༄།ད་ནི་ཡོད་ཚད་ལྷང་ལ་བུད་བཞག་ཐལ།
                      
----འདྲ་པར་ཞིག་མཐོང་བའི་མྱོང་སྣང་།

  གཅན་གཟན་གཟིག་གི་ལྤགས་པའི་རྔམ་ཟིལ་གྱིས།།
ཉམ་ཆུང་ཞིང་བའི་ལོ་ཏོག་ཅི་ཙམ་ཟོས།།
བརྩེ་ལྡན་གཡང་མོ་ལུག་གི་ཕྱི་ཚར་གྱིས།།
འགྲོ་རོགས་ལུག་ཆུང་གསོད་མཁས་ཨ་ཕོ་སྤྱང་།།

སྟག་མོ་ལྦ་ལ་བརྫིས་པའི་ཆོ་འཕྲུལ་གཅིག།
ལྦ་མོ་སྟག་ལ་བརྫིས་པའི་འཇིགས་པ་གཉིས།།
རང་རང་དོན་གྱི་ཁེ་ཕན་ཉི་ཚེ་དེ།།
ཅི་ཙམ་བསྒྲུབ་པ་རང་བློ་རང་ལ་གསལ།།

ཕྱི་ཚུལ་སྟོན་པའི་ན་བཟའ་གྱོན་པ་དེས།།
རང་ཅག་བཙུན་པར་མ་ཉེས་ཁ་གཡོག་བྱས།།
དོན་དམ་སྟོན་པའི་དཀོར་གཟན་བཞེས་བཞིན་དུ།།
རང་ཅག་བསྟན་པའི་བླ་རྐང་ཅི་ཙམ་བཙོང་།།

བལྟས་བལྟས་མིག་ལ་ཡག་པའི་ཁ་ཟས་དེ།།
དོན་ལྔ་སྣོད་དྲུག་རྫོད་པའི་དུག་ངན་ཏེ།།
དལ་འབྱོར་མི་ལུས་བརླག་པའི་གཏེ་བོ་གང་།།
དུག་འདིའི་དུག་ངོ་ཟིན་པར་མ་འགོར་ཅིག།

ཁ་ན་རྒྱུ་འབྲས་ཚངས་པའི་ཐིག་ཅིག་ཡོད།།
དོན་ལ་གཡོ་སྒྱུ་མུན་པའི་ཚང་ཞིག་ཡོད།།
ཕྱི་ནང་ཁ་དོན་འགལ་བའི་མི་དཔོན་ཚོ།།
བདེན་མཐའི་སྐྱ་རེངས་གསལ་བར་མི་འཇིགས་སམ།།

གདོང་ན་མི་མངོན་སྒྲིབ་ཤེལ་གྱོན་ན་ཡང་།།
སྙིང་གི་འདོད་རྔམ་འཕར་སྒྲ་གོ་ནས་བྱུང་།།
ཕྱི་ཚུལ་གསེར་གྱིས་བཏུམས་པའི་འབག་སྐུ་དེར།།
དད་པའི་ལྷ་ཕྱག་འཚལ་མཁན་མེད་དོ་ལོ།།

འདི་ན་བསྟོད་པའི་མེ་ཏོག་ལྷུག་པོར་གྲོལ།།
གན་ན་སྨད་པའི་མཆིལ་ཞག་སྣོད་དུ་བཀང་།།
མངོན་ལྐོག་དགྲ་རུ་ལངས་པའི་ཁྲམ་པ་ཁྱོད།།
འཕོང་ཚོས་ལྷང་ལ་བུད་པར་མི་ཁྲེལ་ལམ།།


ད་ནི་ཀུན་གྱི་བློ་མིག་རྒྱས་ནས་ཐལ།།
ད་ནི་ཡོད་ཚད་ལྷང་ལ་བུད་བཞག་ཐལ།།
མ་ཤེས་མ་རྟོགས་འདོད་པའི་རང་རྩིས་ཅན།།
མགོ་བོ་བསྲིང་ནས་ཕྱོགས་སུ་བལྟ་རན་རེད།

གཞན་གྱི་ཕྱི་གོས་གཙང་མ་མ་རྫོད་ཅིག།
ངེད་ཚོའི་མཚན་སྙན་གཙང་མ་མ་བརླག་ལགས།།
ཕྱི་ནང་འགལ་ན་དུང་དཀར་ཁོག་པ་ཡིན།།
རང་ཚུགས་མ་ཤོར་གཞན་སེམས་ཅི་ལ་དཀྲུགས།།

      (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།