བརྩེ་བའི་ལྷ་ཆེན་སེམས་ཤིག་ཡོད་ན།།
བརྩེ་བ་གྱེར་བའི་གླུ་གཞས་གཉོམ་པོར།།
བརྩེ་བའི་དབྱངས་ཀྱིས་རམ་འདེགས་མཛད་ནས།།
བརྩེ་ལྡན་གང་གི་སྙན་དུ་སྒྲོན་རོགས།།
རྩོམ་ཁུངས། ངེད་དྲ་བ།