ཐལ་དཀར་མཆེ་བ་བསླངས་འདྲའི་མཛེས་སྡུག་གི་ལྷུན་པོ། །
འགྱུར་བག་ངེས་མེད་སྒྱུར་བ་སྤྲིན་དཀར་གྱི་སྟོད་གཡོགས། །
རྩྭ་ལྗང་སྤུ་ལོང་གཡོ་བའི་ནེའུ་གསིང་གི་སྤང་ཐང༌། །
མགོ་ལྕོག་ཤིག་ཤིག་ལྡེམ་པ་མེ་ཏོག་གི་སྐྲ་ལོ། །
ཡིད་འོང་ཉམས་སུ་དགའ་བའི་ན་སྤང་གི་མཚམས་ན། །
ཏིང་འཛིན་འབྱམས་སུ་ཀླས་པ་སྒོམ་ཆེན་གྱི་ནེ་ལེ། །
མནོག་ཆུང་ཨབ་ཤར་དམིགས་པའི་བསམ་གཏན་དེ་ཐོངས་དང༌། །
འུ་ཅག་རང་ལ་ཕན་པའི་བགྲོ་གླེང་ཞིག་བྱའོ། །
རང་ཞེན་བག་ཆགས་མཐུག་པོའི་གདམས་ངག་གི་བུམ་ཆུར། །
བླང་དོར་དཔྱད་འཇོག་མེད་པའི་རྔམ་འཐུང་གིས་འགྲེངས་པས། །
རླུང་སྤྲིན་ངེས་མེད་འཐབ་པའི་བགྲོད་རིམ་དེར་སླེབས་ཚེ། །
མགོ་འཁོར་ཞེན་པ་ལྡོག་པའི་ངེས་འབྱུང་ཞིག་འཁྲུངས་སམ། །
མ་དག་རིང་ནས་གོམས་པའི་ལྟ་བ་ཡི་བུ་ཆུང༌། །
ཨ་འཐས་དྲན་པ་གྱོང་པོས་རྩེ་གཅིག་ཏུ་བསྐྱངས་པས། །
ཁ་སྤུ་ཟིང་ཟིང་གཡོ་བའི་དྲེད་པོ་ཁོ་མ་གཏོགས། །
སྣང་སྲིད་གཞན་ལ་རྒྱུ་བའི་ཤེས་པ་དེ་འགགས་སམ། །
ཕལ་བའི་རྣམ་རྟོག་འགགས་པས་བྱ་གྲལ་ནས་ཐལ་ཞིང༌། །
ལྷག་པའི་རྟོག་པ་མ་སྐྱེས་ལྷ་གྲལ་ཡང་མ་ཟིན། །
ལྷ་མིན་འདྲེ་མིན་ཕུང་བོ་གསུམ་པ་ཡི་གཟུགས་ཀྱིས། །
དུས་དྲུག་ཁོར་མོར་འདའ་བའི་ཁོམ་ལོང་དེ་སུས་བྱིན། །
ཐོབ་ཀྱང་དགའ་རིན་མི་འདུག་ཨབ་རོ་ཡི་ལོངས་སྤྱོད། །
ཤོར་ཀྱང་འགྱོད་རྒྱུ་ཅི་ཡོད་དེ་ག་ལས་མ་འདས། །
ཀྱེ་མ་ད་དུང་ཡིན་མདོག་རང་རློམ་གྱིས་ཆེ་བ། །
མིས་འཕྱ་རང་ཡང་ཁྲེལ་བའི་གཞི་མ་ལས་འདུག་གམ། །
དྲི་བཞོན་གྲོགས་སུ་རྩེན་པ་ཐང་དཀར་གྱི་རྒོད་པོ། །
གཤོག་འགྱུར་ཡངས་པའི་རླབས་ཀྱིས་ནམ་མཁའ་རུ་ལྡིང་སྟེ། །
བརྙས་བཞག་རྟུག་པའི་ཕུང་བོ་མགོ་བོ་རུ་གཏོར་ཚེ། །
