སྒྲ་དབྱངས་ལྷ་མོ།
རྒྱལ་ཀུན་གསང་གསུམ་ཤེལ་དཀར་ཟེཊ་མའི་རྡུལ།།
རབ་མཛེས་ཆུ་སྐྱེས་ལྟེ་བར་སྤུངས་པ་དངོས།།
ལྟ་བའི་མི་ངོམས་མཚན་དཔེའི་ལང་ཚོ་མ།།
སྒྲ་དབྱངས་ལྷ་མོ་ཞེས་བྱས་གྲགས་པ་འབར།།
སྟོན་ཟླ་སྟོང་གི་གཟི་བྱིན་ཡང་།།
སྒེག་མོའི་སྐུ་ཡི་སྐྱེངས་པར་བྱས།།
དཀར་འཇམ་མཉེན་པའི་ཕྱག་ཟུང་གིས།།
བཻཌཱུར་རྒྱུད་མང་སྦྲེང་ལ་བྲེལ།།
ཆུ་གཏེར་འབུམ་གྱི་རླབས་ཕྲེང་ལས།།
འཁྲུངས་པའི་ཡིད་འོང་པད་མའི་བཞིན།།
མཐོང་ཚེ་སྤྱན་རིས་བུང་བ་ཟུང་།།
ཆགས་པས་དལ་མེད་གཡོ་ལ་བརྩོན།།
དྲི་ཞིམ་རལ་བའི་དོ་ཀེར་ལ།།
མཁའ་ཡི་མཛེས་བྱེད་རྒྱན་དུ་ཤར།།
རང་བཞིན་མཛེས་པའི་ལང་ཚོ་ལས།།
རིན་ཆེན་རྒྱན་ཡང་ཞེན་བྲལ་བྱས།།
སྙན་འཇེབས་ངག་གི་ལུས་ཕྲ་མར།།
རབ་འབྱམས་དབྱངས་ཀྱི་གཞོན་ནུས་འཁྱུད།།
སྟོང་ཕྲག་གྱ་བཞིའི་བརྩེ་དུང་གཏམས།།
ཏཾ་བུ་ར་ཡི་རྒྱུད་དང་བསྡེབས།།
བིམ་པ་ལྟར་དམར་མཆུ་སྒྲོས་ལས།།
འཕོས་བའི་བསུང་ཞིམ་བཟང་བོའི་དྲིར།།
ཧི་མ་ལ་ཡི་མཁའ་རླུང་གིས།།
འགྲན་པར་མ་བཟོད་དར་གྱི་ལུས།།
ཉིད་སྐུ་མཛེས་པའི་ལང་ཚོ་ལ།།
དྲེགས་ལྡན་ལྷ་དབང་བདེ་འབྱུང་གིས།།
བསྒྲིམས་ཏེ་བལྟས་ཀྱང་མ་ངོམས་ནས།།
འདྲེན་བྱེད་སྟོང་ཕྲག་བགྲད་དེ་གཟིགས།།
ལྟ་ན་སྡུག་པའི་སྨིན་ལེགས་སྐུར།།
སྣ་ཚོགས་རྒྱན་གྱིས་སྤུད་པ་ནི།།
ཆུ་ཤེལ་དྭངས་མའི་ས་འཛིན་ལ།།
རྒྱུ་སྐར་དོ་ཤལ་གཡོ་བ་བཞིན།།
ཇི་ལྟར་སྙུག་ཕྲན་གཞོན་ནུ་རྣམས།།
རླུང་གིས་དལ་བུར་གཡོ་བ་བཞིན།།
མཉེན་ལྕུག་ཕྲ་བའི་ཡིད་འཕྲོག་སྐུ།།
བརྒྱད་གཉིས་འཇོ་སྒེག་ལང་ཚོས་འགྱིང་།།
ཡིད་འཛིན་སྙན་གྱི་བུ་ག་ཡི།།
རིན་ཆེན་དང་བོའི་རྣ་ཆའི་འོད།།
ཀུན་གསལ་ཁྱོན་ཀུན་བཀང་བ་ན།།
ཉི་ཟླའི་འོད་ཀྱང་དེར་བཏགས་ཙམ།།
ལེགས་བརྗོད་མ་དང་རི་སྐྱེས་སོགས།།
འཆི་མེད་ལུས་ཕྲ་སྟོང་གི་མཛེས།།
ཁྱོད་དྲུང་ནམ་མཁའི་ནོར་བུ་ཡི།།
གམ་ན་མེ་ཁྱེར་བརྟུལ་ཞུགས་བཞིན།།
དེ་ལྟར་དཔག་མེད་ལེགས་བྱས་གཏེར།།
མཐའ་དག་བརྗོད་པའི་དངོས་པོ་ནི།།
ཀུན་གསལ་ཡངས་པའི་པད་མོ་བཞིན།།
དེས་ཕྱིར་དེ་ལས་ངལ་མ་བྱས།།
བདག་མགྲིན་ཟབ་ཡངས་ཆུ་གཏེར་ལས།།
འཁྲུངས་པའི་བསྟོད་ཚིག་བཅུ་དྲུག་ཆ།།
དད་པའི་ཡིད་མཁར་འཆར་བ་དངོས།།
ཚངས་སྲས་དགྱེས་པའི་གཟིགས་མོ་ཉིད།།
འོན་ཀྱང་གསང་གསུམ་དཔག་ཡས་མཛོད།།
རིང་དུ་བཀར་མོད་དེ་ལྟ་ནའང་།།
ལྷ་ཁྱོད་དགེ་ལེགས་དཔལ་གྱི་མཛོད།།
ཆ་ཙམ་བྱིན་པའི་མཐུ་ལས་སོ།།
དགེ་འདིས་བདག་མགྲིན་པད་མའི་ལྟོར།།
དབྱངས་ཅན་ངག་གི་ཉི་གཞོན་འཁྱུད།།
འཆད་རྩོད་རྩོམ་པའི་འདབ་སྟོང་གིས།།
རྒྱལ་བསྟན་སྐྱེད་ཚལ་མཛེས་གྱུར་ཅིག།
(མཆོད་མེའི་པར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།