ང་ཡང་འདབ་ཆགས་སྙམ་པའི་འདུ་ཤེས་ཤིག་མེད་དམ། །
ལུས་སྐྱེས་སྒྲོ་རྫོང་སྟུག་པོའི་རིན་གོང་ལ་རྔམ་ནས། །
ཞོ་འཐུང་རྒྱགས་པའི་འུར་རྡོ་མགོ་བོ་རུ་སྐོར་ཚེ། །
བྱ་ལམ་ཕ་མཐའ་བྲལ་བའི་སྤྲིན་དཀར་གྱི་གསེབ་ཏུ། །
སྐད་ཅིག་ཉིད་ལ་ལྡང་བའི་མངོན་བློ་ཞིག་འཆར་རམ། །
སྣ་ཚོགས་བྱ་ཆེན་དང་ནི་བྱ་ཕྲན་གྱི་ཚོགས་ཀུན། །
བམ་ཤ་གསར་བའི་ལོངས་ལ་ཅི་དགའ་རུ་རོལ་ཚེ། །
ལྟོ་བ་སྟེང་འོག་འགྱུ་འདྲའི་ཚོར་བ་དང་འགྲོགས་ཏེ། །
མགྲིན་པ་འགྲམ་ཆུས་བརྣང་བའི་སྲེད་ལེན་ཀྱང་མེད་དམ། །
ཡེ་ཤེས་སྤྱན་འདབ་འཛུམ་པ་རྣམ་སད་ཀྱི་བུ་དག །
ཁྱོད་ལ་ཁྲེལ་དགོད་དབྱར་རྔ་ཆེམ་ཆེམ་དུ་སྐུལ་ཀྱང༌། །
ད་དུང་ཨུ་པ་ཀརྣའི་སྒྲ་འཛིན་གྱི་མལ་དུ། །
བླུན་སྒོམ་བཙན་ས་འཛིན་པའི་ངང་ཚུལ་འདི་སྐྱོ་ཨང༌། །
ཀུན་འགྲོ་ལྔ་སོགས་སེམས་བྱུང་རྣམ་གཡེང་གི་བུ་ཆུང༌། །
འཇུར་བཅིང་བྲ་བ་རྒྱ་བོའི་ཁུང་ཕུགས་སུ་འཁུམས་པ། །
དབང་མེད་བཙན་གྱིས་སྦྱོར་བའི་བྱེད་པོ་ནི་མ་མཆིས། །
ཅུང་ཟད་ཡན་པར་བཏང་ན་བདེ་ཉམས་ཤིག་མེད་དམ། །
ཤ་སྐྱིབས་པགས་པའི་མལ་དུ་འདྲེན་བྱེད་གྱི་ཆུ་བུར། །
རྩ་རྒྱུས་ཐག་ཞགས་དམ་པོས་འཆིང་བ་དེ་ལྷོད་ལ། །
སྲིད་ཁམས་ཡངས་པའི་ཁྱོན་ལ་བག་ཡངས་སུ་ཕེབས་དང༌། །
དོན་ལྡན་གཤིས་ཀྱི་རི་མོ་མངོན་སུམ་དུ་མཇལ་འོང༌། །
གཤོག་དྲུག་རྩལ་ཁ་རྫོགས་པ་བྱ་རྒྱལ་གྱི་ཁྱུང་ཆེན། །
གནམ་སའི་དཀྱིལ་འཁོར་སྒྲིབ་པའི་ལུས་བོངས་ཀྱིས་དྲེགས་ཤིང༌། །
གཤོག་འཇུམས་སྟང་སྟབས་སྒྱུར་བའི་རྩལ་ལྡན་གྱི་གླག་མོ། །
གླ་ནག་སྦར་འཛིན་བྱེད་པའི་སྡེར་ཁྱིམ་དེ་འཇིགས་སམ། །
ཡིད་འོང་ཁུ་བྱུག་བུ་མོའི་ལོངས་སྤྱོད་ཀྱི་འཁོར་ལོ། །
རིག་བྱེད་དབྱངས་བདུན་རྫོགས་པའི་གླུ་སྙན་གྱིས་ཕྱུག་ཅིང༌། །
འཕྱོར་གཟུགས་ལྡེམ་ལྡེམ་སྐྱོད་པ་རྒྱ་བྱ་ཡི་སྒེག་མོ། །
མེ་ཏོག་གཞུ་ཅན་བསླུ་བའི་འཇོ་སྒེག་དེ་མཚར་རམ། །
མཐོ་རིས་འོད་ལྔ་བཀླུབས་པའི་མཛེས་སྡུག་གི་རྨ་བྱར། །
དུག་ཆེན་ཟས་སུ་སྤྱོད་པའི་གདམས་ངག་ཅིག་ཡོད་ལ། །
སྨྲ་མཁས་ལྕེ་དམར་སྐྱོད་པའི་ནེ་ཙོ་ཡི་ཚོགས་ལའང༌། །
ཕར་བཤད་ཚུར་ལ་སྐྱོར་བའི་ཁྱད་ཆོས་ཤིག་འདུག་གོ ། །
མང་མང་བགྲང་གིས་མི་ལང་བགྲང་དགོས་ཀྱང་མི་འདུག །
འདིས་མཚོན་མཁའ་ལམ་སྐྱོད་པ་གཉིས་སྐྱེས་ཀྱི་ཚོགས་འདིར། །
རང་རང་གཤིས་དང་བསྟུན་པའི་ངོ་མཚར་རེ་རྫོགས་ན། །
ཁྱོད་ལ་ཕ་ཡིས་སྐྱོན་ནམ་མ་མ་ཡིས་ལན་ནམ། །
རྩལ་དགུ་སྟོབས་སུ་དར་བ་བྱ་ཆེན་གྱི་ཚོགས་འདིར། །
བག་ཡངས་སྟང་སྟབས་སྒྱུར་བའི་བདེ་མྱུར་ཞིག་འདུག་ཀྱང༌། །
རང་རང་སྦྱོང་བའི་སྐབས་ཀྱི་དཀའ་སྤྱད་ཅིག་ཡོད་ཀྱི། །
མིན་ན་ཁྱོད་དང་གཉིས་སུ་མེད་པ་དེ་ཤེས་སམ། །
ཁྱོད་ལ་གདོས་སུ་ལྩི་བ་སྒྲོ་ཐུལ་གྱི་ལྭ་བ། །
ཕ་མེས་སྙིང་གི་གཅེས་ནོར་ལགས་པ་དེ་ཨེ་གོ ། །
མཆུ་རྣོན་སྡེར་ཁྱིམ་གཡོ་བ་ལྷན་སྐྱེས་ཀྱི་ཆོས་འདི། །
ད་དུང་གཞན་ལ་བཀོལ་ཀྱང་ཆོག་པ་དེ་ཨེ་ཤེས། །
དུས་ཀྱི་འཕོ་འགྱུར་གར་མཁན་རྐང་སྟབས་བཞིན་སྒྱུར་ཞིང༌། །
ཅོ་འདྲིའི་འཇིགས་པ་བདུད་པོའི་མདུང་རང་བཞིན་གཟེངས་ཚེ། །
ད་དུང་ཅེ་རེར་གཟིགས་པའི་དུས་སྐབས་དེ་མ་ཡིན། །
གོ་ན་ཁྱོད་ཀྱང་རྩལ་དགུ་ལྷག་མེད་དུ་སྤྲུགས་ཤོག །
རྣམ་གཡེང་རླུང་བུ་དར་མའི་རྟ་ཕོ་རུ་ཞོན་ཏེ། །
སྲིད་པའི་གྲོང་སྒོ་ཉུལ་བ་ནམ་ཞིག་གི་ཚེ་ན། །
གློ་བུར་སྙིང་ཁམས་འཁྲུགས་ཏེ་དབང་མེད་ཀྱི་མགྲིན་ནས། །
ཚོད་མེད་བབ་ཅོལ་ཐལ་བས་དགོངས་པ་རང་མ་ཚོམས། །

རྩོམ་ཁུངས།